Tudandamenany Kwend Mud Chenday Yesu Kristu

“Muntu ukulond anch ushich mwi ndiy [Nzamb] ufanyidin

kwend mudi chenday ndiy [Yesu].”—1 YOHAN 2:6.

1, 2. Kumutal Yesu kwa kushinshik kurumburikin ik?

“LIK tubambilany nich kudandamen ni kushik ku chilik chatutekilau kurutu kwetu,” mwamu mwafunday kambuy Paul, “Tumutalany Yesu, kalal ni mwin kutenchikish wa ritiy retu.” (Hebereu 12:1, 2) Kulondul njil ya kushishaman kwitin anch tumutala Yesu Kristu kwa kushinshik.

² Dizu ‘kutal neng,’ mu rudim ra kusambish mud mwadisadilau mu Mifund ya Ugrek ya Ukristu, dirumburikin “muntu kwasin manangu mend pakad kampuw,” “komb nyim ku chom kanang chakwel kuman chom chikwau,” “kushinshikin mes pa chom.” Mukand umwing ulondil anch: “Pa chisu chibambedilay mwin kubambel mwin Grek mu chiwandj anch wadiosh kamu manangu mend ku kubambel ni ku diloz kwasidinay mau, ni walabidin mu kutal chisak cha in kutal, mau mend makukep. Mwamu chidia kudiay mwin Kristu.” Kampuw kakutwish kukangesh kuya kwetu kurutu kwa muspiritu. Tufanyidin kumushinshikin kamu Yesu Kristu. Chom ik lel tukimbina mudiay Kalal? Dizu dia Ugrek diakarumunau anch “kalal” dirumburikin anch “ntakel mujim, muntu utakedila mu yom yin yawonsu ni udia chilakej.” Kumutal Yesu kwa kushinshik kwitin kulondul chilakej chend.

3, 4. (a) Chitin ik ku mutambu wetu chakwel kwend mud chenday Yesu Kristu? (b) Yipul ik yifanyidina kushinshikin?

³ Bibil ulondil anch: “Muntu ukulond anch ushich mwi ndiy [Nzamb] ufanyidin kwend mudi chenday ndiy [Yesu].” (1 Yohan 2:6) Tufanyidin kushal nend mu uumwing ni Nzamb, kusutil ku kuziyil ku yijil yend.—Yohan 15:10.

⁴ Chawiy lel, kwend mud chenday Yesu kwitin anch tumulondul piswimp nakash mud Kalal Ntakel ni kulondul kamu jinzau jend. Yipul yijim ya kushinshikin pa mulong winou yidi yiney: Mutapu ik ututakedilay Kristu ilel? Kwimburij mutapu wa kwend kwend kukwet usu ik pad etu? Kulondul chilakej chashay Yesu Kristu kukwet yiyukish ik?

Mutapu Uyitakedilay Kristu in Kwilejend

5. Kurutu kwa Yesu kukandam mwiur, kushilamu ik kwashilayimu in kwilejend?

⁵ Kurutu akandama mwiur, Yesu Kristu wasangulau wamekana kud in kwilejend ni wayinkisha mudimu ujim. Wayileja anch: “Yangany kwen ku michid yawonsu uyikadishany in kwilej.” Pa chisu chinech Kalal Ntakel washilamu kand kwikal nau pawanyishinau mudimu winou, ndiy walonda anch: “Talany, nidi nen machuku mawonsu, chikupu ni kwisudiel kwa mangand.” (Mateu 28:19, 20) Mutapu ik udiay Yesu Kristu pamwing nau in kwilejend pa chisu chinech cha nsudiel ya ditenchik dia yom?

6, 7. Mutapu ik ukatay Yesu kututakel kusutil ku spiritu utumbila?

⁶ Yesu walonda anch: “Mwongoj, ndiy kamu spiritu utumbila, [ukez kutumay] Tatuku mu dijin diam, ndiy ukez kakulejany yom yawonsu, ni kukuvurishany ya yom yawonsu yinalonda kudi en.” (Yohan 14:26) Spiritu utumbila, watumau mu dijin dia Yesu, ututakedil ni kutukasikesh ilel. Ukat kutumunyikin muspiritu ni kutukwash kwov kurumburik kwa “yom ya Nzamb yikurikina.” (1 Korint 2:10) Chikwau kand, ngikadil ya winzamb ya “rukat, musangar, chisambu, kushimpish muchim, kudimuk, kuwap, [ritiy], kujijaman, kwitudish” madi ‘dibuj dia spiritu.’ (Galatia 5:22, 23) Nich ukwash wa spiritu utumbila, tukutwish kukudish ngikadil yiney.

