Mulikany Satan, ni Yend Ukez Kachin Kudi En!

“Ziyilany kudi Nzamb; pakwez mulikany Satan, ni yend ukez kachin kudi en.”—YAKOB 4:7.

1, 2. (a) Ngikadil ik ya Djabul yimekedina mu mazu mafundau mu Isay shapitre wa 14? (b) Yipul ik tukwisambina?

DJABUL udi chilakej chipandikena kuyip cha kwitutul. Kwibaz kwend akulejen mu mazu mafundau kud Isay muprofet wa Nzamb. Mivu chitot ni kusut kurutu kwa Babilon kwikal dikand dia mangand, antu a Yehova ayimekesha mud alondil mazu malondwila am pantaliken nend “mwant wa in Babilon” anch: ‘Ey walonda mu muchim wey anch nikukandam piur pa madj. Piur pa atutumbu a Nzamb [dichuku dia want dia David] nikutek ditand diam piur . . . Nikez kufanakan nend Mwin Dikand.’ (Isay 14:3, 4, 12-15; Kuchind Michid 24:17) Kwibaz kwa “mwant wa in Babilon” kwadinga chilik chimwing nich ngikadil ya spiritu wa Satan, ‘nzamb wa ditenchik dined dia yom.’ (2 Korint 4:4) Pakwez kwitutul kwa Satan kukez kupwil mu kusheshik, ap kamu mud mwashikena dijuku dia want dia in Babilon ku disudiel dikwatishena usany.

² Pakwez, chirung chawonsu chikwikalayaku Djabul, tukwikal abangidina pa yipul mud ey: Ov, tufanyidin kumwov Satan wom? Ov, mulong wak ukatay kuyibachik ayizengola in Kristu? Ov, mutapu ik tukutwisha kwipuk kuwil mu mipit ya Djabul?

Ov, Tufanyidin Kumwov Satan Wom?

3, 4. Ov, mulong wak in Kristu azizidilau many ni ambay nau kakumwovangap Djabul wom?

³ Mazu manam ma Yesu madi ma dikasikesh nakash kud in Kristu azizidilau many: “Kangal wov wom wa mar masotila kushik swa kudi ey. Nikulejin patok anch, Sakudimban ukutek amwing a pakach pen mu rukan mulong wa kukupakany. Ndiy ukez kukuzengolany machuku dikum. Ikal mwin yakin, ap anch wafap nchik, chawiy am nikez kukwinkish chibangul cha mwom.” (Kujingunik 2:10) Azizidilau many ni ambay nau akweta ruchingej ra kushakam pansh kakatap kumwov Djabul wom. Kuburen kwov wom kwinoku kudiokilap ku kuhamuk kwa chivadik. Kudiaku mulong awiy akwet wom wa kumulimish Nzamb ni ‘ajingamining mu urel wa jimpur jend.’—Kuseng 34:9; 36:7.

⁴ In kwilej akusambish a Yesu Kristu adinga akad wom amekesha kushinshaman djat ni ku rufu yikalap nchik yom yikonkau. Kovap wom wa yom yasotay Satan Djabul kusal, mulong adinga ija anch Yehova kakezap ap pakemp kuyilik antu ashinshamena kud ndiy. Chilik chimwing kurutu kwa kuzengol kukash kwa katat, in Kristu azizidilau many ni ambay nau ipanina akwatin kal mupak wa kulik kushesh kushinshaman kwau kud Nzamb, kambuy Paul walejana anch Djabul ukutwish kulet rufu. Ov, chom chinech chitwovishinap wom?

5. Chom ik twilejidina ku Hebereu 2:14, 15?

⁵ Paul walonda anch Yesu ‘wikala nich mash ni mujimbu’ wa mbij chakwel “mu rufu ndiy ukutwish kumushesh ukweta usu wa rufu, ndiy Satan kamu; ni kuyikamunin awonsu adinga mu uswik mu mivu yawonsu ya kupand kwau mulong wa kurov rufu wom.” (Hebereu 2:14, 15) Mud “ukwet usu wa rufu,” Satan wamuyikela Yudas Iskariyot ni kupwa wasadila antakel in Yuda ni in Rom mulong wa kumujip Yesu. (Luka 22:3; Yohan 13:26, 27) Pakwez, kusutil ku rufu rend ra kwipan, Yesu wayikula antu in yitil kudiokal mu usu wa Satan ni wasala chitwishika kud etu kutambul mwom wa chikupu.—Yohan 3:16.

