Riyind Kudi Antu A Chirung Chinech Chiyimp

Yesu wamulimisha nakash Yohan Mubatish, pakwez mutapu ik wamumanau Yohan kudi antu akwau? Yesu walonda anch: ‘Antu a chirung chinech, adi mudi anikanch ashicha mu chiku akata kuyitazuk akwau ni kulond anch: ‘Etu twakupepilangany mishiy, en walikany kuja; twakunenganeshany pakwez kiudidilanyap.’’—Mateu 11:16, 17.

Chom ik chakimbay kulond Yesu? Wovikesha patok chitongijok chend palonday anch: “Yohan wajila yakudia, walik kuna maar ma nviny, chad antu awonsu amwelang anch: ‘Ndiy ukwet chilembil.’ Pezay Mwan a Muntu, ndiy wading ni kudia ni kuna, chad antu awonsu alonda anch: ‘Talany muntu winou! Ndiy upumbil kudia ni kuna, udi murund wa in kulambwish yitad ni in yitil.’” (Mateu 11:18, 19) Chikwau kand, Yohan wading ni mashakamin ma chilik chimwing mudi ma mwin Nazir, mulong kanangap maar ma nviny, pakwez antu a chirung chinech amwela anch ukwet chilembil. (Kuchind Michid 6:2, 3; Luka 1:15) Pakwez Yesu wading ni mashakamin mudi ma antu awonsu. Ndiy wadiangang ni wanangang maar mu mutapu uwamp, pakwez amufisha nich anch wading upumbil kudia ni kuna. Chimeken anch chikasikening kuyisangaresh antu awonsu.

Yesu wayifanikesha antu a chirung chinech ni anikanch ashicha mu chiku alikina kuja maj papepinau an akwau mishiy ap akata kusangar padidinau antu akwau. Ndiy walonda anch: “Pakwez manangu ma Nzamb makat kumekan anch madi makin ku yisalijok yau.” (Mateu 11:16, 19) Mwaning “yisalijok”—yamekeshau kudi Yohan ni Yesu—yamekesha anch kufish nich kwinoku kwading kwa makasu.

Kupwa kwa Yesu kulond piur pa antu a chirung chinech anch adi ayimp, wayifisha nich antu a mu misumb ya Korazin, Betsaida, ni Kapernaum, mu misumb mwasadinay yilay yivud. Yesu walonda anch, ang wasala yilay yiney mu misumb ya Fenisiy, ya Tir ni Sidon chawiy antu a misumb yiney afanyina kukarumuk. Wajimbula kand Kapernaum, ndond yashakamay mu chisu chimwing. Chawiy, antu avud kitiyijap kwau. Yesu walonda piur pa musumb winou anch: “Nakulejany chakin, pa Dichuku dia Dirumburish dia Nzamb, ndiy ukez kuyovil in Sodom riy kupandakanamu en.”—Mateu 11:24.

Chawiy, Yesu wamutumbisha Tatukwend mulong wajindjika uyakin wa muspiritu ‘kudi antu ilejina ni kudi in manangu’ pakwez wamekesha uyakin winou kudi antu adia mudi anikanch. (Mateu 11:25) Chad, ndiy wayitazuka antu inay adia mudi anikanch anch: “Ezany kudi am, en awonsu uziyinanya mulong wa yisend yikasikena ya mitapu ni mitapu, chad am nikez kukwambulany. Itwikany mpand yam, wingiyiyany am, chad mwamu mipim yen yikwiswedish, mulong am nishimpishin muchim ni kwitudish. Mulong mpand yam yiswakel kwitwik, ni chisend cham chipipel.”—Mateu 11:28-30.

Mutapu ik Yesu wapanay kwiswedish? Antakel a chirelijon ayitwika antu yisend yilimina mu uswik wa yinshankur, mudi mwasalau piur pa yijil yilimina yatekau mulong wa kulimish dichuku dia Sabat. Pakwez, Yesu wapana kwiswedish kudi antu mu kuyifundish uyakin wa Nzamb mulong uyakin winou wayikwola antu mu uswik wa yinshankur yiney. Wayongoja kand antu ading azengodinau kudi antakel a chipolitik ni antu ading iyovila anch kawanyidinap mulong wa yitil yau. Chakin kamu, Yesu wayileja mutapu ukuyilikishinau yitil yau ni mutapu ukutwishau kwikal mu chisambu pamwing ni Nzamb.

Antu awonsu itiyijina kusend mpand ya Yesu afanyidin kwipan ayinau kudi Nzamb ni kumusadin Nzamb wetu udia mwiur wa ranaken ni riy. Kusal mwamu chidiap chisend chilimina, mulong yijil ya Nzamb kiyikasikenap.—1 Yohan 5:3.