Mutapu wa Kusadil​—Mazu ma Kutesh Makwatau

1. Kuwejaku ku yom yafundau, yom ik ya usey tutambwilinga?

¹ Antu avud asangaredining kusadil kapend ka jw.org mulong wa kutang mazu masangareshina ni ma uyakin. (Mul. 12:10) Pakwez, wateshap kal mazu makwatau? Mazu minam matukwashining kutesh yom yivud yatekau pa kapend ketu ka web. Mutapu ik utukwashininga mazu makwatau?

2. Mulong wak tukutwish kusadil mazu makwatau mulong wa kwilej kwetu ayinetu ap mulong wa dilejan dia mu dijuku?

² Mulong wa Kwilej Ayinetu ni Dilejan dia Dijuku: Kutesh mazu makwatau ma mu Bibil, magazet, ap mikand mu weny ap mu midimu ya dichuku ni dichuku kukutwish kutukwash kusadil nawamp chisu chetu. (Efes. 5:15, 16) Tukutwish kuwapish difukwil dietu dia mu dijuku mu kutesh mazu makwatau mu kulondul mu mukand wafundau. Kusadil mazu makwatau mu dilejan dietu dia muntu ipend kudi kwa usey pakampwil anch tukatin kutang nawamp ap anch twilejin dizu kanang.

3. Nany ukutwisha kutaninamu mu teritwar wetu mu mazu makwatau?

³ Mu Mudimu wa Kulejan: Antu adia mu teritwar wetu amena anch kakwetap chisu cha kutang, akutwish kutesh mazu makwatau. Tukutwish kutan antu alondina dizu dindjing ni akutwish kusanger nakash anch atesh uruu wa Want mu “dizu dia kwol kwau.” (Mid. 2:6-8) Mu jindond jimwing, kutesh kuding kwa usey nakash mu chaku chau. Chilakej, antu amwing adinga mu chine atazukiningau anch a Hmong, akweting chaku cha kupan jisangu ja anvaj kudi anau ni akatining nakash kutesh yilejenau. Antu avud a mu Afrik akatining niyawiy kwilej yom kusutil ku jinsangu.

4. Yipul ik tukutwisha kwiyipul piur pa kuyikwash antu adia mu teritwar wetu?

⁴ Mu teritwar wey, ov ukutwish kutaninamu mu kumuteshish mwin chikumbu mazu makwatau mu dizu diend? Antu amwing akutwish kutaninamu mu mikand ya kutesh tutumina kusutil ku mesaj? Tukutwish kusend pa kapend mukand wakwatau ni kuutek pa CD mulong wa kuupan kudi mwin chikumbu usangaredina, pamwing ap ni mukand uchapinau pa mapaper? Buku, broshir, gazet, ap trakt mwawonsu wakwatau upaninau chiwapin kuyichind yawonsu pakach pa mikand tupanina mu kulejan. Mazu makutesh makwatau amasala mwamu chakwel tumatesha mu kwilej kwetu ayinetu ni mulong wa kudim mbut ja uyakin ja Want.​—1 Kor. 3:6.