MUTAPU WA KUKANGESH RUKIS KUDANDAMEN KUVULIJAN

3 | Diosh Rukis Mu Manangu mey

Bibil Ulondin Anch:

“Itiyany Nzamb akukarumunany mu yom yawonsu ni kukwinkishany manangu masu ni muchim usu. Mwamu ukutwishany kujingunin rusot ra Nzamb. Ndiy usotil yom yiwamp, yitentamina kamu, yikata kumusangarish.”—ROM 12:2.

Chirumburikina Mazu Minam:

Nzamb ukat kushinshikin nakash yom tutongina. (Jeremiy 17:10) Chitwitin kusal yom yivud kusutamu kwau kwimen pa kwipuk kulond ap kusal yom nich rukis. Rukis rikat kusambishin mu manangu ni mu muchim. Chawiy, tufanyidin kudiosh karukis kawonsu kadia mu manangu ni mu muchim wetu. Anch twasal mwamu pawiy chad tukumekesha anch ‘twitiyin Nzamb kutukarumun’ ni anch tukatin kukangesh rukis kudandamen.

Yom Ukutwisha Kusal:

Shinshikin nich win kashinsh yom utongining ap mutapu wiyoviling piur pa antu akwau, pakampwil antu a muchid ap ngand yindj. Iyipula anch: ‘Mutapu ik nikata kuyiman? Ov, mutapu niyimena wimedin pa yom nija amwinam piur pau? Anch wimedin pa kasolikany?’ Ipuk yom yawonsu yikasikeshina rukis yilejenau pa Internet, mu mavideo, ap mu kwipuwangej kukwau.

Dizu dia Nzamb dikutwish kutukwash kudiosh rukis mu manangu ni mu muchim wetu

Chiswapelingap kamu chisu chawonsu kwishinshikin ni kwifish nich piur pa yom tutongina ap mutapu twiyovila. Pakwez Dizu dia Nzamb dikutwish kutukwash “kujingunin yitongijok ni rusot ra mu muchim.” (Hebereu 4:12) Chawiy ikal ni chaku cha kutang Bibil. Ilakej mafundish mend ni yitongijok yey, ni sal usu wa kuswimp yitongijok yey chakwel yikwatijan ni yom yilondinay Bibil. Dizu dia Nzamb dikutwish kutukwash kudiosh rukis ridia mud “mapat makash” mu manangu ni mu muchim wetu.—2 Korint 10:4, 5.

Rusangu Rakin—STEPHEN

Waswimpa Mutapu Wend wa Kutong

Stephen ni antu a mu dijuku diend amana mar mulong wa rukis rayimekeshinau kud ayindel. Mud chibudikin, wiyandjika mu chisak cha chipolitik chading chirishina mulong wa kuyisadin antu awonsu nich kutentam. Chisu chimwing, wiyandjika mu matend ma chisum nakash. Stephen ulondin anch: “Yisu yimwing am ni arund nam twatalang mafilm mamekeshina mar mamanau aswik in Afrik mu États-Unis. Pitwovang nayimp nakash mulong wa kuburen kutentam kwinoku, twayifusang yibul ansand ayindel ading mu sine. Kupwa twayangang mu mikal mudia ayindel mulong wa kuyibul antu akwau.”

Stephen waswimpa mutapu wend wa kutong pasambishay kwilej Bibil pamwing ni Atuman a Yehova. Ulondin anch: “Mulong nading ni yitongijok ya kasolikany nakash, yom namana pakach pa Atuman yanshimokisha. Chilakej, Kaman udia chindel wading ukimbina kuya mu weny, wayisha anend kwa Kaman udia muntu mujal kuyilam. Chikwau kand, dijuku dia Atuman adia ayindel diamusenda nsand umwing mujal kushakam nend kwol kwau.” Stephen wikala nich kashinsh anch Atuman a Yehova amekeshijadidin rukat rakin ra ukadivar ralonday Yesu anch rikez kamekan pakach pa in Kristu akin.—Yohan 13:35.

Yom ik yamukwasha Stephen kulik yisal yend ya rukis yadingay nich? Ud verse wa Rom 12:2. Stephen ulondin anch: “Nasambisha kujingunin anch nifanyidin kuswimp yitongijok yam. Nafanyina kuswimp manangu mam mulong wa kwikal mu chisambu nau antu ni namana anch mawiy mashakamin mawamp nakash.” Stephen ukwet katat mwom uwamp pakad kwikal ni yovil ya rukis pasut kal mivu 40 ni kusut.