6, 7. Pa chilik ik pashikedina usu wa Satan wa kulet rufu?

⁶ Usu wa Djabul wa kulet rufu udi mu chilik ik? Mwaning, kudiosh kwisambishil kwa yisal yiyimp ya Satan, makasu mend ni umutakel wend yaleta kal rufu mu antu. Chidi mulong Adam wasala chitil ni chad waswanisha dijuku dia muntu mu chitil ni rufu. (Rom 5:12) Chikwau kand, atushalapol a Satan adia pa divu akat kuyizengol in kumwifukwil Yehova, yisu yimwing djat ni ku rufu, mud kamu mwamusalau Yesu Kristu.

⁷ Ap mwamu, kitufanyidinap kutong anch Djabul ukutwish kumujip muntu win mwawonsu usotilay kujip. Nzamb ukat kuyilam antu adia Endendiy ni kakezap kumulikin Satan ayishesha shitit in kwifukwil akin awonsu pa divu. (Rom 14:8) Chakin, Yehova ulikidil kuzengol kweza pad antwend, ni ulikidil rufu riyikwata amwing etu mud chibudikin cha kurishish kwa Djabul. Ap mwamu, Mifund yipanin ruchingej ripandikena kuwap ra kusanguk kwa adia mu “mukand wafundau yivurikish” wa Nzamb—ni Djabul kakutwishap kusal chom chikukangesha kusanguk kwinoku kwa mwom!—Malakiy 3:16; Yohan 5:28, 29; Midimu 24:15.

Mulong wak Ukatay Satan Kutuzengol?

8. Ov, mulong wak ukatay Djabul kuyizengol atushalapol a Nzamb?

⁸ Anch tudi atushalapol ashinshamena a Nzamb, kudi diyingish dijim dilejena mulong ukatay Djabul kutuzengodil. Diloz diend didi anch etu tutuna ritiy retu. Tukwet urund upandikena kuwap ni Tatukwetu wa mwiur, ni Satan usotil kuujip. Chom chinech chifanyidinap kutukashimwish. Mu Eden, Yehova walonda anch kukez kwikal ukankuny pakach pa ‘mukajend’ wa chifanikesh ni “nnak” ni pakach pa “mbut” jau. (Disambishil 3:14, 15) Mifund yimujingunin Djabul mud “Nnak mujim” ni yijingunin anch chisu chend chiswimp kal nakash ni ujim wend udi ukash. (Kujingunik 12:9, 12) Mud ukankuny pakach pa “mbut” jaad, atushalapol inay ashinshamena a Yehova akutwish kuchingejin kwikal azengodilau. (2 Timote 3:12) Ov, wij diyingish didia kwinyim kwa kuzengol kwinoku kwa Satan?

9, 10. Mulong ik walangwishay Djabul, ni mutapu ik ukwatina mulong winou ku mashakamin ma antu?

⁹ Djabul walangwisha mulong wa ukaleng wa mangand mawonsu. Kwambatan nich mulong winou, ndiy watadika kushinshaman kwa antu kudiay Sakatang wau. Satan wamuzengola Yob ikundj utentamina. Ov, chadinga mulong wak? Chadinga mulong wa kushesh kushinshaman kwa Yob kudiay Yehova. Mband wa Yob ni “in kumwongoj “ asatu asadila rutong ra Djabul pa chisu chinicha. Mud muchilejenau mu buku wa Yob, Djabul wamusarumuna Nzamb, walonda anch kwikil muntu ap umwing ukutwisha kushal ushinshamen kud Ndiy anch amwinkish Satan mbil ya kumupak muntu winou. Pakwez Yob walama dang kushinshaman kwend, chawiy wamekesha anch Satan udi mukamakasu. (Yob 1:8–2:9; 16:2; 27:5; 31:6) Djabul uyizengodil Atuman a Yehova ilel chakwel anch ashesha kushinshaman kwau ni kusot kumekesh anch kusarumun kwend kud kwakin.

