MASHAKAMIN MA MWIN KRISTU
Limish Mbil ja Piur ja Yehova
Yehova Nzamb watekin kal mbil mulong wa antu. Chilakej, wateka mbil anch uruw ufanyidin kwikal uumwing udandamedina pakach pa ikundj ni mband. (Mt 19:4-6, 9) Ukat kufish nich mitapu yin yawonsu ya masandj. (1Ko 6:9, 10) Ukat kutwinkish kand mbil piur pa kwileng ni kudjal, yimekeshina anch antu end ashalijadin.—Kuv 22:5; 1Tm 2:9, 10.
Mu mangand ma nlel, antu avud alikin kwau mbil ja Yehova. (Ro 1:18-32) Akat kwitiyij yitongijok ya antu avud yiyibachika kwikal ni mutapu umwing wa kudjal, wa kwileng ni wa yaku. Avud akat kwibaz mulong wa yaku yau yiyimp ni akat kuyiswingish antu akweta mbil jishalijadina ni ja awiy.—1Pi 4:3, 4.
Mulong tudi Atuman a Yehova, tufanyidin kulimish nich kutakaman mbij ja piur ja Nzamb. (Ro 12:9) Mutapu ik? Tufanyidin kusadin nkeu mulong wa kwijik yom yitiyinay. Pakwez tufanyidin kand kulam mbil ja piur mu mwom wetu. Chilakej, anch tukimbin mutapu kampand wa kudjal ap wa kwileng, tufanyidin kwiyipul anch: ‘Kutond kwam kumekeshin mbil ja Yehova anch ja mangand? Ov, kudjal ap kwileng kwam, kwimekeshin mudi mwin Kristu umwovila Nzamb wom?’ Ap chisu tutondina mafilim ma kutal, tufanyidin kwiyipul anch: ‘Ov, Yehova usangaredin filim winou? Filim winou ukasikeshin mbil jend ja piur? Mitapu yam ya kwipuwangej yikat kuziyish mutapu wam wa kwichidij? (Kus 101:3) Filim ap video winou ukutwish kuyipwakesh antu a mu dijuku diam ap antu akwau?’—1Ko 10:31-33.
Mulong wak chidi cha usey anch tulimisha mbil ja piur ja Yehova? Piswimp ap Kristu Yesu ukujiyish mangand ni antu ayimp. (Eze 9:4-7) Ching kwau antu asadina rusot ra Nzamb awiy akupanda. (1Yh 2:15-17) El amboku tulimishany mbil ja piur ja Yehova chakwel mwikadil wetu uwamp umutumbisha Nzamb.—1Pi 2:11, 12.
Kutond kwam piur pa kudjal ni kwileng, kumekeshin ik piur pa mbil jam ja piur??
TAL VIDEO ULONDINA ANCH DEVIENS L’AMI DE JÉHOVAH—UN HOMME, UNE FEMME, NI KUPWA AKUL KU YIPUL YILONDWILAKU EY:
Mulong wak chidi cha manangu kushakam kukwatijan ni mbil ja Yehova?
Mulong wak anvaj afanyidin kusambish kuyifundish anau mbil ja Yehova pachidiau an akemp?
Mutapu ik ukutwishau ansand ni antu apamina kal kuyikwash antu chakwel ataninamu mu uwamp wa Nzamb?