Anch Kwashiken Yinship ya Mar

Ap anch usadil usu wey wawonsu chakwel wikala nich uruw ni dijuku disangareshina, yom yakad kuchingejin yikutwisha kushiken mu dijuku yikukangesh musangar wen. (Mulej 9:11) Nzamb wa rukat utwinkishining ukwash pa chisu tumeninga mar. Anch walondul yany ya kusadil yiney ya Bibil, ey ni dijuku diey ukutwishany kamu kupandakan mar, chikalap nchik mikadil yipandakena kuyip.

1 MUCHINGEJINA YEHOVA

CHILEJENAY BIBIL: “Tekany minan yawonsu padiay ndiy, mulong ndiy ukat kukulamany en.” (1 Pita 5:7, TMK) Yisu yawonsu vurikany anch Nzamb kakupupininganyap mulong wa yoziu yen. (Jakobu 1:13) Piudia piswimp nend, ndiy ukez kukukwashany mu mutapu uwamp nakash anch chitwishikin. (Isay 41:10) “Burilany michim yen kurutu kwend.”​—Kuseng 62:8.

Ukez kand kutan rongoj chisu utangina ni wilejina Bibil wey pichuku-pichuku. Mudi chibudikin, ukez kuman mutapu Yehova ‘ukata kutwongoj mu yoziu yetu yawonsu.’ (2 Korint 1:3, 4; Rom 15:4) Ndiy ushidilamu kukwinkish “chisambu cha Nzamb chisutila ronganyin ra antu chikulam michim yen ni yitongijok.”​—Filip 4:6, 7, 13.

CHIUKUTWISHA KUSAL:

• Mwita Yehova ukwash mu malembil chakwel witudisha ni wikala nich chitongijok chidia zwang

• Chirikin yitongijok yey yawonsu ni tond njil yipandakena kuwamp yiufanyidina kulondul

2 IBANGIN AMWINEY NI DIJUKU DIEY

CHILEJENAY BIBIL: “Muchim wa manangu ukat kwisak ronganyin, ni ditu dia mwin manangu dikat kusot ronganyin.” (Jinswir 18:15) Shinshikin pa milong yawonsu. Tongin pa maswir ma chid ni chid cha mu dijuku diey. Isamba nau. Yitesha.​—Jinswir 20:5.

Chikwikal nchik anch mukatish umwing wafa? Kangal wov wom wakumekesh yovil yey. Vurik anch, ap “Yesu wadila.” (Yohan 11:35; Mulej 3:4) Kupim nakash ni kulal tul kudi ni kwawiy kwa usey. (Mulej 4:6) Yom yiney yawiy yikez kusal chakwel upandakana mikadil ya minan.

CHIUKUTWISHA KUSAL:

• Kurutu kwa kushiken mar minam, ikala nich chaku cha kwisambin pamwing ni dijuku diey. Anch milong yashikena, awiy akwiyov nawamp kukulej milong yiney

• Yilejamu antu akwau arisha nich mikadil ya mutapu mudi yiney

3 TAMBUL UKWASH USWIRIDIKENA

CHILEJENAY BIBIL: “Murund [wakin] ukat kumekesh kukat machuku mawonsu. Mwanamaku wavadika mulong wa kukwash mu yom yikash.” (Jinswir 17:17) Arund ney akusot kukukwash, pakwez kakutwishap kwijik mutapu wa kusal. Kangal widjidjek kuyilejamu arund ney yom yiuswiridina chakina kamu. (Jinswir 12:25) Chikwau kand, kimb ukwash wa muspiritu kudi antu ija nawamp Bibil. Umutakel udiokidila mu Bibil ukutwishau kukwinkish ukez kukukwash.​—Jakobu 5:14.

Ukez kutan ukwash uswiridina anch winung pamwing ni antu atekininga chakin kamu ritiy rau mudiay Nzamb ni achingejininga mu yakushilamu yend. Ukez kutan kand rongoj rujim anch wayikwash antu akwau aswiridina dikasikesh. Yileja ritiy rey utekininga mudiay Yehova ni mu yakushilamu yend. Ikal ukwatikena mu kuyikwash antu akwau adia mu maswir ni kangal kwiyauril amwiney ni antu akukatina ni akubangidina.​—Jinswir 18:1; 1 Korint 15:58.

CHIUKUTWISHA KUSAL:

• Yileja arund ney a piswimp ni yilika akukwash

• Ikal mwin kulond nich kashinsh kachom ni kachom piur pa yom yiuswiridina