Mutapu wa Kwikal Murund Wakin

OV, KUD chisu wiyovap kal anch warisha ni milong da amwiney? Tushich mu machuku “ma mar nakash” makutwisha kutuziyish ni kusal twiyova anch tud kwetu da ayinetu. (2 Tim. 3:1) Pakwez, tukurishap ni yakamish ya mwom ayinetu. Bibil umekeshin usey wa kwikal ni arund akin mu “[yirung] yikash.”​—Jnsw. 17:17.

MUTAPU UKUTWISHAU ARUND AKIN KUTUKWASH

Kambuy Paul wataninamu mu urund wadingay ni ambay nend a weny. (Kol. 4:7-11) Padingay Paul mu rukan ku Rom, arunend asala yom yading yakaday ndiy amwinend mutapu wa kusal. Chilakej, Epafrodit wamutwadina Paul yom yading yiswirikedinay yamutuminau kud akadivar ni anambaz a ku Filip. (Fil. 4:18) Tishik watwala mikand ya Paul ku yikumangen kushalijan. (Kol. 4:7) Nich ukwash wa arunend, Paul watwisha kukasikesh yikumangen, chikala pa chisu chamulejau kulik kubudik mu chikumbu chend ap pa chisu chadingay amwinend mu rukan. Mutapu ik ukutwisha kwikal murund wakin nlel?

Yilakej ya chirung chetu yimekeshin usey wa kwikal arund akin. Shinshikin chilakej cha nambaz wikala murund wakin wa Elisabet, chibol wa rawonsu wa mu Espany. Pamukwatau makwend a Elisabet kanser wada umutwadina chad ku rufu, nambaz winou wamutumina Elisabet uruu uvud ukasikeshina wimedina pa mifund ya Bibil. Elisabet ulondin anch: “Pinamana uruu wend, nova musangar nakash pa kwijik anch kud muntu winvurikina, ni nova usu wa kusal yom nading novila ja kusal.”​—Jnsw. 18:24.

Tukutwish kukasikesh urund wetu pamwing nau ambay netu in Kristu kusutin kuyikwash mu mijikit ya chikumangen. Chilakej, ov, ukutwish kumusendaku mukadivar ap nambaz ipal mulong wa kuya nend ku yikumangan ap mu mudimu wa kulejan? Anch wasal mwamu, ukukasikeshijanany umwing ni mukwau. (Rom 1:12) Pakwez yom ik tukutwisha kusal kud akadivar nau anambaz akad mutapu wa kudokal ku chikumbu? Mutapu ik tukutwisha kwikal arund awamp kud awiy?

IKAL MURUND WAKIN KUD ANTU AKAD MUTAPU WA KUDOKAL KU CHIKUMBU

Chilakej, akadivar nau anambaz amwing kakutwishap kukumangan netu pamwing ku Chot cha Want mulong wa mayej makash. Shinshikin chilakej cha David, wakwatau mayej ma kanser. Amwoka mayej minam mu angond musamban ni kusut. Pamwokangau, David ni mukajend Lidia akumanganang kusutin videoconferans.

Mutapu ik wayikwashau kud arunau mu chikumangen? Kwinsuden kwa yikumangan, arunau amwing ambambang ni David ni Lidia kusutin videoconferans. Kupwa, anch David ni Lidia akul ku yikumangan, kwinsuden akadivar nau anambaz ayituminang uruu mulong wa kuyikasikesh. David ni Lidia iyovang mutapu ik patambulangau uruu winou? Iyovang anch kadap ayinau.

Tukutwish kwitenchik mulong wa kulejan ni akadivar nau anambaz akad mutapu wa kudokal ku chikumbu. Tukutwish kuswimp program wetu mulong wa kwikal ni chisu cha kusal nau pamwing. Mu mutapu winou, tukumekesh anch tuyivuramedinap. (Jnsw. 3:27) Pamwing ap ukutwish kulejan nau kusutin kufund mikand ap ku telefon. Chikwau kand akadivar nau anambaz akad kwikal ni mutapu wa kudokal ku chikumbu akutwish kulondul yikumangan ya mudimu wa kulejan kusutin videoconferans. David ni Lidia asangara nakash mulong wa ditenchik dined. David urumburil anch: “Kwambambaku nau adadivar mu chisu chikemp ni kulembil, kwatukasikeshang nakash.” Pakwez, anch kwikil ubaaj wa kusal mwamu, yisu ni yisu sal usu wa kwitenchik mulong wa kusambish kuya ni mwin kwilej wa Bibil chakwel wilej nend pamwing ni mwin kulejan wakad kudokalang ku chikumbu.

Anch twasutish chisu pamwing ni akadivar nau anambaz akad kudokalang ku chikumbu, tukujingunin mikadil yau yiwamp ni mwamu tukwikal nau piswimp nakash. Chilakej, anch walejan nau pamwing ni waman mutapu usadidinau Bibil nawamp mulong wa kupukun muchim wa muntu, ukutwish kamu kuyilimish nakash. Anch wayikwash ambay ney in Kristu mu mudimu wa kulejan ap ku yikumangan, ukutwish kwikal ni arund avud.​—2 Kor. 6:13.

Parishay Paul ni yikokujol, murunend Titus weza kumutal, ni chinech chasala anch iyova kamu nawamp. (2 Kor. 7:5-7) Rusang riner rituvurishin anch, tufanyidin kuyikwash antu ada mu maswir kadap kwau ching kusu mu mazu, pakwez kand kusutin kwikal nau piswimp ni kusal yom yawonsu tukutwisha mulong wa kuyikwash.​—1 Yohan 3:18.

IKAL MURUND WAKIN PA CHISU CHA KUZENGOL

Akadivar nau anambaz netu a mu Risi ashil chilakej chiwamp nakash mu mutapu ukwashijadinau umwing ni mukwau. Shinshikin chilakej cha Sergey ni mukajend Tatyana. Amasalay eza kukimb chikumbu chau, ni kupwa kwa kuchitan, ayisenda ni kuya nau mulong wa kuyipol yipul. Asambela kumulikishaku Tatyana, ni wachirika ku chikumbu. Sergey ulondin anch: “Pashikay [Tatyana] ku chikumbu, kapamp kamwing nambaz umwing utakamena weza kumutal. Arund avud eza kutukwash kurijek mu chikumbu chetu.”

Sergey ulondin kand anch: “Nikatining nakash Jinswir 17:17, ulondina anch: ‘Murund [wakin] ukat kumekesh rukat machuku mawonsu. Mwanamaku wavadika mulong wa kukwash mu [yirung] yikash.’ Mazu minam mawanyina kamu chisu nading nirishina nich rupompat, mulong nadingap ni mutapu wa kuwanyish maswir mam ni nading kamu ni kuswir kwa ukwash wa arunam. Yehova wanginkisha arund ankasikesha kamu nakash ni kwinkwash.”a

Chisu turishina ni yikokujol yikash, tukweting kuswir kwa arund tukutwisha kuchingejin. Tukuyiswiriken kand nakash pa chirung cha mar makash. Chawiy, el tusalany etu awonsu usu wa kwikal arund akin kusambish kamu nlel!​—1 Pita 4:7, 8.