Tulondany Mazu “Mawamp Makutwisha Kukasikesh”

1-3. (a) Ov, chipan ik chimwing chatwinkishau kudiay Yehova ni mutapu ik tukutwisha kuchisadil nayimp? (b) Chakwel twilama mu rukat ra Nzamb, ov, mutapu ik tufanyidina kusadin chipan cha kulond?

OV, MUTAPU ik ukutwisha kwiyov kupwa kwa kupan chipan kanang kudiay muntu ukatina anch watambul rusangu anch uchisadidin mu mutapu uyimp? Tong bil anch chipan chinech wamwinkisha chadinga motak, ni wez wajingunin anch wawendishin nayimp ni wabubin nich antu akwau. Ov, ukwovap runeng?

² Ukaliweny wa kulond udi chipan chimwing chidiokila kudiay Yehova Musul upanininga “yom yawonsu yiwamp ni yiwanyidina.” (Jakobu 1:17) Chipan chinech chawiy chitekina kushalijan pakach pa dijuku dia antu ni dijuku dia annam, chitukwashiningap ching kusu kumekesh yitongijok yetu pakwez chitukwashining kand tumekesha yovil yetu kudi antu akwau. Pakwez, mudi motak utwisambidina ou, chipan cha kulond akutwish kuchisadil nayimp. Tongany bil mutapu wiyovilay Yehova pameningay antu mutapu usadidinau ukaliweny wa kulond mu mutapu uyimp, kuyiletin akwau kusansan ku muchim ni kuyovish kuyip!

³ Chakwel twilama mu rukat ra Nzamb, tufanyidin kusadin chipan cha ukaliweny wa kulond mudi mwasotay Sakatang wa chipan chinech. Yehova utulejining patok mutapu wa mazu mamusangareshininga. Dizu diend dilondin anch: “Kangal mu tun twen mwabudik mazu mayimp, pakwez londany ching kusu mazu mawamp makutwisha kukasikesh antu kukul mu ritiy mudi muchifanyidina, ni kuyiyukish antu awonsu akumatesha.” (Efes 4:29) El amboku tushinshikinany mulong wak chidia cha usey kuyikel mazu metu, mazu ma mutapu ik tufanyidina kwipuk, ni mutapu ik tukutwisha kwikal nich “mazu mawamp makutwisha kukasikesh.”

TUFANYIDIN KUYIKEL MAZU METU

4, 5. Ov, mutapu ik jinswir jikwau ja mu Bibil jisambidina usu wa mazu?

⁴ Diyingish dimwing didia dia usey dia kuyikel mazu metu didi anch: mazu makweting usu nakash. Jinswir 15:4 ulondin anch: “Ridim ritudishina ridi mutond wa mwom, pakwez kulond kuyimp kaletining uyimp.”a Chilik chimwing kand ni mem makata kukwash mutond uwumina, mazu mitudishina ni malondiningau mu mutapu uwamp makutwish kumukasikesh muntu umateshininga. Chinyim ni chinech, mazu malondiningau mu mutapu uyimp makutwish kuyovish antu akwau runeng. Pakad ntad, mazu tulondininga makwetining usu wa kuyinenganesh ap wa kuyok antu akwau.​—Jinswir 18:21.

⁵ Mulong wa kumekesh kand anch mazu makweting usu jinswir jikwau jilondin anch: ‘kulond mazu makash kudi mudi kutap kwa mpak ya musamun.’ (Jinswir 12:18) Mazu malondiningau mu mutapu wakad kutongijok makutwish kulet yitat yikash mu yovil ni makutwish kuyipish urund wa piswimp. Ov, kand kal atapap muchim wey nich mazu ma runeng mudi mpak ya musamun? Pakwez chom chiwamp kand, jinswir jimwing ej jilondin anch: “Jindim ja in manangu jikat kwokan.” Mazu malondinau mu mutapu uwamp kudi muntu kanang umekeshininga manangu ma winzamb makutwish kwok muchim unenganena ni makutwish kurijek kand urund wa piswimp. Ov, ukutwish wavurik chisu wadinga mu mwikadil kanang ni wova usu wadinga nich mazu ma kwokan? (Tang Jinswir 16:24.) Anch tudi nich kashinsh anch mazu tulondininga makweting usu, tusotin chakin kamu kuyikel mutapu wetu wa kusadil mazu metu mulong wa kuyok nich antu akwau pakad kuyitap.

