Mareferans ma Mudimu ni Mashakamin ma In Kristu Mukand wa Chikumangan

NGOND WA 7 RUBING RA 1-7

YOM YA USEY YIDIA MU DIZU DIA NZAMB | KOLOSAY 1-4

“Djol Wuntu Ukur ni Djal Wuntu Wusu”

wp11 1/3 paj 12 par. 12-13

Tambulany [Spiritu] Wa Nzamb, Kangal Wa Mangand

¹² Ov, untu wam umekeshin spiritu ik? (Tang Kolosay 3:8-10, 13.) Spiritu wa mangand ukasikeshining midimu ya mbij. (Gal. 5:19-21) Kupak kwakin kukata kutubachikin spiritu winou, kukatap kumekan anch yom yiwapin, pakwez kumekening anch yom yiyipin, chilakej anch mukadivar mwin Kristu ap nambaz, watuvuramen, waturumbukin, ap watusadil chitil. Chikwau kand, pitudia kuns mu yikumbu yetu, chikutwish kumekesh patok spiritu ututakedil. Chiwapidil kwishinshikin ayinetu. Iyipula amwiney anch, ‘Mu angond musamban asutina, ov, untu wam wamekana wa in Kristu ap nawila pamwingap mu yaku ya pasak ya kulondol ni mwikadil uyimp?’

¹³ Spiritu wa Nzamb ukutwish kutukwash ‘kutal anch twadjibwil kal muntu mukuru ni yisalijok yetu, ni kumudjal muntu musu.’ Chawiy chikeza kutukwash kupandikesh rukat ni uwamp. Tukez kwikal nich muchim wa kwilikishin umwing ni mukwau, ap anch tukwet mbil ja kwinan piur pa uyimp watusalau. Tukezap kusal yom mulong wa kurish nich kasolikany nich “mazu mawonsu maridila ni ujim, ni kuswej, ni jinkuny, ni kuchirilan.” Pakwez, tukez kusal usu wa kwikal in ‘kulikishijan.’—Efes 4:31, 32.

wp13 1/9 paj 21 par. 18-19

Ov, Akukarumunany Kal?

¹⁸ Chakwel Dizu dia Nzamb ditukarumuna chakin kamu, kutang ni kwilej Bibil pakad kujing chidi chom cha kusambish. Antu avud atangining Bibil chisu ni chisu ni ashikena ku kwijik nawamp yifundinau. Watanijanap kal pamwing ap ni antu a mutapu winou mu mudimu wa chingand. Amwing akutwish kulam ma verse ma Bibil mu mutu ni kumachirikin pakad kumatang. Pakwez, chinech chikutwishap kwikal nich usu ukash pa yitongijok ni mashakamin mau. Ov, chom ik chiburedinau? Pakwel anch Dizu dia Nzamb dikala ni usu ni dimukarumuna muntu, ufanyidin kusal anch ‘diandama’ mu muchim wend. (Gal. 6:6) Chawiy lel, tufanyidin kwitekin chisu mulong wa kutongijokin piur pa yom twilejina. Chiwapidil kwiyipul anch: ‘Ov, nikwet kashinsh anch yinilejina yipandikenamu malejan mamwing ma chirelijon? Ov, namanap anch wawiy uyakin? Chikwau kand, ov, namen mutapu wa kusadil yom nileja mu mwom wam ni kulik kuyiman anch yidi yom nikutwisha kuyilej kusu antu akwau? Ov, nikat kwiyov anch Yehova ukat kwisamb nam pakampwil?’ Kutong ni kutongijokin pa yipul yiney kukutwish kutukwash chakwel tukasikesha yovil tukweta mu muchim wetu pantaliken ni Yehova. Rukat retu kudi ndiy rikez kupam. Anch malejan mashik ku muchim, muntu ukukarumuk.—Jinsw. 4:23; Luka 6:45.

¹⁹ Kutang ni kutongijokin pa Dizu dia Nzamb pakad kujing kukez kutubachik kudandamen kusal yitukata kusalang mu chilik kanang: “Wadjibwilany kal muntu mukuru ni yisalijok yend, ni kumudjal muntu musu, ufanakena ku ronganyin.” (Kol. 3:9, 10) Mwaning, tukutwish kudandamen kutwish anch twatesh kurumburik kwakin ni usu wa Dizu dia Nzamb. Kwikal ni untu usu wa win Kristu kukudandamen kutukwash kutuking pantaliken ni milad ya kudimban ya Satan.

