Kwov Kuyip—Pitukweta “Mulong ni Mukwau”

Nambaz Linda walonda anch: “Nambaz umwing mu chikumagen cham wandimbena anch namwiyang nfalang. Antu akwau mu chikumangan ijika mulong winou ni asambisha kwikal ku mutambu wend. Kupwa, nambaz winou wanleja anch watambula jinsangu jimwing jisu, anch kinamwiya nfalang. Ap anch wangita dilikishin, niyova mu muchim wam anch nikutwishap ap nchik kumulikishin mulong wa yom yansadinay.”

UKUTWISH kwitek pa ndond ya Linda, wovishau kuyip nakash kusutil ku yisal ya mbay mukaritiy umwing? Cha ushon, amwing ayirumbangesha nich yisal ya antu akwau yikala nich usu pa yaku yau ya muspiritu. Ov yakushikena niyey?

Ov, Chitwishikin Muntu ap Umwing “Kutwauril Etu ku Rukat ra Nzamb”?

Chakin kamu, tukutwish kutukasiken kumulikishin mbay mukaritiy utwovishina nayimp. Ap mwamu, in Kristu afanyidin kukatijan umwing ni mukwau. (Yohan 13:34, 35) Anch aturumbukina kudi mbay mukaritiy, kunenganan ni kusansan kukutwish kutusal nayimp.—Kuseng 55:12.

Chakin kam, Bibil witiyijin anch kudi yisu yimwing yikatau in Kristu “mulong” umwing ni mukwau. (Kolosay 3:13) Ap mwamu, anch chom chinech chatushiken ayinetu, tukutwish kuchiman swa mudi chikokujol tukutwisha kurish nich. Ov, kudi chom kanang chikutwisha kutukwash? Tushinshikinany yany yisatu ya Bibil ey:

Tatukwetu wa mwiur wij yom yawonsu. Yehova umening yom yawonsu yikata kushiken, kuwejinaku kasolikany tumeninga ni mar madiokila ku kasolikany kinak. (Hebereu 4:13) Pakwez, Yehova woviling nayimp pitumena mar. (Isay 63:9) Ndiy kakatap kulikidil “mar ap runeng” ap chom chikwau—ikalap kashalapol wend mukwau—“kutwauril etu ku rukat ra Nzamb.” (Rom 8:35, 38, 39) Chawiy lel, tufanyidinap niyetu kulikidil chom ap chimwing ap muntu kutwauril etu ni Yehova.

Kulikishin kurumburikinap kwitiy. Pitukata kuyilikishin antu aturumbukidina, tukatap kupipej, kuyingish, ap kwitiy yisal yau. Vurik, Yehova kakatap kwitiyij ap pakemp chitil, pakwez ukat kulikishin chitil anch kudi diyingish kanang dia kusal mwamu. (Kuseng 103:12, 13; Habakuk 1:13) Pakatay kutukasikesh chakwel tuyilikishina antu akwau, Yehova utwitin chakwel tumwimburija. Kalondinap anch tushala in ‘kujiman machuku mawonsu.’—Kuseng 103:9; Mateu 6:14.

Anch twalik kulam ujim, tukutaninamu ayinetu. Mu mutapu ik? Tongijokin pa mwikadil ulondwilaku. Wasend diyal dimwing, pamwing ap dikweta akilo akemp kusu, ni kudisend ku chikash. Chikutwish kwikal chiswapela kusend diyal dined mu kachisu kakemp. Pakwez, chikwikal nchik anch wapakish kusal mwamu chisu chilemp? Ov, ukutwish kudisend mu kulep kwa chisu ik—ov, mu minit yimwing? ov, saa umwing? ap chisu chilemp? Chakin kamu, chikas chey chikusiy nakash! Mwaning, kulim kwa diyal kukutwishap kuswimp. Pakwez anch wadisend chisu chilemp, ukwov kulim kwad. Chilik chimwing ni kulam ujim. Anch twalam ujim chisu chilemp—ap kusu ukemp—tukat kwisal nayimp ayinetu. Chawiy lel, chishimokishinap anch Yehova utukasikeshin kulik kulam ujim. Chakin, kulik kulam ujim kudi mulong wa uwamp wetu ayinetu.—Jinswir 11:17.

Nambaz umwing ku Chot cha Want wamekana wovila kuyip ni ulamina rukuny anch wamuman nambaz mukwau mwin Kristu — Anch twalik kulam ujim, tukutaninamu ayinetu

“Niyova Mudi Anch Yehova Amwinend Wadinga ni Kwinlej”

Ov chom ik chamukwasha Linda kulik kulam ujim piur pa mutapu wamurumbukinau ku mbay nend mukaritiy? Pakach pa yom yikwau, ndiy watongijokina piur pa mayingish ma Bibil ma kulikishin nakash. (Kuseng 130:3, 4) Kwijik anch anch twalikishin nakash, Yehova ukez niyend kutulikishin, kwamubachika pakampwil Linda kulikishin. (Efes 4:32–5:2) Piur pa mutapu wakwachikay ni yovil yiney ya kulam ujim, ndiy ulondin anch: “Niyova mudi anch Yehova amwinend wandinga ni kwinlej.”

Mu kusut kwa machuku, Linda watwisha kulik kulam ujim. Wamulikishina amwinend nambaz winou, katat nambaz winou udi murund nend mukatish. Linda wadandamena kumusadil Yehova. Ikal nich kashinsh anch Yehova usotin kukukwash kusal chilik chimwing.