MWBR18.08 Mareferance mulong wa Mudimu ni Mashakamin ma in Kristu Mukand wa Chikamangan
NGOND WA 8 RUBING RA 6-12
YOM YA USEY YIDIA MU DIZU DIA NZAMB | LUKA 17-18
“Tumekeshany Muchim wa Kujikitish”
nwtsty yom ya kwilej yidia mu Lk 17:12, 14
antu dikum ayedila musong wa mak: Mu chisu chafundau Bibil, chimeken pamwing ap anch in musong wa mak ading kushakam pamwing mulong wa kukwashijan umwing ni mukwau. (2 Ant 7:3-5) Chijil cha Nzamb chalonda anch in musong wa mak afanyina kushakam kulemp ni antu ap kulemp ni ul. Mwin musong wa mak wafanyina kand kuyilejamu antu akwau akimba kusankanijan nend anch: “Nijondile! Am nijondile!” (Lev 13:45, 46) Chawiy komb, kukwatijan ni Chijil cha mu Bibil, in musong wa mak imanyina kulem ni Yesu.—Tal it-2-F paj 127.
yangany, ukimekeshany ayinen kudi in kupesh: Padingay panap pansh Yesu Kristu walimisha Chijil chamwinkishau Moses, chawiy chijikay nawamp wintakel wa in kupesh wading mu dijuku dia Aron; chawiy chamulejay muyej wa mak wokay chakwel aya akamulejamu mwin kupesh. (Mt 8:4; Mar 1:44) Kukwatijan ni Chijil chamwinkishau Moses, mwin kupesh ndiy wafanyina kushinshin chakwel ijika anch mwin musong wa mak wayerikang kal. Muyej wa musong wa mak wokau wafanyina kuya ku tempel nich chipan ap mulambu wa atujil aad aom ishitwila, kachikunku ka mutond mudi wa kanjidil, ni kadiswin kasuz nakash, ni chisalamb cha yifukis.—Lev 14:2-32.
w08-F 1/8 paj 14-15 par. 8-9
Mulong Wak Tufanyidin Kujikitish?
Ov, Yesu wadiurila kwend kuburen kwa antu akwau kumekesh kujikitish kwau? Rusangu ridandamedin anch: “Yesu wakul walond anch: Ov, kayokilingip dikum? Pakwez chidivu adi kwisu? Kikwadiap umwing watonga kwez kupan uyaj kudi Nzamb, ching kwend mwin mweny ou?”—Luka 17:17, 18.
In mayej ma mak akwau chidivu kadingap antu ayimp. Kwinsambishil, awonsu amekesha patok anch amwitiyijin Yesu ni adinga tayad kuziyil ku yany yend, mudi kuya ku Yerusalem mulong akimekesha ayinau kudiau in kupesh. Pakwez, ap anch ova pakad kwidjidjek yovil yikash piur pa chisal cha riy chayisadilau kudi Yesu, awiy akanganya kulond kujikitish kwau kudiay ndiy. Mwikadil wau winou wamwovisha Kristu ushon nakash. Ov, chidi nchik ku mutambu wetu? Anch muntu kanang watusadil yom yiwamp, ov, tuding tayad kumujikitish ni, pichifanyidina, kumulej anch tumujikitishin kusutil ku kumufundin ka dizu ka kumujikitish?
Kukimbijol Mapit ma mu Spiritu
nwtsty yom ya kwilej yidia mu Lk 17:10
amwamu: Mu kulond kwa patok “akad usey; akweta usey ukemp.” Yesu kakimbap kulond kukwatijan ni chishimu chinech anch atushalapol, in kwilejend afanyidin kwiman ayinau anch adi antu akad usey ap akweta usey ukemp. Kukwatijan ni yom yiney kulond anch “amwamu” kumekeshin anch atushalapol afanyidin kusal usu wa kwikal antu ikepishina, ap kafanyidinap kwiman anch akwet chisend cha pakampwil ap cha katumb. In kukimbijol amwing alondining anch dizu dined adisadina mu mutapu wa chifanikesh dirumburikina ‘tudi kwetu atushalapol amwamu ni tukwetap kwetu chisend cha pakampwil.’
