Yesu Ukat Kupandishan—Mutapu ik?
Chakul cha Bibil
Yesu wayipandisha antu ashinshamena chisu chapanay mwom wend mudi chakupesh cha difut. (Mateu 20:28) Bibil umutazukin Yesu anch “Mupandish wa antu awonsu a pa mangand.” (1 Yohan 4:14) Bibil ulondin anch: “Dipandish dikat kumeken mwi ndiy kusu. Mwi ngand yawonsu mwikil mukwau wapanay Nzamb mulong wa kutupandish.”—Midimu 4:12.
Yesu ‘wafa mulong wa antu awonsu’ atekina ritiy mudiay ndiy. (Hebereu 2:9; Yohan 3:16) Pakwez, “Nzamb wamuvumbula kwikal mwom,” ni Yesu wachirika mwiur mudi chitang cha mu spiritu. (Midimu 3:15) kudiosh kamu pinapa, Yesu ukutwish “kuyipandish antu ku yom yawonsu chikupu, awiy akuseja kudi Nzamb mwi ndiy, mulong ndiy udi mwom chikupu ukuyilondilap kudi Nzamb.”—Hebereu 7:25.
Mulong wak tukwet kuswir anch Yesu atulondina?
Etu awonsu tudi akayitil. (Rom 3:23) Chitil chikat kutek mwimbu pakach pa Nzamb ni yetwetu ni kutufish nich mulong wa rufu. (Rom 6:23) Pakwez, Yesu ukwet chisend cha “kuyilondin” antu atekina ritiy mu difut dia yakupesh yend. (1 Yohan 2:1) Ukat kuyilondin antu kusutil ku kumwit Nzamb chakwel atesha malembil mau ni kuyilikishin yitil yau kusutil pa dishin dia yakupesh yend. (Mateu 1:21; Rom 8:34) Nzamb ukat kutesh kwit kwau kusadilau kusutil Yesu mulong kwit kwinoku kukwatijadin ni rusot rend. Nzamb wamutuma Yesu pa divu ‘mulong wa kuyipandish antu.’—Yohan 3:17.
Ov, chitin kusu kwau kwitiy mudiay Yesu mulong wa kupand?
Bwat. Chawiy, tufanyidin kumwitiy Yesu mulong wa kutambul dipandish, pakwez chitin kusal yivud. (Midimu 16:30, 31) Bibil ulondin anch: “Chawiy mujimbu wakad mupim ufil. Chawiy chimwing kand, niyau ritiy rakad yisalijok yiwamp rufil.” (Jakobu 2:26) Mulong wa kupand, tufanyidin:
Kwilej piur pa Yesu ni Tatukwend, Yehova.—Yohan 17:3.
Kukasikesh ritiy mudiau awiy.—Yohan 12:44; 14:1.
Kumekesh ritiy retu kusutil kukuziyil ku yijil yau. (Luka 6:46; 1 Yohan 2:17) Yesu wafundisha anch, kadiap antu awonsu akata kumutazuk anch “nsalej” akeza kupand pakwez ching antu akata “kusal mudi musotilay Tatukwam udia mwiur.”—Mateu 7:21.
Kudandamen kumekesh ritiy retu chikalap nchik yikokujol. Yesu wovikesha patok chisu chalonday anch: ‘Mwawonsu ukeza kajijaman djat ni kwi nsudiel ndiy ukeza kupand.’—Mateu 24:13.