Yesu Kristu—Ndiy Udi Nany?

“AP ANTU avud akad kwikal Akristu itiyin anch Ndiy wadinga mulej umwing mujim ni ukweta manangu. Ndiy wadinga chakin ni usu wa kupwit upandakena antu akwau awonsu ezap kwikalaku.” (The World Book Encyclopedia) “Ndiy” winou udi nany? Yesu Kristu, mwin kusambish wa Ukristu. Ov ey wij anch ndiy udi nany? Ov ndiy ukwet usu mu mutapu win wawonsu mu mwom wey?

Jinsangu ja mudimu wa Yesu ajifundin mu Baibel mu mikand yinying ya chishimu yitazukinau anch rusangu ruwamp (enjil). Ov jinsangu jinej jidi ja kashinsh? Kupwa kwa kujishinshikin, ngang-a-chishimu wijikena nawamp Will Durant wafunda anch: “Anch antu akemp akad kwijikan eza kurumb mu chizaz chimwing untu wa usu ni ukatishena mud winou, yaku ya piur ni yitongijok ya ukadivar mud yiney yikatau kusadil antu, chelang kwikal lel chilay chimwing chakad kwitiyik chisutila kulemp ap chilay chisu chafundau mu Rusangu ruwamp.”

Pakwez, ku mamiliyon ma antu adia Kwingangel ni ndond yikwau yikwau, Yesu Kristu udi ngendj. Akutwish kwitiy anch wadingaku, pakwez kakatap kutong anch ukwet usu piur pa mwom wau. Akwau amulikin Yesu mud kafanyidinap mulong wa yom yasalau in kulond anch adi in kwilej end. Mu Japon amwing akutwish kulond anch ‘Akristu adjibula bomb atomik pa musumb wa Nagasaki, musumb umwing ukweta Akristu avud nakash kupandakan misumb yikwau mu Japon.’

Chawiy lel, ov ukumufish nich mwingang mulong wa kuyel kwa muyej anch muyej amwinend walikin kulondul chiyul cha mwingang? Chakin anch bwat. Antu a Kristendom adiula kal chiyul cha Yesu piur pa mutapu wa kupwish milong yau ya dichuku ni dichuku. Chawiy pa ndond pa kumulik Yesu mulong wa antu afila mu kan anch adi Akristu, pakwez akad kulondul mafundish mend, ov mulong wak ukutwishap amwiney kwilej jinsangu kanang piur pend? Shinshikin nawamp Baibel, ni kutal chakin Yesu udi nany ni mutapu ik ukutwishay ap kukarumun mwom wey.

Chiyul Chend—Rukat

Yesu Kristu wadinga mulej umwing mujim washakama mu Palestin pasutil kal piswimp mivu 2 000. Yom yikemp nakash yijikena piur pa wanikanch wend. (Mateu, shapitre 1 ni 2; Luka, shapitre 1 ni 2) Pikalay ni mivu 30, Yesu wasambisha mudimu wend wa “kulejan uyakin.” (Yohan 18:37; Luka 3:​21-23) In kulejan anying a chishimu cha mwom wa Yesu imanyina kamu nakash pa mudimu wend wa patok, mivu ya nsudiel yisatu ni chikunku ya kushakam kwend panap pansh.

Pa chisu cha mudimu wend, Yesu wayinkisha in kwilej end nfungul ya mutapu wa kupwish milong kushalijan mu mwom wau. Ov nfungul yiney yadinga yom ik? Radinga rukat. Mu dimwing dia mafundish mend mijikena nawamp mu chishimu, matazukinau anch Mafundish ma pa Mukandu, Yesu wayifundisha in kwilej end mutapu wa kumekesh rukat kud antu akwau. Walonda anch: “Sal yom, kudi antu akwau, mudi muukatila ing niyau akusadilang ey.” (Mateu 7:12) Chiyul chinech achitazukin anch Chiyul Chipandakena Usey. “Antu” adingay ni kwisambinay Yesu pinap akutwish kand kwikal akankuny a muntu. Mu mafundish minam kand, walonda anch: “Yikatany akankuny nen, yilembidilany akata kukuzengolany.” (Mateu 5:44) Ov rukat mud riner rikutwishap kupwish yivud ya milong yitukweta nlel? Mwamu kamu mwatongay mukaleng mwin Hindu Mohandas Gandhi. Afundil piur pend mud ndiy walonda anch: “Ngand yey ni ngand yam piyikushikena ku kwovijan kulondulijan nich mafundish ma Kristu mafundinau mu Mafundish ma pa Mukandu, tukez lel kapwish milong . . . ya mangand mawonsu.” Anch twasadil mafundish ma Yesu piur pa rukat, makutwish kuyeril misong ya antu.

