Yom Yida Yiwamp ni Yiyimp: Mupak Ufanyidina Kukwat
Mbil tutondina kulondul mu mwom jikutwish kutuletin musangar ap bwat. Yehova wij mwamu. Chawiy chikatinay anch tushakam kukwatijan ni mbil jend.
Yehova ukatin anch twikal ni chisambu ni musangar mu mwom wetu.
“Yam [Yehova] Nzamb wen, nikata kukulejany mulong wa kukukwashany, ni kukulejany njil yiufanyidinanya kuya. Anch en wadiany in kutesh malejan mam, ing yiyukish yam yelang kwikal kud en mud wit wakad kuumang mem! [Chisambu chelang] kwikal kud en mud mambek makata kwezang ku chikum cha karung.”—Isay 48:17, 18.
Mulong ud Sakatang wetu, Nzamb wij mutapu uwamp tufanyidina kushakam. Utwitin kulondul umutakel utwinkishinay mulong wa uwamp wetu. Anch twalondul yijil yend, tukutwishap kwiyakamish piur pa yibudikin ya mipak tukukwata. Yisu yawonsu tukukwat mipak yida yiwamp yikutuletina chisambu ni musangar.
Yehova kakatap kutwit kusal yom twakad kutwish kusal.
“Mulong yijil yiney yinikulejinany ilel unou kiyidiap kulemp, ap kiyikasikenap kwau kuyitesh.”—Kuvurik Yijil 30:11.
Mulong wa kushakam kukwatijan ni mbil ja Yehova chikutwish kutwit kuswimp mutapu wetu wa kutong ni wa kusal yom. Pakwez Yehova kakatap kutwit kusal yom twakad kutwish kusal. Chikwau kand, mulong ud Sakatang wetu, wij nawamp yom tukutwisha kusal. Ni pituyila kumwijik Yehova, tukujingunin anch “yijil yend kiyikasikenap nakash.”—1 Yohan 5:3.
Yehova ushidinamu kuyikwash antu akwatina mupak wa kushakam kukwatijan ni mbij jend.
“Am [Yehova] Nzamb wen. Nikez kakukasikeshany ni kukulejany anch: ‘Kangal wovany wom, nikukukwashany.’”—Isay 41:13.
Tukutwish kushakam mud mukatinay Nzamb, mulong ukutukwash kusal mwamu. Ukutwish kutukwash kusutin Dizu dend, Bibil, ukata kutukasikesh ni kutwinkish ruchingej.
Mamiliyon ma antu ada pa mangand ajingunin kal anch kushakam kukwatijan ni mbil ja Bibil kwayikwashin kal kuwapish mashakamin mau. Utongin nchik anch wishil chisu cha kwilej yiyul yiwamp yida mu Bibil? Ukutwish kusambish kushinshikin broshir Sanger Mwom Chikupu! wimedina pa Bibil, ni ukutwish kumupwit chamwamu pa jw.org. Ukwet malejan manam:
Mutapu ik Ukutwishay Bibil Kuwapish Mwom Wey?
Bibil Ulondin Anch Machuku ma Kurutu Makwikal Mawamp
Ov, Ukutwish Kwitiyij Anch Yom Yilondinay Bibil Yid Yakin?
Piukwitekina chisu cha kwilej Dizu da Nzamb, Bibil, ukujingunin anch ud wa usey ni katat; “[ushich] chikupu ni chikupu.” (Kuseng 111:8) Kulondul mbil jida mu Bibil wawiy mutapu uwamp nakash wa kushakam. Pakwez, Nzamb kakatap kutushindil kusal mwamu. (Kuvurik Yijil 30:19, 20; Joshua 24:15) Ud mupak ufanyidinay kukwat muntu amwinend.