Pa Chisu cha Chivurikish, Ov, Ukez Kwimburij Mushiku wa Yehova ni wa Yesu?

1. Ov, usu wa mutapu ik wa pakampwil usadiningau Atuman a Yehova pa chisu cha Chivurikish?

¹ Yehova uwanyishining rutong rend nich mushiku. Pisambidinay pa yiyukish yimwing ya Want wa Nzamb, Isay 9:7 walonda anch: “Mushiku wa [Yehova] ukez kasal chom chinech.” Chilik chimwing kand, chisu chasalay mudimu wend wa kulejan panap pansh, Mwan wa Nzamb wamekesha mushiku ujim mulong wa difukwil diakin. (Yoh. 2:13-17; 4:34) Muvu ni muvu pa chisu cha Chivurikish, mamiliyon ma in kulejan adia pa mangand mawonsu asadining usu wa pakampwil wa kwimburij mushiku wa Yehova ni wa Yesu kusutil ku kujimbish mudimu wau wa kulejan. Ov, ukez kwikal pakach pau?

2. Ov, mushiku ukez kutubachik tusala ik pa ngond wa Rish 7?

² Kampany wa Chivurikish: Kampany wa muvu winou wa kwijikish Chivurikish ukez kusambish Diampos pa Rish 7. Irijekany katat chakwel wipanany nich mushiku mu mudimu wa kulejan. Yikumangen yikez kwipan nakash mu mudimu wa kulejan chakwel yiwanyisha teritwar wau anch chitwishikin. Salany amboku usu wen wawonsu chakwel uyitazukany antu wilejininganya nau Bibil, antu twachirikina, ambay netu a mudimu, anamakwetu ni arund a shikol kusutil ku kuyinkish kapamp kamwing diladikij ap kusutil ku kusadil jw.org.

3. Ov, mutapu ik tukutwisha kujimbish mudimu wetu wa kulejan pa Rish ni pa Ndol?

³ Mudimu wa Uchibol Nkwash: Kwikal in mushiku kukutubachik kand tujimbisha mudimu wetu wa kulejan. Chakin kamu in kulejan avud akez kutwish kusal mudimu wa uchibol nkwash pa Rish ni pa Ndol, mulong tukez kwikal nich want ipau wa kutond kuwanyish asaa 30 itinau. Pa chisu chikwau cha difukwil diey mu dijuku, ov, mulong wak ukutwishap kwisambin mutapu chid ni chid cha dijuku chikutwisha kwipan nakash mu mudimu wa kulejan? (Jinsw. 15:22) Mushiku ubachikininga, chawiy lel yileja in kulejan akwau a mu chikumangen yom utongidina kusal. Anch watenchik yitenchik ya pakampwil mulong wa kusal nakash, ukez kwimburij mushiku wa Yesu.​—Mar. 6:31-34.

4. Ov, chom ik tukeza kuwanyish anch twimburij mushiku wa Yehova ni wa Yesu?

⁴ Kwimburij kwetu mushiku wa Yehova ni wa Yesu pa chisu cha Chivurikish kukez kutuletin yiyukish yivud. Antu avud adia mu teritwar akez kutambul uman. Tukez kutan musangar ujim udiokila mu kumusadil Yehova ni antu akwau. (Mid. 20:35) Cha usey nakash, tukez kuyisangaresh in mushiku etu Nzamb ni Mwanend.