Shapitre Wa Makum Maad Ni Umwing
Rutong ra Yehova Rikat Kushiken mu Uyaj
1, 2. (a) Ov rutong ra Yehova chom ik piur pa yitang yend yawonsu yikweta manangu? (b) Anany adinga mu dijuku dia Nzamb dinungina mu uumwing dia in kwifukwil?
RUTONG ra rukat ra Yehova ridi ra kuyikumangej yitang yawonsu yikweta manangu mu difukwil dia Nzamb umwing kusu wakin, ni kuyinkish awonsu want ipau wa an a Nzamb. Yawiy kand yisotilau kamu nakash antu awonsu akatina kutentam.
2 Yehova wasambisha kushikij rutong riner ruwamp pasambishay midimu yend ya kuumb. Chitang chend cha kusambish chading Mwan wimekesha kudiosh ku divumbuk diend mud “kutok kwa uyaj wa Nzamb, ndiy kand ufanakenay nend.” (Hebereu 1:1-3) Mwan winou wadinga kapwokal, watangau kud Nzamb amwinend. Chawiy lel, kusutil kud Mwan winou kwawiy kwatanginau yom yikwau yawonsu: cha kusambish angel mwiur, chad antu panap pansh. (Job 38:7, NW; Luka 3:38) Awonsu inay asala dijuku dimwing dia mwiur ni pa divu. Yehova wadinga kud awonsu inay Nzamb wau, Mukaleng Mwin Mangand, ni Tatukwau mwin rukat.
3. (a) Ov chom ik twaswana etu awonsu kud anvajetu a kusambish? (b) Ov ditenchik ik dia rukat diakwatay Yehova mulong wa an a Adam?
3 Payifishau nich anvajetu a kusambish kwa kuyikatwil rufu mud akayitil in kwisotil, ayopata mu Eden ni kuyidiburil kud Nzamb. Kadingap kand mu dijuku diend dia mwiur ni pa divu. (Disambishil 3:22-24; Kuvurik Yijil 32:4, 5) Etu awonsu tudi anau, chawiy lel twavadika nich yibachikin ya kusal yitil. Pakwez Yehova wading wij anch pakach pa an a Adam nend Ev pakez kwikal amwing akeza kukat kutentam. Chawiy lel chatenchikay nich rukat chakwel anch an inay amana mutapu wa kushiken “want ipau wa uyaj pamwing nau an a Nzamb.”—Rom 8:20, 21.
Isarel Washadisha Ndond ya Dilau
4. Dilau ik datandurilay Yehova kud Isarel wa pasak?
4 Piswimp mivu 2 500 kupwa kwa kumutang Adam, Yehova wayitapisha kand antu amwing dilau dia kwikal ni urund wa pakampwil nend Ndiy. Wamutonda Isarel wa pasak chakwel ikala antwend ni kuyinkish kamu Chijil chend. (Disambishil 12:1, 2) Wayitenchika mud muchid ni kuyisadil kulondwish nich rutong rend. (Kuvurik Yijil 14:1, 2; Isay 43:1, NW) Pakwez, ading achidi mu uswik wa chitil ni rufu, chawiy lel kadingap ni want ipau wa uyaj wadingau nich Adam nend Ev pa kusambish.
5. Mutapu ik washadishau in Isarel ndond yau ya pakampwil kurutu kwa Nzamb?
5 Ap mwamu, in Isarel itapila ndond yimwing ya dilau kurutu kwa Nzamb. Adinga kand ni chisend cha kumulimish Yehova mud Tatukwau ni kusadil pamwing nich rutong rend. Yesu wakasikeshina usey wa kuwanyish chisend chinech. (Mateu 5:43-48) Pakwez, muchid wa Isarel wakanganya kusal chom chinech. Ap anch in Yuda adinga ni kufa mukan anch, “Nzamb ndiy tatukwetu umwing kusu,” Yesu walonda anch yisalijok yau ni mwikadil yamekeshau yadinga chinyim nich kulond kwau. (Yohan 8:41, 44, 47) Mu muvu wa 33 C.C., Nzamb wateka nsudiel ku Chijil, ni urund wend wa pakampwil nend Isarel wapwa. Ov chinech chirumburikin anch antu kelap kand kutwish kwikal ni urund nend Nzamb?
Kukumangej “Yom ya Mwiur”
6. Ov rutong ra “wintakel” ujimbwilay Paul mu Efes 1:9, 10 chom ik?
6 Mupostol Paul wamekesha anch amwing pakach pa antu akutwish kwikal ni urund wa pakampwil nend Nzamb. Chilikej, piur pa ditenchik dia Yehova ditwishishina antu iyijidishina ritiy kwikal yid ya chikumbu Chend, Paul wafunda anch: “[Nzamb] wijikisha kudi etu ujindj wa rusot rend. Chidi ku chiyul chend chiwamp chatonginay amwinend, kutekaku wintakel wa chikumbu chakwel mu kuwanyin kwa muten ndiy akumangeja kand yom yawonsu mudiay Kristu, yom ya mwiur ni yom ya pansh.” (Efes 1:9, 10, NW) “Wintakel” winou wengamidin padi Yesu Kristu. Kusutil kud ndiy, ayitekin antu mu mwikadil witiyikina kurutu kwa Nzamb. Antu akemp kusu pakach pau awiy akweta ruchingej ra kuya mwiur. Pakwez tunan ni tunan twa antu akwau akez kushakam chikupu pa divu.