⁷ Chitwilejina Mifund ni kwikasikesh kusadil yitwilejina, spiritu wa Yehova utukwashin kupam mu manangu, mu kujingunin, mu kutesh, mu ronganyin, mu dirumburish, ni mu ukaliweny wa kutong. (Jinswir 2:1-11) Spiritu utumbila utukwashin kand kujijaman ku yipakiu ni yoziu. (1 Korint 10:13; 2 Korint 4:7; Filip 4:13) In Kristu ayikasikeshin ‘kwitokish ku tuyimp twawonsu twa mujimbu ni muchim, ikala antu atumbila.’ (2 Korint 7:1) Ov, chakin kamu tukutwish kwiyisikesh ku yitinay Nzamb piur pa kwishitul, ap kwitokish, pakad ukwash wa spiritu utumbila? Mutapu umwing usadidilay Yesu chakwel kututakel ilel udi spiritu utumbila, mulong Yehova Nzamb wamwinkisha Mwanend mbil ya kumusadil.—Mateu 28:18.

8, 9. Mutapu ik ukatay Kristu kumusadil “kashalapol ushishamena ni kubabal” chakwel kulet umutakel?

⁸ Shinshikin njil yikwau mukatay Kristu kutakel chikumangen ilel. Parumburilay piur pa kwikalaku kwend ni piur pa nsudiel ya ditenchik dia yom, Yesu walonda anch: “Kashalapol ushishamena ni kubabal, watekau kal pa mutu pa a mu chikumbu, ukuyinkish yakudia pa chisu chau, ndiy nany? Kashalapol winau wayuk anch amutan kudi mwant wend ukat kusalang mwamu. Nakulejany chakin kamu anch ukez kamutek piur pa yom yend yawonsu yikwetay.”—Mateu 24:3, 45-47.

⁹ Yesu Kristu ndiy “mwant.” Chisak cha in Kristu azizidilau many chidia pa divu chawiy “kashalapol.” Chisak cha kashalapol winou achinkisha mudimu wa kubangin yisakin ya Yesu yidia pa divu ni kulet yakudia ya pa chisu chau. Kachisak kakemp ka atulam awanyishinau nawamp a pakach pa “kashalapol ushishamena ni kubabal” asadil Chisak Chitakedila, chisadidila mud ntimesh wa chisak cha kashalapol. Awiy atakedin mudimu wa pa mangand mawonsu wa kulejan Want ni kupan yakudia ya muspiritu ya pa chisu chifanyidina. Chawiy Kristu utakedil chikumangen kusutil kudiay “kashalapol ushishamena ni kubabal” uzizidilau many ni Chisak chend Chitakedila.

10. Mutapu ik ufanyidina kwikal ngikadil yetu ya manangu pantaliken nau amakurump, ni mulong wak?

¹⁰ Uman ukwau wa umutakel wa Kristu adi “amakundj mud yipan”—amakurump in Kristu, ap atulam. Awiy ayipana “mulong wa kuwanyish in Kristu ayisadil akwau mudimu wa kuyikwash kutung chikumbu cha mujimbu wa Kristu.” (Efes 4:8, 11, 12) Piur pau, Hebereu 13:7 ulondil anch: “Yivurikany awiy adia in kutakel en, antu akata kunilejany dizu dia Nzamb; yitongijokany yom yikata kusalau, ilikejany ritiy rau.” Amakurump akat kutakel mu chikumangen. Mulong amwimburijin Kristu Yesu, ritiy rau ridi rifanyidina kwimburij. (1 Korint 11:1) Tukutwish kumekesh kujikitish mulong wa ditenchik dia amakurump kusutil ku kwikal in kuyiziyil “amakundj mud yipan.”—Hebereu 13:17.

11. Kristu uyitakedil in kwilejend ilel kusutil ku jinjil ik, ni mulong wak tufanyidina kwov kurumburik kwa mutapu wend wa kutakel ni kuuziyil?

