“Mulikany Satan” Mudi Mwamulikau Kudi Yesu
“Mulikany Satan, ni yend ukez kachin kudi en.”—YAK. 4:7.
1. Yesu wadinga wij anch rupompat ik rikezay kurish nich pa divu, ni kukez kwikal chibudikin ik?
YESU KRISTU wadinga wij anch Djabul ukumupompat. Chom chinech chovakana patok mu mazu mwamwelau nnak kudiay Nzamb ni chakin kamu mazu minam adinga amwedilam muntu wa muspiritu wabwambwila walondila kusutil kudiay nnak anch: “Am nikez kutek rukuny pakach pey ni mband [chikunku cha mwiur cha dirigek dia Yehova], ni pakach pa mbut yey ni mbut ya mband. Ndiy [Yesu Kristu] ukez kukuchany ku mutu wey, niyey ukez kumusum ku kapolantundu kend.” (Dis. 3:14, 15; Kubur. 12:9) Kumusum Yesu ku kapolantundu kurumburikin anch wadinga ufanyidin kuman mar mu kachisu kakemp pamujipau padingay panap pa divu, mulong Yehova wadinga ufanyidin kumusangul ni kumuchirishin uyaj wa mwiur. Pakwez kumuchany nnak ku mutu kwarumburika anch Djabul akez kumujip ni kakezap kand kusanguk.—Tang Midimu 2:31, 32; Hebereu 2:14.
2. Ov, mulong wak Yehova wadinga nich kashinsh anch Yesu ukez kumujijamen ni kumupandakan Djabul?
2 Yehova wadinga nich kashinsh anch Yesu ukez kupandakan mu kuwanyish mudimu wend ni kumulik Djabul pa chisu chikwikalay pa divu. Ov, mulong wak Yehova wadinga nich kashinsh kinak mwamu? Chadinga mulong ndiy wasambela kumutang bil Yesu kurutu kwa mivu, wamushinshikina, ni wijika anch “mwant wa mudimu” winou ni “mwanat wa yom yawonsu yatangau” wadinga mwin kuziyil ni mwin kushinshaman. (Jinsw. 8:22-31; Kol. 1:15) Chawiy chisu chamutumay Yesu pa divu ni mudi mwamulikinay Djabul chakwel amupaka djat ni mu chilik cha kumujip, Nzamb wadinga nich kashinsh anch Mwanend wa kuval kwend umwing ukez kuwin.—Yoh. 3:16.
Yehova Uyichidijin Atushalapol End
3. Ov, Djabul ukwet manangu ik pantaliken nau atushalapol a Yehova?
3 Yesu wamwisambina Djabul mudi anch “mwant wa mangand minam” ni wayibabesha in kwilej End anch akez kuyizengol, mudi mwamuzengolau ndiy. (Yoh. 12:31; 15:20) Ngand yidi mu chikas cha Satan Djabul, yiyikisin in Kristu akin mulong awiy akat kumusadil Yehova ni adi in kulejan a yom yitentamina. (Mat. 24:9; 1 Yoh. 5:19) Djabul wasidin pakampwil padiau ashadilaku a azizidilau many akeza chakin kamu kuyikel pamwing ni Kristu mu Want wend wa mwiur. Satan wasidin kand padiau Atuman a Yehova avud akweta ruchingej ra kushakam chikupu mu paradis pa divu. Dizu dia Nzamb ditubabeshin anch: “Mukankuny nen, Satan kamu, ukat kwonang mudi ntambu, wend uzomb ni kusot uwapidilay kudia.”—1 Pita 5:8.
4. Ov, chom ik chimekeshina anch antu a Nzamb apandakenamu mu kumulik Djabul mu yisu yetu ya katat?
4 Mudi dirijek dikweta ukwash wa Yehova Nzamb, tupandakenamu mu kumulik Djabul. Tushinshikinany yishiken yiney: Pasut kal mivu 100, anyikel amwing in chisum nakash a mu rusangu ra muntu apakisha kuyinongish Atuman a Yehova. Pakwez uvud wa Atuman udandamedin kwiwejinaku ni katat washikedin kal uvud wa 7000000 mu yikumangen 100 000 ni kusut mu mangand mawonsu. Mawinyikel ma chisum mayizengola antu a Yehova mawiy manonga kal!
