Chisu Chikudioshau Rukis Chikupu!
Ap anch twatwish kudiosh rukis mu muchim wetu, pakwez tukutwishap kuyikel yisal ni mikadil ya antu akwau. Antu adandamedin kuyikis akwau pakad mulong. Chawiy, nany ukutwisha kupwish rukis rawonsu chikupu?
Ching Yehova ndiy ukutwisha kudiosh rukis chikupu. Ni Bibil washidinamu kal anch mwawiy kamu mutapu ukusalay.—Jinswir 20:22.
NZAMB UKUDIOSH MISUL YAWONSU YA RUKIS
1. SATAN DJABUL. Satan, mwangel ntombwij ndiy ukasikeshina rukis tumena nlel unou. Nzamb ukumushesh Satan pamwing ni antu awonsu akata kumekesh rukis mud ndiy.—Kuseng 37:38; Rom 16:20.
2. MANGAND MA SATAN MIZWILA NICH RUKIS. Nzamb ukudiosh yom yawonsu yiyimp yikata kukasikesh rukis, kuwejinaku antu a chipolitik in chisum ni anyikel a chirelijon akata kukasikesh rukis. Yehova ukushesh kand milad ya kwisak ya kwitongin, ya choy, ni ya kuyiy antu akwau.—2 Pita 3:13.
3. KUBUREN KUWANYIN KWA ANTU. Bibil urumburil anch antu awonsu aswana kuburen kuwanyin, charumburik anch yovil ya kutong ni kusal yom yiyimp. (Rom 5:12) Kukudish rukis mulong wa antu akwau ni kuyimekeshinar yid pakach pa yovil ya kuburen kuwanyin. Nzamb ukuyikwash antu kupandakan yovil yiney ya kuburen kuwanyin chakwel rukis rawonsu ripwa kamu chikupu.—Isay 54:13.
BIBIL UKANIN NGAND YAKAD RUKIS
1. KUKEZ KIKALAP KAND KASOLIKANY. Mangand akumayikel kud Want wa Nzamb. Want winou ukuyikel kudiokal mwiur ni ukulet kutentam chikupu. (Daniel 2:44) Kukwikalap kand kasolikany ap rukis mulong wa antu a michid yikwau. Nzamb ukupwish kuburen kutentam kwawonsu kurishinau nich antu nlel.—Luka 18:7.
2. ANTU AWONSU AKUSHAKAM MU CHISAMBU. Kwikil muntu ukumana mar madiokila ku chisum ap kwi njit. (Kuseng 46:9) Divu dikwikal ndond ya diking yikushakamau ching antu in chisambu ni akweta rukat.—Kuseng 72:7.
3. MUNTU MAWONSU UKWIKAL NI MASHAKAMIN MAPANDAKENA KUWAP CHIKUPU. Antu awonsu akushakama pa divu akumekeshijadin rukat rakin umwing ni mukwau. (Mateu 22:39) Kwikil muntu ap umwing ukunenganana mulong wa yitongijok yiyimp ap kuvurik yom yiyimp. (Isay 65:17) Pa chisu chinicha, antu akukolika ku rukis “akez kasangar nakash ni kuzangijal mu chisambu.”—Kuseng 37:11.
Ov, niyey ukatin kushakam mwi ngand ya mutapu winou? Kurutu ngand yiney yishika, kud antu avud ilejina kwipuk rukis mu kusadin mbil ja Bibil. (Kuseng 37:8) Yawiy yom yikatau kusal Atuman a Yehova pa mangand mawonsu. Ap anch adiokil ku yishankur ni ku jindond kushalijan, asadin dijuku didia mu umwing ni dikweta rukat.—Isay 2:2-4.
Atuman a Yehova akwov musangar wa kukurumburil yom yilejinau kal piur pa mutapu wa kujijaman anch atumekeshin kuburen kutentam ni kasolikany. Yom wilejina yikutwish kukukwash kudandamen kudiosh rukis mu muchim wey ni kuswinkeshamu rukat. Ukutwish kwilej kuyimekeshin antu in awonsu rukat, ap antu amekena mud akad kujikitish ni akata kumekesh rukis. Mud chibudikin, ukwikal ni musangar katat ni urund uwamp ni antu kwau. Ni cha usey nakash, ukwilej yom ukutwisha kusal mulong wa kushakam mwinshin mwa winyikel wa Nzamb chisu chikudioshau rukis chikupu.—Kuseng 37:29.