Lamany Kom Ken

1. Ov, wisu mutu wa mulong wa program wa chitentam cha pakampwil cha dichuku dimwing cha muvu wa mudimu wa 2013, ni program winou ukwet rutong ik?

¹ Dichuku ni dichuku, turishining nich mikadil yikata kusal usu wa kuyipish kom ketu. Chawiy lel, program wa chitentam cha pakampwil cha dichuku dimwing cha muvu wa 2013, chikusambish pa Mwinses 1, 2012, ukwet mutu wa mulong ulondina anch: ‘Lamany Kom Ken.’ (1 Tim. 1:19) Atenchikin program winou mulong wa kukwash muntu ni muntu pakach petu kushinshikin mutapu tusadidininga kom kinak kadia chipan chimwing cha pakampwil chidiokila kudi Sakatang wetu.

2. Ov, yipul ik ya usey yikezau kwakul ku program winou?

² Shinshikinany pa Manans Minam: Program winou ukez kwakul ku yipul sambwad ya pakampwil yitadina kom:

• Ov,chom ik chikutwisha kutek kom mu ubaj?

• Ov, mutapu ik tukutwisha kwijidish kom ketu?

• Ov, mutapu ik chitwishikina kwitokish nich mash ma antu awonsu?

• Ov, mutapu ik yitongijok ni yisal yetu yengamidina pa yany ya Bibil yikumekesha mutapu tudia?

• Ov, mutapu ik tukutwisha kwipuk kuyipwakesh antu akwau pa mulong utadina kom?

• Ansand, ov, mutapu ik ukutwishanya kwimanany daang nich yipwichikin yikutekinanya mu chak?

• Ov, yiyukish ik yitambwilingau antu alondwilinga umutakel wa kom kau?

3. Ov, mutapu ik program winou ukutwish kutukwash?

³ Nich ukwash wa Yehova tukutwish kujijaman ku yipwichikin yisadiningay Satan mulong wa kuyipish kom ketu. Kusutil ku Dizu dia Nzamb ni ku dirijek diend, Tatukwetu wa rukat wa mwiur utulejin anch: “Njil ya kuya yawiy ey. Yangany mwinimwa.” (Isay 30:21) Program winou udi mutapu umwing upaniningay Yehova umutakel. Chawiy lel, irijekany mulong wa kukumangan ku program mwawonsu wa kabuj. Chidi cha usey kuta matu, ni kushinshikin mutapu ukutwisha kusadil jinsangu ja pakampwil panrey. Isambinany mu dijuku program winou. Anch twasadin umutakel tutambwiling kukez kutukasikesh tudandamena “kulam kom kadia zwang” ni kukez kutukwash kwipuk kusangar maku ma kusot mapit ma kumujimbu ma chisu chikemp madia mu mangand ma Satan.—1 Pita 3:16.