Yom ik Yikukukwasha Kutesh Bibil?
YESU walonda anch: “Mwant wa diur ni divu! Nakujikitish mulong wamekesha kudi antu akad kwilej yom yiwajindjika kudi in manangu ni antu ilejina.” (Luka 10:21, MM) Mazu minam ma Yesu mamulejay Tatukwend mamekeshin anch chakwel anch tutesha Bibil, tufanyidin kwikal ni yitongijok yiwamp. Manangu ma Yehova mameken mu mutapu wa kwel anch ndiy waleta buku ukutwishau kusu kutesh kud antu in kwikepish, ni asotina mafundish mend.
Chidingap chiswapela kud etu avud kwikal in kwikepish. Etu awonsu twaswana chibachikin cha kwitutul. Chikwau kand, tushich “mu machuku ma kwisudiel,” pakach pa antu ‘ikatina ayinau, . . . akad kubangaku antu akwau, ni in kwitutul.’ (2 Timote 3:1-4) Yaku yiney yawiy yaku yikata kutukangesh kutesh Dizu dia Nzamb. Cha ushon chidi anch, mu chilik kanang yaku yiney yitukwatin etu awonsu mulong wa antu tushicha nau. Ov, mutapu ik lel ukutwisha kwikal ni yitongijok yifanyidina chakwel kutesh Bibil?
Rijek Muchim Wey ni Manangu Mey
Ezra, ntakel wa pasak wa antu a Nzamb, ‘warijeka muchim wend chakwel kwilej yijil ya Yehova.’ (Ezra 7:10) Ov, kudi mutapu tukutwisha kurijek michim yetu? Mwaning kudi mutapu wa kuyirijek. Tukutwish kusambish kurijek muchim wetu nich kwikal ni yitongijok yifanyidina mulong wa Bibil. Paul wayifundina ambay in Kristu anch: “Chawiy chinech chitukata kumujikitishil Nzamb wakad kunenet, chakwel piwatambulanya dizu dia Nzamb kudi etu, kiwaditambulanyap mudi dizu dia muntu, pakwez mudi dizu dia Nzamb, mudi mudidia chakin.” (1 Tesalonik 2:13) Ap anch Nzamb wasadila antu mulong wa kufund Bibil, yafundau yadiokal kud Yehova. Kwijik mulong winou wa usey kukez kutukwash nakash kwitiy yitutangina.—2 Timote 3:16.
Malembil udi mutapu ukwau wa kurijek michim yetu. Mulong Nzamb wasadila spiritu utumbila chakwel kuyikwash antu kufund Bibil, Nzamb ukutwish kand kusadil spiritu winou mulong wa kutukwash kutesh Bibil. Tufanyidin kumwit Nzamb ukwash wa spiritu utumbila. Tal yitongijok yadingay nich mwin kuseng wafunda anch: “Nginka ronganyin, chawiy nikulam yijil yey, ni kuyisadil ni muchim wam wawonsu.” (Kuseng 119:34) Tufanyidin kumwit Nzamb madiap kusu manangu ma kutesh yifundinau pakwez tufanyidin kumwit kand mulong wa kwikal nich mwikadil wa muchim ukutukwasha kwitiyij yilondinay Bibil. Chakwel kutesh Bibil, tufanyidin kwitiyij uyakin.
Piutongidina kwikal ni yitongijok yiwamp, shinshikin mutapu ukutwisha kukukwash kwilej kwey kwa Bibil. Tukwet mayingishin mavud mitufanyidina kutangin Dizu dia Nzamb, pakwez diyingishin dia usey nakash didi anch kutang Bibil kutukwashin kushej piswimp ni Nzamb. (Yakob 4:8) Pitutangina mutapu wasalay Yehova mu yisu kushalijan, usey uyimenay nich antu amukatina, ni mutapu ukatay kuyisal antu amulikina, tukat kujingunin mutapu udingay Nzamb. Pitutangina Bibil chitongijok chetu cha kusambish chifanyidin kwikal chisu chawonsu cha kumwijik nawamp Nzamb ni kukasikesh urund wetu ni ndiy.
Yikata Kukangesh Kwikal ni Yitongijok Yiwamp
Yom ik yikutwisha kutukangesh kutesh Dizu dia Nzamb? Chom cha kusambish chikutwisha kutukangesh kutesh Bibil kudi kuchingejin kuyimp mu yitiyij ya antu tutongidina anch ashinshamen. Chilakej, ukutwish kulondul yitiyij ni yitongijok ya antu amwing utekidina ruchingej nakash. Pakwez, mutapu ik ukusala anch antu inay kitiyijinap kwau uyakin udia mu Dizu dia Nzamb? Chikutwish kukasikan kutesh yifundishina chakin kamu Bibil, mu yisu ya mutapu winou. Chawiy lel, Bibil utukasikeshin kushinshik yom yawonsu yatufundishau.—1 Tesalonik 5:21.
Mariy, makwend a Yesu, wading ni mulong mud winou. Mariy amulidina mu chaku cha in Yuda. Wadinga ni kulimish nakash Chijil cha Moses ni wadinga ni kuya ku sinagog. Kupwa ndiy wajingunina anch Nzamb kadingap ni kwitiyij difukwil diamufundishau kud anvajend. Mariy witiyija mafundish ma Yesu ni wadinga pakach pa antu a kusambish a mu chikumangen cha Ukristu. (Midimu 1:13, 14) Kwinoku kwadingap kuburen kalimish kud anvajend ap ku yaku yau; pakwez, winou wadinga mutapu wa kumekesh anch ndiy umukatin Nzamb. Anch tusotin kuman ukwash wa Bibil, tufanyidin mud Mariy, kushinshaman kud Nzamb kupandakanamu kud muntu.