¹¹ Inge, Yesu Kristu uyitakedil in kwilejend ilel kusutil ku spiritu utumbila, “kashalapol ushishamena ni kubabal,” ni kusutil kud amakurump a chikumangen. Kwend kwetu mud chenday Kristu kwitin kwov kurumburik kwa mutapu wend wa kutakel ni kuuziyil. Kwitin kand anch twimburija mutapu wend wa kwend. Kambuy Pita wafunda anch: “Mulong kwawiy kwanitazukinau, mulong Kristu kand wakumenanya en mar, wakushilanya chilik chakwel ulondulany mu ruzau rend.” (1 Pita 2:21) Kulondul chilakej chiwanyidina cha Yesu kukwet nchik usu pad etu?

Ikal Wisikena mu Kusadil Ulabu

12. Mutambu ik wa chilakej cha Kristu, ufanyidinau pakampwil amakurump kubangin mu chikumangen?

¹² Ap anch Yesu watambula ulabu ujim kud Tatukwend, ndiy wadinga wisiken mu mutapu wa kuusadil. Awonsu mu chikumangen—pakampwil atulam—afanyidin kusal chakwel anch ‘kwisikan kwau kumekana kud antu awonsu.’ (Filip 4:5; 1 Timote 3:2, 3) Mulong atulam akwet chilik kanang cha ulabu mu chikumangen, chidi cha usey anch alondula jinzau ja Kristu mu kusadil ulabu.

13, 14. Mwi njil ik mukutwishau amakurump kumwimburij Kristu payikasikeshinau akwau kumusadil Nzamb?

¹³ Yesu watongina mimbu ya in kwilejend. Kadingap ni kuyit yivud chipandikena yikutwishau kupan. (Yohan 16:12) Pakad kuyishindil, Yesu wayikasikesha in kwilejend ‘kurish nich usu ukash’ mu kusal rusot ra Nzamb. (Luka 13:24) Wasalanga mwamu kusutil ku kutakel ni ku kukasikesh michim yau. Chawiy chimwing ilel, amakurump in Kristu kakatap kuyakamish antu akwau chakwel amusadila Nzamb nich usany. Pakwez, akat kuyikasikesh kumusadil Yehova ni Yesu nich rukat, pamwing kand ni kuyisadil akwau antu.—Mateu 22:37-39.

¹⁴ Yesu kasadilap nayimp ulabu wamwinkishau mulong wa kusop mwom wa antu. Katekap yijil yikasikena kusadil ap yany yivud-yivud. Mulad wend wadinga wa kuyikasikesh akwau ni kushik ku michim yau nich yany yadinga mu yijil yamwinkishau Moses. (Mateu 5:27, 28) Mu kumwimburij Yesu Kristu, amakurump alikining kutek yijil yau ayinau ap kukasikeshin pa yitongijok yau ayinau. Piur pa kudjal, kukil ni kwileng ap kwiswedish ni kwipuwangesh, amakurump apakishin kushik ku michim nich kusadil yijil ya Nzamb, mud yidia mu Mike 6:8; 1 Korint 10:31-33; ni 1 Timote 2:9, 10.

Ikal Mwin Riy ni Mwin Kulikishin

15. Mutapu ik wasalay Yesu piur pa kurumbuk kwa in kwilejend?

¹⁵ Kristu watushila chilakej cha kulondul mu mutapu wayisadilay in kwilejend piur pa yilim ni kurumbuk kwau. Tal yinship yaad yasadika pa uchuku wend wa nsudiel pa divu mud muntu. Kwinyim kwa kushik ku Getiseman, Yesu “waya nend Pita ni Yakob ni Yohan” ni wayileja anch ‘chishany ku mes.’ Chad, “waya kurutu pakemp kusu mwamu, wawa pansh, walembil.” Pachirikay, ‘wayitana alel.’ Chom ik chasalay Yesu? Walonda anch: “[Spiritu] chakin usotil, pakwez mujimbu uziyil.” (Marko 14:32-38) Pa ndond pa kumukabwokin Pita, Yakob, ni Yohan, ndiy wayovila riy! Pa uchuku wawiy umwing, Pita wamutuna Yesu tupamp tusatu. (Marko 14:66-72) Mutapu ik wezay Yesu kumusadil Pita? “Mwant wavumbukin, wameken kudi Simon [Pita].” (Luka 24:34) “Wamekana kudi Kefas,” mwamu mulondilay Bibil, “chad wamekan lel kudi adikum ni aad.” (1 Korint 15:5) Pa ndond pa kumutekin kafund ku muchim, Yesu wamulikishina kambuy wakarumuka ni wamukasikesha. Chad, Yesu wamwinkisha Pita yisend yijim.—Midimu 2:14; 8:14-17; 10:44, 45.

