Mutapu Urijekinau Chikumangen ni Kuchitakel

MU MUKAND wend wa kusambish kudi in Korint, kambuy Paul walejana uyakin wa usey piur pa Nzamb. Paul wafunda anch: “Nzamb kadiap Nzamb wa kanvundangesh, pakwez udi Nzamb wa chisambu.” Piur pa yikumangan ya chikumangen walonda anch: ‘Chifanyidin usalany yom yawonsu ni kuyirijek nawamp pakad kanvundangesh.’—1 Kor. 14:33, 40.

² Kwinsambishil kwa mukand winou, kambuy wababesha in chikumangen cha in Korint piur pa kupwitijan kwadinga mu chikumangen. Paul wayikasikesha akadivar anch “ovijanany” ni anch ikalany “nich chitongijok chimwing ni rusot rimwing.” (1 Kor. 1:10, 11) Kupwa wayinkisha chiyul piur pa yom yikwau kushalijan yafanyina kuyipish uumwing wa chikumangen. Wasadina chilakej cha mujimbu wa muntu mulong wa kulejan usey wa kwikal mu uumwing ni kwovijan. Wayikasikesha awonsu a mu chikumangen cha win Kristu, chikalap nchik yisend yau, kubangijadin kwa rukat umwing ni mukwau. (1 Kor. 12:12-26) Chakwel kwikala kwovijan kuwamp pakach pa antu a mu chikumangen chitin anch chikumangen achirijeka.

³ Pakwez mutapu ik urijekinau chikumangen cha win Kristu? Nany ufanyidina kuchirijek? Mudimu ik ufanyidina kusadik mu chikumangen? Anany afanyidina kwikal ni yisend? Anch twalik Bibil atutakela, tukutan yakul yovikena ku yipul yiney.—1 Kor. 4:6.

ACHIRIJEKIN MU MUTAPU WA UTEOKRAS

⁴ Chikumangen cha win Kristu chasambisha dichuku dia Pentekot wa muvu wa 33 C.C. Ov, yom ik tukutwisha kwilejin piur pa chikumangen cha mu mivu chitot ya kusambish? Achirijekin ni kuchitakel mu mutapu wa uteokras, charumburik anch, mu winyikel (mu Grek, kratos) wa Nzamb (the·osʹ). Mazu minam maad madi mu 1 Pita 5:10, 11. Rusangu rapepilau ra yom yasadika mu Yerusalem pasutin kal mivu 2 000 yamekesha anch Nzamb ndiy wasambisha chikumangen cha in Kristu azizidilau many. (Mid. 2:1-47) Ndiy kamu wachitunga, chidi chikumbu chend. (1 Kor. 3:9; Efes 2:19) Nlel unou, chikumangen cha win Kristu chilondwil mutapu wa kutenchik ni wa kusal yom mudi chikumangen cha mu mivu chitot ya kusambish.

⁵ Chikumangen chakusambish chasambisha ni antu 120 ni kusut. Antu inay atambula spiritu utumbila mulong wa kuwanyish uprofet udia mu Jowel 2:28, 29. (Mid. 2:16-18) Chawiy dichuku dinidia, antu akwau 3000 ayibatisha mu mem ni ibomba mu chikumangen cha in Kristu avalau ku spiritu utumbila. Itiya dizu piur pa Kristu ni “ipana mulong wa kutesh malejan malejanau atwimbuy.” Kupwa kwa chinech, ‘Yehova wadandamena kuyiwejinaku dichuku ni dichuku antu apandishay.’—Mid. 2:41, 42, 47.

⁶ Kuya kurutu kwa chikumangen cha mu Yerusalem kwasala anch mwin kupesh mujim wa in Yuda inana anch in kwilej izwish kal Yerusalem nich mafundish mau. Pakach pa in kwilej asu a mu Yerusalem pading kand in kupesh a in Yuda avud andama niyau mu chikumangen.—Mid. 5:28; 6:7.

⁷ Yesu walonda anch: “Ukez kwikalany atuman am mu Yerusalem, ni mu Yudea mwawonsu ni mu Samaria, djat ni kusudiedila mangand.” (Mid. 1:8) Ni chawiy chasadika, kupwa kwa rufu ra Stefan, in kwilej a mu Yerusalem ayizengola nakash chad apalangana mu Yudea ni mu Samaria. Pakwez kwawonsu kwading kuyilau, adandamena kulejan rusangu ruwamp ni kwikadish in kwilej akwau, kuwejaku ni antu a mu Samaria. (Mid. 8:1-13) Kupwa, rusangu ruwamp arulejan kudi antu a michid yikwau akad kutwal ku mukand. (Mid. 10:1-48) Mudimu winou wa kulejan wikadisha in kwilej avud ni wakwasha kusambish kwa yikumangen yisu pol pa Yerusalem.—Mid. 11:19-21; 14:21-23.

⁸ Ov, mipak ik yakwatau mulong wa kwikal nich kashinsh anch chikumangen chawonsu chisu achitakedin ni achirijekin kudi Nzamb—mu mutapu wa uteokras? Kusutin spiritu utumbila wa Nzamb, atufung akat kutambul ukwash chakwel alama amikoku nawamp. Mu yikumangen yendinau kudi Paul ni Barnabas mu weny wau wa kusambish wa umishoner, atonda amakundj mulong wa kwikal amakurump. (Mid. 14:23) Luka wafunda nsangu piur pa chikumangan chasalay Paul pamwing nau amakurump a chikumangen cha Efes. Paul wayileja anch: ‘Babalany ayinen, ni kudi chisak chawonsu cha amikoku mwakutekanyau en atufung kudi spiritu utumbila, mulong wa kudish chikumangen cha Nzamb, chalanday ni mash ma Mwanend.’ (Mid. 20:17, 28) Amakundj inay ikala amakurump mulong awanyisha yom yitinau mu Bibil. (1 Tim. 3:1-7) Titus, mwin kusal mudimu nend Paul, amwinka mbil ya kutond amakurump mu chikumangen cha Kret.—Tit. 1:5.

