Novil ja Kwijip—Ov, Bibil Ukutwish Kwinkwash Anch Nikwet Yitongijok ya Kwijip?
Chakul cha Bibil
Mwaning! Bibil udiokil kudiay “Nzamb ukata kuyongoj antu aziyina ku michim.” (2 Korint 7:6) Ap anch Bibil kadiap buku ukata kulejan mutapu wa kok mayej ma mutu, wayikwashin kal antu avud kupandakan yitongijok ya kwijip. Yiyul yend yikutwish kukukwash niyey.
Maverse ik ma Bibil makutwisha kukukwash kupandakan yitongijok ya kwijip?
Yom ik ukusala anch murund ney wakulej anch: “Nikatin kwam kufa”?
Yiyul ik ya ukwash yitwinkishinay Bibil?
● Mulejamu muntu kanang mutapu wiyovila.
Yom yilondinay Bibil: “Murund ukat kumekesh rukat machuku mawonsu. [Ud] mwanamaku wavadika mulong wa kukwash mu yom yikash.”—Jinswir 17:17.
Kurumburik: Tukwet kuswir kwa ukwash wa antu akwau chisu tukweta yakamish.
Anch walam yovil amwiney, yikutwish kwikal difund dilimina nakash. Pakwez anch wamulejamu muntu mukwau mutapu wiyovila, ukutwish kwiyov nawamp ni ukutwish kwikal ni yitongijok yiwamp piur pa mashakamin mey.
Pakish bil mwamu: Ambamb ni muntu kanang nlel, pamwing ap ni muntu wa mu dijuku diey ap muntu uchingejidina.a Ukutwish kand kufund pa ndond kanang mutapu wiyovila.
● Kimb ukwash wa chimwingang.
Yom yilondinay Bibil: “Antu akash kakuswirangap mwingang, ching kusu antu ayedila.”—Mateu 9:12.
Kurumburik: Tukufanyidin kukimb ukwash wa mwingang anch tuyedin.
Yitongijok ya kwijip yikutwish kwikal chijingidij cha mayej ma mutu ap ma mu manangu. Anch chid mwamu, chitinap kwau kov usany. Mayej ma mutu ap ma mu manangu akutwish kumok.
Pakish bil mwamu: Sal kamu usu wa kukimb ukwash wa mwingang mau mau.
● Vurik anch Nzamb ukubangidin.
Yom yilondinay Bibil: “Ov, kakat kulandishap amiswesu atan kwi nfalang jaad? Pakwez Nzamb kakuvuramenap muswesu ap umwing. . . . Chawiy kangal wovany wom. En ukwetany usey uvud kuyipandakanamu amiswesu avud!”—Luka 12:6, 7.
Kurumburik: Ud wa usey kud Nzamb.
Ukutwish kwiyov anch ud dia amwiney, pakwez Nzamb umen yom urishina nich. Ukubangidin kamu, ap anch ukwetap kand musangar wa kudandamen kwikal mwom. Kuseng 51:19 ulondin anch: “A! Nzamb, ey kiukudiulangap muchim waziyina nich runeng.” Nzamb ukatin anch udandamen kwikal mwom mulong ukukatin.
Pakish bil mwamu: Shinshikin uman kanang mu Bibil umekeshina anch Nzamb ukukatin. Chilakej, tal shapitre 24 wa buku Sejany Piswimp Kudi Yehova.
● Mulembila Nzamb.
Yom yilondinay Bibil: “Letany yakamish yen yawonsu kudi ndiy [Nzamb], mulong ukat kukulamany.”—1 Pita 5:7.
Kurumburik: Nzamb ukutazukin kwambamb nend patok piur pa yom yawonsu yikwakamishina mu manangu.
Nzamb ukutwish kukwinkish chisambu cha mukach ni usu wa kudandamen kujijaman. (Filip 4:6, 7, 13) Mu mutapu winou, ukat kuyikwash antu amutazukina ndiy nich muchim umwing.—Kuseng 55:22.
Pakish bil mwamu: Mulembila Nzamb nlel. Mutazuka pa dijin diend, Yehova, ni muleja mutapu wiyovila. (Kuseng 83:18) Mwita chakwel akukwasha kujijaman.
● Tongijokin piur pa ruchingej ripaninay Bibil piur pa machuku ma kurutu.
Yom yilondinay Bibil: ‘Tukwet ruchingej riner ridia mud nkal mulong wa mupim, ridia rakin ni riminya dang.’—Hebereu 6:19.
Kurumburik: Yovil yey yikutwish kuya oku ni oku mud wat upwepwilau kud rinkind, pakwez ruchingej ripaninay Bibil rikutwish kukukwash kwiman daang.
Ruchingej riner ridiap kwau chilat bwat, pakwez rimedin pa kushilamu kwa Nzamb kulejena anch ukudiosh yom yawonsu yituletidina kusansan.—Kujingunik 21:4.
Pakish bil mwamu: Ileja yom yivud piur pa ruchingej ripaninay Bibil mu kutang dilejan dia 5 dia broshir Rusangu Ruwamp Ridiokila Kudi Nzamb!
● Sal chom kanang chiukatining.
