Mareferans ma Mudimu ni Mashakamin ma Mukand wa Chikumangan
© 2025 Watch Tower Bible and Tract Society of Pennsylvania
RUBING RA 5-11 NGOND WA 5
YOM YA USEY YIDA MU DIZU DA NZAMB JINSWIR 12
Kusal Mudimu ni Mushiku Kukat Kulet Yiyukish
w16.06 paj 30 par. 5
Mwikadil wa Winzamb Ukweta Usey Nakash Kusutamu Kamang
Chikutwish kuyikasiken atushalapol amwing a Yehova kwikal ni nfalang jiwanyidina mulong wa kuwanyish maswir mau. Pakwez pa ndond pa kusal mudimu uswapela ukuyisala ikala akad kashinsh, asadining mudimu ni usu wau wawonsu. Pasadiningau mwamu, amekeshining anch mikadil yiwamp ya Nzamb kuwejinaku win kashinsh yidi ya usey kusutamu yom yawonsu ya ku mujimbu.—Jnsw. 12:24; Efes 4:28.
w15 1/2 paj 5 par. 4-6
Mutapu wa Kusanger Mudimu Ukash
Chipul cha nsudiel ech chidi chiwamp pakampwil kuchitongijokin, mulong mudimu ukat kusangaresh nakash anch twijik mutapu ukatau antu akwau kutaninamu. Yesu amwinend walonda anch: “Chiyukish cha mwin kupan chipandakenamu cha mwin kutambul.” (Midimu 20:35) Kuwejinaku ku antu akata kutaninamu kapamp kamwing kusutil ku midimu yetu—mudi in kuland yom ni in kulandish—kudi antu akwau kand akata kutaninamu mu mudimu wetu. Pakach pa antu inay padi antu a mu dijuku dietu ni antu akweta kuswir kwa ukwash.
Antu a mu dijuku dietu. Anch mutu wa dijuku wasal mudimu ukash mulong wa kuyidish antu a mu dijuku diend, ukat kusal anch ataninamu mu mitapu yikemp yaad. Chakusambish, ukat kusal usu wa kwikal ni kashinsh anch akwet yom ya kumujimbu yikwetau nich kuswir—yakudia, maswin, ni ndond ya kulal. Mwamu uwanyishin chisend chend chamwinkishau kudi Nzamb cha “kuyilam anamakwend.” (1 Timote 5:8) Chakaad, usu usadinay wa kuyidish uyifundishin mu chilakej kusal mudimu wa usey. Shane ujimbwilau mu mutu wa mulong wasuta kal ou ulondin anch, “Tatukwam udi chilakej chijim kudi muntu ukweta chitongijok chiwamp cha mudimu. Wading mwin kashinsh wasala nakash mu mwom wend wawonsu, wasala nakash mudi mwin kusong mabay. Kusutil ku chilakej chend, nileja usey wa mudimu nich makas mend, kusal yom yikeza kwikal ya usey kuyisadin mulong wa muntu mukwau.”
Antu akweta kuswir kwa ukwash. Kambuy Paul wayiyula in Kristu anch chifanyidin “kusal mudimu wakin chakwel ikwasha [ayinau] ni kuyikwash kand aburedina.” (Efes 4:28) Chakin kamu, anch twasal mudimu ukash mulong wa kwikwash ayinetu ni dijuku dietu, tukutwish kand kwikal ni mutapu wa kuyikwash antu aburedina. (Jinswir 3:27) Chawiy lel, mudimu ukash ukutwish kutukwash chakwel twova musangar ujim udiokila ku kupan.
Mapit ma mu Spiritu
ypq chipul cha 5 paj 16 par. 1-3
Nikusal Nchik Anch Ansarumun ku Shikol?
● KANGAL WAKUL. Bibil ulondin anch: “Chisup ukat kumekesh ujim wend wawonsu, pakwez mwin manangu ukat kuudutish.” (Jinswir 29:11) Anch waninet—mu chisu chiwanyidina—antu akusarumwina akulik.
● KANGAL WASAL UYIMP. Bibil ulondin anch: ‘Kangal wachirishany uyimp ku uyimp.’ (Rom 12:17) Kukimb kufundakesh kukat kuyipishang yom.
● IPUK MILONG. Bibil ulondin anch: “Muntu wa manangu anch waman yom yikash, ukat kujingam.” (Jinswir 22:3) Anch kudi mutapu, ipuk antu akutwisha kuletish milong ni ipuk yom yikutwisha kusal anch antu akusarumuna.
RUBING RA 12-18 NGOND WA 5
YOM YA USEY YIDA MU DIZU DA NZAMB JINSWIR 13
Kangal Witiy “Mwend wa Kasu wa Muntu Muyimp” Ukudimba
it-2 paj 196 par. 2-3
Mwend wa Kasu
Kusadin Kukwau kwa Chifanakesh. Chom chisadidinay muntu mulong wa kumunyik mwi njil yend achifanakeshin nich mwend wa kasu. Chifanakesh chinech achisadidin mu jinswir mulong wa kumekesh kushalijan pakach pa muntu utentamina ni muntu muyimp: “Kutok kwa in kutentam kukat kumunyik ni musangar, pakwez mwend wa kasu wa muntu muyimp akuujimish.” (Jnsw 13:9) Chitokish cha antu atentamina chikat kudandamen kuzaz, pakwez ap anch mwend wa kasu wa muntu muyimp ukat kumekan mud uzazin ni kumekan anch uyil kurutu, Nzamb ukusal anch mwi njil yend mwikala mididim yikumushikija ku kwipwakal. Ni yawiy kamu yikumushikena muntu mwawonsu ukukimba uyimp wa tatukwend ap makwend.—Jnsw 20:20.