6. Ov, mulong wak kuyikel rudim retu chidi chakin kamu chikokujol?

⁶ Chitukasikedining nakash kuyikel rudim retu mulong wa yiyingish yikwau ya mu mangand. Diawiy diyingish dia kaad ditufanyidina chakwel tuyikela nawamp mazu metu ni dilondina anch: Chitil ni kumburen kuwanyin kwetu kutubachikining kusadin nayimp rudim retu. Mazu madiokiling mu muchim wetu ni “yitongijok ya muchim wa muntu yayipa kal kwau.” (Disambishil 8:21; Luka 6:45) Kulam rudim retu chiding chakin kamu chikokujol chikash. (Tang Jakobu 3:2-4.) Ap anch chitukasikedining kuyikel nawamp win kamu rudim retu, tufanyidin kusal usu wetu wawonsu chakwel turijek mutapu turisadidininga. Mudi mwin kwisay mu mem usayina ndond yidiokila kawit ufanyidin kusal usu wend chakwel arisha nich mambek makash, chilik chimwing kand niyetu tufanyidin kudandamen kusal usu wa kurish nich mwikadil wa chitil wa kusadil rudim retu mu mutapu wakad kuwanyin.

7, 8. Ov, yibachikin ik yikweta mazu metu pa urund wetu wa piswimp ni Yehova?

⁷ Diyingish dia kasatu ditufanyidina kuyikel mazu metu didi anch Yehova ukuturumburish niyetu mulong wa mazu metu. Mutapu tukata kusadin rudim retu ukutwish kuyipish ap kuwapish urund wetu nau ambay netu in Kristu, ni ukutwish kuyipish kand ap kuwapish urund wetu wa piswimp ni Yehova. Jakobu 1:26 ulondin anch: “Anch muntu mwawonsu utongil anch udi mwin kumwifukwil Nzamb pakwez kalaminap rudim rend, ukat kwidimb amwinend, ni ritiy rend ridi ramwamu.”b Mudi mutwayimena mu shapitre washalap kal ou, mutapu wetu wa kulond uyiling pamwing ni difukwil dietu tumwifukwidilinga Nzamb. Anch tulaminap rudim retu​—ni tulondining mazu maletininga kusansan ku muchim—​midimu yetu ya Ukristu yawonsu tusadininga ku mes ma Nzamb yidi kwau ya chamwamu. Chawiy, tusalangany usu chakwel mazu tulondininga mukan mwetu mikalang mawamp.​—Jakobu 3:8-10.

⁸ Chimeken patok anch tukwet yiyingish yikash yitubachikina chakwel tuyikela chipan chinech cha ukaliweny wa kulond chakwel kangal twachisadil nayimp. Kurutu tushinshikina mitapu yiwamp ya mazu makutwisha kutukasikesh, el amboku twisambinany mazu mamwing makadiau kufanyidin in Kristu akin kusadil mu mashakamin mau.

MAZU MAKATA KUYISADIL ANTU AKWAU NAYIMP

9, 10. (a) Ov, mazu ma mutapu ik masadidiningau antu nlel unou mu mangand? (b) Ov, mulong wak tufanyidina kwipuk mazu ma usany? (Tal not.)