Kukimbijol Mapit ma mu Spiritu

it-2-F p. 833 par. 4-6

Want wa Nzamb

‘Want wa Mwan wa rukat rend.’ Ku Pentekot wa muvu wa 33 C.C., machuku dikum kupwa kwa Yesu kuya mwiur, in kwilejend ikala ni uman anch ndiy ‘amuteka ku chikas cha katatuku cha Nzamb’ chisu chatambulau spiritu utumbila wayituminay. (Mid 1:8, 9; 2:1-4, 29-33) “Manswik masu” masambisha kusadil padi awiy ni ikala dishin dia “muchid utumbila” wusu ap anch Isarel wa mu spiritu.—Heb 12:22-24; 1Pi 2:9, 10; Gal 6:16.

Kristu wading chad ushich ku chikas cha katatuku cha Tatukwend ni wading Ntakel wa chikumangen chinech. (Ef 5:23; Heb 1:3; Fl 2:9-11) Mifund yimekeshin anch kudiosh kamu pa Pentekot wa muvu wa 33 C.C. want wa mu spiritu awuteka padi in kwilejend. Chisu chayifundinay in Kristu a mu mivu chitot ya kusambish a ku Kolosay, kambuy Paul walejana anch Yesu Kristu wading ni want, palonday anch: “[Nzamb] watukamunina mu usu wa mididim ni kutushemunin ku want wa Mwan wa rukat rend.”—Kol 1:13, TMK; ilikej ni Mid 17:6, 7.

Want wa Kristu kusambish Pentekot wa 33 C.C. wikala want wa mu spiritu uyikedila pa Isarel wa mu spiritu, kwawiy kulond anch in Kristu avalau kudi spiritu wa Nzamb mulong wa kwikal an a mu spiritu a Nzamb. (Yh 3:3, 5, 6) Anch in Kristu inay avalau kudi spiritu atambul difut diau dia mwiur, kakwikalap kand antu a pansh a mu want wa mu spiritu wa Kristu, pakwez akwikal ant pamwing nend Kristu mwiur.—Kuj 5:9, 10.

w08 15/8 paj 28 par. 8

Manans Majim ma Mukand wa In Galatia, In Efes, In Filip ni wa In Kolosay

2:8—Chom ik chirumburikina ‘yom ya pa dishin ya mangand’ yababeshay Paul? Madi malejan ma mangand ya Satan—mu yom yiney ap mbil yisadilau mudi kutakel ni kuyibachik. (1 Yoh. 2:16) Pa yom yiney padi filozofi, kukat yom ya ku mujimbu ni marelijon ma makasu ma mangand minam.

NGOND WA 7 RUBING RA 8-14

YOM YA USEY YIDIA MU DIZU DIA NZAMB | 1 TESALONIK 1-5

“Dandamenany Kukasikeshijan ni Kukwashijan Umwing ni Mukwau”

wp11 1/6 paj 30 par. 12

“Yilimishany [Asadina Mudimu Ukash] Pakach Pen”

¹² ‘Kutakel’ chikumangen kwitin yom yivud kupandakanamu kulejan. Dizu dined dimwing akat kudisadil kand mu 1 Timote 3:4. Paul walonda anch kalam ufanyidin “kulam dijuku diend nawamp, kuyilej anend kumuziyil ni kumulimish mu yom yawonsu.” Pinap dizu ‘kutakel’ dirumburikinap ching kusu kuyifundish anend pakwez dirumburikin kand kutakel dijuku ni ‘kuyilej anend kumuziyil.’ Mwaning, amakurump akata kutakel chikumangen, ayikwashin antu awonsu chakwel amuziyila Yehova.—1 Tim. 3:5.

wp11 1/6 paj 32 par. 19

“Yilimishany [Asadina Mudimu Ukash] Pakach Pen”