Kulond anch ‘mwend wa kasu wa muntu ujimin’ kurumburikin anch muntu kakwetap ruchingej ra machuku ma kurutu. Jinswir mukwau ulondin anch: “Muntu muyimp kakwetap ruchingej ra kurutu. Mwend wa kasu wa muntu muyimp ukuujimish.”—Jnsw 24:20.
w12 1/7 paj 17 par. 3
Musadila Nzamb Mwin Want Ipau
3 Anch Satan watwisha kuyidimb antu aad awanyidina—pakad kujimbul yitangil yivud ya mu spiritu—chakwel alika ukaleng wa mangand mawonsu wa Nzamb, ukutwish kukudimb niyey. Mutapu wend wa kusal yom udi kwend winiwa. Ndiy upakishin kutudimb chakwel tutonga anch yany ya Nzamb yilimina nakash, yitukishin musangar. (1 Yoh. 5:3) Yitongijok yiney yikutwish kwikal nich usu pad etu anch twadandamen kuyitesh. Nambaz umwing ukweta mivu 24 wiyandjika mwinjil ya masandj walonda anch: “Arund ayimp ikal ni usu ukash padi am, pakampwil mulong nova wom wa kwikal nich yitongijok yakad kwambatan nich ya arund nam.” Wamen kal pamwing ap niyey yibachikin ya arund mudi yiney.
w04 15/7 paj 31 par. 6
“Muntu Mwawonsu wa Manangu Ukat Kusal ni Ronganyin”
Muntu utentamina ni ukweta manang, ukata kusal yom nich ronganyin, akumuyukish. Salomon utwinkishin kashinsh anch: “Mwin kutentam ukwet yakudia yiwanyidina ya kwikut, pakwez divumu dia muntu muyimp dikat kudil nzal.” (Jinswir 13:25) Yehova wij yom yida yiwamp kud etu mu yom yawonsu ya mu mwom wetu, chikala piur pa dijuku, urund wetu ni antu akwau, mudimu wetu wa kulejan, ap anch atupup. Anch twasadin yiyul tutanina mu Dizu dend, tukwikal ni mwom usangareshina nakash.
Mapit ma mu Spiritu
“Tang Matu ku Mazu ma in Manangu”
15 Bibil utukasikeshin kwit chiyul. Jinswir 13:10 ulondin anch: “Manangu madi kudi awiy akata kutambul chiyul.” Winou ud kamu uyakin! Antu itining chiyul pa ndond pa kuchingel chakwel muntu iyezinap amwinend mulong wa kuyiyul, yisu yivud akat kukul nakash mu spiritu kusutamu antu akad kwitang chiyul. Chawiy, sal rizau ra kusambish mulong wa kwit chiyul.
16 Chisu ik tufanyidina kwit chiyul kud mbay netu mwin Kristu? Shinshikin yilakej yimwing. (1) Nambaz ukat kumwit mwin kulejan ukweta ukaliweny nakash chakwel amutwalaku kutakel dilejan dia Bibil, ni kwinsudien wamwit kal chiyul piur pa mutapu ukutwishay kuwapish mutapu wend wa kufundish. (2) Nambaz udia mujich ukimbin kuland masun, chawiy wamwit kal nambaz uswila mu spiritu chitongijok chiwamp piur pa masun mafanyidinay kutond. (3) Mukadivar amutond kal kapamp kend ka kusambish mulong wa kusal diskur dia antu awonsu. Kupwa wamwit kal mukadivar ukweta ukaliweny wa kusal madiskur chakwel atesh pirijekinay ni kumwinkish yiyul piur pa mutapu ufanyidinay kuwapish. Ap mukadivar wasadina kal madiskur mu mivu yivud ukutwish niyend kwit chiyul kud mukadivar ukweta ukaliweny wa kusal madiskur ni kusadin yiyul yikumwinkishau.
17 Mwi mbing ap angond alondwilaku, etu awonsu tukutambul yiyul, pamwing ap kusutin mwin Kristu uswila mu spiritu, ap kusutin kutang Bibil ap mikand yimedina pa Bibil. Anch chom chinech chashiken, vurik malejan twileja kal. Shal wikepishina. Shinshikin pa malejan madia mu chiyul, kadiap pa mutapu uchipaninau. Ni sadin chiyul watambula kal. Kwikil umwing wa pakach petu wavadika ni manangu. Pakwez anch ‘twatesh chiyul ni kwitiy kupup,’ Dizu dia Nzamb ditukanin anch tukez ‘kwikal ni manangu.’—Jnsw. 19:20
RUBING RA 19-25 NGOND WA 5
YOM YA USEY YIDA MU DIZU DA NZAMB JINSWIR 14
Shinshikin Chom Chawonsu Usadina Anch Kwashiken Chinship Chikash
Kwat Nich Usey Chipan Chatwinkishay Nzamb—Mwom
10 Yisu yimwing tukutwishap kukangesh yishiken yikutwisha kutek mwom mu ubaj, pakampwil yom mud mar madiokila ku yom yatangau, yipupu, ni kupwitamijan kwa yisak kushalijan. Pakwez anch yom mud yiney yashiken, tukutwish kwipuk ubaj ni kupandish mwom kusutil kuziyin kwi mbil jilejena mutapu wa kuchin, ni mbil jikwau ja antakel a ngand. (Rom 13:1, 5-7) Ubaj umwing tukutwish kuwipuk, chawiy chid cha usey kusadin yiyul yipaninau antakel a kwi ndond tushicha piur pa mutapu wa kwirijek mulong wa mar makutwisha kushiken. Chilakej, chikutwish kwikal cha ukwash kulam mem, yakudia yakad kuyipang swa, ni mon.
11 Yom ik tufanyidina kusal anch kwi ndond tushicha kud mayej masamburokina? Tufanyidin kusadin yiyul yipaninau antakel a ngand, mud yiyul yitadina kowal ku makas, kulimish chintamp, kudjal mask, ni kutekan mu karanten. Anch twasal yom yiney, tukumekesh anch tukwatin nich usey nakash chipan cha Nzamb, mwom.