nwtsty yom ya kwilej yidia mu Lk 18:8
ritiy: Ap “ritiy ra mutapu winou.” Mu kulond kwa patok dirumburikin “ritiy.” Dizu dia Grek disadidinau mulong wa kwisambin piur pa “ritiy” dimekeshin anch Yesu kisambinap piur pa ritiy rin rawonsu, pakwez ndiy wisambina piur pa mutapu wa ritiy kanang, mudi ritiy radingay nich mwadiamufu wa mu chishimu chisambinay. (Lk 18:1-8) Chinech chikutwish kurumburik kwikal ni ritiy mu usu wa malembil ni kwikal kand ni ritiy anch Nzamb ukulet kutentam mulong wa antwend atonday kal. Pamwing ap Yesu kakulap ku chipul chitadina ritiy chakwel in kwilejend atongina nakash piur pa ritiy rafanyinau kwikal nich. Chishimu chitadina piur pa ritiy ni malembil chading cha pakampwil mulong Yesu wading wisambidin piur pa yoziu yelau kurish nich in kwilejend.—Lk 17:22-37.
NGOND WA 8 RUBING RA 13-19
YOM YA USEY YIDIA MU DIZU DIA NZAMB | LUKA 19-20
“Ilejina ku Chishimu Cha Nfalang Dikum ja Mina”
Chishimu Cha Nfalang Dikum ja Mina
Ndiy walonda anch: “Kwading muntu umwing mujim wasota kuya kwi ngand ya kulemp chakwel akamudisha want, chad wading uchingejin anch, ukuchirik kand kwol kwend.” (Luka 19:12) Weny winou wading wa machuku mavud. Chimeken patok anch Yesu ndiy ‘muntu mujim’ waya “kwi ngand yakulemp,” mwiur, ndond yafanyinay Tatukwend kumudishin want.
Mu chishimu chinech, kurutu ‘muntu mujim’ aya mu weny, ndiy wayitazuka atushalapol dikum ni wayinkisha muntu ni muntu rufalang ra [mina] kupwa wayileja anch: “Isakany nich nfalang jinej djat ni pinikeza kuchirikin.” (Luka 19:13) Rufalang ra mina rawiy ramufutangau ndim wasalanga mudimu mu angond asatu ni kusut.
In kwilej ajingunina anch awiy ading mudi atushalapol inkinshau nfalang dikum jisambinau mu chishimu chinech, mulong Yesu wasambela kuyifanikesh ni in kwangul mbut. (Mateu 9:35-38) Chakin kamu, Yesu kayilejap in kwilejend kumuletin mbut ja mu yir. Pakwez, kwangul kwinoku kwa kuyilet in kwilej akwau chakwel ikal mu Want wa Nzamb. In kwilej asala usu wau wawonsu mulong wa kuyikwash antu akwau niyawiy ikala mu Want.
Chishimu Cha Nfalang Dikum ja Mina
Anch in kwilej ajingunina anch awiy ading mudi atushalapol asadina usu wau mulong wa kuyikadish antu in kwilej, awiy afanyina kwikal nich kashinsh anch Yesu ukez kusangar. Ni afanyina kwikal nich kashinsh anch akez kuyifut mulong wa mushiku wau. Chakin kamu, kadiap in kwilej awonsu a Yesu adinga ni mashakamin ma mutapu umwing ap ading ni chisu ap kand ukaliweny wa chilik chimwing. Pakwez, Yesu wadishau “want” wij nawamp ni ukuyiyukish in kwilej mulong wa kushinshaman kwau kwasalau mulong wa kuyikadish antu in kwilej.—Mateu 28:19, 20.
Chishimu Cha Nfalang Dikum ja Mina
Palikay kuvudish dipit dia mwant wend, kashalapol winou amutambula yom yawonsu yadingay nich. Atwimbuy ading achingedin chisu chikuyikelay Yesu mu Want wa Nzamb. Piur pa yom yalonday Yesu mulong wa kashalapol wa nsudien, in kwilej afanyina kutong anch, ang kasadinap usu kakwikalap nich ndond mu Want winou.
Kukimbijol Mapit ma mu Spiritu
nwtsty yom ya kwilej yidia mu Lk 19:43
rubumbu ra mitond: Ap “dipat.” Dizu dia Gek kharax didi kwau ching mu Mifund ya Grek ya in Kristu. Adikarumuna mudi “mbwambu ap mitond yijim mudi yikatau kutung nich diyind dia annam; “mudi kand “mitond yikatau kusadin mulong wa kutung nich rupang ra amasalay.” Mazu malonday Yesu mawanyina mu muvu wa 70 C.C. chisu chatungau chibeng ku rubumbu ranyingumuka musumb wa Yerusalem kudi in Rom atakelau kudiay mwant Titus. Chitongijok cha mwant Titus chading cha—kuyikangesh in Yuda chakwel kangal achina mu Yerusalem, chakwel itiya kwi mbil jau ni aziyina ku wintakel wau. Mulong wa kuwanyish yom ya kutung nich rubumbu riner ranyingumuku musumb wa Yerusalem, in Rom akatula mitond yawonsu yading piswimp ni musumb.