⁹ Mulong kwavadika yikumangen yivud, atwimbuy nau amakurump a mu Yerusalem adandamena kusal mudi atulam a pa dishin a chikumangen cha pa mangand mawonsu cha mu mivu chitot ya kusambish. Awiy asala mudi chisak chitakedila.

¹⁰ Pafunday mukand ku chikumangen cha Efes, kambuy Paul warumburila anch mulong wa kusal mu kovijan ni spiritu wa Nzamb, chikumangen cha win Kristu chafanyina kulam uumwing ni kuziyil ku wintakel wa Yesu Kristu. Kambuy wayikasikesha in Kristu akudisha kwikepish ni alama ‘uumwing wa mu spiritu’ pamwing ni kwikal mu urund wa chisambu nau antu awonsu a mu chikumangen. (Efes 4:1-6) Kupwa wajimbula mukand wa Kuseng 68:18 ni wausadina mulong wa ditenchik dia Yehova piur pa amakundj awanyidina mu spiritu mulong wa kuwanyish maswir ma chikumangen mudi atwimbuy, aprofet, in kulejan, atufung nau in kufundish. Amakundj inay, mudi yipan yidiokila kudi Yehova, afanyina kukasikesh chikumangen chawonsu mulong chiwanyisha kukul kwa mu spiritu kumusangareshina Nzamb.—Efes 4:7-16.

YIKUMANGEN YA NLEL YILONDWIL CHILAKEJ CHA ATWIMBUY

¹¹ Nlel, yikumangen yawonsu ya Atuman a Yehova yilondwil chilakej cha mutapu umwing cha ditenchik. Mu uvud wau, yisadin chikumangen chimwing cha mangand mawonsu mudia azizidilau many ku spiritu. (Zak. 8:23) Yesu Kristu ndiy usadina anch yom yiney yisadika mwamu. Mulong wa kuwanyish kushilamu kwend nich kushinshaman, udandamedin kwikal pamwing nau in kwilejend azizidilau many “machuku mawonsu djat ni kwisudiel kwa mangand.” Antu awonsu andamina mu chikumangen akat kutesh rusangu ruwamp ra Nzamb, akat kwipan kudi Yehova ni kutambul dibatish mudi in kwilej a Yesu. (Mat. 28:19, 20; Mar. 1:14; Mid. 2:41) Awiy ij anch Yesu Kristu “kafung muwamp,” ndiy udia Ntakel wa chisak chinech cha amikoku, ikala azizidilau many ap “amikoku akwau” adia mu chikumangen. (Yoh. 10:14, 16; Efes 1:22, 23) “Chisak chimwing” chinech chidi mu uumwing kusutil ku kwitiy nich kushinshaman ku umutakel wa Kristu ni kuziyin dirijek, ‘kashalapol ushishamena ni kubabal,’ watonday Kristu. Tudandamenany kumuchingejin kashalapol winou—Mat. 24:45.

MUDIMU WA YITENCHIK YA RELIJON

¹² Mulong wa kupan yakudia ya mu spiritu chisu chiwanyidina ni kulejan rusangu ruwamp ra Want kurutu disudiel dieza, dirijek dia Yehova diateka yitenchik yimwing. Yitenchik yiney ayij kudi mbil ya ngand kushalijan ni yikat kusal mu kovijan yimwing ni yikwau. Yikat kuswapej mudimu wa kulejan rusangu ruwamp pa mangand mawonsu.

MUTAPU URIJEKINAU YOM MU MUTIY

¹³ Chikalap nchik ndond yidia biro wa mutiy, akat kutond amakurump a Komite wa Mutiy asatu ap kusut mulong wa kutakel mudimu mwi ngand yidiau ap mwi ngand yindjing. Mukurump umwing pakach pau ukat kusal mudi ntakel wa Komite wa Mutiy.

¹⁴ Yikumangen yitakedinau kudi mutiy ayikatwil mu minyingumuku. Kujimb kwa minyingumuku kukwatijadin ni ndond, dizu ni kuvul kwa yikumangen yitakedinau kudi mutiy. Akat kutond kalam wa munyingumuku mulong wa kutal yikumangen yidia mu munyingumuku. Midimu yau akat kuyijikish chisu ni chisu kusutin mikand yikatau kuyitumin atulam a minyingumuku kudi biro wa mutiy.

¹⁵ Yikumangen yikat kulimish yitenchik yiney yilejenau mulong wa uwamp wa antu awonsu. Yikumangen yikat kwitiy amakurump atondinau mulong wa kutakel mudimu wa mutiy, minyingumuku ni yikumangen. Yikat kumuchingejin kashalapol ushinshamena ni kubabal mulong wa kutambul yakudia ya mu spiritu pa chisu chiwanyidina. Kashalapol ushinshamena niyend ukat kulimish umutakel wa Kristu, ukat kulondul mbil ja Bibil ni umutakel wa spiritu utumbila. Mulong tusadin mu uumwing, tukat kusanger niyetu yom mudi yadingau nich in Kristu a mu mivu chitot ya kusambish: ‘Chawiy chikumangen chadandamena kukasikan mu ritiy, ni avulijanang pichuku pichuku.’—Mid. 16:5.