12 Pa chisu cha mar, tukutwish kutesh jinsangu ja makasu kud arund netu, amutej netu, ni ku ma radio ap ma televizion. Pa ndond pa kwitiyij “mazu mawonsu” tuteshina, tufanyidin kutesh yom yilejenau ku misul ya jinsangu ya kuchingejin ya mburamatad ni ya milong ya rupital. (Tang Jinswir 14:15.) Chisak Chitakedila ni ma biro ma mitiy akat kusal usu wa kukimb jinsangu jakin kurutu kwa kupan umutakel piur pa yikumangan ni mudimu wa kulejan. (Heb. 13:17) Anch twaziyin ku umutakel utwinkishinau, tukwichidij ayinetu ni kuyichidij kand antu akwau. Tukuyikwash kand antu akwau kwikal ni chitongijok chiwamp piur pa Atuman a Yehova.—1 Pita 2:12.
Ikal Utakamena Mud Sadok
11 Anch atwit kuyikwash akadivar mu yirung ya ubaj, mutapu ik tukutwisha kumekesh kutakaman mud kwamekesha Sadok? (1) Londul umutakel. Pa yisu mud yiney, chikwikal cha usey kushal mu uumwing. Yitin kuziyin kwi mbil jidokila ku mutiy wa mwi ngand yen. (Heb. 13:17) Amakurump afanyidin ushinshikin chisu chawonsu mbil jitadina piur pa kwirijek mulong wa mar madokila ku yom yatangau ni yom yifanyidina kusal anch mar minam mashiken. (1 Ko. 14:33, 40) (2) Ikal utakamena kusutin antu akwau. (Jsw. 22:3) Kurutu kwa kusal yom ufanyidin kutong. Kangal wiyandjikish mu ubaj. (3) Muchingejina Yehova. Vurik anch Yehova ukubangidin nakash ey ni akadivar ney. Ukutwish kukukwash chakwel uyikwash akadivar ney kwikal mu diking.
Mapit ma mu Spiritu
Mutapu wa Kukwat Mipak Yiwamp
2. Yom ik ufanyidina kutongin kurutu kwa kukwat mupak?
Bibil ulondin anch: “Muntu ubabela ukat kushinshik kuyilay.” (Jinswir 14:15) Chinech chirumburikin anch kurutu kwa kukwat mupak, tufanyidin kwitekin chisu cha kutongin piur pa mipak yetu. Piushinshikidina mupak ukimbina kukwat, iyipula anch: ‘Mbil ik ya Bibil yitadina mulong winou? Mupak ik ukwinkwasha kwikal ni chisambu cha mu manangu? Mupak wam ukwikal ni yibudikin ik pad antu akwau? Ni cha usey nakash, ov, ukumusangaresh Yehova?’—Kuvurik Yijil 32:29.
Yehova ukwet mbil ya kutulej yom yidia yiwamp ni yidia yiyimp. Anch twijik nawamp yijil yend ni mbil jend, ni twasal usu wa kujilondul, tukufumb kom ketu. Kom ud nchakal wa mukach ukata kutulej anch yom yiwapin ap yiyipin. (Rom 2:14, 15) Kom kafumbinau nawamp kakutukwash kukwat mipak yiwamp.
RUBING RA 26 NGOND WA 5–1 NGOND WA 6
YOM YA USEY YIDA MU DIZU DA NZAMB JINSWIR 15
Yikwasha Antu Akwau Kwikal ni Musangar
w10 1/11 paj 31 par. 16
Tufanyidin Kwendil Mu Kashinsh!
16 Job wading mwin kuyak aeny. (Job 31:31, 32) Ap anch tukutwishap kwikal a mpich, tukutwish ‘kuyak aeny ku yikumbu.’ (Rom 12:13) Tukutwish kupan yakudia kudi antu akwau, ni kuvurik anch “chidi chiwamp kudia yom ya mayij kusu anch kudi rukat, kupandakan kudia mbij ja ngomb wa many anch kudi kukis.” (Jinsw. 15:17) Kudia pamwing ni ambay netu in kashinsh mu mwikadil wa rukat kukutwish kusal anch yakudia yikemp yikala yom ya musangar ni yikez kwikal chakin kamu dikasikesh mu spiritu.
“Tupandakeshany Kukasikeshijan” Umwing ni Mukwau
16 Chikwikal nchik anch umen anch chikukasikedin kuyilej antu akwau mutapu wiyovila piur pau? Chakin, chikasikenap kwau kuyikasikesh antu akwau. Sal usu wa kumusipish muntu. Anch niyend kasipinap, pamwing ap ukwet mulong ni uswirikedin muntu kampand wa kwambamb nend. Ukutwish kumwongoj anch wamutesh nawamp palondinay.—Jak. 1:19.
17 Mukadivar umwing nsand utazukinau anch Henri wajimana nakash chisu chalikau anamakwend a piswimp avud kumusadin Yehova. Umwing wa pakach pau wading tatukwend, ni wading mukurump wa chikumangen. Kalam wa munyingumuku umwing wamana anch Henri wading ukwet ushon ni wamusenda mulong wa kuna nend kafe. Wamutesha nawamp Henri chisu chading chimulejinay yovil yend. Henri wajingunina anch mutapu umwing ukutwishay kusal mulong wa kukwash dijuku diend kushal mu uyakin udi wendendiy kushal ushinshamena. Wikala kand ukasikeshinau patangay Kuseng 46; Sofoniy 3:17; and Marko 10:29, 30.
18 Yom ik tukutwisha kwilejin kusutin yom yamushikena Marthe ni Henri? Etu awonsu tukutwish kumwongoj ni kumukasikesh mukadivar ap nambaz udia mu maswir. Mwant Salomon wafunda anch: “Chidi chom cha musangar kudi muntu kwikal ni dizu pa chisu chidiburedinau, ni dizu dia mu chisu chau didi diwamp.” (Jnsw. 15:23, 30) Ov, ukutwish kutong piur pa muntu kanang wija uziyina ap ukweta ushon? Umenap anch chidi chiwamp kusal chom kanang mudi kumutangin Chinong cha Kalam ap kumulej yom yidia pa kapend ka web? Chikwau kand, Paul wafundisha anch kuwang miminy ya Want pamwing kukutwish kusal anch twiyova nawamp. Wafunda anch: “Lejijanany ni kubabeshijanany umwing ni mukwau nich manangu mawonsu. Muwangilany Nzamb miminy ya kuseng, ni miminy ya win Kristu, ni miminy ya kumushiman, muwangilany [Yehova] nich kujikitish mu michim yen.”—Kol. 3:16; Mid. 16:25.