Yom yilondinay Bibil: “Muchim wa musangar udi mwon uwamp.”—Jinswir 17:22.
Kurumburik: Anch twasal yom yikata kutuletin musangar, tukutwish kuwapish ukash wa mujimbu wetu.
Pakish bil mwamu: Sal chom kanang usangaredining. Chilakej, tesh mizik yiwamp, tang yom kanang yikasikeshina ap yang mu kwipuwangej. Ukutwish kand kwikal nich musangar nakash mu kuyikwash antu akwau, ap mu tuyom tukemp kwau.—Midimu 20:35.
● Lam nawamp mujimbu wey.
Yom yilondinay Bibil: “Masengan ma mujimbu makwet usey.”—1 Timote 4:8.
Kurumburik: Tukat kutaninamu anch twijidish mujimbu, twalal mu chisu chiwanyidina ni kudia yakudia yiwamp.
Pakish bil mwamu: Budik pol ni wendanganaku, ap mwa aminit 15 kwau.
● Vurik anch yovil ni yom yikwau mu mwom yikutwish kuswimp.
Yom yilondinay Bibil: “En kiwijanyap chom chimwing chikushika diamashik.”—Jakobu 4:14.
Kurumburik: Mulong kanang ukumeshina mar ap uumena anch ukutwishap kupwa, ukutwish kwikal wa mu chisu chikemp.
Ap anch nlel mashakamin mey mameken anch mad makash nakash, pakwez diamashik makutwish kuswimp. Chawiy kimb mitapu ya kujijamen. (2 Korint 4:8) Yom yikumeshina mar katat yikutwish kuswimp mu kusut kwa chisu, pakwez anch wijip kwakupwa kal kwey.
Pakish bil mwamu: Tang mu Bibil jinsangu ja antu aziya nakash ni akimba kwau kufa, ni tal mutapu waswimpa mashakamin mau ni kwikal mawamp nakash, ni yisu yivud maswimpa mu mutapu wakadiau ayinay kutongin. Shinshinkin bil yilakej yimwing mwamu.
Ov, Bibil wisambidin piur pa antu ading akatina kwau kufa?
Mwaning. Bibil utulejin piur pa antu amwing alonda anch nikimbin kwam kufa. Nzamb kayipupap pakwez wakata kuyikwash. Ukutwish kand kusal mwamu mulong weyey.
Elija
● Wading nany? Elija wading muprofet chifuv. Pakwez chisu chimwing niyend waziya nakash. Jakobu 5:17 ulondin anch “Elija wading muntu mudi etu.”
● Mulong wak wakimba kufa? Chisu chimwing mwamu, Elija wiyova anch ud dia amwinend, wova wom ni wamana anch kakwetap kand usey. Chawiy walonda anch: “[Yehova] tambul mupim wam.”—1 Ant 19:4.
● Yom ik yamukwasha? Elija wamuleja Nzamb mutapu wading wiyovilay. Nzamb wamukasikesha mutapu ik? Nzamb wamuleja anch umubangidin ni wamumekeshina anch ukwet usu nakash. Wamukasikesha kand Elija anch uchikwet kal usey ku mes mend ni wamwinkisha muntu wa kumubangin ni kumukwash.
▸ Tang piur pa Elija: 1 Ant 19:2-18.
Job
● Wading nany? Job wading ikundj umwing mpich, wading ni dijuku dijim ni wading umwifukwidin Nzamb wakin nich kushinshaman.
● Mulong wak wakimba kufa? Yom yivud yiyimp yamushikena Job pakad kuchingejin. Washadisha yom yend yawonsu. Anend awonsu dikum afa ku akisidan. Wayela mayej mayimp nakash. Ni kupwa, arund nend a makasu amufisha nich ni kumwel anch ndiy amwinend wikakina milong yiney. Job walonda anch: “Nafa kal kwam, kinikupandap kand chikupu.”—Job 7:16.
● Yom ik yamukwasha? Job wamulembila Nzamb ni wambamba ni antu akwau. (Job 10:1-3) Amukasikesha kud murund mwin ranaken, Elihu, ni wamukwasha kwikal nich chitongijok chiwamp piur pa mashakamin mend. Ni cha usey nakash, Job witiya yiyul ni ukwash wa Nzamb.
▸ Tang piur pa Job: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Moses
● Wading nany? Moses wading ntakel mu Isarel wa pasak ni muprofet ushinshamena.
● Mulong wak wakimba kufa? Moses wading ni chisend chijim, amupunganang chisu chawonsu ni chinech chamuziyishang nakash. Chawiy wamudidina Nzamb anch: “Njipa katat.”—Kuchind Michid 11:11, 15.
● Yom ik yamukwasha? Moses wamuleja Nzamb mutapu wading wiyovilay. Nzamb wamukwasha kusutil kukepish chisend chend mulong wa kupwish ushon wading wovilay.
▸ Tang piur pa Moses: Kuchind Michid 11:4-6, 10-17.
a Anch yovil yey ya kwijip yid yikash nakash ni kwikil muntu ukutwisha kulejamu, tazuk ku nimero wa opital kanang ap wa ambilans.