16. Mutapu ik tukutwisha kwend mud chenday Yesu anch ambay netu akaritiy aturumbukin ap atusal nayimp mwi njil yimwing ap yikwau?

¹⁶ Anch ambay netu akaritiy aturumbukin ap atusal nayimp mwi njil yimwing mulong wa kuburen kuwanyin kwa chiuntu, ov, tufanyidinap niyetu kuyovil riy ni kuyilikishin mud mwasalay Yesu? Pita wayikasikesha ambay nend akaritiy: “En awonsu ikalany ni muchim umwing, ongojijanany, katijanany mudi akadivar, ni michim ya riy ni yitudila. Kangal wafundakeshany kuyip ni kuyip, ap kuchirilan, pakwez yukishany.” (1 Pita 3:8, 9) Ov, chikwikal nchik ang muntu umwing waburen kutusadil mud musotilay Yesu, walik kutwovil riy ap kutulikishin? Chikalap nchik mwamu tudi ashindidilau kupakish kumwimburij Yesu ni mud mwelay kusal ndiy.—1 Yohan 3:16.

Tek Yisakin ya Want pa Ndond ya Kusambish

17. Chom ik chilejena anch Yesu wateka pa ndond ya kusambish kusal rusot ra Nzamb mu mwom wend?

¹⁷ Kudi kand njil yikwau, mutufanyidina kwend mud chenday Yesu Kristu. Kulejan rusangu ruwamp ra Want wa Nzamb kwadinga pa ndond ya kusambish mu mwom wa Yesu. Kupwa kwa kumulej mband mwin Samaria piswimp ni ul wa Sikar mu Samaria, Yesu wayileja in kwilejend anch: “Yakudia yam yidi kusal rusot rendendiy wantuma am, ni kupwish mudimu wend.” (Yohan 4:34) Kusalang rusot ra Tatukwend kwamukwasha Yesu; kwadinga kud ndiy mud kudia yakudia, yisangareshina, ni yitudishina. Ov, kumwimburij Yesu nich kwasin pa kusal rusot ra Nzamb kukez kutwal ku chom chindjing chisutila mwom urumburikina ni usangareshina?

18. Kuyikasikesh an kusal mudimu wa chisu chawonsu kukwet yiyukish ik?

¹⁸ Pakatau anvaj kuyikasikesh anau chakwel asala mudimu wa chisu chawonsu, awiy pamwing ni anau akat kutambul yiyukish yivud. Tatuku umwing sampas wateka mudimu wa uchibol kurutu kwa anend ampamb mud diloz diau kudiosh mu wanikanch wau. Kwinyim kwa kupwish shikol, ampamb inay ikala ayibol. Chatongijokinay pa musangar watanay mud chibudikin, tatuku winou wafunda anch: “Anetu amakundj katukwatishap usany. Tukutwish kulond nich kujikitish anch, ‘An adi uswan udiokila kud Yehova.’” (Kuseng 127:3) Ni mutapu ik ukutwishau an kwisakin kusal mudimu wa chisu chawonsu? Maku wa an atan ulondil anch: “Kusal mudimu wa uchibol kwayikwasha anam awonsu kukudish urund wa piswimp ni Yehova, kwawapisha yaku yau ya dilejan dia muntu ipend, kwayikwasha kwilej mutapu wa kusadil chisu chau nich manangu, ni kwayikwashin kwilej kutek yom ya muspiritu pa ndond ya kusambish mu mwom wau. Ap anch awonsu awapila kukarumon yom kampand mu mwom wau, kwikil ap umwing wau winanina mulong wa njil yatondau.”