¹⁹ Ov, chom ik ukutwisha kusal anch watambul chipan chatenchikau pakampwil mulong weyey? Ov, ukez kumekesh anch usangaredin kuchisadin? ‘Amakundj mudi yipan’ adi antu akwinkishinau kudi Yehova kusutil Yesu Kristu. Mutapu umwing ukutwisha kumekesh kujikitish kwey mulong wa yipan yiney udi kusutil ku kutesh nawamp madiskur maletinau kudi amakurump ni kusal usu wa kusadil manans makatau kupan. Ukutwish kand kumekesh kujikitish kwey kusutil ku kupan yakul yey ku yikumangan. Yikwasha amakurump mu mudimu utakedilau, mudi mu mudimu wa chingand. Anch wataninamu mu chiyul watambwila kudi mukurump umwing, ov, mulong wak ukutwishap kumulej mwamu? Chikwau kand, mulong wak umekeshinap kusanger kwey mulong wa majuku ma amakurump? Vurik anch, pakwel anch mukurump asala mudimu ukash mu chikumangen, dijiku diend difanyidin kupan yisu yifanyidinau kushakam nend.

w17.10 paj 6-7 par. 13

‘Tukatany . . . mu Yisal ni Uyakin’

¹³ Yikwasha antu aziyina. Chijil cha Bibil cha ‘kuyikwash aziyila ni kushimpish michim kudi antu awonsu’ chikutwish kupak anch rukat retu ridi rakin. (1 Tesalonik 5:14) Akadivar avud ading aziyina akasikana mu ritiy. Pakwez akwau adandamedin kwikal ni kuswir kwa kushimpish michim kwetu ni kuyikwash kwa rukat. Mutapu ik tukutwisha kuyikwash? Tukutwish kusadin Bibil mulong wa kuyikasikesh, kulejan nau pamwing ap kuyitesh chisu chilondinau. Chikwau kand, tufanyidinap kutong anch akadivar ap anambaz adi ‘akash’ ap ‘aziyin.’ Pakwez, tufanyidin kwijik anch etu awonsu tukweting usu ni tukat kuziy. Ap kambuy Paul niyend witiyina anch wading uziyin. (2 Korint 12:9, 10) Etu awonsu tukwet kuswir kwa ukwash ni kukasikeshijan umwing ni mukwau.

wp15 1/2 paj 11 par. 16

Imburijany Kwikepish ni Ranaken ra Yesu

¹⁶ Mazu metu ma ranaken. Rukat tukweta mulong wa antu rikat kutubachik ‘kulond mu mutapu uwamp kudi antu ovila runeng.’ (1 Tes. 5:14) Ov, chom ik tufanyidina kulond mulong wa kuyikasikesh antu inay? Tufanyidin kuyilej yom yikutwisha kumekesh mutapu tuyimena. Tukutwish kuyijikitish kamu chakwel ijika anch akwet mikadil ni ukaliweny uwamp. Tukutwish kuyivurish anch Yehova uyipwitin piswimp ni Mwanend, mwamu akutwish kwijik anch akwet usey. (Yoh. 6:44) Tufanyidin kuyilej anch Yehova udi piswimp ni atushalapolend akweta “michim yinenganena” ap ‘akweta ushon.’ (Kus. 34:18) Mazu metu ma ranaken makat kuletang usu kudi antu akweta kuswir kwa ukwash.—Jinsw. 16:24.

Kukimbijol Mapit ma mu Spiritu

it-1-F p. 921 par. 2

Yisal ya Masandj

Yisal ya masandj chidi chitil chikutwisha kusal anch muntu amopata mu chikumangan cha win Kristu. (1Ko 5:9-13; Heb 12:15, 16) Kambuy Paul warumburila anch mwin Kristu usadina yisal ya masandj ukat kusal chitil ku mujimbu wend, mulong ukat kusadin yid yend ya ruvaj mu mutapu wijondila. Ukat kwisal nayimp mu spiritu, ukat kwijondish chikumangen cha Nzamb ni ukat kwitek mu ubaj wa kwikal ni mayej makata kusamburik mu kulalijan mashikijina ku rufu. (1Ko 6:18, 19) Chikwau kand, ukat kuyisal nayimp akadivar nend in Kristu (1Tes 4:3-7) kusutil (1) kwijondish chikumangen, usany uyimp ni kwifish nich (Heb 12:15, 16), (2) kumwijondish muntu wasalangay nend masandj, anch udi mujich, kakwikalap winangina chisu chikwatanay, (3) kusal anch dijuku diend dilika kwikal ni kalimish ka mwikadil uwamp, pamwing kand ni (4) kuyisal nayimp anvajend, nfumwend, ap mband ukimbinau kwat kudi muntu wasalangay nend masandj. Kupwa, ukat kumulik, kadiap muntu ukata kulikishin pamwing ap masandj, pakwez Nzamb ukata kupupan mulong wa chitil chend.—1Tes 4:8.

