DILEJAN 65
Ester Wapandish kal Anamakwend
Ester wading changadim mwin Yuda ushicha mu Peris mu musumb wa Suz. Mu mivu yivud, dijuku dend dading mu uswik payikwatau mu Yerusalem kuday Nebukadinezar. Amulila kuday musanyend Maridoke kashalapol wenday Mwant Asuwerus wa ku Peris.
Mwant Asuwerus wakimba kwat mband musu. Chawiy, atushalapol end amuletina amband avud awamp nakash, pakach pa amband inay pading Ester. Pakach pa amband amuletinau, mwant watonda Ester kwikal mwant mwad. Maridoke wamuleja Ester anch kangal walond anch ud mwin Yuda.
Mwin kwitutul Haman wading ntakel wa amakurump. Wakata anch muntu mwin mwawonsu amwifukwilang. Maridoke kitiyap kwifukwil, chawiy Haman wajimana nakash ni wakimba kumujip. Pijikay Haman anch Maridoke ud mwin Yuda, chawiy chakwatay mupak wa kuyijip in Yuda awonsu adinga mwi ngand yau. Wamuleja mwant anch: ‘In Yuda ad antu ayimp nakash, ufanyidin kuyijip.’ Asuwerus wakula anch: ‘Sal kwey yom yawonsu ukimbina kusal,’ ni wamwinkisha mbil ya kutek chijil chitadina mulong winou. Haman wateka chijil chalejana anch chifanyidin kuyijip in Yuda awonsu pa dichuku da 13 da ngond wa Adar. Yehova wading umen yom yiney yawonsu.
Ester kadingap kija chijil chinech. Chawiy, Maridoke wamutumina Ester mukand ufundinau chijil ni wamuleja anch: ‘Yang umuleja mwant.’ Ester walonda anch: ‘Muntu mwawonsu ukweza kumutal mwant pakad kumutazuk akumujip. Pakwez, mwant kand kal antazukap pasut kal machuku 30! Pakwez, nikuya. Anch wanlej kukwat ku mukombu wend wa want nikupand. Anch kanginkishinap mukombu wend kukwataku nikufa.’
Ester waya mu chipang cha mwant. Mwant pamumanay Ester, wamuzambwila mukombu wend wa want chakwel akwataku. Ester witapina dilau kurutu kwa mwant chad mwant wamwipula anch: ‘Ester chom ik ukimbina amboku?’ Ester wakula anch: ‘Nikimbin weza ey ni Haman ku musambu ukusadika urel.’ Ku musambu winou, Ester wayitazuka kand ku musambu ukwau. Ku musambu wa kaad, mwant wamwipula kand Ester anch: ‘Ester chom ik ukimbina amboku?’ Ester wakula anch: ‘Kud muntu ukimbina kwinjip pamwing ni anamakwam. Tupandishaku amboku.’ Mwant wamwipula anch: ‘Nany ukimbina kukujip?’ Ester wakula anch: ‘Muntu winou muyimp ndiy kamu Haman.’ Asuwerus wajimana nakash ni wapana mbil chakwel amujipa Haman pakad kulab.
Pakwez, kwikil muntu ap mwant wafanyina kuswimp chijil chatekay Haman. Chawiy, mwant wamuteka Maridoke kwikal ntakel wa amakurump ni wamwinkisha mbil ya kutek chijil chisu. Maridoke wateka chijil chisu chafanyina kuyikwash in Yuda kwichidij anch akimb kuyirishikish. Pa dichuku da 13 da ngond wa Adar, in Yuda ichidija ku makas ma akankuny nau. Kusambish pa dichuku dinida in Yuda asambisha kusal musambu wa kuwin kwinoku muvu wawonsu.
“Akukutwalany kurutu kwa aguverner ni kwa ant mulong wamam, chad chinech chikwikal uman kud awiy ni ku michid.”—Mateu 10:18