Yipul ya in Kutang
Yom ik yarumburilay Yesu pamulejay Nikodem anch: “Kwikil umwing wakandama mwiur, ching ndiy wadiokala mwiur, ndiy kamu Mwan a muntu”?—Yohan 3:13.
Yesu wading uchidi pa divu, wading kand kal akandama, ap kuchirikin mwiur. Pakwez, yitwija piur pa Yesu ni mazu malonday yikutwish kutukwash kwov kurumburik.
Yesu “wadiokala mwiur” mulong ndiy washakama cha kusambish mwiur ni Tatukwend, pakwez pa chisu chifanyidina, mwom wa Mwan aushemunina mu dichimb dia Mariy, wawiy mutapu wavadikay Yesu mud muntu. (Luka 1:30-35; Galatia 4:4; Hebereu 2:9, 14, 17) Kupwa kwa rufu rend, Yesu wavumbuka wikal mud chitang cha muspiritu ni kuchirik chakwel kwikal pamwing ni Yehova. Chawiy lel, machuku makemp kurutu kwa rufu rend, Yesu walembila anch: “Katat Tatuku, ntumbisha am nich uyaj wey amwiney unadinga nich ni yeyey padingay mangand kamatangilip kal.”—Yohan 17:5; Rom 6:4, 9; Hebereu 9:24; 1 Pita 3:18.
Pisambay Yesu ni Nikodem, Mufaris ni mulej mu Isarel, Yesu wadinga kand kal achirikina mwiur. Chakin, kwadingap muntu mukwau wafa wakandam mwi ndond ya muspiritu, mwiur. Yesu amwinend walonda anch Yohan Mubatish wadinga upandakena kujimb mud muprofet wa Nzamb, pakwez “muntu upandakena kukep mu Want wa Nzamb, ndiy umupandakenamu Yohan kujimb.” (Mateu 11:11, MM) Kambuy Pita warumburila anch ap Mwant David ushinshamena wafa, ni wading uchidi mwi nzay; David kakandamap mwiur. (Midimu 2:29, 34) Kwadinga diyingish dimekeshina anch antu afa kurutu kwa Yesu, mud David, Yohan Mubatish, ni antu akwau a ritiy kayap mwiur. Antu inay afa kurutu Yesu ayifungwila antu njil ap mutapu wa kuvumbuk mulong wa kuya ni kushakam mwiur. Kambuy Paul wafunda anch Yesu, mud mwin kusambish, “watubuzina njil yisu, njil yikweta mwom” ya kuya mwiur.—Hebereu 6:19, 20; 9:24; 10:19, 20, MM.
Mulong Yesu wadinga kand kal afa ni kuvumbuk, yom ik yarumburilay Yesu pamulejay Nikodem anch: “Kwikil umwing wakandama mwiur, ching ndiy wadiokala mwiur, ndiy kamu Mwan a muntu”? (Yohan 3:13) Shinshikin yalonday, ap yadingay ni kwisamb ni Nikodem.
Mukurump winou mwin Yuda pezay kud Yesu uchuku, Yesu wamuleja anch: “Chakin chakin nakulej anch, ching muntu wavadik musu, chamwamu kakutwiship kuman want wa Nzamb.” (Yohan 3:3) Nikodem wamwakula, wamwipul anch: “Muntu ukutwish nchik kumuval kand pakunanapay? Ndiy ukutwish kwandam nchik kapamp ka chaad mwivumu mwa makwend ni kumuval kand?” Nikodem kateshap mafundish minam ma Nzamb piur pa kwikal mu Want wa Nzamb. Ov, kwadinga mutapu wendendiy kwijik chinech? Mwaning, kelap kutwish kwilej mafundish minam kulondwish nich yitongijok ya muntu; kwadingap muntu wela kutwish kumurumburil mulong wa kwandam mu Want. Yesu ndiy kusu wela kutwish kumufundish. Yesu watwisha kumufundish Nikodem ni akwau mulong ndiy wadiokala mwiur ni wading uwanyishinau nawamp mulong wa kuyifundish antu yom mud yiney.
Chawiy lel chipul piur pa mufund winou chimekeshin chom chimwing cha usey piur pa kwilej Dizu dia Nzamb. Chifanyidinap kwidjidjek piur pa mufund kanang mulong pa kuutang umeken mud ukasiken kutesh. Yilondilay Bibil ndond yimwing chifanyidin kuyishinshikin nich ukwash wa mifund yikwau ni kwovijan nich mifund yikwau. Chikwau kand, chisu chivud mulad wa minsamb—mwikadil wa ndond ap yadingau ni kwisambin—yikutwish kutukwash kwov nawamp, kurumburik kwovikena kwa mufund ukasikena.