wp15 1/7 paj 20 par. 14-15

“Dipandish Dien Didi Piswimp”!

¹⁴ Yom ik yikusadika kupwa kwa Gog wa mwi ngand ya Magog kusambish kuyirishish antu a Nzamb? Bibil ulondin anch Mwan a muntu “Ukez kuyitum aruu a mwiur kuya ku mitambu ni mitambu ya ngand, mulong wa kuyikumangej antu atonday Nzamb adia ku mitambu yawonsu ya ngand.” (Marko 13:27; Mateu 24:31) Mudimu winou wa kukumangej umekeshinap chisu chiyitondinau kapamp ka kusambish in Kristu azizidilau many. Ni umekeshinap chijingidij cha nsudiel cha azizidilau many achidia kal pa divu. (Mateu 13:37, 38) Yijingidij yiney akuyitek kurutu kwa mar makash kusambish. (Kujingunik 7:1-4) Ov, mudimu wa kukumangej winou chom ik? Chidi chisu chikutambulau azizidilau many difut diau ni kuya mwiur. (1 Tesalonik 4:15-17; Kujingunik 14:1) Yom yiney yikusadik kapamp kamwing kupwa kwa Gog wa mwi ngand ya Magog kusambish njit. (Ezekiel 38:11) Chikusadik mudi mwalonday Yesu anch: “Antu atentamina akez kuzut mudi muten mu Want wa Tatukwau.”—Mateu 13:43.

¹⁵ Ov, chinech chirumburikin anch, antu azizidilau many akez ‘kayizambul’? Antu adia mu ma relijon ma makasu alondining anch in Kristu akez kuya mwiur nich mijimbu ya mbij. Atongining kand anch akez kamuman Yesu nich mes mau pakuchirikay mulong wa kuyikel pa divu. Pakwez, Bibil ulejen patok anch kwez kwa Yesu kudi kwakad kumekan ku mes palondinay anch: “Chijingidij cha Mwan a muntu chikez kumekan mwiur” ni Yesu ukwez kez mu “madj ma mwiur.” (Mateu 24:30) Bibil ulondin kand anch ‘mbij ni mash yikutwishap kuswan Want wa Nzamb.’ Komb antu akuya mwiur aswiridin chakusambish kwikal ‘akarumwinau mu ka chisu kakemp mudi kufet kwa dis, pakeza kabulau mpuny ya disudiel dia mangand.’ (Tal mazu madia kwishin kwa paj.) (Tang 1 Korint 15:50-53.) Tusadidinap dizu ‘kuyizambul’ mulong wa kurumburil yom yiney, mulong yikwatijadin nich mafundish ma makasu ma Kristendom. Pa chinech, komb ashinshamena azizidilau many achidia kal pa divu akez kuyikumangej pamwing kapamp kamwing.

NGOND WA 7 RUBING RA 15-21

YOM YA USEY YIDIA MU DIZU DIA NZAMB | 2 TESALONIK 1-3

“Kumekan kwa Muntu Wakad Chijil”