¹⁰ Kwijik anch Djabul uletin kuzengol pad etu mulong usotil kushesh chamwamu kushinshaman kwetu kud Nzamb kukutwish chakin kamu kutukwash kwikal akankamena ni akash. (Kuvurik Yijil 31:6) Nzamb wetu udi Mwant mwin Mangand, ni ukez kutukwash kulam kushinshaman kwetu. Tudandamenany kusangaresh muchim wa Yehova kusutil ku kwikal in kulam kushinshaman, kumwing mutapu wa kumwakul mwin kumusal mujim, Satan Djabul.—Jinswir 27:11.

‘Tukola kud Muntu Muyimp’

11. Chirumburikin ik kwit anch, “Kangal watutwal ku yoziu”?

¹¹ Kwikal mwin kulam kushishaman udiap mulong ukemp; kwitin malembil ma kinakin. Mazu ma malembil ma sampul madi pakampwil ma ukwash nakash. Kupwa, Yesu walonda kand anch: ‘Kangal watutwal ku yoziu, pakwez tukola kud muntu muyimp.’ (Mateu 6:13) Yehova kakatap kutwoz nich chitil. (Yakob 1:13) Pakwez, chisu ni chisu Mifund yilondil piur pa kusal kwend ap kusadish kwend yom, pakatay chakin kamu, kuyilikin yisadika. (Rut 1:20, 21) Chawiy, kusutil ku kulembil mud mwalejanay Yesu, tukat kumwit Yehova kangal atulikina mu choziu. Ni kakezap kusal mwamu, mulong tukwet kashinsh ka Mifund: “Nzamb udi wakin, ndiy kakwitiyip en anozany kusut usu wen; pakwez yoziu anch yez, ndiy ukunilejany njil ya kukwasinik, chakwel ukwikalany ni usu wa kupandakan.”—1 Korint 10:13.  

12. Ov, mulong wak tukata kulembil anch, ‘Tukola kud muntu muyimp’?

¹² Kupwa kwa kujimbul choziu mu malembil ma sampul, Yesu walonda nawamp win kamu anch: ‘Tukola kud muntu muyimp.’ Mu yikarumun yimwing ya Bibil tutangining anch: “tukola ku kuyip” (King James Version; Revised Standard Version) ap anch “tukamunina ku kuyip.” (Contemporary English Version) Pakwez, dizu ‘kukol ku’ akat kudisadil pakampwil ku mutambu wa antu, ni Rusangu rafunday Mateu risambidin kamu nawamp piur pa Djabul mud “Mwin kwozan.” (Mateu 4:3, 11) Chawiy lel chidi cha usey nakash kulembil mulong wa kukolik kudiokal kudiay ‘muntu muyimp,’ Satan Djabul. Ndiy upakishin kutubachikin mu kusal chitil kurutu kwa Nzamb. (1 Tesalonik 3:5) Pitukata kulembil anch, ‘tukola kud muntu muyimp,’ tukat kumwit Tatukwetu wa mwiur atutakela ni kutukwash chakwel anch Djabul kangal atupandakana.

Kangal Djabul Akwisak

13, 14. Ov, mulong wak in Korint ading afanyidin kuswimp mutapu wamusadilau ikundj mu chikumangen wasala masandj?

¹³ Pa chisu chezay Paul kuyishindil in Kristu a mu Korint kwikal in kulikishin, ndiy wafunda anch: “Anch wamulikishilany muntu chom, ni yam kand nikumulikishil; mulong chinalikishila, anch nalikishilap chom, nachilikishila ku mes ma Kristu, chakwel Satan kakutwiship kuman ndond ya kutwisakil; mulong etu kitukangenyip kwijik kubabal kwend.” (2 Korint 2:10, 11) Djabul ukutwish kutwisakil mwinjil kushalijan, chad mulong wak mazu ma Paul mitwajimbula kal am madi ma ukwash?