Mapit ma mu Spiritu
ijwbq mutu wa mulong wa 39 par. 3
Ov, Mwin Kristu Ukuwish Kwitiy Milad ya Kwiyokish ya Chimwingang?
2. Ov, nifanyidin kusadin mulad wa kwiyokish nich wa chimwingang wa kaad ap wa kasatu? “In chiyul avud” akutwish kwikal a usey, pakampwil anch mayej makasiken kamu.—Jinswir 15:22.
RUBING RA 2-8 NGOND WA 6
YOM YA USEY YIDA MU DIZU DA NZAMB JINSWIR 16
Yany Yisatu ya mu Bibil Yikutwisha Kukukwash
w14 1/1 paj 19-20 par. 11-12
Tondany ni Manangu mu Usand Wen
11 Musangar wetu ujim nakash udiokiling ku kumusadin Yehova. (Jnsw. 16:20) Chimeken anch Baruk, kalerik wa Jeremiy wavuramena chom chinech. Pa chisu chimwing, kasangerap kwend mudimu wa Yehova. Yehova wamuleja anch: ‘Ey ukat kukimb yom yijim mulong weyey amwiney. Kangal wadandamen kuyikimb. Am nikat kulet kusheshik kudi antu awonsu, . . . ni nikez kupandish mwom wey kwawonsu ku ukeza kuya.’ (Jer. 45:3, 5) Chom ik utongina? Ov, chom ik chela kumwinkish Baruk musangar—kukimb yom yijim bil anch kupand ku kusheshik kwa Yerusalem mudi mwin kumusadil Nzamb ushinshamena?—Jak. 1:12.
12 Mukadivar umwing watana musangar mu kuyisadil antu akwau udi Ramiro. Ulondin anch: “Nidiokil mu dijuku dia atuzwendj didia mu ka ul kakemp ka mu Mikandu ya ku Andes (mu amerique wa kurul). Chawiy lel, panlejay yayam anch anfutina shikol ya piur, chading chom chimwing chijim nakash. Pakwez, nadi nadiokal kal lel ku kutambul dibatish mudi umwing wa Atuman a Yehova, ni nasambisha kusal mudimu ukwau—chibol umwing wantazuka chakwel nisambisha kulejan pamwing nend mu ka musumb kamwing kakemp. Pinashika kwinikwa, nileja kukil nswich, ni nafungula chikumbu cha kukilan nswich mulong wa kuwanyish maswir mam ma kumujimbu. Pitwasambisha kuyilej antu Dizu dia Nzamb, avud itiya ni musangar. Kupwa, nasambisha kukumangan mu chikumangen chisu mwading mulondinau dizu diam dia chivadik. Nikwet katat mivu dikum mu mudimu wa chisu chawonsu. Kwikil mudimu ukwau wela kwinletin musangar nova mu kuyikwash antu chakwel ileja rusangu ruwamp mu rudim rau ra chivadik.”
w13 1/9 paj 17 par. 1-3
Ov, Akukarumunany Kal?
MUNTU ni muntu pakach petu amubachikining nakash kulondul mutapu wamulilau ni ndond yishichay. Tukatining kudjal mu mutapu kanang; tukatining yakudia kanang ni tusadining yom mu mutapu kanang. Mulong wak? Ku mutambu umwing, chidi mulong wa chibachikin cha antu atunyingumwokina ni ku mutambu ukwau mulong wa yishiken yetu ya mu mwom.
2 Pakwez, kudi yom yidia ya usey nakash kupandakanamu kutond kwetu kwa yakudia ni kwa mutapu wetu wa kudjal. Chilakej, atufundisha kuman yom yimwing anch yiwapin ap ayitiyijin, ni kulik yom yikwau yiyipina ap yakad kwitiyij. Milong yiney yidi ya muntu panrend ni yishalijadin kulondulijan ni muntu ni muntu. Yitusadina yikutwish ap kumekesh ukash wa kom ketu. Bibil ulejen anch yisu yivud “antu a michid yikwau katambulap Yijil ya Moses . . . akat kusal mudi mulejenau mu Yijil yiney.” (Rom 2:14) Chinech chirumburikin anch, ang kwikil chijil cha Nzamb chovikena patok, ov, tukutwish kulondul kusu mitapu ap yany yatufundishau ni yilondwilau mwi ndond mutudia?
3 Kudi mayingish maad ma usey masadina anch mwin Kristu kafanyidinap kwikal mwamu. Chakusambish, Bibil utuvurishin anch: “Kudi njil yimwing yikatay kutongay muntu anch yitentamin, pakwez kwisudiel kway yidi njil ya rufu.” (Jinsw. 16:25) Mulong wa mwikadil wetu wakad kuwanyin, etu antu tukwetap ukaliweny wawonsu wa kujingunin chidia chakin kamu cha usey kudi etu mulong wa kuyikel jinzau jetu mu mutapu uwanyidina. (Jinsw. 28:26; Jer. 10:23) Chakaad, Bibil ulejen anch yibachikin ni yijil ya mangand ayitakedil ni kuyiyikel kudi Satan, “mukish uyikedila mangand minam.” (2 Kor. 4:4; 1 Yohan 5:19) Chawiy lel, anch tusotin kutambul chiyukish ni dilau dia Yehova, tufanyidin kutesh chiyul chidia mu Rom 12:2.—Tang.