19. Ntong ik ja machuku ma kurutu jifanyidinau ansand kushinshikin nich manangu?

¹⁹ Ansand, jisu ntong jen mulong wa machuku ma kurutu? Ov, usotilany kuya kurutu mu mudimu kanang? Ap kand, ov, usadilany usu wa kwel anch mudimu wa chisu chawonsu wikala mujikit wa mwom wen? Paul wababesha anch: “Babalany mudi muukata kwendany, kangal wendany mudi antu akad kubabal, pakwez ching mudi ababela, lamany chisu cha muten, mulong machuku mayimp madi kwaku.” Wawejinaku kand anch: “Chawiy kangal wasupany, pakwez ijikany mudi mudia rusot ra Mwant.”—Efes 5:15-17.

Ikal Ushishamena

20, 21. Mwi njil ik mwadingay Yesu ushishamena, ni mutapu ik tukutwisha kwimburij kushishaman kwend?

²⁰ Kwend mud chenday Yesu kwitin kwimburij kushishaman kwend. Mulong wa kushishaman kwa Yesu, Bibil ulondil anch: “[Ap anch] ndiy wading mu chilik cha Nzamb, pakwez kichindilap kwikal wilikena nend Nzamb mudi chom cha kubwitan, pakwez wilika amwinend, watambula chifu cha kashalapol, wikala mudi antu; ni pakarumukay muntu ndiy wikepisha amwinend, wikal mwin kuziyil ku rufu, inge ku rufu ra [pa mutond wa mar].” Yesu wachidija nich kushishaman ukaleng wa Yehova kusutil ku kuziyil ku rusot ra Nzamb mulong wendendiy. Waziyila djat ni ku mar ma rufu pa mutond wa mar. Tufanyidin kwikal nich “chiyul chimwing” ni kuziyil kwa kushishaman kusal rusot ra Nzamb.—Filip 2:5-8.

²¹ Yesu wamekesha kand kushishaman kud atwimbuy end ashishamena. Chikalap nchik kuziy ni kuburen kwau kuwanyin, Yesu wayikata “djat ni kwisudiel.” (Yohan 13:1) Chawiy chimwing, kitufanyidinap kulikin kuburen kuwanyin kwa akadivar netu kutwikadish nich ngikadil ya runyinyit.

Lamat ku Chilakej Chashay Yesu

22, 23. Yisu yiyukish yidiokila ku kulamat ku chilakej chashay Yesu?

²² Chitudia antu akad kuwanyin, chakin kamu, tukutwishap kwend kamu muchifanyidina mu jinzau ja Chilakej chetu chiwanyidina. Pakwez, tukutwish kwikasikesh chakwel kulondul piswimp jinzau jend. Kusal mwamu kwitin anch tutesha kurumburik ni kuziyil kwi njil ya Kristu ya kutakel ni kushal alamatina ku chilakej chashay.

²³ Kwikal in kumwimburij Kristu kutwadil ku yiyukish yivud. Mwom wetu ukwikal urumburikina nakash ni usangareshina mulong twasidin pa kusal rusot ra Nzamb pa ndond pa kusal rusot retu. (Yohan 5:30; 6:38) Tukwet kom kawamp. Kwend kwetu kukwikal chilakej. Yesu uyiladikijin antu awonsu akata kusal midimu ni akweta yisend yilimina kuya kud ndiy chakwel atana diswedish dia mipim yau. (Mateu 11:28-30) Anch twalondul chilakej cha Yesu, niyetu tukutwish kuyikasikesh antu akwau kusutil ku urund wetu. Komb, tudandamenany kwend mud chenday Yesu!

Ov, Uchivurikin?

• Mutapu ik uyitakedilay Kristu

in kwilejend ilel?

• Mutapu ik ukutwishau amakurump kulondul umutakel wa Kristu mu kusadil ulabu wau wayinkishau kud Nzamb?

• Mutapu ik tukutwisha kulondul chilakej cha Yesu piturishina nich yilim ya antu akwau?

• Mutapu ik ukutwishau ansand kutek yisakin ya Want pa ndond ya kusambish?

[Chipich chidia pa paj wa 15]

Amakurump in Kristu atukwashin kulondul umutu wa Kristu

[Chipich chidia pa paj wa 16]

Ansand, ov, ntong ik witekidinanya mulong wa mwom upitishina wa Ukristu?