⁹ Mazu ma usany. Nlel unou mu mangand, antu akat kupepan masaal, alondining pakad kalimish ni alondining kand mazu makwau ma usany. Antu avud asadidining mazu mayimp mulong wa kukasikesh yom yilondinau ap kijap mazu ik mafanyidinau kusadin. Yisu yivud in maswimbu asadidining mazu mayimp, alondining yom ya winzikis mulong wa kuyisipish nich antu. Pakwez, mazu ma usany madiap ma kusipishan nich bwat. Pasutin kal mivu 2 000, kambuy Paul wapepilau wapana chiyul chinech ku chikumangen cha Kolosay anch djimbulany “masaal.” (Kolosay 3:8) Paul wapana kand chiyul ku chikumangen cha in Efes anch “yom ya winzikis” yidi pakach pa yom yifanyidinap in Kristu akin ‘kujimbul.’​—Efes 5:3, 4.

¹⁰ Mazu ma usany mamwovishining Yehova kuyip. Mayovishining kand kuyip antu amukatininga. Chawiy lel, rukat retu ritumukatininga nich Yehova ritubachikining twipuka mazu ma usany. Pisambinay Paul piur pa “yisalijok ya wuntu,” ndiy wajimbula “kwijond” dizu dined dikutwisha kand kurumburik kwijond mu kulond. (Galatia 5:19-21) Mulong winou udiap wa kupipej. Akutwish kumwopat muntu kanang mu chikumangen kupwa kwa kumuyul tupamp tuvud anch walik kukarumuk ni anch udandamedin kusadin mazu mayimp ap mazu makutwisha kumubachik muntu kusal masandj, kumwovish usany ni kumujondish.c

11, 12. (a) Ov, runyinyet chom ik ni mutapu ik rikutwisha kwikal riyimp? (b) Ov, mulong wak in kwifukwil a Yehova afanyidin kwipuk mazu ma kumudimben nich muntu?

¹¹ Runyinyet riyimp ni kumudimben muntu. Kumunyinyet muntu kudi kwisambin piur pa milong yend ap piur pa mashakamin mend pakadiay kwikalaku. Ov, kunyinyet kwawonsu kuding kuyimp? Bwat. Chilakej, chiyipinap kwisambidin mu mutapu uwamp piur pa rusangu ra ukwash, mudi piur pa antu adiokila kamu kubabatishiu ap aswiridina mazu ma dikasikesh. In Kristu a mu mivu chitot ya kusambish asalanga usu nakash wa kubangin ukash wa ambay nau in kwitiyij ni ijikishananga milong yikwau piur pau. (Efes 6:21, 22; Kolosay 4:8, 9) Pakwez, kunyinyet kukutwish kwikal kuyimp anch twashiken ku kulond nayimp piur pa yom yiwamp yisadinay muntu ap twasambish kwisambin piur pa milong yend yimutadina amwinend. Chawiy, tukutwish kushiken ku kusal chom chidinga chiyimp chisu chawonsu, chirumburikin anch kulond makasu piur pa muntu win wang. Kumudimben muntu kudi “kulond yom ya makasu mulong wa kumuyipishin katumb kend.” Chilakej, Afaris alonda yom ya makasu piur pa Yesu mulong wa kumuyipishin katumb kend. (Mateu 9:32-34; 12:22-24) Yisu yivud, kumudimben muntu kuletining matend.​—Jinswir 26:20.

¹² Yehova kakatiningap antu ayidimbedininga akwau milong ap aletininga kwaurik pakach pa antu. Ukisining antu akata ‘kusarumun matend pakach pa akadivar.’ (Jinswir 6:16-19) Dizu dia Grek dikarumwinau anch “mwin kuyidimben akwau” dirumburikin kand anch djabul, diding mwaz wenday Satan. Ndiy “Djabul” umudimbedininga Nzamb yom yiyimp nakash. (Kujingunik 12:9, 10) Chawiy lel, tufanyidin kwipuk kulond yom yin yawonsu ya makasu yikutwisha kutusal chakwel twikala niyetu mudi djabul. Chifanyidinap kudimben akwau milong kwikala mu chikumangen mulong kuletining yom ya kumujimbu mudi “matend” ni “kwaurik.” (Galatia 5:19-21) Chawiy, kurutu kwa kumulej muntu kanang rusangu rumwing riwatesha kal, chifanyidin kwiyipul bil amwiney anch: ‘Ov, ridi rakin? Ov, anch narilejan rusangu riner kudi muntu mukwau, chikwikal cha manangu? Chidi cha usey ap cha manangu kulejan rusangu riner?’​—Tang 1 Tesalonik 4:11.