nwtsty yom ya kwilej yidia mu Lk 20:38
mulong kudi ndiy awonsu adi aom: Ap ‘awonsu adi akash ku mes mend.’ Bibil umekeshin patok anch antu awonsu adia aom pakwez adi kulemp ni Nzamb, antu inay adi mudi antu afila kal ku mes mend. (Ef 2:1; 1Tm 5:6) Pakwez, atushalapol itiyinay Nzamb afila kal, adi mudi antu adia aom ku mes ma Yehova; mulong chitongijok chend cha kuyivumbul antu chikez kuwanyin chakin kamu.—Ro 4:16, 17.
NGOND WA 8 RUBING RA 20-26
YOM YA USEY YIDIA MU DIZU DIA NZAMB | LUKA 21-22
“Dipandish Dien Didi Piswimp”
kr paj 226 par. 9
Want wa Nzamb Uyisheshin Akankuny Au
9 Yikeza kusadik mwiur. Yesu watakela kulond anch: “Muten ukez kujal, ni ngond kakez kumunyikap kand. Atutumbu akez kudiokal mwiur, apalik.” Chakin antakel a chirelijon kakezap kukimb kand chitokish—antu kakezap kand kukimb umutakel wa antakel a chirelijon mulong kakwikalap nich mwikadil wau wa kutakel. Ov, Yesu wisambina kand piur pa yom yishimokishena yikeza kusadik mwiur? Pamwing ap mwawiy. (Isay 13:9-11; Jow. 2:1, 30, 31) Ov, chom ik chikezau antu kusal mulong wa yom yikezau kuman? Akez “kukatuk mong” mulong wa “wom [wa kuburen kwijik chikusalau].” (Luka 21:25; Sof. 1:17) Mwaning, akankuny a Want wa Nzamb—‘ant ni aswik’—akez “kufa mutentu pakuchingelau yom yikeza kushik” ni akez kuchin mulong wa kujingam. Pakwez, kakezap kutan ndond ap yimwing ya kujingamin chakwel ku- kwasinik ku ujim wa Mwant wetu.—Luka 21:26; 23:30; Kuj. 6:15-17.
w16.01 paj 11 par. 17
Sal Usu Chakwel ‘Rukat Rey ra Ukadivar Ridandamena’!
17 ‘Kwikal nich kutakaman.’ (Tang Hebereu 13:6.) Ruchingej mudiay Yehova ritwinkishin kutakaman mulong wa kujijamen yikokujol yikash. Kutakaman kwinoku kutwinkishin kwikal ni chitongijok chiwamp. Ni anch tukwet chitongijok chiwamp, tukutwish kumekesh rukat ra ukadivar pa kuyikasikesh ni kuyongoj akadivar ni anambaz netu. (1 Tesalonik 5:14, 15) Ap pa chisu cha mar makash, tukutwish kwikal ni kutakaman, pa kwijik anch dipandish dietu didi piswimp.—Luka 21:25-28.
w15 1/7 paj 20 par. 13
‘Dipandish Dien Didi Piswimp’!
13 Ov, chom ik chikusalau ampemb pakwijikau anch akuyijiyish? “Akez kudil.” (Mateu 24:30) Pakwez, chom ik chikezau kasal antu azizidilau many ni antu akwau ayikwashina? Akulondul chiyul chayilejau Yesu anch: “Piyikusambisha kumekan yom yiney, imanany piur, zambulany mes, mulong dipandish dien diez kal piswimp.”—Luka 21:28.
Kukimbijol Mapit ma mu Spiritu
nwtsty yom ya kwilej yidia mu Lk 21:33
Diur ni divu yikez kujiy: Pakwez maverse makwau mamekeshin anch diur ni divu dikwikalaku chikupu. (Dis 9:16; Kus 104:5; Mul 1:4) Chawiy, mazu malondinay Yesu pinap madi ma chifanikesh, marumburikina anch, ap anch kwasadik yom yikash, diur ni divu yajiy, pakwez mazu ma Yesu makudandamen kuwanyin. (Ilakej ni Mt 5:18.) Pakwez, diur ni divu yisambidinau pinap yidi pamwing ap diur ni divu ya chifanikesh yitazukinau mu Kuj 21:1 anch: “diur disu ni mangand masu.”
