Mareferans ma Mudimu ni Mashakamin ma In Kristu Mukand wa Chikumangan

NGOND WA 8 RUBING RA 5-11

YOM YA USEY YIDIA MU DIZU DIA NZAMB | 2 TIMOTE 1-4

“Nzamb Katwinkishap Muchim wa Wom”

wp09 1/5 paj 19 par. 9

Ansand—Mekeshany Kukul Kwen

⁹ Chakwel amukwasha Timote, Paul wamuvurisha anch: “Nzamb katwinkap muchim wa wom, pakwez wa usu, ni wa rukat, ni kwirijek.” (2 Tim. 1:7) Mu “kwirijek” mudi kwikal utwishina kutong ni kujingunin nakash. Mudi kand kwikal nich ukaliweny wa kuman yom mu mutapu uyidia—chidiap muusotila anch yikala. Ansand amwing akad kal kukul akat kumekeshang muchim wa wom ni akat kutongin kwiyep milong yikash ku kulalang nakash ap kutalang televizion, kunang mon ya kulewishan, kwipan mu misangar ap kand mu masandj. Pakwez in Kristu ayibabeshin anch djibulany “yom yiyimp ni kulik yom ya mu mangand, ni kushakam ni michim yitudila ni yitentamina ni yiwapila mu mangand minam.”—Titus 2:12.

w03-F 1/3 p. 9 par. 7

‘Ikal Utakamena ni Mukash!’

⁷ Paul wamufundina Timote anch: ‘Nzamb katwinkishap muchim wa wom, pakwez wa ukash . . . Kangal wov usany wa kulejan uman wa Nsalejetu.’ (2 Timote 1:7, 8; Marko 8:38) Kupwa kwa kutang mazu minam, tukutwish kwiyipul anch: ‘Ov, novil usany wa ritiy ram, ap nidi utakamena? Ku mudimu (ap ku shikol), nikat kulejan anch nidi Kaman wa Yehova, anch nikat kwijindjik? Ov, nikwet usany wa kwikal ushalijadina nau akwetu, ap nikwet musangar wa kwikal ni urund uwamp ni Yehova?’ Anch muntu wovil wom wa kulejan rusangu ruwamp pa wa kumuman nayimp mulong wa yitiyij yend, tufanyidin kumuvurish chiyul chamwinkau Joshua kudi Yehova: ‘Ikal utakamena ni mukash.’ Kangal twavuramen anch chom chidia cha usey nakash chidi chitongijok chikwetay Yehova ni Yesu piur petu, kadiap cha akwetu tusadina nau mudimu ap arund netu a ku shikol.—Galatia 1:10.

Kukimbijol Mapit ma mu Spiritu

w17.07 paj 6-7 par. 13

Kimbany Mapit Makin

¹³ Timote wading ikundj wa ritiy. Kupwa kwa kumutazuk Timote anch “isalay muwamp wa Kristu Yesu,” Paul wamuleja anch: “Muntu usadila mudimu wa usalay ukatil kumusangarish mukurump wamwandjika ku mudimu, chawiy ndiy kakubangakup kand milong ya mwom wakad wa usalay.” (2 Timote 2:3, 4) In kwilej a Yesu nlel, pamwing ni miliyon umwing ni kusut wa antu adia mu mudimu wa chisu chawonsu, asadin usu mulong wa kusadin chiyul cha Paul. Akat kujijamen yoziu mulong wa kulik kwiyandjik mu mapiblisite ma mangand minam makweta ris. Akat kuvurik mbil yilondina anch: “Mwin kusondam ukat kwikal muswik wa mwin kumusondjik.” (Jinswir 22:7) Satan ukatin anch tusutish chisu chetu ni usu wetu wawonsu mulong wa kusadin mangand mend ma kwisak. Antu amwing akat kusondam nfalang jivud nakash mulong wa kuland chikumbu, motak, kwilej shikol ap kand mulong wa kusal musambu wa uruw. Anch tubabelap, tukutwish kwandam mu dibaz dia mivu yivud. Tumekeshin anch tusadidin manangu anch twapipej mwom wetu, twiyep mabaz ni twasadin nfalang mu mutapu uwamp. Mu mutapu winou tukwishadin mulong wa kumusadin Nzamb pa ndond pa kwikal asuk a yom ya kwisak ya mangand minam.—1 Timote 6:10.

wp14 1/7 paj 16 par. 10

Antu a Yehova “Afanyidin Kulik Yom Yiyimp”