13, 14. (a) Ov, chibudikin ik chikutwisha kwikal nich masaal padi antu asaadiningau? (b) Ov, kumusaal muntu kurumburikin ik ni mulong wak muntu mwin kusaalan witekining mu mwikadil wa ubaj?

¹³ Masaal. Mudi mutwisambinanga kwinsambishin oku, mazu makweting usu wa kuyisadin antu akwau nayimp. Chitudia antu aburedina kuwanyin, yisu yivud tulondining yom yitwovishininga runeng. Pakwez, Bibil utubabeshin piur pa mutapu wa mazu makad ni ndond mu majuku metu in Kristu ap mu chikumangen. Paul wayibabesha in Kristu anch: “Dioshany rukuny rawonsu, ni kuswej kwawonsu, ni ujim wawonsu. Kangal wabarokany, ap kusaalan masaal.” (Efes 4:31) Mu ma Bibil makwau akarumwin dizu dined “masaal” mudi “mazu maridila,” ma “kuchirilan mu kulond” ni “mwovishininga nayimp ku muchim.” Mazu mayimp mudi kupilijan majin mayimp​—ma kumumekesh nich muntu mudingay muyimp chisu chin chawonsu—​makutwish kumwovish muntu usany ni kumushikij ku kwiman mudi muntu wakad usey. Yisu yivud, an oviling nayimp pakatau kuyisaal mulong ruchingej rau riding mudi antu akwau.​—Kolosay 3:21.

¹⁴ Bibil kitiyijiningap ap pakemp chaku cha kusaalan, chawiy kulond anch kuyilond antu mazu ma kuyipipej nich ap ma kuyovish nich usany. Muntu ukweta chaku cha mutapu winou witekin amwinend mu ubaj, mulong mwin masaal uyudiningau tupamp tuvud pakad kukarumuk akutwish kumwopat mu chikumangen. Anch ndiy kalikinap chaku chinech, ukutwish kuburen ni mwom wa chikupu. (1 Korint 5:11-13; 6:9, 10) Pakad ntaad, chimeken patok anch tukutwishap kwilam mu rukat ra Nzamb anch tukwet chaku cha kusaalan masaal, kulond makasu ap kulond mazu mwovishininga nayimp ku muchim. Mazu ma mutapu winou mayisadidining antu akwau nayimp.

MAZU “MAWAMP MAKUTWISHA KUKASIKESH ANTU”

15. Mazu ma mutapu ik madinga “mawamp ni makasikeshina”?

¹⁵ Ov, mutapu ik tukutwisha kusadil mazu makutwisha kumusangaresh Nzamb wetu? Tuvurikany amboku anch Dizu dia Nzamb ditukasikeshin etu chakwel kulond “ching kusu yom yiwamp malong wa kukasikesh.” (Efes 4:29, NWT) Yehova usangering chisu tulondininga mazu makasikeshininga, ma rongoj ni ma kukankamish nich antu akwau. Chawiy, chidi cha usey bil kutongijok kurutu kwa kulond. Bibil katulejinap mwa kulond ni katulejinap mutapu wa “mazu mawamp” tufanyidina kulond. Titus 2:8) Chakwel twikala nich mazu “mawamp makasikeshina antu,” tufanyidin kwijik yom ey yisatu yimekena yikemp pakwez yikwet usey uvud: Mazu metu mafanyidin kwikal mawamp, makin ni makasikeshina antu akwau. Komb mwamu, twisambinany piur pa yilakej yikemp ya mazu makutwisha kukasikesh antu.​—Tal mushet ukweta mutu wa mulong ulondina anch “Ov, Mazu Mam Mayikasikeshining Antu Akwau?”