7. Ov anany adia “yom ya mwiur”?
7 Cha kusambish, kudiosh pa dichuku dia Pentekot mu muvu wa 33 C.C., asambisha kamu kushinshikin nakash “yom ya mwiur,” chawiy kulond, antu adinga afanyidina kwikal answan pamwing nend Kristu mu Want wa mwiur. Pa dishin dia ritiy rau mu usey wa yakupesh ya Yesu, ayiyingisha kud Nzamb. (Rom 5:1, 2) Ni kupwa, awejinaku in Yuda nau antu a majuku ma michid yikwau, ni “yom ya mwiur” yikala antu 144 000. (Galatia 3:26-29; Kujingunik 14:1) Kuchidi kusu antu akemp a pakach pau achidia ni katat panap pansh.
Kukumangej “Yom ya Pansh”
8. Anany adia “yom ya pansh,” ni urund ik ukwetau nend Yehova?
8 Wintakel winou umwing ukat kukumangej kand “yom ya pansh.” Akumangejin katat mamiliyon ma antu akweta ruchingej ra kushakam panap pansh chikupu. Akat kushiman dijin dia Yehova ni kutumbish difukwil diend pamwing ni answan a Want achidia panap pansh. (Isay 2:2, 3, NW; Sofoniy 3:9, NW) Ni yawiy akat kumutazuk Yehova anch “Tatuku” mulong amwij ndiy mud musul wa mwom. Ni akwet mwikadil witiyikina kurutu kwend pa dishin dia ritiy rau mu mash michika ma Yesu. (Kujingunik 7:9, 14) Pakwez chichidiau antu akad kuwanyidin, itiyijin anch akez kwikal kamu chakin an a Nzamb mu machuku ma kurutu.
9. Kushilamu ik kudia mu Rom 8:21 mulong wa an a antu?
9 Antu inay akweta ruchingej ra panap pansh akat kuchingel katat nich impu yijim dichuku dikezau ‘kuyikwol antu mu uswik wa yom yivundila.’ (Rom 8:21) Want ipau winou ukez kusambish kupwa kwa Kristu ni yisak yend ya mwiur kupwish mar majim nich nsudiel yau kwi njit ja Harmagedon. Chinech chikurumburik kusheshik kwa ditenchik diyimp dia yom diawonsu diakabuj dia Satan, kupwa pakulondul yiyukish ya Winyikel wa Mivu Kanan wa Kristu mu Want ukweta dikand. —Kujingunik 19:17-21; 20:6.
10. Ov atushalapol a Yehova akez kuwang muminy ik wa kushiman?
10 Chikez kwikal chisangareshina mud ik atushalapol a Yehova a pa divu pakezau kunung yovil yau kud atushalapol end a mwiur, alejena nich musangar anch: “[Yehova, NW] Nzamb Mwin Dikand Diawonsu, yisalijok yey yidi yijim yikwamushena! Ey udi Mwant wa michid yawonsu, jinjil jey jidi jakin jitentamina. A! Nsalejetu! Ov, nany wakad kukwov ey wom? Ov, nany wakad kupan uyaj ku dijin diey? Ey yey kusu kwey utumbila. Michid yawonsu yikwez ni kukwifukwil ey, mulong yisalijok yey yitentamina ayijingunin kal.” (Kujingunik 15:3, 4) Mwaning, atushalapol awonsu a Yehova akez kwikal mu umwing mu difukwil dia Nzamb umwing kusu wakin. Ni afu akez kuyivumbul ni kuyinkish kand chisu cha kunungin mazu mau mu kumushiman Yehova. —Midimu 24:15.
Want Ipau Upandikena Kuwap Udi Kurutu
11. Ov want ipau ik upandikena kuwap ukeza kwikal nich antu akurezika ku mar majim?
11 Anch mar majim, nich musong wau ku Harmagedon, mapwish kudiosh uyimp pa divu, Satan Djabul kakwikalap kand “nzamb wa ditenchik dined dia yom.” In kwifukwil a Yehova kakusambishap kand kurish nich usu uyimp wa Satan. (2 Korint 4:4, NW; Kujingunik 20:1, 2) Relijon wa makasu kakwikalakwap kand mulong wa kumumekesh Yehova mutapu umwing uyimp ni mulong wa kwauril chisak cha antu. Atushalapol a Nzamb wakin kakez kumanap kand kuburen kutentam ni wintany wa anyikel a chimuntu. Ukez kwikal want ipau upandikena kuwap mud ik!