¹⁰ Lel unou, antu a Yehova kakatap kurish yisu yawonsu nich malejan ma in kupumbwok a mu chikumangen. Pakwez, anch alejan mafundish makad kukwatijan ni ma mu Bibil, chikalap nchik ndond yimadioshinau, tufanyidin kukwat mupak ukash wa kumalik. Chikutwish kwikal kuburen manang anch twiyandjik mu kupwitijan ni in kupumbwok, chikal kumanijan mpal ni mpal, kusutil ku kwakul ku jinsangu jau, ap kusutil ku mitapu yin yawonsu ya kwambambin. Ap anch chitongijok chetu chidi cha kuyikwash antu, mambamb mudi minam makutwish kwikal chinyim ni umutakel upaninau mu Bibil utufanyidina kusadil. Chawiy lel, mulong tudi antu a Yehova, twipukany kamu rawonsu, tulikany malejan ma in kupumbwok.

NGOND WA 8 RUBING RA 12-18

YOM YA USEY YIDIA MU DIZU DIA NZAMB | TITUS 1–FILIMON

“Tond Amakurump a Yikumangen”

w14-F 15/11 p. 28-29

Yipul ya in Kutang

Ap anch mifund yirumburilap kamu mutapu watondangau amakundj pa chisu chinicha, pakwez yilejen yom yimwing yimekeshina mutapu wasalangau mwamu. Tutangin anch kupwa kwa kuchirik mu weny wau wa kusambish wa umishoner, Paul ni Barnabas, ‘atonda amakurump mu yikumangen yawonsu, alembila ni ajila yakudia, chad ayipana awonsu mu makas ma Yehova, mulong itiyija mudiay ndiy.’ (Midimu 14:23) Kupwa kwa mivu kanang, Paul wamufundina Titus mbay nend mwin kwendangan anch: “Wawiy mulong unakushila ey ku Kret, chakwel utenchik yo yashala yakad kufanyin, ni kutond amakurump ku mal mawonsu mudi munakwinka usu.” (Titus 1:5, TMK) Chilik chimwing, chimeken anch Timote niyend wenda nakash ni kambuy Paul watambula usu mudi winou. (1 Timote 5:22) Choviken patok anch kutond kwinoku akusala kudi atulam in kwendangan, kadiap kudi atwimbuy ap amakurump adinga ku Yerusalem.

Kusutil chilakej chinech cha Bibil, Chisak Chitakedila cha Atuman a Yehova charijekin mutapu wa kutond amakurump nau ankwash a mudimu. Kusambish machuku ma ngond 1 Ngond wa 9, 2014, kutond kukusadik mwamu: Kalam wa munyingumuku mwawonsu ukushinshikin nawamp kutond kusadilau mu munyingumuku wend. Chsu chikwendilay yikumangen ukusal usu wa kuyijik nawamp antu akimbinay kutond, anch chitwishikin kuya nau pamwing mu mudimu wa kulejan. Kupwa kwa kwisambin kutond kwinoku ni chisak cha amakurump, kalam wa munyingumuku ndiy ukweta chisend cha kutek amakurump ni ankwash a mudimu mu yikumangen yidia mu munyingumuku wend. Mutapu winou wa kusal ufanaken ni wasalangau mu mivu chitot ya kusambish.

Chisend ik chikwetay muntu ni muntu mu ditenchik dined dia kusal yom? Chisend cha kusambish cha ‘kashalapol ushinshamena ni kubabal’ chidi cha kudish in mudimu akwau. (Mateu 24:45-47) Chisend chinech chimwitin kand kwilej chikurikina Bibil kusutil ukwash wa spiritu utumbila, mulong wa kurumburil mutapu ufanyidina kusadil mbil ja Bibil jitadina mutapu wa kutenchik chikumangen cha pa mangand mawonsu. Kashalapol ushinshamena ndiy ukata kutond kand atulam a munyingumuku awonsu ni yid ya Biro wa Mutiy. Kupwa, biro wa mutiy ukat kupan ukwash mulong wa kusadin mbil jidiokila ku Chisak Chitakedila. Chisak chawonsu cha amakurump chikwet chisend cha kushinshikin nawamp anch akadivar awonsu atondinau mu chikumangen cha Nzamb awanyishin yom yitinau mu Bibil. Kalam wa munyingumuku win mwawonsu ukwet chisend chijim nakash cha kulembil ni kushinshikin nawamp yom yimulejinau amakurump ni kupwa ukutwish chad kutond amakundj awanyishina yitinau.