16, 17. (a) Ov, mulong tufanyidina kuyijikitish antu akwau? (b) Ov, yisu ik yimwing tukutwisha kuyijikitish antu akwau mu chikumangen ni mu dijuku?

¹⁶ Mazu ma kuyijikitish antu nich muchim umwing. Yehova ni Yesu iji nawamp mutapu udinga nich usey kumujikitish muntu ni kumukasikesh. (Mateu 3:17; 25:19-23; Yohan 1:47) Chiding kand cha usey kudi in Kristu kukasikeshijan pa chisu chifanyidina. Ov, mulong wak? Mulong Jinswir 15:23, (NWT), ulondin anch “dizu dilondinau pa chisu chifanyidina diwapin mudi ik!” Iyipula amwiney anch: ‘Ov, mutapu ik niyovilinga pankasikeshiningau nich muchim umwing? Ov, novilingap musangar nich dikasikesh ku muchim?’ Chakin kamu, piutambwilinga kujikitish kwakin ni dikasikesh chimekeshining anch antu abazining chiusadininga, asadining usu piur pey ni usadining yom yiwamp. Mazu ma dikasikesh mudi minam makwinkishining usu ni makubachikining kudandamen kusal yom yiwamp. Mudi muwovilinga musangar chisu chikujikitishiningau, ov, niyey ukutwishap kusal usu chakwel uyijikitishang akwen mudi mukujikitishiningau?​—Tang Mateu 7:12.

¹⁷ Sal usu wa kujingunin yom yidia yiwamp kudi antu akwau, ni kupwa, yikasikesha nich mazu mawamp. Chilakej, ukutwish pamwingap kutesh diskur diwamp disadinau ku chikumangan cha chikumangen, kumubangin nsand uyila kurutu muspiritu ap ipal kanang wezininga ku yikumangan yawonsu chikalap nchik kuburen kwa dikand mulong wa upal wend. Anch watambul chaku cha kuyijikitish antu mudi inay, chikutwish kuyikasikesh ni kukasikesh kand ritiy rau. Ap mu dijuku, ikundj ni mband afanyidin kujikitishan nich musangar ku muchim umwing ni mukwau. (Jinswir 31:10, 28) Pakampwil, an akatining kuyibangin nakash pamwing ni kuyijikitish. Kumujikitish mwan ni kumukasikesh kuding mudi muten ni mem yikwashininga mutond chakwel upama. En anvaj, salany amboku usu wa kwikal ni chaku cha kuyijikitish an en ni kuyikasikesh kand piur pa ngikadil jau jiwamp ni yisal yau yiwamp yisadiningau. Kusal mwamu kukuyibachik an en kwikal nich usu ni kutakaman chakwel adandamena kusal yom yiwamp.

18, 19. Ov, mulong wak tufanyidin kusal usu wetu wawonsu chakwel tuyikasikesha ni kuyongoj ambay netu in kwitiyij ni mutapu ik tukutwisha kusal mwamu?

¹⁸ Mazu kukasikesh ni Rongoj. Yehova uyibangidining nich muchim umwing antu “itudishina” ni “akweta michim yinengenena.” (Isay 57:15) Dizu diend dituyudin anch “kasikeshijanany umwing ni mukwau” ni “kulond nich rongoj kudi antu anenganena.” (1 Tesalonik 5:11, 14, NWT) Twikalany nich kashinsh anch Nzamb umening yom yawonsu tusadininga mulong wa kuyikasikesh ni kuyongoj ambay netu akaritiy akweta michim yinengenena.