5. Ov, mutapu ik umekenay Isay 54:17 kwikal wakin ku mutambu wa atushalapol a Yehova?
5 Pisambinay piur pa chikumangen cha Isarel wa pasak mudi “mband” wend, Nzamb washilamu anch: “Ut wawonsu ukuchilau mulong wa kukurishish ukez kupandikanap bwat, ni rudim rawonsu rikeza kakulankin mu dirumburish ukez karifish nich. Winou udi uswan wa antu a Yehova, ni kutentam kwau kudiokil kud am.” (Isay 54:11, 17, NW) Kushilamu kwinoku kwameken kal kwikal kwakin ku mutambu wa antu a Yehova pa divu diawonsu dia kabuj mu chirung chinech cha “machuku ma kwisudiel.” (2 Tim. 3:1-5, 13) Tukudandamenany kumulik Djabul, ni kwikil ut upakishinay kusadil mulong wa kuyinongish antu a Nzamb ukupandakana, mulong Yehova udi netu.—Kus. 118:6, 7.
6. Uprofet wa Daniel utulejin ik piur pa dikez dia winyikel wa Djabul?
6 Ku kushejin swa kwa nsudiel ya ditenchik dined diyimp dia yom, yom yawonsu yisadila winyikel wa Satan akez kuyipuchol chikupu. Profet Daniel wafunda pamubachikau kudi mwiku wa Nzamb anch: “Pa chisu cha in kutakel inay [adiaku pa chisu chetu chinech], Nzamb wa mwiur ukez kukasikesh want ukwau wakad kwez kwikal nich disudiel chikupu. Kakez kuukwatap want winou, pakwez ukez kushesh mant makwau mawonsu [madiaku ilel], chad wawiy ukez kushakam chikupu.” (Dan. 2:44) Pichikeza kushiken chom chinech, winyikel wa Satan ni wa antu akad kuwanyin ukez kunong chikupu. Mulad win wawonsu wa ditenchik dia yom dia Djabul ukez kunong chikupu, ni Want wa Nzamb ukez kuyikel pakad mukankuny pa divu diawonsu dia kabuj.—Tang 2 Pita 3:7, 13.
7. Ov, mutapu ik twija anch atushalapol a Yehova akutwish umwing ni umwing kupandakan mu kumulik Djabul?
7 Kwikil kwidjidjek ap pakemp anch dirijek dia Yehova dikez kupand ni dikez kwitapil dilau dia Nzamb. (Tang Kuseng 125:1, 2.) Ov, chikez kwikal nchik ku mutambu wetu? Bibil utulejin anch tukutwish twapandakan mu kumulik Djabul, mudi mwamulikau kudi Yesu. Chakin kamu, uprofet waletay Kristu kusutil kudiay kambuy Yohan utulejin anch, kwikalap nchik rupompat ra Satan, “chisak chipandakena kujimb” cha antu akweta ruchingej ra kushakam pa divu chikez kupand kwinsudiel kwa ditenchik dined. Kukwatijan nich Mifund, awiy abarokin nich dizu piur ni kulond anch: “Dipandish didi kudi Nzamb wetu, ushicha pa nkwas, ni kudi Mwan a mukoku [Yesu Kristu].” (Kubur. 7:9-14) Azizidilau many ayisambidin mudi anch amupandikana Satan, ni ambay nau “amikoku akwau,” niyawiy amupandaken mu kumulik. (Yoh. 10:16; Kubur. 12:10, 11) Pakwez chitin usu wakin chakwel kusal mwamu ni malembil makin mulong wa ‘kukolik kudiay muntu muyimp.’—Mat. 6:13.