Kukimbijol Mapit ma mu Spiritu

w89-F 15/5 p. 31 par. 5

Yipul ya in Kutang

Kambuy Paul kitiyap yom yiyimp ap ya kasolikany yalondangau piur pa antu a mu Kret. Tukutwish kwikal ni kashinsh kinak, mulong Paul wading wij anch mu Kret mwading in Kristu awamp itiyijau kudi Nzamb ni azizilau many kusutil spiritu Wend utumbila. (Midimu 2:5, 11, 33) Mwading in Kristu ipanina mulong wa kusal yikumangen “mu mal mawonsu.” Ap anch in Kristu inay kadingap antu awanyidina, tukutwish kwikal nich kashinsh anch kadingap akamakasu ap in kupump kudia a chamwamu; anch chading mwamu ing Yehova kadandamenap kuyinkish dilau diend. (Filip 3:18, 19; Kujingunik 21:8) Mudi mutapu mudia kand mwamu nlel mu michid yawonsu, chimeken patok anch mu Kret mwading antu a kashinsh ading anenganena mulong wa mwikadil uyimp wa antu ading ayinyingumukina ni ading akatin kwitiy uruu wa win Kristu.—Ezekiel 9:4; ilikej ni Midimu 13:48.

w08 15/10 paj 31 par. 4

Manans Majim ma Mukand wa Titus, wa Filimon, ni wa in Hebereu

15, 16—Mulong wak Paul kamwitap Filimon kumulikishaku Onezim? Paul waswirikena kamu kushal ulamatina ku mudimu wend wa ‘kulejan want wa Nzamb ni kufundish yom yimutadina Nsalejetu Yesu Kristu.’ Pa chinech, ndiy watonda kulik kwiyandjik mu mashakamin ma antu avud, mudi pa yitadina mulong wa usuk.—Mid. 28:31.

NGOND WA 8 RUBING RA 19-25

YOM YA USEY YIDIA MU DIZU DIA NZAMB | HEBEREU 1-3

“Kat Kutentam ni Kis Kujip Chijil”

wp14 1/2 paj 10 par. 8

Mushimanany Kristu, Mwant wa Uyaj!

⁸ Yehova wamuteka Mwanend mudi Mwant Mesia wend mwiur mu muvu wa 1914. ‘Ditand dia want wend didi ditand dia kutentam,’ chawiy lel kutentam kwa want wend kudiaku. Want wend udi wakin, mulong ‘want wend amwinkishau kudi Nzamb.’ Chawiy lel, Yehova udi mufulandal wa want wend. Chikwau kand, want wa Yesu ukez kwikalaku ‘chikupu ni chikupu.’ Ov, usangaredinap kumusadin Yehova mwishin mwa umutakel wa Mwant mukash watondau kudi Nzamb?

wp14 1/2 paj 9-10 par. 7

Mushimanany Kristu, Mwant wa Uyaj!

⁷ Tang Kuseng 45:6, 7. Mulong Yesu wakata nakash kutentam ni wakisa chom chawonsu chela kukangesh kumulimish Tatukwend, Yehova wamuzizila many mudi Mwant wa Want wa Mesia. Yesu amuzizila nich “many ma musangar” kupandakanamu ‘akwau,’ mudi, mwant wa in Yuda wa mu dijuku dia David. Ov, mutapu ik? Chom chimwing chidi anch, amuzizila Yesu many kudi Yehova amwinend. Chikwau kand, Yehova wamuzizila many chakwel ikala Mwant ni Mwin Kupesh Mujim. (Kus. 2:2; Heb. 5:5, 6) Chikwau kand, Yesu kamuzizilap nich many pakwez amuzizila nich mwiku utumbila, ni want wend udiap wa pa mangand pakwez udi wa mwiur.

Kukimbijol Mapit ma mu Spiritu

it-1-F p. 1170 par. 4

Chifu

Ov, Yesu umekeshining chisu chawonsu chifu cha Tatukwend mu chilik chimwing?

