Dilejan dia 2

Nzamb Udi Nnany?

Nzamb wakin udi nnany, ni dijin diend did disu? (1, 2)

Ov ukwet mujimbu wa mutapu ik? (3)

Yizwish yend yiwapila nakash yidi yisu? (4)

Ov tukutwish kusadin yipich ni yifanikesh mu kumwifukwil kwetu? (5)

Jisu njil jaad ja kumwilejin Nzamb? (6)

1. Antu akat kwifukwil yom yivud. Pakwez Baibel utulejin anch kuding ching kusu Nzamb umwing WAKIN. Ndiy watanga chom ni chom mwiur ni pansh. Mulong ndiy watwinka etu mwom, udi kamu kwend Ndiy tufanyidina kwifukwil.​—⁠1 Korint 8:​5, 6; Kuburik 4:⁠11.

2. Nzamb ukwet yijiken yivud pakwez ukwet kusu dijin dimwing. Dijin din-dia didi YEHOVA. Mu Mabaibel mavud, dijin dia Nzamb adidioshamu kal ni kudiswinkesh nich yijiken NSALEJAM ap CHINAWEJ. Pakwez pa chisu chamufundau Baibel, dijin YEHOVA diamekananga mukach mway tupamp mud 7 000!​—⁠Kubudik 3:​15, NW; Kuseng 83:​18, NW.

3. Yehova ukwet mujimbu, pakwez kiudiap ufanikena ni [mijimbu] yetu. “Nzamb udi Spiritu umwing,” Baibel ulondin. (Yohan 4:​24, NW) Spiritu udi mutapu umwing wa mwom udinga wa piur kusut iyetu.  Kwikil mukamuntu wezap kumuman Nzamb ap dichiku dimwing. Yehova ushiching mwiur, pakwez ukutwish kuman yom yawonsu. (Kuseng 11:​4, 5; Yohan 1:18) Chad lel, spiritu utumbila (mwinsant) chidi chom ik? Kaudiap muntu mud Nzamb. Chinyimanyim, udi usu wa kusalish wa Nzamb.​—⁠Kuseng 104:⁠30.

4. Baibel uburil untu wa Nzamb kud etu. Umekeshin anch yizwish yend yiwapila nakash yidi rukat, kutentam, manangu, ni dikand. (Kuvurik Yijil 32:​4, NW; Yob 12:​13, NW; Isaya 40:​26, NW; 1 Yohan 4:⁠8) Baibel utulejin etu anch udi kand mwin ranaken, uwamp, dilikishin, kupan ni kwishimpul muchim. Etu, mud aan in kuziyil, tufanyidin kupim kumwilikej.​—⁠Efesus 5:​1, 2.

5. Ov tukutwish kwasin manungun ap kulembidil yipich, yifwatul, ap yifanikesh mu kwifukwil kwetu? Bwat! (Kubudik 20: 4, 5) Yehova ulondil anch tufanyidin kumwifukwil ching ndiy kusu. Kakezap kwangan uyaj wend ni muntu mukwau ap umwing ap chom chikwau ap chimwing. Yipich kiyikwetap usu wa kutukwash etu.​—⁠Kuseng 115:​4-8; Isaya 42:​8, NW.

6. Mutapu ik tukutwisha kushiken kumwonganyin Nzamb nawamp? Njil yimwing yidi kushinshikang yom yatangay ni kutongijokinang piur pa yin yitulejina etu. Yitang ya Nzamb yimekeshin kud etu anch ukwet dikand dijim ni manangu. Tumen rukat rend mu yawonsu yasalay. (Kuseng 19:​1-6; Rome 1:20) Njil yikwau tukutwisha kwilej piur pa Nzamb yidi kusutin kwilejang Baibel. Mwinomu ukat kutulej etu yom yivud piur pa mutapu wa Nzamb udingay ndiy. Utulejin kand piur pa rutong rend ni yik yisotinay etu tusala.​—⁠Amos 3:​7, NW; 2 Timoteu 3:​16, 17.

[Caption on page 5]

Twilejin piur pa Nzamb kudiokal ku yitang ni kudiokal mu Baibel