it-1-F p. 221 par. 5

Kulamat Kudi Nzamb

Pinap padi ujindj ukwau ushalijadina nakash ni “ujindj utumbila” wa Yehova. Udi ‘ujindj wa muntu wakad chijil.’ Wading ujindj kudi in Kristu akin mulong mu chisu cha kambuy Paul ‘muntu wakad chijil’ wading kandikal kamu ikalaku ni amekana kamu patok mudi chisak. Ap kupwa kwa ‘muntu’ winou kwikalaku, kumekan kwend kwafanyina kudandamen kwikal ujindj kudi antu avud mulong wafanyina kusal uyimp mudi kumekesh anch ulamatin kudi Nzamb ni mu dijin dia kulamat kwinoku. Chisal chinech chading kamu kupumbok pantaliken ni kulamat kwakin kudi Nzamb. Paul walonda anch ‘ujindj wa muntu wakad chijil’ wadingaku pa chisu chend, mulong mu chikumangen cha win Kristu mwading yibachikin yiyimp yadandamena kwikal chisak cha in kupumbok. Kupwa chad, muntu winou akumujiyish kudi Yesu Kristu pa chisu cha kwikalaku kwend. ‘Muntu’ winou mwin kupumbuk, usadidinay Satan, wafanyina “kupompat akish awonsu ni yom yikwau yawonsu yikat kwifukwilau antu, ukez kwizambwish kwitek amwinend piur pa yom yiney yawonsu” (mu Grek seʹba·sma). Mwamu mukankuny winou mujim wa Nzamb, usadidinay Satan wafanyina kudimban nakash ni kulet disheshik kudi antu awonsu alondwila yisalijok yend. Usu wa ‘muntu wakad chijil’ wafanyina kwikal mu kudimban ni kudandamen kusal uyimp mulong wa kumekesh anch wipanin kudi Nzamb mu mutapu wa rubabek.—2Tes 2:3-12; ilikej ni Mt 7:15, 21-23.

it-2-F p. 255 par. 7

Makasu

Yehova Nzamb walika ‘chisal cha kupumbuk’ kudi antu akatina makasu chakwel ‘ayibachika kwitiy yom ya makasu’ pa ndond pa kwitiy rusangu ruwamp piur pa Yesu Kristu. (2Tes 2:9-12) Mbil yiney yimekeshin yom yasadika kwasutin kal yitot ya mivu kudi Mwant Akab wa Isarel. Aprofet a makasu amwinka Akab kashinsh anch ukuwin njit pantaliken ni Ramot wa ku Galad, pakwez Mikey muprofet wa Yehova wasambela kulejan anch kakuwinap. Kukwatijan ni yom yamulejay muprofet wend Mikey mu chishimushimu, Yehova walika anch chitang chimwing cha mu spiritu chikala “[spiritu] wa makasu” mu kan ka aprofet a Akab. Mu kulond kukwau, spiritu winou wasadina usu wend pa awiy chakwel alonda, kadiap uyakin pakwez yom yading yisotinau ayinau kulond ni yom yading yikatinay Akab kutesh kudi awiy. Ap anch amubabesha, Akab witiya anch amudimba ni wafa mulong wa kwitiyij makasu minam.—1Ant 22:1-38; 2Jsng 18.

Kukimbijol Mapit ma mu Spiritu

it-1-F p. 890 par. 6

Kasu

Pita wafunda anch ‘maur ni divu, ayilamidin chakwel yez yisheshik nich kasu.’ Kukwatijan ni yom yisambidinau pinap ni yidia mu maverse makwau kand, choviken patok anch kasu kinak kadiap kasu tukata kusadin, pakwez kamekeshin disheshik dia chikupu. Mabeb ma pa chisu cha Nowa masheshap maur ni divu ditumena ed, pakwez mashesha antu ayimp, chilik chimwing kand ni kujingunik kwa Yesu Kristu pamwing ni angel end a usu kukumekesh disheshik dia chikupu padi antu ayimp ni pa ditenchik dia yom diyimp didiawamu.—2Pi 3:5-7, 10-13; 2Tes 1:6-10; ilikej ni Is 66:15, 16, 22, 24.