Chilakej Chipandakenamu cha Kumulik Djabul
8. Choziu ik cha kusambish chafundau chasadilay Djabul padiay Yesu mwimpay, ni Kristu wasala mutapu ik?
8 Djabul wapakisha kushesh kushinshaman kwa Yesu. Mwimpay, Satan wasadila yoziu chakwel amushikija Yesu ku kulik kumuziyil Kwend Yehova. Pakwez, Yesu washa chilakej chipandakenamu cha kumulik Satan. Kupwa kwa kusutish machuku 40, muten ni uchuku pakad kudia, chakin kamu Yesu wova nzal yikash. Satan wamwela anch: “Anch ey udi Mwan a Nzamb, marumba bil mayal am mikala mabot.” Pakwez Yesu walika kusadil usu wend wamwinkishau kudi Nzamb mulong wa kwisakinamu kwend amwinend. Yesu wamwakula anch: “Achifundila kal anch: Muntu kakwikalap mwom ku mabot kusu, pakwez ching ku dizu diawonsu dikubudika mukan mwa [Yehova, NW] Nzamb.”—Mat. 4:1-4; Kuvur. 8:3.
9. Ov, mulong wak tufanyidina kujijamen ku yoziu ya Djabul yikatay kusadil maku metu ma chivadik?
9 Nlel, Djabul usotin asadila maku ma chivadik ma atushalapol a Yehova. Chawiy tufanyidin kukwat mupak wa kujijamen pantaliken nich maku mijondila ma kusal masandj, mapalangena nakash mu mangand minam ma masandj. Chakin kamu Dizu dia Nzamb dilondil anch: “Kiwijinyip anch antu akad kutentam kakez kaswanip want wa Nzamb? Kangal widimbany; ap akamakaj, ap in akish, ap in kusotan, ap in utumu wa amakundj ni amakundj . . . kakuswanip want wa Nzamb.” (1 Kor. 6:9, 10) Choviken patok anch, antu asadilinga masandj ni alikina kukarumuk kakezap kwikal nich mbil ya kushakam mu mangand masu ma Nzamb.
10. Kukwatijan nich Mateu 4:5, 6, chisu chadinga choziu chikwau chasadilay Satan pasotay kushesh kushinshaman kwa Yesu?
10 Piur pa chimwing cha yoziu yamwozau Yesu mwimpay, Mifund yilondil anch: “Chawiy Satan wamutwala ku ul utumbila, wamushichik pa musong wa tempel, wamwel anch: Anch ey udi Mwan a Nzamb, turik bil pansh ey amwiney, mulong achifunda kal anch: Ndiy ukez kapan angel end kukulam ey, akez kakwakil pa makas mau, palemp wez wakidjukul chidjatil chey ku diyal.” (Mat. 4:5, 6) Chamekana mudi anch, chom chinech chawiy chikeza kumekesh mu mutapu wamushena anch Yesu udi Mesia. Pakwez, chakin kamu, chela kwikal kurumbuk, chisal cha kwibaz chelay kulik kwitiyijau kudi Nzamb. Kakwau kand, Yesu walama kushinshaman kwend kudiay Yehova ni wakula nich kujimbul mufund. Ndiy wamwakula anch: “Achifunda anch: Kangal ukasala cha kumupak nich Mwant Nzamb wey.”—Mat. 4:7; Kuvur. 6:16.
11. Ov, mutapu ik ukutwishay Satan kutwoz, ni kukutwish kwikal chibudikin ik?
11 Satan ukutwish watupak chakwel tusota ntumb mu jinjil kushalijan. Ukutwish watubachik chakwel twimburija milad ya mangand mu kudjal, kwikil ni kwileng ap kwiyandjik mu kwipuwej kuyimp. Pakwez anch twadiburil chiyul cha Bibil ni twimburij mangand, ov, tukutongin anch angel akutwish ez atuchidij ku yibudikin yiyimp ya mashakamin minam? Ap anch Mwant David wita dilikishin dia yitil yend yasalay ni Batisheba, kwikil wamuchidija ku yibudikin yiyimp ya yisal yend. (2 Sam. 12:9-12, NW) Kangal twamupukany Yehova mu jinjil jiyimp, pamwingap kusutil ku kuta urund ni mangand.—Tang Yakob 4:4; 1 Yohan 2:15-17.