Mwan wa kusambish wa Nzamb, weza kwikal Yesu kupwa, udi chifu cha Tatukwend. (2Ko 4:4) Choviken patok anch Nzamb wamuleja Mwan winou palonday anch: “El tumutanganyap muntu mu chifu chetu,” chinech chimekeshin anch chifu cha Mwan ni cha Tatukwend udia Sakatang chadingaku kudiosh kamu pamutangau Mwan. (Dis 1:26; Yh 1:1-3; Kol 1:15, 16) Padingay pa divu mudi muntu uwanyidina, wamekesha mikadil ni wuntu wa Tatukwend mu chilik chijim nakash nich mimbu ya an a antu, chawiy chatwishay kulond anch “wanmena kal am, wamumen kal Tatuku.” (Yh 14:9; 5:17, 19, 30, 36; 8:28, 38, 42) Pakwez, chifu chinech chapandakana nakash chisu chavumbukay nich mwom wa spiritu ni patambulay “ulabu wawonsu wa mwiur ni wa pansh” kudi Tatukwend, Yehova Nzamb. (1Pi 3:18; Mt 28:18) Mulong Nzamb wamuzambwisha Yesu “piur pa yom yawonsu,” Mwan a Nzamb wamekesha chad uyaj wa Tatukwend mu chilik chipandakena kujim kusutamu chadingay nich mwiur kurutu eza panap pa divu. (Fl 2:9; Heb 2:9) Katat udi ‘kamu chifu cha Nzamb.’—Heb 1:2-4.

it-1-F p. 478 par. 1

Diur

Mazu madia mu Kuseng 102:25, 26 mamutadin Yehova Nzamb, pakwez kambuy Paul umajimbwil kand anch mamutadin Yesu Kristu. Chidi mulong Mwan kapwokal wa Nzamb wading Muntu wasadinay amwinend mulong wa kutang mangand tumena ni mes. Paul walonda anch ang Nzamb wakata, wafanyina ‘kuvung mudi kabwik wa piur’ maur ni divu chakwel yilika kwikalaku. Chinyim ni chinech, Paul walonda anch Mwan a Nzamb wafanyina kwikalaku chikupu.—Heb 1:1, 2, 8, 10-12; ilikej ni 1Pi 2:3.

NGOND WA 8 RUBING RA 26–1 NGOND WA 9

YOM YA USEY YIDIA MU DIZU DIA NZAMB | HEBEREU 4-6

“Sal Usu wey Wawonsu Mulong wa Kwandam mu Kwiswedish kwa Nzamb”

wp11 1/1 paj 24-25 par. 3-5

Ov, Kwiswedish Kwa Nzamb—chom ik?

³ Kudi mayingish maad matukwashina kushiken ku kulond anch dichuku dia sambwad diading didandamedin mu mivu chitot ya kusambish C.C. Chakusambish, shinshikin yalonday Yesu kudi akankuny nend asambisha kumupompat mulong wokana pa dichuku dia Sabat, awiy amana anch chisal chinech chading chirumburikin kusal mudimu. Mwant wayileja anch: “Tatukwam ukat kusalang mudimu yisu yawonsu, chifanyidin niyam kusal mudimu.” (Yoh. 5:16, 17) Ov, pisu padinga mulong? Yesu amufisha nich mulong wasala mudimu pa dichuku dia Sabat. Palonday anch: “Tatukwam ukat kusalang mudimu yisu yawonsu” ndiy wayakula ku chitongijok chau. Chawiy lel, Yesu wading ukat kuyilej antu amufisha nich anch: ‘Am ni Tatukwam twipanin kal mu mudimu wa chilik chimwing. Mulong Tatukwam udandamedin kusal mu sabat wend wa mivu tunan, ndiy wanginkisha mbil ya kudandamen kusal ap pa dichuku dia Sabat.’ Chawiy lel, Yesu walejana anch piur pa divu, Sabat mujim wa dichuku dia kwiswedish dia Nzamb, dichuku dia sambwad, kapwap mu chirung chend.

⁴ Diyingish diakaad adilejen kudi kambuy Paul. Pajimbulay Disambishil 2:2 piur pa kwiswedish kwa Nzamb, Paul wafunda nich spiritu wa Nzamb anch: “Katat etu twitiyina tuyil ni kushik ku chisu cha kwiswedish kwinoku.” (Heb. 4:3, 4, 6, 9) Chawiy lel, dichuku dia sambwad diading dikat kudandamen pa chirung cha Paul. Ov, chirung cha kwiswedish chafanyidina kudandamen mu uvud wa machuku minch?