mazu mam kimakez kujiyap: Ap “Mazu mam makezap kusut.” Mazu ma Grek maad masadidinau mu mutapu wa kukangesh chitongijok kanang mulong wa kuchilik, dimekeshin chitingijok chalonday Yesu chidandamedina.
w14 1/10 paj 19-20 par. 15-16
Ukez Kwikalany “Want wa in Kupesh”
15 Kupwa kwa kusal kapamp ka kusambish chivurikish cha Yakudia ya Urel ya Mwant, Yesu wasuka manswik nau in kwilejend ashinshamena, matazukau anch manswik mulong wa Want. (Tang Luka 22:28-30.) Chinyim ni manswik makwau, mudiay Yehova umwing wa antu asukina manswik, mu manswik minam madi pakach pa Yesu ni in kwilejend azizidilau many. Palonday anch: ‘mudi mwasukay Nzamb manswik niyamam,’ chimeken anch Yesu wading kulond piur pa manswik masukay nend ma kwikal ‘mwin kupesh wa chikupu, udia mudi Melkizedek.’—Heb. 5:5, 6.
16 Atwimbuy 11 ashinshamena ‘amana mar pamwing ni Yesu.’ Manswik mulong wa Want mading kuyinkish kashinsh anch akwikal nend mwiur ni kushakam pa matand ma kuyikel mudi ant ni kusal mudi in kupesh. Pakwez, antu 11 kafanyinap kwikal ayinau akweta chisend chinech. Yesu wamekana kudi kambuy Yohan mu chilay ni wamuleja anch: ‘Muntu mwawonsu ukupandakana nikumwinkish usu wa kushakam pamwing ni yamam pa ditand diam, mudi munapandakana niyam, chad nashakama ni Tatukwam pa ditand diend.’ (Kuj. 3:21) Mwamu, manswik mulong wa Want amasuka ni antu azizidilau many 144 000. (Kuj. 5:9, 10; 7:4) Manswik minam mimedina pa kuyikel kwau ni Yesu mwiur. Chinech chidi mudi mband witiyijina kumwat kudi mwant uyikedila ni kwikal niyend ni mutapu wa kuyikel nend pamwing. Pakwez, Bibil uyimekeshin in Kristu azizidilau many mudi “ngachik” wa Kristu, “ngachik wakad kal kumwijik ikundj” ukimbinau kwat kudi Kristu.— Kuj. 19:7, 8; 21:9; 2 Kor. 11:2
NGOND WA 8 RUBING RA 27–2 NGOND WA 9
YOM YA USEY YIDIA MU DIZU DIA NZAMB | LUKA 23-24
“Ikal Witenchikina Mulong wa Kuyilikishin Antu Akwau”
“Kwijik Rukat Rawonsu ra Kristu”
16 Yesu wamekesha patok rukat ra Tatukwend mu mutapu ukwau wa usey nakash—ndiy wading “witenchikin mu kulikishilan.” (Kuseng 86:5) Yesu walikishina djat ni padingay pa mutond wa mar. Amujipa rufu rimwing ra usany nakash, mulong amupampa ku makas ni ku mend yend, ov, chom ik chalonday Yesu? Ov, wamuleja Yehova anch ayijipa antu inay amusala mwamu? Pakwez, ndiy walonda anch: “Tatuku, yilikishina! Mulong awiy kijap yom yisadilau.”—Luka 23:34.
g-F 2/08 paj 11 par. 5-6
Ov, Nzamb Ukat Kulikishin Yitil Yijim?
Yehova kakatap ching kushinshikin pa yitil yisadiningay muntu pakwez ukat kushinshikin nakash pa mwikadil wa muntu wasadina chitil. (Isay 1:16-19) Shinshikin mulong winou kusutil ku chilakej cha ampongarik aad ading pa mutond wa mar pamwing ni Yesu. Ampongarik inay awonsu asal yom yiyimp nakash, mulong umwing wa pakach pau witiya uyimp wasalay palonday anch: “Ey niyamam atufishil nich kamu mulong wa yisalijok yetu yiyimp, ndiy [Yesu] kasadilap chom chiyimp.” Mazu ma mpongarik winou mamekeshin anch wading wij yom kanang piur pa Yesu. Kwijik kwa yom yiney, kwawiy kwamukwasha pamwing ap aswimpa mwikadil wadingay nich. Yom yiney yijiken patok kusutil ku yom yamwitay Yesu palonday anch: ‘Winvukang am piukwandama mu want wey.’ Mutapu ik wakulay Yesu ku kwit kwinoku kwakin? Yesu walonda anch: ‘Nakushilamu kal nlel unou, ukez kwikal ni yamam mwi mu Paradis.’—Luka 23:41-43.