¹⁴ Paul wayipupa in Korint mulong amulika ikundj mwin kusal masandj ashala mu chikumangen. Chom chinech chamusangaresha Satan, mulong ntumb yiyimp yawila pa chikumangen mulong wa kubwik dis pa “makaj [makad kwikal] mudi madia pakach pa in mangand.” Chakin kamu, mwin kusal uyimp amwopata. (1 Korint 5:1-5, 11-13) Ikundj weza kukarumuk kwinyim. Anch in Korint alika kulikishin ni kumuchirish ikundj winou, Djabul wela kuyisakin mwinjil yindjing. Mwinjil ik? Ela kwikal in chisum ni akad ranaken, mud chidingay Satan amwinend. Anch ikundj wakarumuka ez “kumuminy kudi ushon ukash” chad wez walik kumwifukwil Nzamb rawonsu, pakampwil amakurump akez kusend yisend yimwing pa chinech kurutu kwa Nzamb mwin ranaken, Yehova. (2 Korint 2:7; Yakob 2:13; 3:1) Mwawiy, kwikil mwin Kristu ap umwing ukusota kumwilakej Satan kusutil ku kwikal mwin chisum, muyimp, ni wakad ranaken.

Achidijinau Kusutil Yom ya Njit ja Nzamb

15. Njit ik twasina, ni pisu pimanyidina kupandakan?

¹⁵ Anch tusotil kukolik kudiokal kud Djabul, tufanyidin kwas njit pantaliken nich usu wa aspiritu ayimp. Kuyipandakan kwetu aspiritu inay ayimp akweta usu ukash kwimanyidin pa mutapu tudjadila “yom ya njit yawonsu ya Nzamb.” (Efes 6:11-18) Mu yom yiney ya njit mudi “rikibu ra kutentam [ra] pa ntul.” (Efes 6:14) Mwant Saul wa Isarel wa pasak wamubwambwila Nzamb ni waburena spiritu utumbila. (1 Samwel 15:22, 23) Chad, anch twasadil kutentam ni kwikal ni yom yawonsu ya njit ya muspiritu, tukez kutambul spiritu utumbila wa Nzamb ni dichidij diswiridikina pantaliken nend Satan ni angel end ayimp, ayilembil.—Jinswir 18:10.

16. Mutapu ik tukutwisha kudandamen kwichidij pantaliken nau aspiritu ayimp a usu?

¹⁶ Chakwel kudandamen kwichidij ku aspiritu a usu ayimp, tuswiridin kutang ni kwilej pakad kujing Dizu dia Nzamb, kusadil nawamp mikand yiletinau kusutil kud “kashalapol wakin ukweta manangu.” (Luka 12:42) Chawiy tukez kwizwish mu manangu metu nich milong yiwamp ya muspiritu, mu kwovijan nich chiyul cha Paul chilondila anch: “Chawiy anamakwam, yom yawonsu yidia yakin, yom yilimishilau, yom yitentamina, yom yitokila, yom yikatilau, anch kudi yom ya kashinsh ni kuwap, yom yiwanyidina ni yifanyidina kulimish, tondany pa yom yiney.”—Filip 4:8.

17. Chom ik chikeza kutukwash kwikal in kulejan asongina mabuj ma rusangu ruwamp?

¹⁷ Yehova ututwishishin kudjal “yisapat ya kwirijek kwa kulejan rusangu ruwamp ra chisambu ku mend” metu. (Efes 6:15) Kukumangan kwakad kujing ku yikumangan ya Ukristu kutwinkishin mutapu wa kulejan rusangu ruwamp ra Want wa Nzamb. Musangar mud ik utukata kwov pa kuyikwash antu akwau kwilej uyakin wa Nzamb ni kutan want ipau wa muspiritu! (Yohan 8:32) “Mpak ya musamun ya [s]piritu, diawiy dizu dia Nzamb,” yidi ya usey mu kwichidij ku malejan ma makasu ni mulong wa “kubumon nich mpwembu jikash.” (Efes 6:17; 2 Korint 10:4, 5) Kusadil kwa nkeu kwa Dizu dia Nzamb diafundau, Bibil, kutukwashin kulejan uyakin ni kutuchidijin kudiokal ku kuwil mu mipit ya Djabul.