⁵ Mulong wa kwakul ku chipul chinech, tufanyidin kuvurik piur pa rutong ra dichuku dia sambwad. Disambishil 2:3 dirumburil anch: “[Nzamb] wadiyukisha dichuku dia sambwad, waditumbisha kand.” Dichuku dined ading akat ‘kuditumbish’—kuditokish ap kuditek kuns, kudi Yehova—mulong wa kuwanyish rutong rend. Rutong riner piur pa kushakam pa divu kudi amakundj ni amband aziyidila akeza kudilam ni kulam mwom wawonsu udiap. (Dis. 1:28) Chidi mulong wa kuwanyish rutong riner chawiy chidandamedinau Yehova Nzamb ni Yesu Kristu, ‘Mwant wa dichuku dia kwiswedish, kusalang mudimu yisu yawonsu.’ (Mat. 12:8) Dichuku dia kwiswedish kwa Nzamb dikez kudandamen djat ni pakeza kuwanyin rutong rend kwambatan nich yikeza kuwanyin kwinsudiel kwa Mivu Kanan ya Want wa Kristu.

wp11 1/7 paj 25 par. 6

Ov, Kwiswedish Kwa Nzamb—chom ik?

⁶ Rutong ra Nzamb amulejar Adam nenday Ev patok, pakwez awiy akanganya kuziyil. Mwaning, Adam ni Ev ading antu a kusambish alika kuziyil. Kudiosh pinipa kwikala kand ma miliyon ma antu mayilondula. Ap antu atondau kudi Nzamb, muchid wa in Isarel ni wawiy walika kuziyil. Chawiy lel, Paul wayikasikesha in Kristu a mu mivu chitot ya kusambish anch ap antu amwing pakach pau ela kuwil mu mupit mwawilau in Isarel a pasak. Ndiy wafunda anch: “Tusalany mwamu chakwel kangal muntu umwing wa pakach petu wawa mudi mwawau antu amwing mwi mpay alika kumuziyil Nzamb.” (Heb. 4:11) Tal anch Paul walejana anch kulik kuziyil kurumburikin kukangany kwandam mu kwiswedish kwa Nzamb. Ov, chirumburikin ik kudi etu? Anch twalik kuziyil ku rusot ra Nzamb mu mutapu kanang, ov tukutwish kukangany kwandam mu kwiswedish kwa Nzamb? Chimeken patok anch, chakul ku chipul chinech chidi cha usey nakash kudi etu, ni tukez kuchishinshikin kurutu. Pakwez, pa mulong winou, talany amboku yom yivud tukutwisha kwilej piur pa kwandam mu kwiswedish kwa Nzamb kusutil ku kushinshikin chilakej chiyimp cha in Isarel.

wp11 1/7 paj 27-28 par. 16-17

Ov, Kwiswedish Kwa Nzamb—chom ik?

¹⁶ Lel unou in Kristu akemp akutwish kusal usu wa kulam mikadil yimwing ya Chijil cha Moses chakwel atambula dipandish. Mazu mapepidilau ma Paul kudi in Efes malejen patok anch: “Chawiy chidi ku ranaken ra Nzamb kwawiy kuwapandilanya mulong wa ritiy ren. Dipandish dined kidiezap ku usu wen ayinen chidia kwau kupan kwa riy kwa Nzamb. Kichidiap mulong wa yom yiwasalanya, bwat, chad kwikil muntu ukutwisha kwibaz.” (Efes 2:8, 9) Katat, ov, chirumburikin ik kudi in Kristu kwandam mu kwiswedish kwa Nzamb? Yehova wateka kuns dichuku dia sambwad—dichuku diend dia kwiswedish—mulong wa kushikish rusot rend pantaliken ni divu ku kuwanyin kwa katumb. Tukutwish kwandam mu kwiswedish kwa Yehova—ap kwiswedish pamwing nend—kusutil ku kusal nich kuziyil kulondulijan nich rutong rend riyila kurutu mudi murilejenau kudi etu kusutil ku ditenchik diend.

¹⁷ Chikwau kand, anch twalik kutesh chiyul chidiokila mu Bibil chitutambwila kusutil ku chisak cha kashalapol ushinshamena ni kubabal, twatond kulondul mwikadil wa want ipau, tukez kwitek ayinetu mu kupwitijan nich rutong rilejenau ra Nzamb. Chinech chikutwish kuyipish urund wetu wa chisambu ni Yehova. Mu mutu wa mulong ulondwilaku, tukez kushinshikin mikadil yikemp yikutwisha kushiken kudi antu a Nzamb ni tukwisambin mutapu ukutwisha mipak tukwatina, ya kuziyil ap ya kulondul njil ya want ipau, kumekesh anch twandamin kal chakin kamu mu kwiswedish kwa Nzamb ap bwat.

