Chakusambish Sal Bil Chisambu ni Mukadivar Ney—Mutapu ik?

Tong bil mudi anch ushich mu Galalia pa chirungu cha Yesu. Uyil ku Yerusalem mulong wa kusal Musambu wa Ankunku. Musumb wizulang kal too nau in kwifukwil akwau adiokila ku jindond kushalijan ja kulemp. Katat ukimbin kupan yakupesh kudi Yehova. Chawiy wasambish kuya ni mpemb wey, ukat kusut mu jinjil ja musumb mudia antu avud mulong wa kuya ku tempel. Piwashika kal, watan kal tempel wizwil too nau antu akwau ezang niyau mulong wa kupan yakupesh. Kupwa, chisu chey chawanyin kal chad cha kupan mpemb wey kudi in kupesh. Pa chisu chinicha, wavurik kal anch mukadivar ney, ukutwisha kwikal ndond kanang mu yisak ya antu ap mu musumb, ukwet mulong niyeyey. Yesu warumburila yom yifanyidina kusal. (Tang Mateu 5:24.) Mutapu ik ukutwisha ey ni mukadivar ney warumbukinang kusal chisambu mudi mwalejanay Yesu? Mu malist madia kwinshin oku, tek chijingidij ku chakul chakin.

UFANYIDIN . . .

• kwambamb ni mukadivar ching anch utongin anch wading ukwet diyingishin diwamp dia kujiman

• kusal usu wa kuswimp yitongijok ya mukadivar ney anch utongin anch waswapalang kujiman ap kumulej mutapu ufilay nich mulong

• kumutesh mukadivar ney nich kuswimpish muchim palondinay, ni anch uteshinap nawamp yom yilondinay, mwita dilikishin diakin mulong wiyovang nayimp ap mulong wa yibudikin yiyimp ya yisal yey

MUKADIVAR NEY UFANYIDIN . . .

• kukimb ukwash wa antu akwau mu chikumangen mu kuyilej mutapu wakurumbukinangau kudi mukadivar ney

• kukufish nich, kushinshikin tuyom tukemp tukemp twa uyimp wasalang ni kukulej anch witiyina kurumbuk kwey

• kwijik kwikepish ni kutakaman kwasalangay mulong wa kwez kwambamb ney ni mulikishina ni muchim umwing

• Ap anch tukatap kupan yakupesh ya annam mu difukwil dietu nlel, yom ik yafundishay Yesu piur pa kwovijan kudia pakach pa chisambu ni mukadivar netu ni difukwil ditiyinau kudi Nzamb?