Yesu Umufundishin Nikodem Uchuku

Padingay mu Yerusalem mulong wa kusal musambu wa Pasak mu muvu wa 30 C.C., Yesu wasala yilay yishimokishena. Mudi chibudikin, antu avud ateka ritiy rau mudiay Yesu. Nikodem wadinga mu chisak cha Afaris, wading kand mu chisak cha in Yuda chasalang mu dirumburish dijim dia in Sanedrin washimoka nakash. Mulong wading ukatin kwilej yom yivud, waya kumutal Yesu uchuku, pamwing ap wading wovil wom wa kumuman, mulong akumuswingish kudi antakel akwau in Yuda.

Nikodem walonda anch: “[Rabbi], twij anch, Nzamb wakutuma mulong wa kutulej. Kwikil muntu ukutwisha kusal yilay yiukata kusal ey, ching anch Nzamb udi nend.” Yesu wamwakula Nikodem anch, mulong wa kwandam mu Want wa Nzamb muntu ufanyidin ‘kuvadik kapamp kakwau.’—Yohan 3:2, 3.

Nikodem wipula anch: ‘Mutapu ik ukutwishay muntu kuvadik kapamp kakwau? Chakin kamu kakutwishap kwandam mwivumu mwa makwend chakwel avadik kapamp ka chaad!’—Yohan 3:4.

Chinech chirumburikinap anch muntu ukutwish kuvadik kand kapamp kakwau. Yesu wamurumburila anch: “Kwikil muntu ukutwisha kwandam mu Want wa Nzamb, ching anch wavadik ku mem ni ku [spiritu] utumbila.” (Yohan 3:5) Pamubatishau Yesu ni spiritu utumbila pamushirikinay, chidi mudi ndiy wavadika “ku mem ni ku spiritu.” Pa chisu chinicha kwading dizu diadiokala mwiur dialonda anch: “Ey udi Mwanam unikatila nakash. Am nikat kusangar mulong weyey.” (Mateu 3:16, 17) Palonday Nzamb dizu dined, wamekesha anch wamusala Yesu mudi wavadik kal kwikal mwan wa muspiritu wading ni ruchingej ra kwandam mu Want wa mwiur. Kupwa pa dichuku dia Pentekot wa 33 C.C., spiritu utumbila wayishirikina antu akwau abatishau, antu inay ading mudi avadika kand kapamp kakwau mulong wa kwikal an a muspiritu a Nzamb.—Midimu 2:1-4.

Chamukasikena nakash Nikodem kutesh yom yamufundishau kudi Yesu piur pa Want. Chawiy, Yesu wamufundisha kand jinsangu jikwau piur pa chisend chend cha pakampwil mudi Mwan a Nzamb wavadika mudi muntu. Yesu walonda anch: “Mudi mwazambulay Moses nnak. . . mwi mpay, wawiy kand mutapu ukez kumuzambulau Mwan a muntu, chakwel muntu mwawonsu ukumwitiyija ukez kwikal nich mwom wa chikupu.”—Yohan 3:14, 15.

In Isarel awonsu asumau kud annak afanyina kutal kwi nnak wa chirumbidij wa utad wa bronze chakwel apanda. (Kuchind Michid 21:9) Chilik chimwing kand, antu awonsu afanyidin kutek ritiy rau mudiay Mwan a Nzamb chakwel apanda ku mikadil yau yiyimp ni akutambul mwom wa chikupu. Pisambinay piur pa rukat ramekeshay Yehova, Yesu wamuleja kand Nikodem anch: “Mulong Nzamb wakata ngand nakash, ndiy wamupana Mwanend kapwokal chakwel muntu mwawonsu ukumwitiyija ndiy kakujiyap, pakwez ukez kwikal nich mwom wa chikupu.” (Yohan 3:16) Kupwa, pasalay angond musamban mu Yerusalem kupwa kwa kusambish mudimu wend wa kulejan, Yesu wamekesha patok anch ndiy udia njil ya dipandish ya antu.

Yesu wamuleja Nikodem anch: ‘Mulong Nzamb kamutumap Mwanend pa mangand mulong wa kurumburish mangand.’ Chinech chirumburikin anch Yesu kamutumap pa mangand mulong wa kurumburish, ni kuyifish nich antu awonsu mulong wa kuyishesh. Pakwez Yesu walonda anch, amutuma ‘mulong mangand mapandila mwi ndiy.’—Yohan 3:17.

Nikodem wova wom nakash chawiy chayay kumutal Yesu uchuku. Chisangareshin kwijik anch Yesu wapwisha mambamb pamwing ni Nikodem pamulejay anch: “Nzamb ukat kuyirumburish antu mwamu, chimunyik [yawiy yom yafundishangay Yesu] cheza kal mu mangand, pakwez antu akatil mididim nakash kupandakanamu kutok, mulong yisalijok yau yidi yiyimp. Muntu mwawonsu ukata kusal yom yiyimp ukisin kutok, kasotilap kwez ku chimunyik, mulong kakatilap yisalijok yend yiyimp yimekan patok. Pakwez muntu mwawonsu ukata kusal yom yitentamina ukat kwez ku kutok, mulong chimunyik chimekesh yom yisadilay chakwel amekan anch, umuziyidin Nzamb.”—Yohan 3:19-21.

Katat Nikodem wa mu chisak cha Afaris ni mulej wa in Isarel wafanyina kutongijokin pa yom yateshay piur pa chisend chikwetay Yesu mu yom yitonginay Nzamb kusal.