Yom Yida Yiwamp ni Yiyimp: Bibil—Ntakel wa Kuchingejin

Tukutwishap kwikal nich kashinsh anch mipak yetu yikwikal ni yibudikin yiwamp anch yimedin kusu kwau pa mutapu wetu wa kutong ap pa mutapu wa kutong wa antu akwau. Bibil ulondin yom yivud pa ndond pa kwimen kwau pa kulet mayingishin. Utukwashin kwauril yom yida yiwamp ni yiyimp, ni chinech chikat kusal anch twikala ni musangar.

UMUTAKEL TUSWIRIKEDINA

Mu Bibil, Yehovaa Nzamb ulejen anch antu afanyidin kulondul umutakel wend, pa ndond pa kukimb kwitakel ayinau. (Jeremiy 10:23) Chawiy chapanay umutakel tutanina mu Bibil. Uyikatin antu ni kakatinap anch tukwata mipak yida yiyimp yikutwisha kutusal nayimp ni kutuletin yakamish mu mwom. (Kuvurik Yijil 5:29; 1 Yohan 4:8) Chikwau kand, mulong ud Sakatang wetu, ukwet manangu ni ronganyin yiwanyidina mulong wa kutwinkish yiyul yipandakena kuwap. (Kuseng 100:3; 104:24) Pakwez, Nzamb kakatap kumushindil muntu kulondul mbil jend.

Yehova wayinkisha ikundj ni mband a kusambish, Adam ni Ev, chom chin chawonsu chadingau nich kuswir mulong wa kwikal ni musangar wakin. (Disambishil 1:28, 29; 2:8, 15) Wayinkisha kand umutakel uswapela ni wasota anch auziyin. Pakwez wayishila ayinau chisu cha kutond kuziyin ap bwat ku umutakel winou. (Disambishil 2:9, 16, 17) Cha ushon, Adam ni Ev atonda kusal yom yikatinau pa ndond pa kuziyin kwi mbil ja Nzamb. (Disambishil 3:6) Yibudikin ik yikalaku? Ov, chinech chikat kuyiletin antu musangar wa kusal yom yawonsu yimenau anch yid yiwamp? Bwat. Kudosh pakur, chimeken patok anch kulik kuziyin kwi mbil ja Nzamb kuletiningap chisambu ni musangar wakin.—Mulej 8:9.

Bibil ukat kutwinkish umutakel tuswirikedina mulong wa kukwat mipak ya manangu, chikalap nchik ndond tuda, ap mutapu uda dijuku detu. (2 Timote 3:16, 17; Tal mushet: “Buku Wa Antu Awonsu.”) Shinshikin mutapu ukatay Bibil kusal mwamu.

Ileja yom yivud piur pa mayingishin mamekeshina anch Bibil ud chakin kamu “dizu da Nzamb.”—1 Tesalonik 2:13. Tal video Bibil Udiokil Kudi Nany? uda pa jw.org.

YISADINA ANCH ANTU APIPEJA BIBIL

Antu amwing akat kulond anch Bibil kakutwishap kwikal musul uwamp wa umutakel wakin. Akutwish kulangwish yikangesh yilondwilaku ey.

Chikangesh: “Bibil ud mud mpak ya mutwil kwaad.”

Uyakin: Kwisambishil, chikutwish kumekan anch maverse mamwing matanijadinap ni makwau. Pakwez anch wilej mutapu ni chisu chamafundau ukujingunin anch makwatijadin kwau.

Mulong wa kutan yilakej yimwing, tang mutu wa mulong: “Y a-t-il des contradictions dans la Bible ?” uda pa jw.org.

Chikangesh: “Antu akata kulondul Bibil akat kusal yom yiyimp, chawiy Bibil kakutwishap kwikal ntakel muwamp.”

Uyakin: Tukutwishap kumufish nich Bibil mulong wa mwikadil uyimp wa antu akad kusadin yom yifundishinay. Bibil wasambela kulond anch antu avud—kuwejaku antakel a chirelijon—akata kufa mukan anch alondwil yom yifundishinay Bibil akusal yom yakad kukwatijan ni yilondinay Bibil. Wasambela kand kulond anch, mud chibudikin, akez “kadiwol” Bibil.—2 Pita 2:1, 2.