Mapit ma mu Spiritu
Kangal Akupumbul Nich “Manangu ma Mangand Minam”
Bibil ulondin anch: “Muntu mwawonsu ukweta muchim wa kwibaz utakanen kurutu kwa [Yehova].” (Jnsw. 16:5) Mulong wak Yehova uyikisin antu in kwibaz? Diyingishin dimwing didi anch antu akata kukudish ni kumekesh mwikadil wa kwikat ayinau imburijin kwibaz kwa Satan. Tongijok bil, Satan watonga anch Yesu—wasadinau kudi Nzamb mulong wa kutang yom yawonsu—ufanyidin kumwasin manungin ni kumwifukwil! (Mat. 4:8, 9; Kol. 1:15, 16) Antu imena ayinau anch akwet usey nakash amekeshin patok anch manangu ma mangand madi usup ku mes ma Nzamb.
RUBING RA 9-15 NGOND WA 6
YOM YA USEY YIDA MU DIZU DA NZAMB JINSWIR 17
Sanger Chisambu mu Uruw wey
g 9/14 paj 11 par. 2
Mutapu wa kulik kulam rukuny
Ishinshikina Amwiney Nich win Kashinsh. Bibil ulejen anch antu amwing ad ‘in ujim’ ni ‘in kusul ku muchim swa.’ (Jinswir 29:22) Ov, niyey mwawiy uding? Iyipula anch: ‘Ov, nikweting chaku cha kulam rukuny? Nikat kujiman swa? Nikatining kujimbish milong?’ Bibil ulondin anch “muntu ukata kuvurok milong ukat kujip urund.” (Jinswir 17:9; Mulej 7:9) Chikutwish kand kwikal mwamu mu uruw. Chawiy anch wamana anch ukimbin kusambish kwikal ni chaku cha kulam rukuny, iyipula anch: ‘Ov, chingitinap kumushimpishin mbay nam wa uruw muchim?’—Mbil ya Bibil: 1 Pita 4:8.
w08 1/7 paj 20 par. 6-21 par. 1
Mutapu wa Kupwish Milong
1. Itekinany chisu cha kwisambin mulong. “Kudi chirung cha yom yawonsu, . . . kudi chisu chimwing cha kuninet, kudi chisu chikwau cha kulond.” (Mulej 3:1, 7) Mudi mwachilejanangau mu kutandikijan kudia kwiur oku, milong yimwing yikutwish yalangwish yovil yikash. Anch chom chinech chashiken, ilama amwiney chakwel witudishaku—chakwel “kuninet”—kurutu ujim usweja. Ukutwish wachidijany urund wen ku milong yikwau yivud anch wateshany chiyul cha Bibil chilondila anch: “Disambishil dia matend didi mudi kusambish kujikul mem, chawiy lik piwakadia kal kusambish matend.”—Jinswir 17:14.
Pakwez, kuding kand “chisu chikwau cha kulond.” Milong yiding mudi masuku mayimp, makat kuvulijan anch wamadiulany. Chawiy komb kangal wadiwulany mulong, nich kutong anch ukwipwil kwau. Anch wimikany kutadikijan, mulimisha mbay ney ni kimb chisu chindjing pakad kulabijok chiukwisambinanya pa mulong winou. Kushilamu kwinoku kukutwish kwakukwashany en awonsu aad kusadil yilondila chiyul cha Bibil chinech: “Kangal muten wandam ni ujim wey.” (Efes 4:26) Chakin kamu, ufanyidin kamu kulam kushilamu kwey.
Mapit ma mu Spiritu
Dandamen Kutaninamu mu Kumwov Nzamb Wom
Diyingishin dia usey ditubachikina kuchidij muchim wetu wa chifanakesh did anch Yehova ukat kuushinshikinang. Chinech chirumburikin anch ukat kuman yom yakadiau antu akwau kuman ni wij wuntu wetu wa mukach. (Tang Jinswir 17:3.) Ukutukat anch twadandamen kutongijokin pa yiyul yend yiletina mwom. (Yoh. 4:14) Chawiy mwamu tukwichidij ku kwijond ni makasu ma Satan ni ma antu ayimp. (1 Yoh. 5:18, 19) Pitudandamedina kumusejin Yehova piswimp, rukat ni kalimish ketu mulong wendendiy yikupam. Mulong tusotinap kumunenganesh Tatukwetu, tukusal usu wa kukis chitongijok chawonsu chikutwisha kutushikij ku kusal chitil. Anch atupak kusal yom yiyimp, tufanyidin kwiyipul anch: ‘Mutapu ik nikutwisha kumunenganesh kwa kwisotin muntu wamekeshina rukat rijim mud riner?’—1 Yoh. 4:9, 10.
RUBING RA 16-22 NGOND WA 6
YOM YA USEY YIDA MU DIZU DA NZAMB JINSWIR 18
Mukasikesha Muntu Uyedina Chisu Wambambina Nend
Manangu Makin Makat Kutazwok
17 Tong kurutu kwa kulond. Anch tubabelap, mazu metu makutwish kuyisal antu akwau nayimp. Bibil ulondin anch: “Kudi amwing akata kulond mazu makash mudi kutap kwa mpak ya musamun, pakwez jindim ja in manangu jikat kwokan.” (Jnsw. 12:18) Tukat kulam urund uwamp anch twipuk kulondol piur pa kurumbuk kwa antu akwau. (Jnsw. 20:19) Chakwel mazu metu mikal min kokan pa ndond pa kutapan, tufanyidin kwinzwish mu muchim wetu nich ronganyin ra Dizu dia Nzamb. (Luka 6:45) Anch twatongijokin pa yom yilondinay Bibil, mazu metu makwikal mud “musul wa manangu” makuyikasikesha antu akwau.—Jnsw. 18:4.
mrt mutu wa mulong wa 19 mushet
Mutapu wa Kurish Nich Mayej Mashikedina Pakad Kutongin
Ikal mwin kutesh nawamp. Mutapu uwamp nakash wa kumukwash muruney ud wa kumutesh chisu chilondinay. Kangal watong anch ukwet kuswir kwa kwakul ku yom yawonsu yilondinay. Yisu yivud kumutesh muntu kwawiy kuding kwa usey. Kangal wamurumburish, chikalap nchik yom yilondinay. Kangal watong anch uteshin mutapu wiyovilay, pakampwil anch mayej mend mamekenap ku mes.—Jinswir 11:2.