Tongil bil pa chom ech: Mazu ma nsudiel malonday Yesu padingay ni mujimbu wa mbij mulong wa muntu wading ukimbinau kujip mulong wa yom yasalay mamekesha riy. Mazu minam mading makasikeshin mud ik! Chawiy, tukutwish kwikal nich kashinsh anch Yesu Kristu pamwing ni Tatukwetu, Yehova akuyimekeshin antu awonsu akata kwit dilikish diakin ranaken chikalap nchik yisal yau yasalau pakur.—Rom 4:7.
“Kwijik Rukat Rawonsu ra Kristu”
17 Mutapu wamulikishinau kambuy Pita kudi Yesu ukutwish kwikal kand chom chikwau cha usey nakash. Chimeken anch Yesu wamukata chakin kamu Pita. Uchuku wa nsudiel wa mwom wa Yesu pa divu pa Nisan 14, Pita wamuleja anch: “Nsalejam, am nitiy kal kuya ni yeyey mu rukan, nikufa kand ni yeyey!” Kupwa pasuta chisu chikemp, Pita watadika tupamp tusatu anch kamwijap Yesu! Bibil utulejin chashikena patadikay Pita tupamp tusatu anch: “Chad Nsalejetu Yesu wakarumuka, wamutal Pita neeng.” Povay kuyip nakash mulong wa kulim kwa chitil chend, Pita “wabudika, waya ni kushikok kudil.” Pafay Yesu pa dichuku dinidia, kambuy winou wiyipula chakin kamu anch, ‘Ov, Mwant wam wanlikishina kamu?’—Luka 22:33, 61, 62.
18 Pita kelap kuchingel chisu chilemp pakad kutambul chakul ku chipul chinech. Yesu wavumbuka pamanch pa Nisan 16, ni chimeken anch Yesu waya kumuman Pita pa dichuku dinidia. (Luka 24:34; 1 Korint 15:4-8) Ov, mulong wak Yesu wamuteka mwamu pa ndond ya kusambish kambuy walika nakash anch kamwijap? Yesu wasota pamwing ap kumukasikesh Pita wakarumuka anch Mwant wend wading umukatin ni umukwatin kand nich usey. Pakwez Yesu wasala kand yom yikwau yivud kupwa kwa kumukasikesh Pita.
Kukimbijol Mapit ma mu Spiritu
nwtsty yom ya kwilej yidia mu Lk 23:31
anch mutond utalela, . . . anch mutond uumin: Yesu wading wisambidin pamwing ap piur pa muchid wa in Yuda. Muchid winou wading mudi mutond uumina pakwez uchitalelaku pakemp, chawiy chirumbrikina anch mulong Yesu wading uchid mwom ni in Yuda amwing ading atekin ritiy rau mudiay ndiy. Pakwez, ading afanyidin kumujip Yesu mu machuku makemp, chawiy in Yuda akweta ritiy afanyina kuyizizil many nich spiritu utumbila chakwel ikal in Isarel a mu spiritu. (Ro 2:28, 29; Gal 6:16) Pa chisu chinicha, muchid wa Isarel wa ku mujimbu wafanyina kufa mu spiritu, chawiy wafanyina kwikal mudi mutond uumina.—Mt 21:43.
nwtsty yom yikwau
Musumad Wandama mu Difut dia ku Kapolantundu
Chinech chid chipich cha kapolantundu ka muntu kapampinau musumad wa kulep kwa asantimetre 11 ni chikunku. Difup dined aditana mu muvu wa 1968, chisu chakimbijolau kurul kwa Yerusalem, ni didiaku kudiosh pa chirung cha in Rom. Chinech chipanin uman wakin wa yom ya pakur anch asadinang misumad mulong wa kumupampin nich muntu ku mutond. Musumad winou ukutwish kwikal wa mutapu umwing ni wasadinau amasalay a in Rom mulong wa kumupamp nich Yesu Kristu ku mutond. Chom chinech achitana mu mushet wa diyal utazukinau anch mushet wa mafup mwatekangau mafup ma muntu ufila kupwa kwa kuvund. Chinech chimekeshin anch muntu wajipinangau ku mutond afanyinang kumujik.