18. Ov, mutapu ik tukutwisha ‘kwiman dang pantaliken nich kudimok kwa Djabul’?

¹⁸ Paul wasambisha minsamb ya yom yetu ya njit yawonsu ya muspiritu nich kulond anch: ‘Chawiy ikalany akash mu Mwant, ni mu usu wa dikand diend. Djalany yom ya njit yawonsu ya Nzamb, chakwel ukwimanany dang kurutu kwa yoziu ya Satan.’ (Efes 6:10, 11) Dizu dia Ugrek dikarumwinau anch “kwiman dang” disambidin kwiman kwa isalay. Tukat kwiman dang mwi njit ja muspiritu, ap anch Satan wasadil kudimok mu usu wend wa kuyipish uumwing wetu, kujondish malejan metu, ap kushesh kushinshaman kwetu kud Nzamb. Pakwez kurishish kwa Djabul kwapandakanap bwat—ni kukezap kupandakan!a

Mulikany Djabul, Chad Niyend Ukez Kachin

19. Yisu njil yimwing yitukutwishina kumulikin Djabul?

¹⁹ Tukutwish kupandikan mwi njit jetu ja muspiritu pantaliken nend Djabul ni aspiritu ayimp a usu akatay kutakel. Kwikil diyingish dia kwov wom wa Satan, mulong kambuy Yakob wafunda anch: “Ziyilany kudi Nzamb; pakwez [mulikany] Satan, ni yend ukez kachin kudi en.” (Yakob 4:7) Njil yimwing ya kumulikin Satan ni yitang yiyimp ya muspiritu yisadila nend pamwing yidi kwipuk chom ap chisu cha yisal ya aspiritu ayimp ap yip ni kuyipuk antu iyandjikina mu yom yiney. Mifund yilejen patok anch atushalapol a Yehova afanyidin kulik kukimb yom ya yipong ap kwiyandjik mu astroloji, wimbuk, ni kuyisadil aspiritu ayimp. Anch tukwet yivud ya kusal ni tudi iminya dang muspiritu, tukwetap mutapu wa kwov wom anch muntu kanang ukez kutwas chom cha ulaj.—Kuchind Michid 23:23; Kuvurik Yijil 18:10-12; Isay 47:12-15; Midimu 19:18-20.

20. Mutapu ik tukutwisha kumwiyep Djabul?

²⁰ ‘Tukat kumwiyep Djabul’ kusutil ku kulamat ku yijil ya Bibil ni ku uyakin ni kwiman dang pantaliken nend. Mangand movijadin nend Satan mulong ndiy udia nzamb wa mangand. (2 Korint 4:4) Chawiy tukat kudjibwil kwa ngikadil ya mangand, mud kwibaz, ushish, kusal masandj, chisum, ni kusot mapit kupandikena chisik. Twij anch Djabul wakadaba mau pajijamanay Yesu ku kumuzangish kwend ku kusadil Mifund pamwozau mwi mpay. (Mateu 4:4, 7, 10, 11) Chilik chimwing, Satan ukez ‘kutuchin’ mu kukangany anch twamuziyil Yehova muchifanyidina ni anch twengamidin pad Ndiy mu malembil. (Efes 6:18) Nich ukwash wa Yehova Nzamb ni Mwanend mukatish, kwikil muntu ukutwisha kutushesh chikupu—kwikil, ap Djabul kakutwishap!—Kuseng 91:9-11.

[Mazu madia kwishin kwa paj]

Ukwakul Nchik?

• Ov, tufanyidin kumwov Satan Djabul wom?

• Mulong wak ukatay Satan kuyizengol in Kristu?

• Ov, mulong wak tukata kulembil chakwel kukolik kudiokal kud ‘muntu muyimp’?

• Ov, mutapu ik tukutwisha kupandakana mwi njit ja muspiritu?

[Chipich chidia pa paj wa 8]

In kwilej a Kristu a kusambish akad wom ashinshamana djat ni ku rufu

[Chipich chidia pa paj wa 9]

Djabul kakutwishap kukangesh divumbuk dia antu adia mu chivurikish cha Yehova

[Chipich chidia pa paj wa 10]

Ov, ukat kulembil mulong wa kukolik kud ‘muntu muyimp’?

[Chipich chidia pa paj wa 11]

Ov, udjit “yom ya njit yawonsu ya Nzamb”?