Mulong wa kutan chilakej cha mutapu antakel a chirelijon avud ukatau kulik kulondul mafundish ma Bibil, tang mutu wa mulong: “La religion n’est-elle qu’une entreprise commerciale de plus ?” uda pa jw.org.

Chikangesh: “Antu akata kulondul yom yifundishinay Bibil kayilimishiningap antu ashalijadina ni awiy.”

Uyakin: Bibil ukasikeshin kuyisadin antu akwau nich kalimish. Kakasikeshiningap yisal mud . . .

kwiman anch tuyisutinamu antu akwau.—Filip 2:3.
kulik kuyilimish antu ashalijadina niyetu ap akweta yitiyij yishalijadina.—1 Pita 2:17.
kuyishindil antu kwitiyij yitongijok yetu.—Mateu 10:14.

• Bibil umekeshin anch Nzamb ukat kuyisadinang antu yisu yawonsu nich rukat ni kutentam ni anch ukatin niyetu tuyisadin antu akwau mwamu.—Rom 9:14.

Mulong wa kwijik jinsangu jivud, tang mutu wa mulong: “La tolérance : Quelle aide la Bible peut-elle apporter ?” uda pa jw.org.

MUTAPU UMEKESHINAY BIBIL UMUTAKEL WA NZAMB

Bibil utulejin mutapu ukatay Yehova kuyisadin antu kudokal kwinsambishil. Yom yidamu yitukwashin kujingunin chitongijok cha Nzamb piur pa yom yiwamp ni yiyimp, ya usey ni ya ubaj. (Kuseng 19:7, 11) Mbil twilejiningamu jiding ja usey chisu chawonsu ni jikat kutukwash kukwat mipak ya manangu mu mwom wetu wa dichuku dawonsu.

Chilakej, tal kubabesh kuda mu Jinswir 13:20: “Muntu ukata kwend nau in manangu, niyend ukwikal mwin manangu, pakwez ukata kwend nau ayisup ukuman mar.” Mbil yiney yid ya usey mu chirung chetu mud mutapu uyadinga pasak. Bibil wizwil nich mbil ja usey ni ja ukwash mud yiney.—Tal mushet: “Manangu Mada mu Bibil Mad ma Usey Yisu Yawonsu.”

Pakwez ukutwish kwiyipul anch: ‘Mutapu ik nikutwisha kwikal nich kashinsh anch umutakel wa Bibil ud wa ukwash nlel?’ Mutu wa mulong wambakedinap ukwisambin yilakej yakin ya yom yayishikena antu mu mwom.

a Yehova dawiy dijin da Nzamb.—Kuseng 83:18, NWT.

MANANGU MADA MU BIBIL MAD MA USEY YISU YAWONSU

Ap anch Bibil amufunda pasutin kal mivu 2 000, yom yilondinay yid ya usey ni katat. Antu adandamedin kukimb musangar ni mwom uwamp. (Mulej 1:9) Manangu mada mu Bibil makutwish kutukwash kuwanyish chitongijok chinech.

Win kashinsh

“Tusotil yisu yawonsu kusal yom yiwamp.”—Hebereu 13:18.
“Chifanyidin muntu mwij alika kwiy, chad asambisha kusal mudimu wakin.”—Efes 4:28.

Mutapu wa kushakam ni antu akwau

“Chifanyidin muntu ni muntu kudandamen kukimb, kadap uwamp wa amwinend, pakwez uwamp wa mukwau.”—1 Korint 10:24.
“Chifanyidin kulikishijadin umwing ni mukwau.”—Kolosay 3:13.

Kukwat Mipak

“Muntu wamwamu ukat kwitiyij mazu mawonsu, pakwez muntu ubabela ukat kushinshik kuyilay.”—Jinswir 14:15.
“Muntu wa manangu, anch waman yom yikash, ukat kujingam, pakwez antu amwamu akat kuya kurutu ni kwimesh mar.”—Jinswir 22:3.