Ov, Djabul Udingaku?

Chakul cha Bibil

Mwaning, Djabul udingaku. Ndiy udia “mwin kutakel wa mangand minam,” chitang cha mu spiritu chikala mpongarik ni chamubwambwila Nzamb. (Yohan 14:30; Efes 6:11, 12) Bibil ulejen wuntu wa Djabul kusutil majin malondwilaku am:

• Satan, urumburikina anch “Mwin kumbwambwil.”—Job 1:6.

• Djabul, urumburikina anch “Mwin kafukej.”—Kujingunik 12:9.

• Nnak, dijin disadidinau mu Bibil dirumburikina anch “Mukamakasu.”—2 Korint 11:3.

• Mwin kozan.—Mateu 4:3.

• Mukamakasu.—Yohan 8:44.

Kadiap uyimp ap yaku yiyimp

Antu amwing atongining anch Satan Djabul ud uyimp ap yaku yiyimp tukweting. Pakwez Bibil ulejen mambamb masadika pakach pa Nzamb ni Satan. Nzamb ud uwanyidina, chawiy chovikenap kutong anch wading ukat kwambamb ni chikunku kanang cha uyimp chidia mukach mwend. (Kuvurik Yijil 32:4; Job 2:1-6) Chikwau kand, Satan wamwoza Yesu, wakad kwikal ni chitil. (Mateu 4:8-10; 1 Yohan 3:5) Chawiy, Bibil umekeshin anch Djabul udingaku ni kadiap yaku yiyimp tukweting.

Ov, tufanyidin kushimok mulong antu avud kitiyijinap anch Djabul udingaku? Bwat, mulong Bibil ulondin anch Satan ukat kusadin makasu mulong wa kuwanyish yom yitonginay. (2 Tesalonik 2:9, 10) Mupit umwing ujim ukatay kusadin ud kuyibwik antu pa mes chakwel alika kwitiyij anch udingaku.—2 Korint 4:4.

Yitongijok yikwau ya makasu piur pa Djabul

Makasu: Lisifer did dijin dikwau dia Djabul.

Win yakin: Dizu dia Hebereu dikarumwinau mu ma Bibil mamwing anch “Lisifer” dirumburikin anch “mwizikuch.” (Isay 14:12) Yom yisambidinau mu mukand winou yimekeshin ant a Babilon, afanyinau kwovish usany kud Nzamb mulong wa kwitutul kwau. (Isay 14:4, 13-20) Dizu “mwizikuch” adisadina mulong wa kuyisip nich ant a Babilon kupwa kwa kushesh want wau.

Makasu: Nzamb ukat kumusadin Satan mud “nzwij.”

Win yakin: Djabul ud mukankuny wa Nzamb, kadiap kashalapol wend bwat. Satan ukat kuyirishikish ni kuyifund kwa makasu antu amusadidina Nzamb.​—1 Pita 5:8; Kujingunik 12:10.