Wimbwambol mwi Ngand ya Muspiritu

Antu awonsu a muspiritu atangay Yehova adinga awamp. Chad lel mwangel umwing wakarumuka wikal muyimp. Ndiy Satan Djabul. Satan wasota antu a pansh amwifukwilang ndiy pikil Yehova bwat. Tal yasalika:

Mu chir cha Eden, mwadinga mitond yivud yadinga ni kusong mabuj matadina. Yehova wamuleja Adam ni mukajend, Ev, anch akutwish kudia pakad chijil ya mabuj mau. Pakwez kwadinga mutond umwing walonday Nzamb anch kakutwishap kudia ya mabuj mau. Walonda anch ang kamu adia ya ku mutond, akez kafa kamu.—Disambishil 2:9, 16, 17.

Dichuku dimwing padingay Ev di’amwinend nnak walonda nend. Mwaning, kadingap chakin nnak walonda; wadinga Satan Djabul wasala chimekan mud nnak wading ni kulondang. Satan wamuleja anch ang wadia ya dibuj dijidikinau, ukez kikal mwin manangu mud Nzamb. Walonda kand anch kakutwishap kufa bwat. Mazu minam mawonsu madinga ching kwau makasu. Ap mwamu, Ev wamwitiya Satan ni wadia dibuj. Kupwa, wamwinkishaku Adam, ni ndiy wadia kwend.—Disambishil 3:1-6.

Kudiokal ku chishimu chinech chakin, twilej kal anch Satan udi mbwambol ni mukamakasu. Wamuleja Ev anch ang wamubwambukin Nzamb, kakez kafap. Min-ma madinga makasu. Ev wafa mud mwafay kand Adam. Satan kafap pin-pa, ap nchik ukez kashiken kufa, mulong wasala chitil. Katat, chad, uchid mwom ni ukat kudandamen kushadish akaantu. Uchid kand mukamakasu, ni ukat kupim kuyibachik antu ku kumatik yijil ya Nzamb.—Yohan 8:44.

Angel Akwau Abwambul

Kwinyim, angel akwau akarumuka ku kuyip. Angel inay amana amband a yifu yiwamp chad eza panap pansh ni asota kulal nau. Chad ashirikina pansh ni adjala mijimbu ya wikundj. Chawiy itondinap ayinau amband. Chinech chading chinyim ni rutong ra Nzamb.—Disambishil 6:1, 2; Yuda 6.

Chinech chaleta kand kanrumbangesh mukach mwa ukauntu. Akajau avalola aan, pakwez kadingap mud aan awonsu. Akudila mu kwikal in chisum ni ayifuvu anjipan. Chawiy divu dizula sens ni chisum, mutapu Yehova wakatulay kuyijiyish antu ayimp nich mabeb majim. Antu apanda ku mabeb minam adinga ching kusu mwin kutentam Noa ni dijuku diend.—Disambishil 6:4, 11; 7:23.

Chawiy, angel ayimp inay, achirika mwi ndond ya muspiritu; kafap bwat. Pakwez ayikatwila dilapish. Kachirikap kand mu chisak chitentamina cha Nzamb nau angel atentamina. Nakash nakash, Yehova kayitiyinap awiy kudjal kand mujimbu wa anaantu. Ni nsudiel yawu akez kafil mu dichuku dia dirumburish dijim.—2 Pita 2:4; Yuda 6.

Satan Amwopat kal Mwiur

Mu chikunku cha kusambish cha chirungu chetu cha mivu chitot, kwikala njit mwiur. Buku wa Bibil wa Kuburik ulejen anch: “Njit yijim yamekana mwiur: Mikael [Yesu Kristu, wavumbulau] ni angel end [awamp] ni kurish nend nnak mujim [Satan]. Nnak mujim nau angel end [ayimp] warisha nau; awiy kapandikanap nich usu, ap kusu ndond yau kayitanap kand mwiur. Nnak mujim amudjibwila pansh, ndiy nnak mukuru upidilau anch Djabul ni Satan, sakadimban wa ngand yakabuj; amudjibwila pansh, ni angel end [ayimp] ayidjibwila nend.”

Yom ik yamekana? Rusangu ridandamedin anch: “Chawiy, sangarany mwiur ni yenen ushichanyamu!” Angel awamp akutwish kwikal ni musangar mulong Satan nau angel end ayimp, ap aspiritu, kadingap kand mwiur. Pakwez nchik piur pa antu pa divu? Bibil ulondil: “Riyind kud a mangand ni karung, mulong Satan washirik kal pansh kud en, ukwet ujim nakash, wij kal chakwel anch kwamushal kal chisu chikemp kusu.”—Kuburik 12:7-9, 12.

Mwaning, Satan ni ambay end ayimp akat kuyishadish ni kuletin antu riyind rijim panap pa divu. Angel ayimp inay akat kuyitazuk anch ademon. Adi akankuny nend Nzamb. Awonsu awu adi ayimp.