Lond yom yikasikeshina. Yisu yimwing ukutwish kuburen ya kulond, pakwez kulondaku ap mazu makemp kusu mamekeshina anch ubangidin yom yimushikedina muruney kukutwish kumukasikesh nakash pa ndond pa kuninet. Anch uburedin mazu ma kulond, pakish kulond yom yikemp pakwez yidokila ku muchim, mud: “Nijap kamu mutapu wiyovila, pakwez ikal nich kashinsh anch nikubangidin.” Ipuk kusadin mazu mud: “Yom yafanyinang kuyip” ap “Waying kwey mulong . . . ”
Ukutwish kumekesh anch umubangidin muruney kusutin kukimb kwijik nsang jivud piur pa mayej makwetay. Muruney ukutwish kusanger usu usadin mulong wa kwijik yikokujol yirishinay nich, ni yom ukulonda yikukwatijan ni yom yimushikedina. (Jinswir 18:13) Pakwez, babal chakwel kangal wamwinkish chiyul chakaday kwikal nich kuswir.
Pan ukwash. Pa ndond pa kutong anch wij mutapu ukutwisha kumukwash, mwipula yom ukutwisha kusal. Pakwez vurik anch, muruney ukutwish kulik kwitiy anch ukwet kuswir kwa kumukwash, yawonsu yiney mulong kakatinap kumekan mud ud chisend. Anch chid mwamu, pakish kumwipul yom ukutwisha kumusadin, pamwing chikukwit kumulandinaku yom, kumurijekin ku chikumbu, ap yom yikwau kand.—Galatiya 6:2.
Kangal waziy. Parishinay muruney ni mayej, yisu yimwing ukutwish kulikap yom wambambanya kusal ap kulik kwov ja kwambamb ney. Mushimpishina muchim ni mwova kurumburik. Dandamen kumwinkish ukwash uswirikedinay.—Jinswir 18:24.
wp23.1 paj 14 par. 3-15 par. 1
utapu wa Kuyikwash Antu Akweta Milong ya Ukash wa mu Manangu
“Yikwashany aziyila.”—1 TESALONIK 5:14.
Murund ney ukutwish kwikal ni yakamish ni ukutwish kurish ni yovil ya kwiman mud kakwetap usey. Anch wamwinkish kashinsh anch umubangidin, ukutwish kumwongoj ni kumukasikesh ap anch wijap kamu yom ufanyidina kulond.
“Murund [wakin] ukat kumekesh rukat machuku mawonsu.”—JINSWIR 17:17.
Mwinkisha ukwash uswirikedinay. Pa ndond pa kutong anch wij mutapu ufanyidina kumukwash, mwipula yom ufanyidina kumusadin. Anch chimukasikedin murund ney kukulej yom yikwetay nich kuswir, sal usu wa kumulej yom ukutwisha kusalany nend pamwing mu kusutish nend chisu pamwing. Ap ukutwish kuya kumulandin yom, kumututin ap kumukwash kand kusal yom kanang.—Galatia 6:2.
‘Shimpish muchim.’—1 TESALONIK 5:14.
Murund ney kakutwishap chisu chawonsu kukulej yom kapamp kamwing. Mukasikesha anch ukusanger kutesh yom yikukulejay pa chisu chikukatay kulond. Mulong murund ney uyedin, ukutwish kulond ap kusal yom yikutwisha kukujimesh. Ukutwish pamwing ap kuswimp yom watenchikang kusal nend pamwing ap kukujimen. Shimpish muchim ni mutesha chisu umukwashina.—Jinswir 18:24.
Mapit ma mu Spiritu
Yehova Ukukukwash pa Yirung Yikash
13 Yom tufanyidina kusal. Kangal kwiyauril nau akwen. Anch twiyauril nau akwetu, rusot retu ra kusal yom rikukep, ni tukusambish kushinshikin pa maku metu ayinetu ni pa milong tukweta. Yitongijok ya mutapu winou yikutwish kwikal ni yibudikin pa mipak yetu tukwatina. (Jnsw. 18:1) Chakin kamu, etu awonsu kud chisu tukatining kwikal ayinetu, pakampwil anch turishin ni yishiken yikash. Pakwez, anch twiyauril nau akwetu tukwikal ni yakamish mu chisu chilemp, tukutwish kulik ukwash wa antu akwau asadidinay Yehova mulong wa kutukwash. Chawiy anch tud mu yirung yikash, itiy ukwash wa dijuku dey, wa arund, ni wa amakurump a chikumangen. Yimana anch Yehova uyisadidin mulong wa kukukwash.—Jnsw. 17:17; Isay 32:1, 2.
RUBING RA 23-29 NGOND WA 6
YOM YA USEY YIDA MU DIZU DA NZAMB JINSWIR 19
Ikal Murund Muwamp kud Akadivar nau Anambaz ney
Mutapu Tukutwisha Kulam Rukat Retu Rikash Kud Muntu ni Mukwau
16 Shinshikin pa yom yiwamp yisadinau akadivar nau anambaz, pakwez yom yiyimp bwat. Shinshikin chilakej ech. Tongin bil anch ud mu chisak pamwing ni akadivar nau anambaz. Wasutishang chisu chiwamp nakash ni kupwa kwa mambamb wasambish kutal yipich wakwatangana. Anch wanon yipich yaad, chakusambish kachikwatangap nawamp. Katat ukwet yipich yisatu. Pakwez chimwing pakach pa yipich yiney, mukadivar kadingap kasipina. Chipich chinech ukuchisal nchik? Ukuchijip mulong ukwet yipich yikwau yaad wakwatangana pasipinay mukadivar.
