Ov, Bibil Ukutwish Kukukwash Anch Urishin ni Mayej Makad Kuyerikang?

Chakul cha Bibil

Mwaning. Nzamb ukat kuyibangin atushalapol end ayedina. Bibil ulondin piur pa kashalapol ushinshamena anch: “[Yehova] ukat kumutalang pa ulal wa kuyel.” (Kuseng 41:4) Anch ukwet mayej madandamedina, yom yisatu yilondwilaku ey yikutwish kukukwash kumarish nich:

1. Mulembila Nzamb mulong wa kumwit usu wa kujijaman. Ukutwish kutambul “chisambu cha Nzamb chisutila ronganyin ra antu,” chikutwisha kukepish yakamish yey ni kukukwash.​—Filip 4:6, 7.

2. Ikal ni chitongijok chiwamp. Bibil ulondin anch: “Muchim wa musangar udi mwon uwamp, pakwez muchim wa runeng ukat kuumish mafup.” (Jinswir 17:22) Kwikal mwin kuswimbul kukutwish kuwapish machuku wakad kwiyov nawamp ni kud kand kwa usey nakash mulong wa ukash wey wa mujimbu.

3. Kasikesh ruchingej rey mulong wa machuku ma kurutu. Ruchingej rikash rikutwish kukukwash kwikal ni musangar ap anch ukwet mayej makash ni madandamedina. (Rom 12:12) Bibil ulondin anch chisu chimwing “kwikil muntu ap kusu umwing . . . ukeza kinan kand mulong wa kuyel.” (Isay 33:24) Nzamb ukupwish mayej mawonsu makangenyau kwok kud in siyans a katat. Chilakej, Bibil urumburil anch amapal akez kwikal kand ansand palondinay anch: “Mujimbu wend ukwikal sinin mudi mujimbu wa mwan, ukat kuchirikin kand ku machuku ma usand wend.”​—Job 33:25.

Chijikish: Ap anch akwet kashinsh anch Nzamb ukat kuyikwash kamu, Atuman a Yehova niyau akat kuyok kud amingang anch akwet mayej makash. (Marko 2:17) Pakwez, kakatap kuyilej antu akwau piur pa mutapu wa kwiyokish ap mwon wa kusadin; muntu ni muntu ufanyidin kwikwatin mupak amwinend pa mulong winou.