DILEJAN DIA 51

Mutapu ik Ukutwisha Kumusangaresh Yehova mu Mazu Mey?

Dichap

Patutangau kud Yehova, watwinkisha chipan chiwamp nakash—ukaliweny wa kulond. Ov, ukat kubanginang mutapu tusadidina chipan chinech? Inge! (Tang Jakobu 1:26.) Chad mutapu ik tukutwisha kusadin ukaliweny wetu wa kulond mu mutapu ukumusangaresha Yehova?

1. Mutapu ik tufanyidina kusadin mazu metu?

Bibil utulejin anch: “Kasikeshijanany mu ritiy muntu ni mukwau, kwashijanany kand.” (1 Tesalonik 5:11) Ov, wijaku muntu ukweta kuswir kwa kumukasikesh? Yom ik ukutwisha kusal mulong wa kumukwash? Muleja anch ndiy ud wa usey kud ey. Pamwing ap ukutwish kumulej yom ukata kusangerang piur pend. Ov, wijaku verse kanang ukutwisha kumukasikesh nich muntu wija? Kud maverse mavud nakash ukutwisha kusadin. Vurik kand anch mutapu ulondina yom ukutwish kuyikasikesh antu nakash kusutamu kwau mazu usadidina. Chawiy, sal usu wa kulond chisu chawonsu yom yiwamp ni kwa matul.—Jinswir 15:1.

2. Mazu ik tufanyidina kwipuk?

Bibil ulondin anch: “Kangal mu tun twen mwabudik mazu mayimp.” (Tang Efes 4:29.) Chinech chirumburikin anch tufanyidinap kulond yom yiyimp ap ya chisum ni ya masaal yikutwisha kuyovish antu akwau nayimp. Tufanyidin kand kwipuk kulond yom ya mboj ni ya kafukej.—Tang Jinswir 16:28.

3. Yom ik yikutukwasha kulond yom yiwamp?

Yisu yivud, yom tukata kulond yimekeshining yom yidia mu muchim wetu ap yidia mu manangu metu. (Luka 6:45) Chawiy tufanyidin kusal usu wa kushinshikin pa yom yikasikeshina—yom yitentamina, yidia zwang, yikatishena, ni yiwanyidina kushiman. (Filip 4:8) Mulong wa kushinshikin pa yom yiney, tufanyidin kutond kwa manangu mitapu ya kwipuwangej ni arund netu. (Jinswir 13:20) Chid kand cha manangu kutong kurutu kwa kulond. Tong kand mutapu ukwiyovau antu akwau piur pa mazu mey. Bibil ulondin anch: “Kudi amwing akata kulond mazu makash mudi kutap kwa mpak ya musamun, pakwez jindim ja in manangu jikat kwokan.”—Jinswir 12:18.

ILEJA CHIKURIKINA

Ileja mutapu wa kulond yom yimusangareshina Yehova ni yiyikasikeshina antu akwau.

4. Sop mazu mey

Yisu yimwing etu awonsu tukat kulondang yom yikata kutunenganesh. (Jakobu 3:2) Tang Galatia 5:22, 23, kupwa isambinany yipul ey:

Mikadil ik pakach pa mikadil yiney ukutwisha kwit mu malembil chakwel yikukwasha kusop mazu mey? Mikadil yiney yikutwish kukukwash mutapu ik?

Tang 1 Korint 15:33, kupwa isambinany chipul ech:

Arund ni kwipuwangej kwey yikutwish kwikal ni yibachikin ik pa mazu ulondina?

Tuyipich: Yom yimushikijina ikundj umwing kumuswejen mukajend. 1. Ukat kutesh mizik yiyimp. 2. Ndiy ni murund nend akat kutal nich musangar ku televizion antu atendina. — Yom ik yikutwisha kusal anch mutapu wetu wa kulond wikal uwamp ap uyimp?

Tuyipich: Yom yimushikijina ikundj winou kwambamb nawamp ni mukajend. 1. Ukat kutang Bibil. 2. Ndiy ni mukajend akat kwambamb ni murund nau ku Chot cha Want. — Yom ik yikutwisha kusal anch mutapu wetu wa kulond wikal uwamp ap uyimp?

Tang Mulej 3:1, 7, kupwa isambinany chipul ech:

Chisu ik chikutwisha kwikal chiwamp kuninet ap kuchingel chisu chikwau mulong wa kumulej muntu chom kanang?

5. Lond yom yiwamp piur pa antu akwau

Mutapu ik ukutwisha kwipuk kuyisaal antu akwau ap kuyilond yom yiyimp? Talany VIDEO, kupwa isambinany yipul yilondwilaku ey:

VIDEO: Lond ‘Mazu Mawamp Makutwisha Kukasikesh’ Antu Akwau (4:07)

Mu video winou, mulong wak mukadivar winou wad ukatin kuswimp mutapu wend wa kwambamb ni antu akwau?
Yom ik yasalangay mulong wa kuswimp?

Tang Mulej 7:16, kupwa isambinany chipul ech:

Yom ik tufanyidina kuvurik anch tukimbin kumulond muntu kanang yom yiyimp?

Tang Mulej 7:21, 22, kupwa isambinany chipul ech:

Maverse minam makutwish kukukwash mutapu ik anch wakimb kwakul nayimp pakulondinau nayimp kud muntu mukwau?

6. Sadin mazu mawamp piwambambina ni antu a mu dijuku diey

Yehova ukatin anch twambamba ni antu a mu dijuku dietu mu mutapu uwamp ni wa rukat. Talany VIDEO, kupwa isambinany chipul chilondwilaku ech:

VIDEO: Rukat ni Kalimish Yikat Kubombakesh Majuku (3:08)

Yom ik yikukukwasha kwambamb mu mutapu uwamp ni antu a mu dijuku diey?

Tang Efes 4:31, 32, kupwa isambinany chipul ech:

Mazu ma mutapu ik makata kukasikesh dijuku?

Yehova walonda mutapu wading wiyovilay piur pa Mwanend Yesu. Tang Mateu 17:5, kupwa isambinany chipul ech:

Mutapu ik ukutwisha kumwimburij Yehova mu mutapu wey wa kwambamb ni antu a mu dijuku diey?

Maku umwing ukat kumujikitish mwanend wapwisha kal kufatul. — Ikasikesha kuyijikitish antu akwau

ANCH MUNTU WAKWEL ANCH: “Am nilondining kwam yawonsu yingezina mu manangu. Chawiy, udiap kwau uyimp wam anch antu akwau kakatinap yom nilondining.”