it-1-F p. 1188 par. 1

Kupepil

‘Mazu Mapepilau’—Makin ni ma Makasu. Dizu dia Grek pneuʹma (spiritu) dikwet kurumburik kwa pakampwil mu mikand ya atwimbuy. Chilakej, mu 2 Tesalonik 2:2, kambuy Paul wayikasikesha akadivar nend a ku Tesalonik anch kangal arumbangan swa ni kwiyakamish ap ‘ku dizu diapepilau [ap anch “spiritu”] ap kusutil uruu wa ku kan ap kusutil mukand mudi udiokil kudi etu umekeshina anch dichuku dia Yehova diashikal.’ Choviken patok anch pinap Paul usadidin dizu pneuʹma (spiritu) mulong kwilikej ni mitapu ya kwambambin mudi ‘uruu wa ku kan’ ap ‘mukand.’ Mulong wa diyingishin dined, (Theologisch-homiletisches Bibelwerk, Die beiden Briefe Pauli an die Thessalonicher, par J. P. Lange, 1864, p. 110) urumburil piur pa mukand winou anch: “Kusutin chinech kambuy wading umen anch chidi chitongijok chading chitinau kudi spiritu, mudi yom ya kubwak ap yilondinay muprofet.” Mu mikand yaad ya mwinsant Paul kudi in Tesalonik, yafunday C. Masson, (Neuchâtel, 1957, p. 93, 94), tutangin anch: “Ku spiritu, choviken anch kudi kusutil dizu diapepilau, ap kujingunik [...] mudi mutapu mwalondangau aprofet mu yikumangan ya Egliz wa kusambish. Mwamu, ap anch mabibil makwau makarumwin pneuʹma anch “spiritu” mu verse winou ni mu maverse makwau malondulijadina, mabibil makwau makarumwin anch “uruu wa Spiritu” (PV), “kubwak” (TOB), “kupepil” (Od ; Sg), “dizu diapepilau” (NWT).

NGOND WA 7 RUBING RA 22-28

YOM YA USEY YIDIA MU DIZU DIA NZAMB | 1 TIMOTE 1-3

“Wanyish Mudimu Uwamp”

w16.08 paj 16 par. 3

Umen Usey wa Kuya Kurutu mu Spiritu?

³ Tang 1 Timote 3:1. Kambuy Paul wayijikitisha akadivar ‘akatina’ kwikal atulam. Kud muntu ukatina chom kanang chidia kulemp, ufanyidin kusal usu ni pamwing ap ufanyidin konan chikas chakwel achinona. Tong katat mukadivar ukatina anch ikala nkwash wa mudimu. Ufanyidin kwijik anch ufanyidin kusal usu chakwel awapisha mikadil yend ya win Kristu. Kupwa wasambish kusal mud nkwash wa mudimu, ufanyidin kudandamen kusal usu nakash chakwel ikala kalam.

km-F 12/78 p. 4 par. 7

Antu Akata ‘Kwikal ni Ndong ya Kalimish’

⁷ Chiswapel katat kuman mulong wak Paul walonda anch amakundj inay “akat kwikal ni ndond yiwamp.” Kwinoku kudiap kukandam maz mu Egliz, mudi mutapu ukat kulondau antu amwing. Pakwez, ankwash a mudimu asadina “mudimu wau nawamp” akwet kashinsh ka kutambul yiyukish ya Yehova ni ya Yesu, ni ayilimishin ni kuyikwash kudi chikumangen cha kabuj. Chakin kamu akat “kulond patok wakad wom ya ritiy rikwetau mu Kristu Yesu.” Akat kusal nich kushinshaman midimu yiyinkinau, akat kuyisanger mulong wa mudimu wau uwamp, akwet ritiy rikash ni akat kurilejan pakad usweral ap wom wa kuyifish nich.

Kukimbijol Mapit ma mu Spiritu

it-1-F p. 980 par. 2

Majin ma Majuku

Kwipan mulong wa kwilej ni kwisambin milong mudi yiney kwading kwau kwa chamwamu, ni chading kand mwamu nakash pa chisu chamufundinau Timote kudi Paul. Kwikal ni list ulejena majin ma majuku mulong wa kumekesh kwisu kudiokilay muntu kwading kwau kwakad usey, mulong Nzamb katekap kand kushalijan pakach pa in Yuda ni Akamichid adinga mu chikumangen cha win Kristu. (Gal 3:28) Chikwau kand, majin ma majuku mading malejen kal kwau anch Kristu ukuvadikin mu mulong wa David. Kupwa, chisu chikemp kupwa kwa Paul kupan chiyul chinech, Yerusalem afanyina kumushesh pamwing ni yom yin yawonsu ya in Yuda. Nzamb kayichidijap yom yiney. Paul wading ukatin anch Timote ni yikumangen kangal yikala ni kampuw mu kusutish chisu cha kukimbijol ni kwisambin milong ya majuku yakad usey ku ritiy ra win Kristu. Majin ma majuku madia mu Bibil maletin uman anch Yesu ndiy wading Mesia, mawiy majin ma majuku madia ma usey nakash kudi in Kristu. Majin makwau mafundinau mu Bibil maletin kwau uman anch yom yifundinau mu Bibil yidi yakin ni mulong wa kumekesh kamu anch ridi rusangu rakin rasadika.

