Yohan Mubatish Urijekin Kwez Kwa Yesu

Padingay Yesu ni mivu 12 payipulangay alej yipul mu tempel, pasuta mivu 17. Katat chidi chisu cha kapepil cha muvu wa 29 C.C. Antu avud ading isambidin piur pa Yohan mwanamakwend a Yesu, walejenang mwi ngand ya kwingangel kwa ushad wa Wit wa Yordan.

Yohan wading ushimokishena piur pa yom yalondangay ni kuwap kwend. Masun mend madjalangay mading ma kuchim ni ndand wa mavuj ma atumel ni mukab wend wading mwi mbund wading wa chikit cha nnam. Wading ni kudia ampasu amwing—atazukinau anch atubol—ni wadiangang kand woch. Uruu ik walejanay? Walejana anch: “Karumukany, udiokalany ku yitil yen, mulong Want wa mwiur udi piswimp!”—Mateu 3:2.

Uruu wa Yohan wayisangaresha nakash antu eza kuutesh. Pateshau, antu avud amana anch afanyina kukarumuk ku yitil yau, alika yisal yau yiyimp ni untu wau ukur udia uyimp. Antu ezang kumutesh adiokala ku “Yerusalem, ni mwi ngand yawonsu ya Yudeya, ni mwi ngand yawonsu yadinga piswimp ni Yordan.” (Mateu3:5) Antu avud eza kudi Yohan akarumuka. Wayibatisha mu kuyandjik jimu mu mem ma wit wa Yordan. Mulong wak wasalay mwamu?

Wayibatisha antu mudi chijingidij cha kumekesh anch akarumuk kal chakin kamu ku yitil yau yasalau pantaliken ni Chijil cha Nzamb cha manswik. (Midimu 19:4) Kwikil muntu mukwau wading uwanyidina kusal mwamu. Pezau antakel amwing a chirelijon Afaris ni Asadus kudiay Yohan, ndiy wayitazuka anch ‘En an a annak.’ Wayileja anch: “Salany yom yikutwisha kumekesh anch, wakarumukinany kal kudiokal ku yitil yen. Kangal watongany anch, ‘Aburaham udi tatukwetu.’ Chakin kamu, nakulejany anch, Nzamb ukutwish kukarumun mayal minam kwikal antu a majuku ma Aburaham. Kasok kalel kwinshin kwa mitond mulong wa kukatul mij. Chawiy mutond wawonsu wakad kusong mabuj mawamp , akez kuukatul, audjibul mu kasu.”—Mateu 3:7-10.

Yohan amutesha nawamp kudi antu mulong wa uruu wend usangareshina ni ukweta dikand, antu avud ayibatisha, chawiy ayituma in kupesh ni in Levi chakwel amwipula anch: “Ov, ey udi nany?”

Yohan wayakula anch: “Am kinidiap Kristu Uzizidilau Many, bwat.”

Awiy amwipula kand anch: “Chad lel, ey udi nany? Ov, ey udi Elija?

Wayakula anch: “Bwat, kiyamap kwam.”

Amwipula kand anch: “Yey Muprofet?” ipula mwamu mulong wa kwijik anch ndiy wading Muprofet mujim walejanay Moses anch ukwez.—Kuvurik Yijil 18:15, 18.

Yohan wayakula anch: “Bwat.”

Ashinshika kumwipul anch: “Chad tuleja lel, ey udi nan? [Tuleja chakwel] tukayileja antu atutumanga. Ov, ey lel amwiney ulondil anch udi nany?” Yohan wayakula nich mazu ma uprofet malondina anch: “Am nidi dizu dia muntu ukata kombil rubil mwi mpay anch ‘Rijekany salal mukombil wa [Yehova]!’”—Yohan 1:19-23.

Amwipula kand anch: “Mulong wak ubatishena,” Anch kiudiap Kristu Uzizidilau Many, ap Elija, ap [Muprofet] utuchingedila wa Nzamb?” Ndiy wayakula anch: “Am nikat kubatish nich mem, pakwez pakach pen padi muntu umwing wakadiany en kwijik mudiay. Ndiy ukez kwez kwinyim kwam.”—Yohan 1:25-27.

Mwaning, Yohan wading wij anch urijekin kwez kwa Yesu kusutil mu kuyitenchik antu mu mutapu uwamp chakwel amwitiya Mesia mudi Mwant wasambelau kulejan. Yohan amwinend walonda anch: ‘Muntu ukweza kwinyim kwam wimpandakenamu am, Am kinidiap muwamp uwanyidina ap kudjol yisapat yend.’ (Mateu 3:11) Chawiy, Yohan walond kand anch: “Pakwez winsutilamu am ulabu, mulong ndiy wading kal kwaku pinading am kand kal nivadik.”—Yohan 1:15.

Chawiy komb, uruu walonday Yohan anch: “Karumukany, udiokalany ku yitil yen, mulong Want wa mwiur udi piswimp” autesha pa chisu chiwanyidina. (Mateu 3:2) Wamekesha patok anch mudimu ukusalay Mwant walonday Yehova, Yesu Kristu udi piswimp ni kusambish.