Mulong wak Udandamedina Rukis Kuvulijan Mwamu?

Mulong wak udandamedina rukis kuvulijan mwamu pa mangand? Mulong wa kwijik diyingishin, chitin cha kusambish kwijik chirumburikina rukis, mulong wak antu akat kusambish kuyikis akwau, ni mutapu rikata kupalangan.

Rukis Chom Ik?

Rukis kud kumwov muntu fu ku muchim ap kwikal ni rukuny rikash pantaliken ni muntu kampand ap chisak cha antu kanang. Rirumburikin kudandamen kumwovil muntu ujim.

MULONG WAK ANTU AKAT KUSAMBISH KUYIKIS AKWAU?

Kud mayingishin mavud makata kusal anch antu asambish kuyikis akwau. Yisu yivud, kakatap kuyikis antu mulong wa yom yisadinau, pakwez mulong wa chidiau. Antu akutwish kuyiman antu akisinau anch ad antu ayimp, atubaj, ni kakezap kuswimp. Akutwish kuyiman mud antu akad usey, in kuletish kanrumbangesh ni milong. Antu ayikisining akwau ayimekeshina pamwing ap chisum, katond, ap ayisadina yom yikwau yiyimp yasala anch akudish yovil ya rukuny.

MUTAPU IK RIKATA KUPALANGAN?

Muntu ukutwish kuyikis akwau ap anch kandikal amanijanangap nau mes ni mes. Chilakej, muntu ukutwish kwimburij yitongijok yiyimp ya antu alimishiningay ap a piswimp nakash. Chawiy, rukis rikutwish kupalangan ni antu avud akutwish kwikal ni yovil yiney ya rukis piur pa akwau.

Tukutwish kwov kurumburik mulong wak antu avud ayikisin akwau anch twatesh mutapu ukatau antu kusambish kuyikis akwau. Pakwez, mulong wa kukangesh rukis kudandamen kuvulijan mu mangand, tufanyidin bil kwijik misul ya rukis, ni Bibil uyilejen patok.

BIBIL ULEJEN MISUL YA RUKIS

Chifatul cha jinseu jad jinyingumukina jimekeshina yom yikata kusal anch rukis ridandamen kuvulijan. 1. Nsangu ja makasu mu chisak cha antu, pa Internet, ni ku televizion ap mu majurnal. 2. Kulik kwijik nawamp yishankur, ulombu wa chikit, ap relijon. 3. Wom wakuswimp mashakamin, kushalish yom, ap kulik kwijik yikushikena.

AN A ANTU KADINGAP NI RUKIS PAYITANGAU. Rukis rasambisha chisu chabwambwilay mwangel umwing wa mwiur, wapilau anch Satan Djabul. “Kudiokal ku disambishil kamu [Djabul] wading mwin kujipan.” Wadandamena kuletish rukis ni chisum “mulong ndiy udi mwin kudimban, ndiy kamu tatuku wa makasu mawonsu.” (Yohan 8:44; 1 Yohan 3:11, 12) Bibil umurumburil Djabul mud mwin makasu, mwin ujim, ni mwin kurishikishan.—Job 2:7; Kujingunik 12:9, 12, 17.

CHID CHISWAPELA KUD ANTU AKAD KUWANYIN KWIKAL NI RUKIS. Ikundj wa kusambish, Adam, walondula njil ya chitil ya Satan. Mud chibudikin, antu awonsu aswana chitil ni kuburen kuwanyin. (Rom 5:12) Kain, mwan wakusambish wa Adam wamukisa mwanchend Abel ni wamujipa kwa chisum. (1 Yohan 3:12) Chid chakin anch kud antu avud adandamedina kumekesh rukat ni ranaken. Pakwez mulong wa chitil twaswana, chiyiswapedin antu avud kwikal in kwitongin ayinau, in ris, ni in kwitutul, chawiy mikadil yiney yikat kuyishikij kukudish rukis.—2 Timote 3:1-5.

MUNTU WAKAD KUYISANGER ANTU ASHALIJADINA NEND UKUTWISH KUYIKIS. Antu akat kuvudish rukis mu mangand tushicha kusutin kukasikesh yisal ya chisum, ni mikadil ap yaku yiyimp. Mulong “yom yikwau yawonsu ya mu mangand ayitakedil kudi Sakudimban,” yawiy kudia antu akad kuyisanger antu akwau, in kasolikany, in masaal, in kuyirishikish antu akwau, ni in kuyisheshin antu yom yau.—1 Yohan 5:19.

Pakwez, Bibil urumburil yom yivud kusutamu kwau kurumburil misul ya rukis. Ulejen kand yom yikusalay Nzamb mulong wa kudiosh misul yawonsu ya rukis.