cl paj 12 par. 15

“Talany! Ou Ndiy Nzamb Wetu”

¹⁵ Chijiken chikwau chisadidiningau ching kudiay Yehova amwinend chidi kand anch “Mwant wa chikupu.” (1 Timote 1:17; Kujingunik 15:3) Ov, chirumburikin ik? Chidi chikasiken chakwel tulama mu manangu dijin dined, pakwez, Yehova udi chikupu mu mitapu yawonu—pasak ni mu machuku ma kurutu. Kuseng 90:2 ulondin anch: “Kudiokal chikupu ni chikupu, ey uding kwey Nzamb.” Chawiy, Yehova kakwetingap nsambishil; pakwez, ndiy wadingaku yisu yawonsu. Chawiy kand chifanyidina kumutazuk kamu anch “Wakad disambishil”—ndiy wadingaku chikupu kurutu kwa yom yawonsu kwikalaku ap kurutu kwa kwikalaku kwa yom yikwau ya mu mangand! (Daniel 7:9, 13, 22) Ov, nany ukutwisha kwitiyij anch chakin kamu ndiy ufanyidina kwikal Mukaleng Mwant?

NGOND WA 7 RUBING RA 29–4 NGOND WA 8

YOM YA USEY YIDIA MU DIZU DIA NZAMB | 1 TIMOTE 4-6

“Kulamat Kudi Nzamb ni Mapit”

w03-F 1/6 p. 9 par. 1-2

Twilejany Ujindj wa Kusanger yom Yitukweta

Chom chijim chamuletinang Paul musangar ni kuzangijal chidi anch wading wij kusanger yom yading yikwetay. Pakwez, chirumburikin ik kusanger yom yikwetay muntu? Mu wiswimp chirumburikin kusanger yom yidia ya usey. Pa mulong winou, Paul wamuleja Timote mbay nend wa mudimu anch: “Chakin, mwom wa [kumulamat] Nzamb ukat kulet mapit mavud kudi muntu ukata kusangar nich yom yikwetay. Mulong etu kitwaletap chom mu mangand, chawiy chimwing kand, kitukusendap chom. Chawiy chifanyidin etu kusangar anch tukwet yakudia ni yidjal.”—1 Timote 6:6-8.

Tal anch Paul utekin pamwing kusanger yom yitukweta ni kulamat kudi Nzamb. Wamana anch musangar wakin udiokiling ku kulamat kudi Nzamb, kwawiy kulond anch ku kutek mudimu wa Nzamb pa ndond ya kusambish, kadiap ku kulondul yom ap mapit ma ku mujimbu. “Yakudia ni yidjal” yadingap yom yading yimukwashina kulondul kulamat kudi Nzamb. Kudi Paul, ujindj wa kusanger yom yadingay nich wading wa kumuchingejin Yehova mu milong yin yawonsu.

g-F 6/07 p. 6 par. 2

Kusal usu wa Kwikal Mpich Kukwet Yibudikin Padi ey

Chakin kamu, antu avud kakatap kufa mulong wa kusurab kukimb mapit. Pakwez, akutwish kushadish kusanger yom kanang mu mwom wau. Chikwau kand, mwom wau ukutwish kuyip mulong wa kusal midimu yiziyishena ap milong ya nfalang yikutwisha kusal anch ayela, aburena tul, ayela mayej ma kabar a mutu ap ikala ni yitat ku yidi ya mujimbu. Ni ap anch muntu wajingunin anch ufanyidin kuswimp chitongijok chend piur pa yom ya kutek pa ndond ya kusambich mu mwom wend, ukutwish kwikal ni yibudikin yiyimp yakad kupwa. Pamwing ap mbay nend wa uruw kakumuchingejinap kand, anend akutwish kwiyov nayimp ni ukash wend wa mujimbu ukutwish kuyip. Pamwing ap yibudikin yimwing yikutwish kupwa, pakwez chitin kusal usu nakash. Antu mudi inay “michim yau yikat kutem nich yakamish yivud.”—1 Timote 6:10.