17 El twilakeja yipich yaad twashalang nich mulong wa kuyilam. Katat tukwet mutapu wa kuvurik chisu chiwamp twasutishang pamwing ni akadivar nau anambaz. Pakwez chisu chimwing chashiken anch, mukadivar ap nambaz walond ap wasal chom chitukisishina. Yom ik tukutwisha kuvurik piur pa mulong winou? Tufanyidin kusal usu wa kuyivuramen mu manangu, mud mutapu twajimisha chipich (Jnsw. 19:11; Efes 4:32) Tufanyidin kusal usu wa kuvuramen kurumbok kwa akadivar nau anambaz, mulong tuvurikin chisu chiwamp twasutisha nau. Yiney yawiy yom yiwamp ya kuvurik tufanyidina kulam ni ya usey.
Dandamen Kukul mu Rukat
10 Niyetu tukat kukimb mitapu ya kuyikwash akadivar nau anambaz netu in Kristu. (Heb. 13:16) Shinshikin chilakej cha Ana, twisambina mu mutu wa mulong wasambelangaku ou. Kupwa kwa rinkind mukash kutut, ndiy ni nfumwend endina dijuku dimwing dia Atuman ni ajingunina anch rinkind wasenda malat ma chikumbu cha dijuku dined. Mud chibudikin, dijuku diadingap ni masun mawamp. Ana ulondin anch: “Twasenda masun mau, twamatuta, twamakom ni kumabam, kupwa twayichirishinam. Ku mutambu wetu twamana anch chid kwau chom cha usweral twasala, pakwez mulong wa chom chinech, twikala arund nakash kushik ni nlel.” Rukat ra Ana ni nfumwend mulong wa akadivar nau anambaz rayibachika kupan ukwash.—1 Yoh. 3:17, 18.
11 Anch twayisadin akwetu kwa rukat ni ranaken, akuman kamu usu tusadina mulong wa kwimburij mitapu yikatay Yehova kutong ni kusal yom. Akutwish kusanger mutapu uwamp tuyisadidina mu chilik twakad kutongin. Khanh, twisambina kal kwiur oku ukat kuvurik antu amukwasha. Ulondin anch: “Niyijikitishin nakash anambaz akatish ezang kwinsend mulong wa kuya nau mu mudimu. Ansendang, Antazukang kudia nau yakudia, ni asalang usu chakwel nichirik ni kushik nawamp ku chikumbu. Nlel nijingunin anch wading mudimu ujim nakash wasalangau. Ni asalang mwamu mulong wa rukat rau.” Chid chakin anch kadiap muntu mwawonsu ukutujikitisha mulong wa yom tumusadidina. Khanh ulondin piur pa antu amukwasha anch: “Natongijoka ja kuyifut mulong wa yom yawonsu yiwamp yansadinau, pakwez nijap kwindond kushichau. Pakwez Yehova wij, ni nikat kumulembil chakwel anfutinau.” Khanh uyingin nich. Yehova ukat kuman ap tuyom tukemp nakash tuwamp tukata kuyisadin akwetu. Ukat kuman tuyom twinetu mud chipan cha usey nakash ni mud dibaz tumusondjikina ndiy ni dikutufutay.—Tang Jinswir 19:17.
Dandamenany Kumekeshijadin Rukat Rudimukina Amwing ni Akwau
6 Nlel akutwish kumwel muntu wasadidina kal ku sosiyete umwing mu mivu yivud anch ud nsalamudimu ushinshamena. Pakwez, pamwing ap mu mivu yiney yawonsu, kandikal amanijanangap ni ntakel ap umwing wa sosiyete winou. Kakutwishap chisu chawonsu kwitiy mipak yikwatinau antakel. Pamwing ap kakatinap kwend sosiyete winou, pakwez usanger kwend mulong ukwet mudimu ukata kumwandjikin karufalang. Ukutwish kudandamen kusal mudimu ku sosiyete winou pamwing ap djat ni pakumenay mudimu ukwau.
7 Kushalijan kudia pakach pa kushinshaman mud mutapu warumburilau kal mu paragraf wa 6 ni rukat rudimukina kwimedin pa yibachikin ya muntu. Kukwatijan ni Bibil, yom ik yayibachika antu a Nzamb kumekesh rukat rudimukina pasak? Amekesha rukat riner kadiap mulong ading ayishindidin, pakwez mulong ading akatin kusal mwamu. Shinshikin chilakej cha David. Muchim wend wamubachika kumumekeshin murund nend Jonatan rukat rishinshamena ap anch tatukwend a Jonatan wading ukimbin kumujip David. Mivu yivud kupwa kwa rufu ra Jonatan, David wadandamena kumumekeshin Mefiboket mwan a Jonatan rukat rudimukina.—1 Sam. 20:9, 14, 15; 2 Sam. 4:4; 8:15; 9:1, 6, 7.
Mapit ma mu Spiritu
it-1 paj 515
Chiyul, Mwin kuyulan
Yehova ndiy ukweta manang mapandakena nakash. Ndiy kusu wakading kwikal ni kuswir kwa kumuyul kud muntu. (Isay 40:13; Rom 11:34) Mwanend ukwet mutapu wa kusal mud ‘Mwin Chiyul ukwamushena,’ ni kupan umutakel, mulong watambula ni kulondul yiyul ya Tatukwend ni ukwet spiritu wa Nzamb. (Isay 9:5; 11:2; Yoh 5:19, 30) Chinech chimekeshin anch, chakwel chiyul chikala cha usey, chifanyidin kwimen pad Yehova. Chiyul chin chawonsu chipompatijadina ni wa Piur Nakash chidap cha usey. Chidap kamu chiyul bwat.—Jnsw 19:21; 21:30.