12. Mutapu ik ukezau kuyikwol antu awonsu ku chitil ni ku yibudikin ya chitil?
12 Mud “Mwan a Mukoku wa Nzamb ukata kudiosh yitil ya antu,” Yesu Kristu ukez kusadil usey wa yakupesh yend mulong wa kujimangesh yitil ya an a antu. (Yohan 1:29) Yesu padingay panap pansh ni kumulikishin muntu kampand yitil yend, wadinga ni kumwok mulong wa kumekesh uman wa dilikishin dined. (Mateu 9:1-7; 15:30, 31) Chilik chimwing kand, mud Mwant wa Want wa mwiur wa Nzamb, Kristu Yesu ukez kuyok mu chishimokish amputames, atumam, atujikamatu, ayilim, antu ayedila rangul, ni awonsu akweta mayej makwau. (Kujingunik 21:3, 4) Antu awonsu in kuziyil akez kuyijipin ‘chijil cha chitil’ mutapu wakwel anch yitongijok yau ni yisalijok yau yawonsu yikwikal yiyisangareshina awiy ni Nzamb. (Rom 7:21-23) Kwisudiel kwa Mivu Kanan, akez kuyichirish ku kuwanyidin kwa muntu, mu ‘chifu ni mu chifanakesh’ cha Nzamb umwing kusu wakin. —Disambishil 1:26.
13. Kwisudiel kwa winyikel wa Mivu Kanan, ov chom ik chikusalay Kristu, ni chom ik chikubudikinaku?
13 Anch Kristu wayilet an a antu ku kuwanyidin, ukez chad lel kuchirish kud Tatukwend wintakel wamwinkau mulong wa mudimu wend: “Kristu ukez kushesh kuyikel kwa mitapu yawonsu, ni ulabu wa mitapu yawonsu, ni ukash wa mitapu yawonsu. Chawiy ukez kupan Want kudi Nzamb Tatuku. Mulong chifanyidin Kristu kuyikel djat ni pakuyipandakenau akankuny awonsu ni kuyitek mwishin mwa yidjatil ya Kristu.” (1 Korint 15:24, 25) Winyikel wa mivu Kanan wa Want ukez kuwanyish kamu sens rutong rau; chawiy lel, kukez kwikalap kand kuswir kwa winyikel ukwau ukwikala pakach pa Yehova nau an a antu. Chikezau kudiosh chitil ni rufu chikupu ni kuyipandish antu, kuswir kwa Yesu kwa kwikal Mupandish ni kwawiy kukupwa. Baibel urumburil anch: “Chawiy Mwan amwinend ukez kwitek mwishin mwa Nzamb, ndiy kamu wateka yom yawonsu mwishin mwa Kristu. Chad mwamu Nzamb ukez kutakel yawonsu.” —1 Korint 15:28.
14. Ov antu awonsu awanyidina akez kuyitek kurutu kwa chom ik, ni mulong wak?
14 Kupwa kwa chinech, akez kuyinkish antu awanyidina chisu cha kumekesh anch kutond kwau kud kwa kumusadil ching kusu Nzamb wakin chikupu. Chad lel, kurutu kwa kuyitambul kamu sens mud anend, Yehova ukez kuyitek antu awonsu inay awanyidina mu choziu cha nsudiel. Satan nau ayilembil end akez kuyisuburil kubudik mu dibuku diakad musul. Chinech chikez kuyisalap nayimp antu amukatina chakin Yehova. Pakwez awonsu akulika kuziyil ni kwilikidil mu kubwambwil kud Yehova akez kuyishesh chikupu, pamwing ni mbwambol wa kusambish nau ayilembil end. —Kujingunik 20:7-10.
15. Ov mikadil ik yikwikalaku kand pakach pa yitang yawonsu ya Yehova yikweta manangu?
15 Yehova ukez chad lel kuyitambul antu awonsu awanyidina mud anend engamidina pa ukaleng wa Nzamb pa chirung cha kupak kwinoku kwa nsudiel. Kudiosh kamu pinipa kuya djat ni kurutu, akez kwikal sens ni want ipau wa uyaj wa an a Nzamb adia mu dijuku dia mwiur ni pansh dia Nzamb. Yitang yawonsu yikweta manangu ya mwiur ni ya panap pansh yikez kwikal kand mu uumwing wa kumwifukwil ndiy mud Nzamb umwing kusu wakin. Rutong ra Yehova rikez kushiken mu uyaj ukash! Ov usotil kwikal ku mutambu wa dijuku dined dia mwiur ni pansh dikweta musangar ni dia chikupu? Anch mwamu usotila, tukukasikeshin kuvurik yilondila Baibel mu 1 Yohan 2:17 anch: “Mangand mayil ni kujiy pamwing ni yom yawonsu yikwetau nich antu ris, pakwez muntu mwawonsu ukata kusal rusot ra Nzamb ukez kupand chikupu.”
Misamb ya Kuchirikin
• Kurutu kwa kubwambul kwa mu Eden, ov urund ik wadingaku pakach pa Yehova ni in kumwifukwil end?
• Ov chisend ik chikwetau antu adia atushalapol a Yehova?
• Ov anany afanyidina kand kwikal an a Nzamb, ni chinech chambaten nchik nich rutong ra Yehova piur pa uumwing wa difukwil?
[Chipich chidia pa paj wa 190]
Antu in kuziyil akez kasanger mwom mu paradis wa pa divu diakabuj