g-F 11/08 p. 6 par. 4-6

Yom Musamban Mulong wa Kutwish mu Mwom

Mudi mutapu twamana kal mu mutu wa mulong udia kwiur oku, antu akata kusurab nakash mapit mulong wa kutwish mu mwom, akat kulondul kwau rinkind. Akat kuziy chipandakena ni kwikal ni kusansan nakash. Chilakej, antu akata kulondul mapit mudi amput a mes, akat kudiul urund ni majuku mau ni arund nau. Akwau kakatap kwau kulal, mulong wa kusal mudimu nakash ap mulong wa minan ni yakamish. Mulej 5:12 ulondin anch: “Tul twa muntu wa mudimu tutadil, ap anch ndiy wadiap nchik yikemp ap yivud. Pakwez mulong wa mapit mavud, muntu mpich kakulalangap tul.”

Nfalang udi nsalej muyimp ni ukat kudimban kand nakash. Yesu walonda piur pa “ris ra mapit.” (Marko 4:19) Mu kulond kukwau, mapit makat kukan kulet musangar pakwez makuletangap bwat. Mapit makat kulet kwau maku makading kupwa. Mulej 5:10 ulondin anch: “Ukatila nfalang, kajikwetap jiwanyidina.”

Mu wiswimp, rukat ra nfalang rikat kutwal ku yom yiyimp ni rikat kushikij ku kuziy, ujim ap ku kujipan. (Jinswir 28:20) Mulong wa kutwish mu mwom ni kwikal ni musangar, chidi cha usey kwikal mwin kupan, mwin kulikishin, kwikal ni mwikadil uwamp, kwikal ni rukat ni kwikal muntu wa mu spiritu.

Kukimbijol Mapit ma mu Spiritu

lvs paj 23-24 par. 17

Kom Kawamp Kurutu Kwa Nzamb

¹⁷ Kambuy Pita wafunda anch: ‘Lamany kom kawamp.’ (1 Pita 3:16) Cha ushon, pakatau antu avud kuvuramen mbil ja Yehova, kom kau kakatap kuyibabesh. Paul walonda anch kom mudi kinak ‘akosha kal ni chikung chisuzina kasu.’ (1 Timote 4:2) Ov, wateminap kal kasu nayimp? Anch chakushiken, chikit chey chikukachalal, chawiy ukutwishap kand kutesh anch akukwat pa chikit chinech. Anch muntu wadandamen kusal yom yiyimp, kom kend kakutwish kwikal mudi ‘akosha kal’ ni kakusalap kand.

it-2-F p. 122 par. 1-2

Kutang kwa Patok

Mu Chikumangen cha win Kristu. Mu mivu chitot ya kusambish, antu akemp awiy ading ni makopi ma mivungur yivud ya Bibil, chom chading cha usey mu kutang kwa patok. Kambuy Paul walejana kutang patok mikand yend ku yikumangan ya yikumangen ni yikumangen yitambula kand mikand yend yikwau yafundinay yikumangen yikwau chakwel ayitanga kand. (Kol 4:16; 1Tes 5:27) Paul wamuyula mwin Kristu nsand wading kalam, Timote kwipan amwinend ku ‘kutang kwa patok, ku kukasikesh, ku kulejan.’—1Tm 4:13.

Muntu utangina kurutu kwa antu awonsu ufanyidina kutang nawamp. (Aba 2:2) Mulong kutang kwa patok kupanin mafundish kudi antu akwau, mwin kutang wa patok ufanyidin kwov nawamp yom yitanginay, kwijik chitongijok cha mwin kufund ni kangal apana chitongijok chiyimp ap cha makasu kudi in kumutesh. Kukwatijan ni Kujingunik 1;3, antu atangina uprofet winou ni dizu dia piur, pamwing ni antu ateshina ni alimishina uprofet winou, akwikal ni musangar.