12. Choziu ik chafundau mu Mateu 4:8, 9, ni mutapu ik mwasalay Mwan a Nzamb?
12 Kakwau, choziu chikwau chasadilay Djabul mwimpay chadinga mulong wa kusot kumwinkish Yesu usu wa chipolitik. Satan wamuleja Yesu mant mawonsu madia mu mangand ni uyaj wau ni wamwela anch: “Yom yiney yawonsu nikukwinkish kwey, anch wawa pansh wangifukwil am.” (Mat. 4:8, 9) Choziu cha rilemb mudi ik pantaliken nich difukwil dia Yehova ni chakwel kumushikij Yesu ku kwikal wakad kushinshaman kudiay Nzamb! Mulong wa kutongijokin kwend nakash piur pa kumwifukwil, kwawiy kwamushikija mwangel winou wadinga pakusambish ushinshamena ku kusal chitil, kwov ris, ni wikala mukamakasu mujim mwin kozan Satan Djabul. (Yak. 1:14, 15) Pakwez, mu kushalijan kujim, Yesu wakwata mupak wa kushal ushinshamena kudiay Tatukwend wa mwiur ni chawiy chalonday anch: “Diokal kwa Satan; mulong achifunda kal: Ukamwifukwil Mwant [Yehova, NW] Nzamb wey, ukamusadilang ndiy kusu.” Chawiy Yesu wamulika kakwau kand Djabul mu mutapu umwing ukash ni mu mazu madia zwang. Mwan a Nzamb kasotap kwikal chikunku cha mangand ma Satan ni kakezap kumwifukwil muntu winou muyimp dichuku ap dimwing!—Mat. 4:10; Kuvur. 6:13; 10:20.
“Mulikany Satan, ni Yend Ukez Kachin Kudi En”
13, 14. (a) Ku kumulej Yesu mant mawonsu ma pa mangand, Djabul wadinga umwinkishin chom ik? (b) Ov, mutapu ik ukutwishay Satan kupakish kutujondish?
13 Ku kumulej Yesu mant mawonsu madia mu mangand, Djabul wadinga umwinkishin usu wakadiay kwikal nich muntu. Satan wadinga uchingejin anch yikumanay Yesu yikutwish yamusangaresh ni kumwitiyikish anch ukutwish wikal ntakel umwing wa chipolitik upandakenamu nakash usu. Nlel, Djabul kakatap kutwinkish mant, pakwez usadiling usu wa kusot kujondish michim yetu kusutil ku mes metu, matu metu, ni manangu metu.
14 Djabul ndiy uyikedila mangand manam. Chawiy chikatay kand kuyikel jinjil jawonsu ja kupalangeshin jinsangu. Chawiy lel, chishimokishinap, anch yom ya kutal ya mangand, ya kutesh ni ya kutang yizwil too nich jinsangu ja masandj ni chisum. Kwijikish yom kwa mangand minam kudi nich rutong ra kukudish mudi etu maku ma kusot kwikal nich yom yitwakadia chakin kamu kuswiriken. Kusutil ku yom yiney, chisu ni chisu Djabul ukat kutwoz nich kutupwit ni yom ya ku mujimbu yikutwisha kusangaresh mes metu, matu metu, ni manangu metu. Pakwez anch twalik kuyital, kuyitesh, chad twatang yom yitiyikina kukwatijan nich Mifund, chakin kamu chidi mudi tulondil anch: “Diokal kwa Satan!” Chawiy tumwimburijin Yesu mu kwikal ajijamena ni akash mu kukwat mipak ya kumalik mangand mijondila ma Satan. Mudi kitudiap chikunku cha mangand ma Satan kumekedin kand mu mutapu tukata kwiyijikish ayinetu nich kukapuk anch tudi Atuman a Yehova ni tudi in kwilej a Kristu pitudia ku mudimu, ku shikol, mwi ndond mutushichinga, ni kudi anamakwetu.—Tang Marko 8:38.
