Sadilany Kubabal Chisu Udiany mu Mudimu wa Kulejan
1. Ov, mulong wak kubabal kudi kwa usey chisu tudia mu mudimu wa kulejan?
1 “Mudi amikoku mukach mwa atwingol,” atushalapol a Nzamb akat kulejan “mukach mwa in matung ni akayitil a chirung chinech.” (Mat. 10:16; Fil. 2:15) Marapor mayimp ma njit ya chisivil, chisak cha in chisum, ni kujipan kwa usu yom yiney yisadikining kwawonsu, uman wa antu ayimp uyil kurutu “nakash mu kuyip.” (2 Tim. 3:13) Ov, yany ik ya Bibil yitukutwisha kusadin chakwel twikala ‘ababela’ mu mudimu wa kulejan?—Mat. 10:16.
2. Ov, mikadil ik yifanyidina kushinshikin kurutu kwa chisu mulong wa kudiokal mu teritwar ni kulejan mwi ndond yikwau?
2 Kusal Nich Manangu: Jinswir 22:3 ukasikeshin chitongijok chakusal nich manangu mulong wa ‘kwijindjik ayinetu’ ku milong yikash. Kushal adimukina! Mwikadil wa yisu yawonsu wa kulam ndond yiushicha ukutwish waswimp kwa kukashimuk. Ukutwish waman mudimu wa ampurish uyil ni kujimb ap chisak cha ampurish chisadin mu mikombil. Yisu yimwing mwin chikumbu ukweta muchim uwamp ukez kupan dibabesh. Pa ndond pa kulabijok, chikwikal cha manangu kudiokal swa ni kuya kwindond yikwau.—Jinsw. 17:14; Yoh. 8:59; 1 Tes. 4:11.
3. Ov, chany chidia mu Mulej 4:9 mutapu ik chidia cha kusadil mu mudimu wetu wa kulejan?
3 Kusal Pamwing: Mulej 4:9 ulondin anch: “Antu aad asadila mudimu pamwing amupandakenamu muntu umwing.” Pamwing ap ukweting chaku chakusal mudimu wa kulejan amwiney, ov, chiwapining kusal mwau? Mu yisu yimwing, chiwapining kusal mwau. Pakwez mu yisu yikwau, chiwapiningap nambaz ap mwan nsand kusal mudimu wa kulejan wa ku chis ni chis, pakampwil kupwa kwa muten kwandam. Chikalap nchik usu wetu uwamp utusadila mulong wa kwipuk mikadil yiyimp, uman wamekeshin kal anch ukwash wa muntu mukwau uding wa usey. (Mul. 4:10, 12) Dandamen mu kuyibabeshang yidi yikwau yidia mu chisak chey. Itekina chaku cha kuyijikishang in kulejan akwau kurutu kwa kudiokal mu teritwar.
4. Ov, mutapu ik tukutwisha kusal chakwel tuyikinga antu awonsu adia mu chikumangen?
4 Amakurump akwet chisend cha kupan umutakel wa kusadin kwambatan nich mashakamin ma pol pen, padiau in ‘kulam mipim yetu.’ (Heb. 13:17) Yehova ukutuyukish anch twamekesh mwikadil wa in Kristu wa kwikepish ni kusal nakash pamwing nau. (Mike 6:8; 1 Kor. 10:12) Atushalapol awonsu a Nzamb akutwish kukwash kupan uman nich chibudikin chiwamp mu teritwar wetu, chikwau kand mu kudandamen nich kubabal.