Dilejan dia 12

Kumekeshang Kulimish Mwom ni Mash

Mutapu ik tufanyidina kuuman mwom? (1) kudiosh divumu? (1)

Akristu akumeshang nchik kwakamin ukash wa mwom? (2)

Ov chidi chiyimp kujip annam? (3)

Yisu yimwing ya yisaljok yakad kumekesh kalimish mulong wa mwom? (4) Chijil cha Nzamb piur pa mash chidi chisu? (5)

Chijil chinech chitadil kand kwandjik mash mu mijir? (6)

1. Yehova udi Musul wa mwom. Mwom wau aom awonsu udiokil kud Nzamb. (Kuseng 36:⁠9) Mwom udi utumbila ku mes ma Nzamb. Ap kand mwom wa mwan wakad kuvadik mwivumu mwa makwend udi wa usey kud Yehova. Kujip kwa kukat mwan mukemp mud winou uchidia kukulang chiyipin ku mes ma Nzamb.​—⁠Kubudik 21:​22, 23; Kuseng 127:⁠3.

2. Akristu akin adi in kwakamin ukash wa mwom. Akat kushinshik anch motak ni yikumbu yau yikal yakad kuletish aksident. (Kuvurik Yijil 22:⁠8, NW) Atushalapol a Nzamb kakatap kuswimbwil mwom wau ching kusu piur pa kwisangaresh ap kuzangam. Chawiy chilikinau kusal nau akwau masport ma ubaj makutwisha kusal antu akwau nayimp [kuyibukun ap kuyitap chitat]. Akat kwipuk kwipuwangej kukasikeshidina ubaj.​—⁠Kuseng 11:5; Yohan 13:⁠35.

3. Nau mwom wa nnam udi utumbila kudiay Sakatang. Mukristu ukutwish kujip annam mulong wa kukwat yakudia ni yidjal ap kwilam amwinend piur pa mayej ni ubaj. (Disambishil 3:21;9:3; Kubudik 21:28) Pakwez chidi chiyimp kumesh annam mar ap kuyijip kwau mulong wa sport ap kwisangaresh.​—⁠Jinswir 12:⁠10.

4. Kunang ruwand, kusakul ntit ja betel [mbut ya ku Asia, mud ndung], ni kusadinang mon ya kulewish (drogues) yadingap ya Akristu. Yisaljok yiney yidi yiyimp mulong (1) yikat kutusal etu aswik au, (2) yikat kusal nayimp mijimbu yetu, ni (3) yidi yijondila. (Rome 6:19; 12:1; 2 Korint 7:⁠1) Chikutwish kukasiken nakash kulik yaku yiney. Pakwez tufanyidin kuyilik tumusangaresha Yehova.

5. Ni mash kand madi matumbila ku mes ma Nzamb. Nzamb ulondil anch tufanyidin ‘kulik mash.’ (Midimu 15: 28, 29; Disambishil 9:​3, 4) Chidi chiyimp kudia mash. Chidi kand chiyimp kudia mbij ja nnam wakadau kukatul pa nshing nawamp. Ang nnam amunyongang ap wifilang mu mupit, chifanyidinap kumudia. Ang amwasang ni nseu ap kumuloz, chifanyidin kumukatul nshing swa anch udi wa kudia.​—⁠In Levi 17:​13, 14, NW.

6. Ov chidi chiyimp kwitiy kwandjikish mash mu mijir? Vurikap, Yehova witin anch tujila mash. Kwawiy kulond anch tufanyidinap kutambul mash ma muntu windjing ap kand kutekish mu mifuku mash metu ayinetu ni kumachirish kand mu mutapu ap umwing. (Midimu 21: 25) Chawiy Akristu akin kakwitiyap kwandjik mash mu mijir. Akwitiy ayoka ni mon yikwau, mud ya kwandjikin mu mijir yakad kusadin mash. Asotin kwikal aom, pakwez kakatap kupim kupandish mwom wau kwa kumatikang yijil ya Nzamb.​—⁠Mateu 16:25

[Caption on page 25]

Chakwel tumusangaresh Nzamb, tufanyidin kwipuk kwandjik mash mu mijir, yaku yijondila, ni maaksident mamwamu