15. Ov, mulong wak kumulik Satan kurumburikin kudandamen kucha ku mes?
15 Kupwa kwa kapamp ka kasatu ka chamwamu ka Djabul kupakish kumwoz Yesu chakwel ituna kushinshaman Kwend kudiay Nzamb, “Satan wamusha.” (Mat. 4:11) Pakwez, Satan kalikap rawonsu kupakish kumwoz Yesu, mulong atulejin anch: “Chapwishay Satan kuwanyish yoziu yawonsu [mwimpay] wadiokala kudiay ndiy, kushik ni peza chisu chikwau.” (Luka 4:13) Anch twapandakan kumulik Djabul, tufanyidin kumujikitish Yehova. Pakwez, tufanyidin kand kudandamen kukimb ukwash wa Nzamb, mulong Djabul ukuchirik kand kupakish kutwoz pa chisu chindjing chimuwapidila—ni chikutwishap chikal cha usey pa chisu tuchingejidina choziu. Chawiy, tufanyidina kucha ku mes yisu yawonsu, tayad kudandamen nich kumusadil Yehova mudimu utumbila kwikalap nchik yoziu yitufanyidina kura nich.
16. Usu ik ukash utwinkishiningay Yehova, ni mulong wak tufanyidina kuwit mu malembil?
16 Tufanyidin kulembil pa mulong winou, chakwel atukwasha mu usu utusadila wa kumulik Djabul, ni tukez kutambul usu ukash upandakenamu mu mangand—mwiku utumbila wa Nzamb. Mwiku winou ukututwishish chakwel tusala yom yikutwisha kwikal yikash kudi etu kuyisal nich usu wetu ayinetu. Yesu wayinkisha in kwilej end kashinsh ka kutambul mwiku wa Nzamb palonday anch: “Anch en lel ayimp wijany mwa kupan yom yiwamp kudi anen, ing lel Tatukwen wa mwiur kakupandikeshimup kupan [spiritu utumbila, NW] kudi awiy akata kumwit?” (Luka 11:13) El tudandamenany kumulembil Yehova chakwel atwinkisha spiritu wend utumbila. Usu winou upandakanamu nakash ukutukwash mu mupak wetu wa kumulik Djabul, tukez kutwish kuwin. Kuwejin pa malembil metu pakad kulik, tuswiridin kand tudjala yom yawonsu ya njit ya muspiritu yiletinay Nzamb chakwel ‘tukutwish twiman pantaliken nich yisal ya kudimok, ya Djabul.’—Efes 6:11-18.
17. Ov, musangar ik wamukwasha Yesu chakwel amulika Djabul?
17 Kudi chom chikwau chamukwasha Yesu chakwel amulika Djabul, niyetu chikutwish chatukwash. Bibil ulondil anch: “Mulong wa musangar watekau kurutu kwend, ndiy wakasikena mu mar ma [pa mutond, NW], wapipeja usany, washakam ku chikas cha katatuku cha nkwas ya Nzamb.” (Heb. 12:2) Niyetu tukutwish twikal nich musangar wa chilik chimwing anch twachidij ukaleng wa Yehova, kulimish dijin diend ditumbila, ni kutek difut dia mwom wa chikupu kurutu kwetu. Tukez kovu musangar mudi ik pakezau kumunongish chikupu Satan ni midimu yend yawonsu ni ‘antu itudishila akez kaswan ngand ni akez kusangar mu kuvul kwa chisambu’! (Kus. 37:11) Chawiy lel, tudandamenany kumulik Djabul mudi mwamulikay Yesu.—Tang Yakob 4:7, 8.
Ov, Ukwakul Nchik?
• Ov, uman ik udiaku ulejena anch Yehova ukat kuyichidij antu end?
• Ov, chilakej ik chashay Yesu cha kumulik Satan?
• Ov, mu jinjil ik muukutwisha kumulik Djabul?
[Chipich chidia pa paj wa 29]
Kuta urund ni mangand kukutwikadish akankuny a Nzamb
[Chipich chidia pa paj wa 31]
Yesu wamalika mant mawonsu mamwinkishau kudiay Satan