Lik Mwikadil wa Kwitongin Nakash uda mu Mangand Nlel
OV, UMEN anch antu avud mu mangand minam akatin anch ikal ni maz ya piur nakash, want ipau ni ayiman anch ad a usey nakash kusutamu akwau? Chikalap nchik yom yikutwishau kutambul, akat kutong anch ad awanyidin kutambul yisutina pinap. Kutong mud kwinoku kudokil ku mwikadil wa kwitongin nakash ni wakad kujikitish. Ni Bibil wasambela kulond anch wawiy mutapu ukwikalau antu a machuku ma nsuden.—2 Tim. 3:2.
Chakin, mwikadil wa kwitongin usambishinap nlel. Adam ni Ev akwata mupak wa kwitondinap ayinau yom yida yiwamp ni yiyimp, chawiy nlel etu awonsu tukat kuman mar ni kufa mulong wa mupak winou. Kupwa kwa yitot ya mivu, Mwant wa mu Yuda Ozias watonga anch wading ni mbil ya kwosh diseng da malash mu tempel, pakwez widimba kamu nakash. (2 Jsng. 26:18, 19) Chilik chimwing, Afaris ni Asadus ading atongin anch Nzamb wafanyina kuyisadin awiy mu mutapu uwamp nakash kusutamu antu akwau, mulong ading adokil ku dijuku da Aburaham.—Mat. 3:9.
Atunyingumukinamu kud antu ada in kwitongin ayinau, ni mwikadil wau ukutwish kutusamburikin. (Gal. 5:26) Tukutwish kusambish kutong anch tuwanyidin kwikal ni chisend kanang, ap kutusadin nawamp nakash kusutamu antu akwau. Mutapu ik tukutwisha kwipuk yitongijok mud yiney? Cha kusambish, tufanyidin kuman yom mud muyimenay Yehova. Mbil jaad ja Bibil jikutwish kutukwash.
Yehova ndiy ukata kukwat mupak wa yom tufanyidina kutambul. Shinshikin yilakej yimwing.
Mu dijuku, ngatan ufanyidin kwiyov anch amulimishin kud mukajend, ni ngachik ufanyidin kwiyov anch amukatin kud nfumwend. (Efes 5:33) Ikundj ni mband akatining anch maswir ma kulalijan mimen pad awiy ayinau. (1 Kor. 7:3) Anvaj niyau akatining anch anau ayiziyina, ni an akat kuchingejin anch anvajau ayibangin ni kuyimekeshin rukat.—2 Kor. 12:14; Efes 6:2.
Mu chikumangen, tufanyidin kuyilimish amakurump akata kusal mudimu ukash. (1 Tes. 5:12) Pakwez, kakwetap mbil ya kuyiyikel akadivar ni anambaz nau.—1 Pita 5:2, 3.
Nzamb wayinkisha antakel a ngand mbil ya kulambwish yitad ni ya kuyilimish kud antu ayikedinau.—Rom 13:1, 6, 7.
Nich rukat, Yehova ukat kutwinkish yivud kupandakanamu yituwanyidina kutambul. Mulong twavadika akayitil, tuwanyidin kwetu ching kufa. (Rom 6:23) Pakwez, mulong wa rukat rend rishinshamena, Yehova utwinkin yiyukish yivud. (Kus. 103:10, 11) Chiyukish ap chisend chin chawonsu tukweta, chid mulong wa ranaken rend rijim.—Rom 12:6-8; Efes 2:8.
MUTAPU IK TUKUTWISHA KWIPUK MWIKADIL WA KWITONGIN NAKASH?
Lik kutong mud mutonginingau antu a mangand. Pakad kutongin, tukutwish kusambish kutong anch tuwanyidin kutambul yom yivud nakash kusutamu antu akwau. Mulong wa kumekesh mutapu tukutwisha kukudish pakad kulab chitongijok mud chinech, Yesu wasadina chilakej cha ansalamudimu afutau rufalang ra denye umwing. Amwing pakach pau asambisha kusal mudimu pamanch nakash ni asala mudimu dichuku da kabuj pa muten usansena; akwau asala kwau mu saa umwing. Ashika a kusambish atonga anch mulong wa mudimu wasalau, afanyina kutambul difut dijim kuyisutamu akwau. (Mat. 20:1-16) Mu chilakej chinech, Yesu wamekesha anch in kwilej end afanyina kusanger yom yikatinay Nzamb kuyinkish.
Ansalamudimu asala mudimu dichuku da kabuj antonga anch afanyina kutambul difut dijim
Ikal mwin kujikitish, ipuk kada katun. (1 Tes. 5:18) Mwimburija kambuy Paul, kayitap akadivar nend a ku Korint kumwinkish ukwash wa ku mujimbu ap anch wading ukwet mbil anch akutwish kumusadin mwamu. (1 Kor. 9:11-14) Tufanyidin kusanger chiyukish chin chawonsu tutambwila ni kulik kuchingejin anch ching kamu antu akwau atwinka yom.
Kambuy Paul kitap ukwash wa nfalang
Ikal mwin kwikepish. Anch muntu wikal mwin kwitongin nakash, ukusambish kutong anch ndiy ukweta mbil ya kwikal ni yom yivud kusutamu yikwetay. Mulong wa kukangesh mwikadil winou usamburokina, chifanyidin kwikal muntu wikepishina.
Kwikepish kwa muprofet Daniel kwasala anch ikala muntu wa usey nakash kud Yehova
Muprofet Daniel washa chilakej cha kwikepish chipandakena kuwap. Wapamina mu dijuku da antu ajim, wading wa ufun, ukweta manang, ni ukaliweny uvud, yom yiney yafanyina kumubachik antonga anch afanyidin kumusadin mu mutapu wa pakampwil kusutamu antu akwau. (Dan. 1:3, 4, 19, 20) Pakwez, Daniel watonda kwikepish ni mwikadil winou wasala anch ikala muntu wa usey nakash kud Yehova.—Dan. 2:30; 10:11, 12.
Tulikany komb mwikadil wa kwitongin nakash uda mu mangand nlel. Pakwez, tudandamenany kusanger chiyukish chin chawonsu chitwinkishinay Yehova kusutin ranaken rend rijim.