Mujimbu wa muntu woshangau udi mu mulond piswimp ni chipich cha mwin kufa

Yom ik Yilondinay Bibil Piur pa Kwosh Mujimbu wa Mufu?

Chakul cha Bibil

Bibil kaletinap mbil ap yimwing piur pa chaku cha kwosh mujimbu wa muntu wafang kal. Kwikil mbil ya Bibil yilondina piur pa kujik ap kwosh mijimbu ya afu.

Pakwez Bibil ulondin piur pa atushalapol ashinshamena a Nzamb ajika afu au. Chilakej, Aburaham wasala usu nakash mulong wa kuland ndond ya kumujikin mukajend Sara.—Disambishil 23:2-20; 49:29-32.

Bibil ulondin kand piur pa antu ashinshamena osha yid kanang ya mijimbu ya antu afa. Chilakej, chisu chafay Saul Mwant wa Isarel ni anend amakundj asatu kwi njit, mijimbu yau yashala bil mu teritwar wa akankuny nau ni ayisadina pakad kalimish. Chateshau mulong winou, amasalay ashinshamena a Isarel aya kusend mujimbu wa Saul ni ya anend, ayosha ni ajika yashalaku. (1 Samwel 31:8-13) Bibil umekeshin anch wading mutapu uwamp wa kusal mijimbu ya amakundj inay.—2 Samwel 2:4-6.

Yitongijok ya makasu piur pa kwosh mujimbu wa mufu

Chitongijok cha makasu: Kwosh mujimbu wa muntu wafang kal kudi kulik kulimish mujimbu.

Win yakin: Bibil ulondin anch antu afila akat kuchirik ku rufunfut, chom chinech chikat kushiken anch mujimbu wavund. (Disambishil 3:19) Kwosh mujimbu wa muntu wafang kal kukat kusal anch mujimbu wikala swa mawut ap rufunfut.

Chitongijok cha makasu: Pasak, oshang ching antu akad kwikal ni dilau dia Nzamb anch afa.

Win yakin: Mijimbu ya antu amwing akad kushinshaman ayosha kupwa kwa rufu rau, mudi Akan ni dijuku diend. (Joshua 7:25) Pakwez, chom chinech chasadika kwau pa chipatu, chidiap chijil bwat. (Kuvurik Yijil 21:22, 23) Mudi mutapu twalondang kwiur oku, mijimbu ya antu amwing ashinshamena, mudi Jonatan mwan a Mwant Saul, awosha kupwa kwa rufu rend.

Chitongijok cha makasu: Kwosh mujimbu wa muntu wafang kal kukumukangesh Nzamb kumuvumbul muntu.

Win yakin: Kwikil chom chikutwisha kumukangesh Nzamb kuyivumbul afu, ap anch muntu amujika, amwosha, wafila mu mem ap amudia kudi nnam wa chidiany. (Kujingunik 20:13) Nzamb wa Dikand Diawonsu ukutwish kutangiril kand pakad kulab mujimbu wa muntu.—1 Korint 15:35, 38.

Ov, Mujimbu wey Akuwosh Anch Akuujik Piukufa?

Anch ukimbin kukwat mupak wa mutapu winou, chidi chiwamp kutongin piur pa yom yilondwilaku ey:

Rusot ra mwin kufa. Bibil ukwet yilakej yimekeshina mutapu antu a mu dijuku dia muntu wafang mwalimishau mbil yend piur pa mutapu wa kusal mujimbu wend anch wafa.—Disambishil 50:4, 5; Kubudik 13:19.
Yishankur ya pol. Yom yiney yikat kwikal ni usu piur pa mutapu ukatau antu kusal ni mujimbu wa muntu wafang kal. (Yohan 19:40) Chilakej, pasak, antu ading ni chaku cha kujik afu. (Disambishil 49:31; 1 Samwel 28:3) Chilik chimwing nlel, muntu ukutwish kutond kulondul yishankur ya pol anch yipwitamijadinap ni mbil ja Bibil.
Mbil ja ngand. Bibil utukasikeshin kuziyil antakel a piur. (Rom 13:1) Mu jingand jimwing, antakel akat kutek yijil piur pa mutapu wa kusal ni mijimbu ya afu. Chilakej, anch mujimbu wa muntu akuwosh, akat kulet mbil piur pa ndond ya kudjibwil mawut.
Yovil ya antu akwau. Bibil utukasikeshin kukimb uwamp wa antu akwau. (Filip 2:4) Chisu tukwatina mupak piur pa chom cha kusal ni mujimbu wa muntu wafang kal, tufanyidin kushinshikin yipul yilondwilaku ey: Antu a mu dijuku diam atongin yom ik piur pa kwosh mujimbu ap kuujik? Antu a ndond yinishicha akat kuman nchik piur pa chaku chinech?