Yipul Ya In Kutang

Pafunday David mazu madia mu Kuseng 61:8, walonda anch ukumutumbish Nzamb “chikupu.” Ov, chinech chirumburikin anch wading utongin anch kakufap?

Bwat. Yom yafunday David yading yovakena ni yakin.

Shinshikin yom yafunday mu verse winou ni makwau kand. Wafunda anch: “am nikuwang muminy wakukushiman ey, nikuwanyish kushilamu kwam kudi ey machuku mawonsu.” “A [Yehova] Nzamb wam, nikukushiman nich muchim wam wawonsu, nikez katumbish kand dijin diey chikupu.” “Nikukushimanang ey chikupu ni chikupu.”​—Kus. 61:8; 86:12; 145:1, 2.

Chisu chafunday David mazu minam, kadingap utongina anch kakezap kufa bwat. Wading wij anch Yehova walonda anch ang muntu wasal chitil ukufa, ni David wading wij anch ud mukayitil. (Dis. 3:3, 17-19; Kus. 51:4, 5) Wading kand wij anch ap amakundj ashinshamena mud Aburaham, Isak, ni Jakob, niyau afa. Ni David wading wij kamu anch ukez kafa. (Kus. 37:25; 39:4) Pakwez mazu mend madia mu Kuseng 61:8 mamekeshin maswir ni mupak wend wa kumutumbish Yehova chikupu, mu chilik cha kuman mud uchidandamedin ni mwom.​—2 Sam. 7:12.

Yisu yimwing David wafunda piur pa yom yashikena mu mwom wend, mud mutapu tumena mazu madia mu Kuseng 18, 51, ni 52. Mu Kuseng 23, David umumekeshin Yehova mud kafung wend ukata kumutakel, kumupizurish ni kumuchidij. David wading kafung wa mutapu mud winou. Ni wakata kumusadin Yehova ‘machuku mawonsu ma mwom wend.’​—Kus. 23:6.

Lam kand mu manangu anch Yehova ndiy wamupepila David kufund yom yiney. Mu yom yafunday mwading kand ma uprofet ma yom yafanyina kuwanyin mu machuku ma kurutu. Chilakej, mu Kuseng 110, David wafunda piur pa chisu chafanyinay Nsalejend ‘kushakam ku chikas cha katatuku cha Nzamb’ mwiur ni kutambul dikand. Mulong wa kusal ik? Mulong wa kuyikel piur pa akankuny a Nzamb ni ‘kurumburish michid’ yawonsu ya pa divu. David wading ngakiril wa Mesia, wafanyina kuyikel mwiur ni kwikal “mwin kupesh chikupu.” (Kus. 110:1-6) Yesu walonda anch uprofet udia mu Kuseng 110 wading umutadin ndiy ni anch wafanyina kuwanyin mu machuku ma kurutu.​—Mat. 22:41-45.

Chakin kamu, Yehova wamupepila David chakwel afunda piur pa chirung chend ni chirung cha machuku ma kurutu pakumuvumbulau ni kusanger kumushiman Yehova chikupu. Chinech chitukwashin kuman anch Kuseng 37:10, 11, 29 wading wisambidin piur pa mashakamin mading mu Isarel wa pakur ni piur pa mashakamin makwikalaku pa divu dia kabuj mu machuku ma kurutu pakuwanyishay Nzamb kushilamu kwend kwawonsu.​—Tal paragraf wa 8 mu mutu wa mulong “Ey ukwikal ni yamam mu Paradis” mu nimero winou.

Kuseng 61:8 ni maverse makwau kand, mamekeshin anch David wading ukatin kumutumbish Yehova mu Isarel wa pasak djat ni ku rufu rend. Ni mamekeshin yom yikusalay David pakumuvumbulau kud Yehova mu machuku ma kurutu.