Kukimbijol Mapit ma mu Spiritu

w16.09-F p. 13

Yipul ya in Kutang

Chom ik chirumburikina “dizu dia Nzamb” dilondinay Hebereu 4:12 anch ‘didi diom ni dikwet usu’?

Yom yisambidinau mu shapitre winou yimekeshin anch kambuy Paul wading wisambidin piur pa uruu utadina chitongijok cha Nzamb, mudi udia mu Bibil

Hebereu 4:12 akat kumujimbul nakash mu mikand yetu mulong wa kumekesh anch Bibil ukwet usu wa kuswimp mwom ya antu, ni chiwapin nakash kusadin verse winou mu mutapu winou. Pakwez, chiwapin kushinshikin Hebereu 4:12 kukwatijan ni yom yisambidinau mu shapitre winou. Paul wading uyikasikeshin in Kristu in Hebereu kusal pamwing mu kwovijan ni yitongijok ya Nzamb. Yivud pakach pa yitongijok yiney ading ayifundin mu mifund yitumbila. Paul wasadina chilakej cha in Isarel akwolau mu Idjibit. Ading ni ruchingej ra kwandam mwi ngand ya kushilamu “yizwila nich mayel ni woch,” ni mwinamwa afanyina kusanger kwiswedish kwakin.—Kub. 3:8; Kuv. 12:9, 10.

Chinech chawiy chading chitongijok cha Nzamb. Pakwez in Isarel achinchika mu michim yau ni kikalap kand ni ritiy, chawiy chasala anch avud akanganya kwandam mu kwiswedish kwinoku. (Kuch. 14:30; Jos. 14:6-10) Ap mwamu, Paul wawejinaku anch kwading ‘kushilamu kwa kwandam mu kwiswedish [kwa Nzamb].’ (Heb. 3:16-19; 4:1) “Kushilamu” kwinoku kudi niyawiy mu chitongijok cha Nzamb. Mudi in Kristu in Hebereu, tukutwish kwijik ni kusal pamwing mu kwovijan ni chitongijok chinech. Mulong wa kukasikeshin anch kushilamu kwinoku kwimedin pa mifund, Paul wajimbula tuyikunku twa mazu tudia mu Disambishil 2:2 ni Kuseng 95:11.

Chakin kamu, tufanyidin kusangar mulong ‘kushilamu kwa kwandam mu kwiswedish [kwa Nzamb] kuchidiaku.’ Tukwet kashinsh anch chiswapel kwandam mu kwiswedish kwa Nzamb kwashilaumu, ni tusadin usu mulong wa kwandamamu. Tusadinap usu wa kulimish Chijil cha Moses ap wa kwitapil dilau dia Yehova kusutil midimu yetu. Pakwez, nich ritiy tusadin nich musangar mu kovijan pamwing ni chitongijok cha Nzamb chilejenau ni tudandamedin kusal mwamu. Chikwau kand, mudi mulejenau kwiur oku, tunan twa antu pa mangand mawonsu twilejin Bibil ni kwijik chitongijok cha Nzamb. Avud akat kuswimp mashakamin mau, kwikal ni ritiy ni kwikal in Kristu abatishinau kal. Mutapu udiau umekeshin kamu patok anch ‘dizu dia Nzamb didi diom ni dikwet usu.’ Yitongijok ya Nzamb, mudi mutapu muyilejenau mu Bibil, yikwet kamu usu padi etu ni yidandamedin kwikal ni usu mu mwom wetu.

it-1-F p. 799 par. 7

Ruchingej

Ruchingej riner ra mwom wa chikupu ni ra kwikal ni mujimbu wakad kuvund rikwetau antu ‘atazukinau mwiur’ (Heb 3:1) Ridi kamu rakin ni chidi chom chikutwishau kuchingejin. Rimedin pa yom yaad yakad Nzamb kutwish kudimban, kwawiy kulond anch kushilamu kwend ni machip mend, ruchingej ridi mu Kristu, ukweta katat mwom wakad kufa mwiur. Chawiy chisadina alonda piur pa ruchingej riner anch ridi ‘mudi chom chikwadikidina ku mupim, ridi rakin ni kudandamen, ni kwandam kwinyim kwa diswin dialiminingau [mudi mutapu mwandamangay mwin kupesh mujim mu Kapalakany Katumbila Nakash pa Dichuku dia Kuchakwish], kwandamay Yesu mudi mwin kusambish wetu, wikala mwin kupesh wa pa mutu wa chikupu mu chilik cha Melkizedek.’—Heb 6:17-20.