Dandamen Kulembil Chakwel Utambula Dilau dia Nzamb

Nzamb wayinkisha antu chipan cha pakampwil—chidi chipan cha kwambamb nend ni chakumulej yovil yau kusutil ku malembil. Muprofet David walembila anch: ‘Mulong ey ukat kwakul kulembil kwetu. Antu awonsu akat kwez kudi ey.’ (Kuseng 65:2) Mutapu ik tufanyidina kulembil chakwel Nzamb atutesha ni atuyukisha?

LEMBIL YOM YIDIOKILA KU MUCHIM NICH KWITUDISH

Malembil mey makutwish kukukwash wanzurila muchim wey kurutu kwa Nzamb—chakwel umuleja yovil yey yakin. (Kuseng 62:8) Mwin Dikand Diawonsu ukatining kutesh malembil madiokila ku muchim.

SADIN DIJIN DIA NZAMB CHISU ULEMBILA

Ap anch Nzamb ukwet yijiken yivud, pakwez ukwet kusu dijin dimwing dia pakampwil. ‘Yam kusu Yehova Nzamb wen. Diawiy dijin diam.’ (Isay 42:8) Dijin dia Yehova adijimbwil tupamp 7000 mu Mifund Yitumbila. Chisu chamulembilau Nzamb, aprofet avud amutazukang pa dijin diend. Aburaham walonda anch: “A! [Yehova] amboku, . . . nchingela nilonda bil ney.” (Disambishil 18:30) Niyetu kand tufanyidin kusadin dijin dia Nzamb, Yehova, pitukata kulembil.

UKUTWISH KULEMBIL MU DIZU DIEY

Nzamb uteshining yitongijok ni yovil yetu chikalap nchik dizu tulondina. Dizu Diend ditwinkishin kashinsh anch: “Nzamb kakwetap kasolikany pakach pa antu, bwat. Ku michid yawonsu, muntu mwawonsu ukata kumulimish ni kusal yom yitentamina, Nzamb ukat kumwitiy.”—Midimu 10:34, 35.

Pakwez, chakwel Nzamb atuyukisha, tufanyidin kusal yom yivud kusutamu kwau ching kulembil. Mu mitu ya milong yilondwilaku ey, tukushinshikin yom tufanyidina kusal.