Chipul Chikemp Ukutwisha Kwipul

Mary ni nfumwend Johna ashich mwi ngand mukutwishau kulejan rusang ruwamp kud angendj avud adokila mu Filipin mulong wa kwez kusal mudimu. Pa chirung cha chipupu cha KOVID-19, Mary watwisha kusambish kutakel malejan ma Bibil, kadap kwau ching kusu mwi ngand mwading mushichay, pakwez kand mu jingand jikwau. Mutapu ik watwishay kusal mwamu?

Mary wamwipulang mwin kwilej wend wa Bibil mwawonsu anch: “Ov, wijaku kand muntu mukwau ukatina niyend kwilej Bibil?” Anch wakul anch mwaning, ndiy wamulejang kumwijikishay. Yipul yiney yikemp yikalang ni yibudikin yiwamp nakash. Mulong wak? Mulong antu akata kusanger dizu da Nzamb akatining niyau kuyilejamu anamakwau ni arunau yom yilejinau mu Bibil. Yom ik yashikenang chisu chipulangay Mariy chipul chinech?

Jasmin wafundishangau Bibil kud Mariy wamuleja antu anying ading akatina kwilej Bibil. Kristine, umwing wa pakach pau wasangera nakash dilejan dend da Bibil ni wamuleja Mariy chakwel ilejang nend tupamp twaad pa rubing. Pamwipulau Kristine kud Mary mulong wa kwijik anch kud muntu mukwau ukatina kwilej Bibil, Kristine wakula anch: “Mwaning, nikukwijikishau arunam.” Mwi mbing jikemp kusu, Kristine wamwijikisha Mary kud arunend anying ading akatina kwilej Bibil. Kupwa, Kristine wamwijikisha Mary arunend akwau; arund inay a Kristine niyau ayijikisha arunau kud Mary.

Kristine wakata kand anch dijuku dend da mu Filipin dileja ni dawiy Bibil. Chawiy wambamba ni mwanend mband, Andrea. Kwinsambishin, Andrea watongang anch, ‘Atuman ad kwau kachisak kakemp ka relijon wakad kwijikan, kitiyijiningap kwau muday Yesu, ni asadidining kwau ching kusu Mansuk Makur.’ Pakwez kupwa kwa kwilej kwau kapamp kamwing, wajingunina anch yitongijok yend piur pa Atuman yading ya makasu. Chisu chawonsu chilejangay chom chisu mu Bibil, walondang anch: “Chid chakin, mulong chidokil mu Bibil!”

Mu machuku malondulaku, Andrea wamwijikisha Mary kud arunend aad ni mbay nend wa mudimu umwing; awonsu inay asambisha kwilej. Ni pakad Mary kwijik, Angela, mpanyend wa tatukwend a Andrea wadinga mputames, wateshang niyend chisu chilejangau Bibil. Dichuku dimwing, Angela wamwita Andrea chakwel amuleja Mary anch niyend uswirikedin kusambish kwilej Bibil. Angela wakata nakash yom yilejangay. Mwi ngond umwing, walama maverse mavud mu manang ni wakata kusambish kwilej tupamp tunying pa rubing! Nich ukwash wa Andrea, Angela wasambisha kukumangan pakad kujing kusutin videoconferans.

Pijikay Mary anch Joshua, nfumwend wa Kristine washakamang piswimp chisu chawonsu chilejangau, Mary wamwipula anch niyend ukukat kusambish kwibomb nau ku dilejan da Bibil. Joshua walonda anch: “Nikuteshang kusu kwam, pakwez kwingipul yipul bwat, chamwamu nikuya kwam.” Mu aminit atan kupwa kwa kusambish kwilej, Joshua wipula yipul yivud kumusutamu ni Kristine win; ni wakata niyend kwilej.

Chipul chikemp cha Mary chashikija ku malejan mavud ma Bibil. Chawiy, watenchika chakwel avud pakach pa in kwilej end asambish kwilej nau Atuman akwau. Mary watakela malejan ma Bibil 28 mu jingand jinying.

Jasmin, mwin kwilej wa kusambish twajimbulang mu rusang riner, amubatisha mwi Ngond wa 4, 2021. Kristine amubatisha mwi Ngond wa 5, 2022 ni wachirika mu Filipin muda dijuku dend. In kwilej akwau aad amwinkishau Mary kud Kristine ayibatisha niyau. Kusut kwa angond akemp kupwa kwa kumubatish Kristine, Angela niyend amubatisha. Katat usadin mud chibol wa rawonsu. Joshua nfumwend wa Kristine, mwanau mband Andrea, pamwing nau in kwilej Bibil akwau avud ayil kamu kurutu mu dilejan dau.

Pa chirung cha Yesu ni cha atwimbuy, antu avud alejanang yom yilejau piur pa Yesu kud antu a mu majuku mau ni kud arunau. (Yoh. 1:41, 42a; Mid. 10:24, 27, 48; 16:25-33) Umen nchik anch wamwipul mwin kwilej wey mwawonsu wa Bibil anch: “Ov, wijaku kand muntu mukwau ukatina niyend kwilej Bibil?” Anch wipul kachipul kinak kakemp, pamwing ap ukutwish niyey kutan antu avud akatina kwilej Bibil.