MUTAPU WA KUKANGESH RUKIS KUDANDAMEN KUVULIJAN

4 | Twish Kudiosh Rukis Kusutin Ukwash Wa Nzamb

Bibil Ulondin Anch:

‘Dibuj dia spiritu didi rukat, musangar, chisambu, kushimpish muchim, kudimuk, kuwap, ritiy, kwitudish, ni kwilam.’—GALATIA 5:22, 23.

Chirumburikina Mazu Minam:

Chitwishikin kukangesh rukis kudandamen kusutin ukwash wa Nzamb. Spiritu wend utumbila ukutwish kutukwash kukudish mikadil twakad kutwish kukudish nich usu wetu ayinetu. Chawiy, pa ndond pa kupakish kupandakan rukis nich usu wetu ayinetu, chid cha usey kuchingejin ukwash wa Nzamb. Anch twasal mwamu, tukutwish kuman yom mud yamanay kambuy Paul, wafunda anch: “[Nzamb] ukat kwinginkish ukash uwanyidina wa kusal yom yawonsu.” (Filip 4:13) Mulong wa chinech, tukutwish kulond anch: “Ukwash wam ukat kudiokal kudi [Yehova].”—Kuseng 121:2.

Yom Ukutwisha Kusal:

“Yehova wankarumuna kwindiosh ku wuntu wa chisum ni wangikadisha muntu wa chisambu.”—WALDO

Mulembila Yehova, nich kashinsh kawonsu mwita spiritu wend utumbila. (Luka 11:13) Mwita chakwel akukwash kumekesh mikadil yiwamp mu mwom wey. Ileja mikadil yifundishinay Bibil yikata kwopat rukis, mud rukat, chisambu, kushimpish muchim, ni kwilam. Kimb mutapu wa kukudish mikadil yiney mu mwom wey. Ni sutish chisu pamwing ni antu asadina usu wa kukudish mikadil yiney. Antu a mutapu winou akutwish kukukwash “kumekesh rukat ni kusal yisalijok yiwamp.”—Hebereu 10:24.

Rusangu Rakin—WALDO

Watwisha Kulikap Rukis

Waldo warisha ni yikokujol yikash pading payilay mu kupam yizwisha rukis mu muchim wend. Urumburil anch: “Niyandjikang yisu yivud mu matend mu jinjil mulong wa kurish ni antu ading kulandishang ma drog . . . Dichuku dimwing, chisak cha ampopol ading akankuny netu amutuma ikundj umwing mwin kujipan wading wijikena nakash chakwel anjip, pakwez kupwa kwa kwimpamp mpak kapamp kamwing, natwisha kukwasinik ni nachina.”

Waldo kwovap musangar chisu chasambishay mukajend kwilej Bibil pamwing ni Atuman a Yehova. Ulondin anch: “Nading niyikisin Atuman a Yehova, ni yisu yivud nayisaalang. Pakwez chisu chawonsu ikuchikang.”

Disudien, Waldo wasambisha niyend kwilej Bibil. Ulondin anch: “Chadingap chinswapedina kusadin yom nading nilejina. Natongang anch nikezap katwish ap pakemp kulikap ujim ni chisum.” Pakwez yom yimwing yilejay mu Bibil yaswimpa nakash mwom wend.

Waldo urumburil anch: “Dichuku dimwing, Alejandro wading mulej wam wa Bibil wangita kutang Galatia 5:22, 23. . . . Alejandro wanrumburila anch nikutwish kukudish mikadil yiney, kadiap ni usu wam amwinam, pakwez kusutin ukwash wa spiritu utumbila wa Nzamb. Uyakin winou waswimpa kamu yitongijok yam!”

Kusutin kuchingejin ukwash wa Nzamb, Waldo watwisha kukangesh rukis kudandamen mu mwom wend. Ulondin anch: “Anamakwam ni arund nam kwovap kurumburik mutapu nashikena kuswimp mwamu.” Ulondin kand anch: “Yehova wankarumuna kwindiosh ku wuntu wa chisum ni wangikadisha muntu wa chisambu.”