Rukat Rend Risadil

Yesu wadinga ni kusadil yadingay ni kufundish. Wateka kuwap kwa antu akwau kurutu kwa kuwap kwend amwinend ni wamekesha rukat mu yisal. Dichuku dimwing, Yesu ni in kwilej end adinga ni kuyisadil antu avud, pakad ap kuman chisu cha kudia yakudia. Yesu wamana kuswir kwa in kwilej end chakwel ‘iswedishaku pakemp,’ chawiy lel aya kwi ndond yau ayinau. Pakwez chisak cha antu ayitakela kwi ndond kwayau ni adinga ni kuchingel kushik kwau. Ov mutapu ik wela kusal anch yey wadinga pa ndond ya Yesu? Mwaning, Yesu “wayovila riy” ni “wasambisha kuyilej yom yivud.” (Marko 6:​30-34) Chovil chinech chikash cha riy chamubachika kuyikwash antu akwau.

Yasalay Yesu mulong wa kuwap kwa antu akwau yisudedinap kusu pa mafundish ma yom ya muspiritu. Wapana kand ukwash umekena. Chilikej, wayidisha amakundj 5 000 (kuwejaku amband nau an) adinga ni kumutesh kushik urel nakash. Wayidisha kand antu akwau 4 000 mu chisu chikwau. Kapamp ka kusambish, wasadila mabot matan ni ansh aad, kapamp ka nsudiel, wasadila mabot sambwad ni ansh akemp. (Mateu 14:​14-21; 15:​32-38; Marko 6:​35-44; 8:​1-9) Ov yidi yilay? Mwaning, wadinga mwin kusal mudimu wa chilay.

Yesu wayerila kand ayej avud. Wayerila amputames, ayilim, in musong wa mak, ni atujik-a-matu. Wasangula kand ap afu! (Luka 7:22; Yohan 11:​30-45) Dichuku dimwing, mwin kuyel mak wamwilembila: “Anch ey ukatil, ukutwish kwingok.” Ov mutapu ik wakulay Yesu? “Watandjeka chikas wamukwat, wamwel anch: ‘Nikatil kukok, chawiy katat yerik.’” (Marko 1:​40, 41) Yesu wadinga ni rusot rijim ra kuyikwash. Nich yilay mud yiney, wamekesha rukat rend mulong wa ayimanamar.

Ov chikasiken kwitiy? Pakwez Yesu wasala yivud ya yilay yiney kurutu kwa antu avud. Ap akankuny nend, adinga ni kumupompat, antu apakishanga kumukwat yilim chisu chin chawonsu, katwishap kutadik anch wasalanga yilay. (Yohan 9:1-34) Chikwau kand, yilay yend yadinga ni rutong kanang. Yayikwasha antu kumwijik Yesu mud muntu umwing utuminau kud Nzamb.—Yohan 6:14.

Kushinshikin mu wiswimp mafundish ma Yesu ni mwom wend yimwikadishil mukatish kud etu ni kutubachikin ku kusot kwilikej rukat rend. Pakwez, winou udap kusu mutapu umwing ukutwishay Yesu kwikal ni usu mu mwom wey. Kadingap kusu mulej umwing mujim wafundisha rukat. Walejana anch wadingaku kurutu kwa kwikal muntu mud Mwan kapokal wa Nzamb. (Yohan 1:14; 3:16; 8:58; 17:5; 1 Yohan 4:9) Udaku kand katat, chom chimusadila ndiy kwikal muntu umwing ukweta dirumburik dijim kud ey. Baibel ulejen anch amusangula Yesu ni katat wadidil kal want mud Mwant wa Want wa Nzamb. (Kujingunik 11:15) Yesu walonda anch: “Antu akwikal nich mwom wa chikupu anch akwijik ey Nzamb wakin, ni kumwijik Yesu Kristu watuma ey.” (Yohan 17:3; 20:31) Chakin, kumwijik Yesu Kristu kukutwish kurumburik mwom wakad nsudiel mu Paradis! Ov chinech chitwishikin nchik? Ov mulong wak ukutwishap kwilej yivud piur pa Yesu ni kutal mutapu ‘utuyikedila rukat ra Kristu’ chakwel tumwilikeja? (2 Korint 5:14) Atuman’a Yehova akusangar kukukwash.​—⁠Yohan 13:​34, 35.

Ching anch ayilejen, mifund yawonsu ya Baibel yidiamu yidiokil mu Mukand wa Nzamb wa Uruund.