¹⁹ Ov, mazu ik ma dikasikesh ufanyidina kulond kudiay mbay ney mwin Kristu uziyila ap unengenena? Pikil watong amboku anch ukutwish kupwish mar mend. Mu mitapu yivud, mazu makemp kusu maletining ukwash upandakena. Muleja muntu wongojina anch mar marishinay nich makovishin ni yey runeng ku muchim. Mwita chakwel ulembila nend nich dizu dia piur, ni mwita Yehova amukwasha chakwel ajingunina anch amukatin kudi Nzamb ni kudi antu akwau. (Jakobu 5:14, 15) Muleja nich kashinsh anch amuswiridin ni amukwatin nich usey mudi chid cha chikumangen. (1 Korint 12:12-26) Tang nend amboku verse umwing wa mu Bibil chakwel umuleja nich kashinsh ach chakin kamu Yehova umubangidining mudi muntu panrend. (Kuseng 34:18; Mateu 10:29-31) Anch washakatany nend ni wisambany nend nich “dizu diwamp” chikumukwash kwiyov anch amukatin ni amusangaredining.​—Tang Jinswir 12:25.

20, 21. Ov, yom ik yimwing yisadininga chiyul chikala chiwamp?

²⁰ Yiyul yiwamp. Mutudia yitang yakad kuwanyin, etu awonsu tuswiridining kutambul yiyul pa chisu ni chisu. Bibil utukasikeshin anch: “Tesh ku chiyul ni kwitiy malejan, chakwel wikal nich manangu kurutu.” (Jinswir 19:20) Kuyiyul antu akwau chidiap kusu chisend cha amakurump. Anvaj akat kuyiyul anau. (Efes 6:4) Anambaz akudina akutwish kuyiyul ayangadim. (Titus 2:3-5) Rukat mulong wa antu akwau rawiy ritubachikininga kupan yiyul kudi antu akutwisha kuyitambul pakad kwiyov mudi tuyishindidin. Ov, chom ik chikutwisha kutukwash chakwel tupana yiyul mudi yiney? Tushinshikinany amboku yiyul yisatu ya usey yiney: mwikadil ni chitongijok cha mwin kuyulan, mufulandal wa chiyul ni mutapu wa kuchipan.

²¹ Chakwel chiyul chikala chiwamp, mwin kuyul ufanyidin niyend kuyulan nawamp. Chawiy lel, chidi cha usey wiyipula amwiney anch: ‘Ov, chisu ik chiswapelinga kwitiyij chiyul?’ Piukwijik anch muntu ukuyudina ukubangidin, kalondinap pakad kukwovish wom, ni kakwetap yibachikin yiyimp, chiyul chinech chikuswapal kuchitiy. Chawiy, piuyiyudina antu akwau, ov, yom yiney yikutwish kwikal yakin kusutil ku mwikadil wey ni chitongijok chey? Chiyul chiwamp chengamedining kand pa Dizu dia Nzamb. (2 Timote 3:16) Ap anch chiyul chimedin pa Bibil ap bwat, tufanyidin kwikal nich mufulandal wa Mifund chisu tupanina chiyul kanang. Chawiy, amakurump afanyidin kudimuk chakwel kangal ayibachik antu akwau ku usu kusadil ching yitongijok yau; ap kukarumun Mufund wa mu Bibil chakwel ukwatijana nich chisotinau awiy. Chiyul chiding kand chiwamp anch achipanin mu mutapu uwamp. Muntu ukutwish kwitiyij chiyul pakad ntad chisu chimenay anch amuyudin nich dizu diwamp ni amulimishin.​—Kolosay 4:6.

22. Ov, mupak ik wakwatina pa mulong utadina mutapu wa kusadil chipan cha kulond chikwinkishinau kudi Nzamb?

²² Twikalany nich kashinsh anch ukaliweny wa kulond udi chipan cha usey chidiokila kudi Nzamb. Rukat retu mudiay Yehova rifanyidin kutubachik tusadila chipan chinech mu mutapu uwamp. El amboku tuvurikany anch mazu tulondininga makweting usu kudi antu akwau​—usu wa kukasikesh nich ap wa kuziyishan. El kand tusalany usu wa kusadin chipan chinech mudi musotinay Mwin kupan—​mazu “makutwisha kukasikesh.” Kusadil mutapu wetu wa kulond mwamu kukez kuyikwash antu atuteshininga kukez kutukwash kand twilama mu rukat ra Nzamb.