RUBING RA 30 NGOND WA 6–6 NGOND WA 7
YOM YA USEY YIDA MU DIZU DA NZAMB JINSWIR 20
Kwendijadin Kukutwisha Kuyikwash Antu Kukwat Mupak Uwamp
Mutapu Uwamp wa Kwendijadin Umutumbishina Yehova
3 Ap anch kukutwish kulet musangar, rid kand rizau ra usey rikutwisha kuyishikij antu ku kwatijan. Pa dichuku dau da uruw, ambay a uruw akat kusal machip kurutu kwa Yehova kukatijan ni kulimishijan umwing ni mukwau mu mwom wau wawonsu. Kurutu kwa kuchip, ufanyidin kumushinshikin mbay wa uruw ni kubabal. (Tang Jinswir 20:25.) Kinak kawiy kashinsh ka machip ma uruw. Kwendijadin kukat kuyikwash ambay a uruw kwijikijan umwing ni mukwau ni kukwat mupak wa manangu. Yisu yimwing mupak winou ukwikal wa kwatijan, yisu yikwau ukutwish kwikal mupak wa kwimik kwendijadin. Ap anch imik, chinech chirumburikinap anch kwendijadin kwau kwading kuyimp. Chawiy, kwendijadin kukwet rutong ra kuyikwash antu kukwat mupak wa kwatijan ap bwat.
4 Mulong wak chid cha usey kwikal ni chitongijok chiwamp piur pa kwendijadin? Anch mujich ukwet chitongijok chiwamp, kakutwishap kuya kumutond muntu anch kakwetap chitongijok cha kumwat. Kadap ching ajich akweta kuswir kwa kwikal ni chitongijok chiwamp. Etu Awonsu tufanyidin kukudish chitongijok chiwamp. chilakej, antu amwing akat kutong anch, ang antu atondijan afanyidin ching kwatijan. Chisal chinech chikat kuyisal mutapu ik in Kristu ajich? Melissa, nambaz mujich uda mu États-Unis ulondin anch: “Anch mukadivar ni nambaz atondijan, Atuman amwing akat kuchingej anch ching kamu atijan. Mud chibudikin, antu amwing akat kudandamen kwendijadin ap anch yom yiyilap kwau nawamp pakach pau. Ajich amwing akat kulik kwau kutondijan. Yibachikin yiney yikutwish kuletish yakamish nakash.”
Mutapu wa Kutan Mbay wa Uruw Muwamp
8 Mutapu ik ukutwisha kumushinshikin muntu ku ujindj? Ku yikumangan ap ku jindond jikwau, ukutwish kuman yom piur pa mwikadil wend wa mu spiritu, wuntu wend ni yisal yend. Anany arund nend, yom ik yikatay kwisambin? (Luka 6:45) Ov, ntong jend jikwatijadin ni jeyey? Ukutwish kwambamb nau amakurump a chikumangen chend ap mwin Kristu uswila umwija nawamp. (Jnsw.20:18) Ukutwish kwipul piur pa yisal yend ni mikadil yend. (Rut 2:11) Chisu umushinshikidina muntu ikal nich kashinsh anch usadinap chom chikutwisha kumovish nayimp. Limish yovil yend, yom yimutadina, ni kumulimish.
Mutapu Uwamp wa Kwendijadin Umutumbishina Yehova
7 Mutapu ik ukutwisha kushiken kumwijik muntu nawamp? Ukutwish kusal mwamu kusutin kwipul yipul ni kuteshijan nawamp umwing ni mukwau, ufanyidin kumulej yovil yey ni kwikal mwin kashinsh mu yakul yey. (Jsw. 20:5; Yak. 1:19) Pamwing ap, ukutwishany kutond kusal yom pamwing chinech chikusal anch chikuswapelany kwambamb, mud kuda pamwing, kwipuwangej pamwing, ni kuya mu mudimu wa kulejan pamwing. Ukutwishany kand kwijikijan nawamp piusutishinanya chisu pamwing ni arund nau antu a mu dijuku. Chikwau kand, ukutwishany kutenchik mijikit kushalijan yikutwisha kukukwashany kujingunin kuman mutapu ukuyisadinay antu mu yishiken kushalijan. Shinshikin yom yapakishay kusal Aschwin uda mu Pays-Bas. Wisambidin piur pa kwendijadin kwau ni Alicia: “Twakimbang mijikit yafanyina kutukwash kwijikijan umwing ni mukwau. Yom mud, kwisuk ya kuda pamwing ap kusal mudimu pamwing. Pa chisu cha mijikit mud yiney, twamana usu ni kuziy kwa muntu ni muntu.”
8 Ukutwish kwijikijanany kand nawamp umwing ni mukwau kusutin kwilej yom ya mu spiritu pamwing. Anch watijanany kal, ufanyidinany kwitekin chisu cha kusal difukwil da mu dijuku, kusal mwamu kukumekesh anch Nzamb ukwet usey mu uruw wen. (Mul. 4:12) Chawiy mutapu ik ukutwisha kutenchik chisu cha kwilej pamwing chisu wendijadinanya? Chakin kamu, antu endijadina kadap mu dijuku, ni mukadivar kadap ntakel wa nambaz. Pakwez, kusutin kwilej pamwing ukuwishany kwijik mutapu muntu ni muntu mu chilik chimukatinay Yehova. Max ni Laysa, ambay a uruw ada mu États-Unis, ataninamu mu mutapu ukwau. Ulondin anch: “Mu kwendijadin kwetu, twasambisha kwilej mikand ni mitu ya milong yisambidina piur pa kutondan, uruw ni mwom wa dijuku. Yichap yiney yatwazurila njil yakwambambin pa yom yivud ya usey ya twafanyinap kutwish kwambambin anch kwadingap yichap yiney.”
Mapit ma mu Spiritu
it-2 paj 196 par. 7
Mwend wa kasu
Kukwatijan ni Jinswir 20:27, “muchim wa muntu wawiy mwend wa kasu wa [Yehova], ukat kutalijol mukach mwa muntu.” Yom yikatay muntu “kupim,” ap kubudish, mikala mazu mawamp ap mayimp, yimekeshining ap kumunyik wuntu wend, chiday kamu mukach.—Ilakej ni Mid 9:1; NWT.