Difundish dia 4

Mutapu ukutwisha kwilej piur pa Nzamb

Ukutwish kwilej piur pa Yehova kusutil kutang Baibel. Pasak Nzamb watondap antu amwing chakwel afunda yitongijok yend. Yom yafundau yiniya ayitazukin anch Baibel. Nlel twilejin piur pa Nzamb kusutil kutang Baibel. Mulong Baibel ukwet dizu ap uruu wa Yehova, amutazukin kand anch Dizu dia Nzamb. Tukutwish kwitiy yilondilay Baibel mulong Yehova kakudimbanangap. “Nzamb kakutwishap kudimban.” (Hebereu 6:18) Dizu dia Nzamb dikwet uyakin.—Yohan 17:17.

Baibel chidi chipan cha Nzamb chipandakena kuwap kud etu. Udi kamu mud mukand wa tatuku mwin rukat kud anend. Utulejin kushilamu kwa Nzamb kwa kukarumun divu kwikal ndond yimwing ya kushakam yipandakena kuwap—paradis. Utulejin yasalay Nzamb pasak, yisadilay katat, ni yikusalay machuku ma kurutu mulong wa anend ashishamena. Baibel utukwashin kand kupwish milong yitukweta ni kuman musangar.—2 Timote 3:16, 17.

Atuman’a Yehova adi arund nend Nzamb; akukukwash kutesh yifundishina Baibel. Yileja kwey anch usotil kwilej Baibel. Kakwitangap nfalang mulong wa kwilej Baibel. (Mateu 10:8) Chikwau kand, ukutwish kukumangan ku yikumangan ya Ukristu. Yikumangan yiney akat kuyisadil mu jindond ja difukwil jitazukinau anch Yot ya Want. Anch wakumangan ku yikumangan ya Ukristu, ukupam swa mu ronganyin rey piur pa Nzamb.

Ukutwish kwilej piur pa Nzamb kusutil yom yasalay. Chilikej, Baibel ulondil anch: “Nzamb watanga diur ni divu.” (Disambishil 1:1) Yehova patangay “diur,” wasala muten. Ov chinech chitufundishin ik piur pa Nzamb? Chitufundishin anch Yehova ukwet dikand dijim nakash. Ndiy kusu ukutwisha kusal chom chikweta usu upandakena mud muten. Chitufundishin kand anch Yehova udi mwin manangu, mulong chafanyidina manangu chakwel kusal muten, niwawiy uletining marungil ni chimunyik pakad kutemish ap pakemp.

Yatangay Yehova yimekeshin anch utukatin. Tongin mitapu ya mabuj kushalijan madia pa divu. Yehova wela kutwinkish kusu mutapu umwing wa dibuj—ap kulik kumasal. Pakwez, Yehova watwinkisha mabuj ma mitapu ni mitapu min kushalijan yifu, kujimb, ulomb ni kutal. Chinech chimekeshin anch Yehova kadap kusu Nzamb umwing wa rukat pakwez udi kand mwin kupan nakash, mwin kuyitongin akwau ni muwamp.—Kuseng 104:24.