Cha ushon, antu avud kameningap kwau nich usey uyakin wa Bibil. Amwing akat kwitiyij kulondul yaku ya makasu ya relijon. Akwau ni yawiy mu mutapu wau wa kulond ni wa kushakam amekeshin anch uyakin wa Bibil ukwetap usey. Chawiy lel, kwitiyij Bibil kwitin kwikasikesh: kukutwish kwakushikij ku kuburen kwovijan nau arund, amutej ney, antu ukata kusal nau mudimu pamwing, ap ni dijuku dey. (Yohan 17:14) Pakwez, Salomon wafunda anch: “Land uyakin kangal waulandish.” (Jinswir 23:23) Anch uyakin ukwet usey nakash kud ey, Yehova ukez kukukwash kutesh Bibil.
Pakwez chom chikwau chikutwisha kutukangesh kutesh uruu udia mu Bibil, kudi kulik kusadil yilondilay. Yesu wayileja in kwilejend anch: “En akwinkishanya kal kudi Nzamb ronganyin ra ujindj wa yom ya Want wa mwiur, pakwez kudi awiy, bwat. Mulong michim ya antu inay yichinchikin, ni matu mau mibwikin [majikin].” (Mateu 13:11, 15) Antu avud ashimuninay Yesu rusangu ruwamp alika kwau kutesh, kasotap kukarumuk. Chishalijadin kamu nakash ni chasalay mwin kwisak wa mu chishimu chalonday Yesu! Chatanay diyal dimwing dia usey ukash, ndiy waya walandisha yom yend yawonsu yadingay nich mulong wa kudiland. Kutesh uyakin udia mu Bibil kufanyidin kwikal ni usey wa chilik chimwing kud etu. —Mateu 13:45, 46.
Mulong wak Chikasiken Kwitiyij Anch Atufundish
Chom chijim chikasikeshina kutesh Bibil udi mwikadil wa kwitiyij anch muntu atufundisha. Chikutwish chamukasiken muntu kwitiyij yitongijok yisu yilondilay muntu umekena kud ndiy mud muntu wa chamwamu. Atwimbuy a Yesu Kristu adinga “antu amwamu akad kwilej.” (Midimu 4:13) Paul warumburila mulong wak atwimbuy a Yesu Kristu adinga antu amwamu akad kwilej pafunday anch: “Anamakwam in Kristu, vurikany mutapu wakutazukanyau kud Nzamb. Avud pakach pen kadiap in manangu, avud kakwetap ukash, avud kadiap in majuku malimina. Nzamb watonda antu atongilau antu anch adi ayisup, mulong wa kuyikwatish in manangu usany.” (1 Korint 1:26, 27) Anch umen anch chikukasikedin kwikepish pakufundishinau kud muntu wa chawamu, vurik anch muntu winou udi kwend mutapu usadidilay Yehova mulong wa kukufundish. Twitapidil dilau dijim patufundishinau kud Yehova, ‘Mulej wetu Mujim.’—Isay 30:20; 54:13.
Chamukasikena Naman, mukurump wa amasalay a in Siri kwitiyij mafundish ma muntu wa chamwamu. Chadingay ni kusot anch amwoka mayej ma mak madingay nich, ndiy waya kwa muprofet wa Yehova, Elisha. Pakwez Nzamb wasadila kashalapol mulong wa kumulej Naman yifanyidinay kusal chakwel kuyerik. Yalonday Nzamb ni mutapu wamulejau Naman kusal, yamukasikena kuyitiy nich kwikepish. Chawiy ndiy walika bil kwitiyij dizu dia muprofet wa Nzamb. Kupwa, Naman waswimpa yitongijok yend ni amwoka. (2 Ant 5:9-14) Turishining nich mulong wa chilik chimwing pitukata kutang Bibil. Tukutwish kwilej anch chakwel kuyerik mu spiritu ni mu manangu, tufanyidin kuswimp mulad wetu wa kushakam. Ov, tukez kwikepish chakwel kwitiyij anch muntu atufundisha yitukweta nich kuswir? Ching kamu asotininga anch ayifundish awiy akutwish kutesh Bibil.
Ntung mwin Etiopi wadinga mukurump mwin kulam chipau cha Kandas mwant mband wa in Etiopi, wamekesha yitongijok yiwamp. Wading uchirikin kwol kwend mu Afrik, ushich mu ditemb diend payay Filip mau wamukundam. Filip wamwipula anch wadinga ni kwov yading yitanginay. Mukurump winou wadinga mwin kwikepish nakash, wamwakula anch: “Ov, nikutwish nchik kwov anch kwikil muntu mwin kwinrumburil?” Chateshay Dizu dia Nzamb, ikundj winou amubabatisha. Kupwa kwa yom yiney, ntung “wadandamena mu weny wend nich musangar nakash.”—Midimu 8:27-39.
Atuman a Yehova adi mud antu awonsu. Rubing ni rubing akat kufundishang Bibil ku yikumbu ya antu miliyon musamban ni kusut. Mulong Bibil ufundishin mutapu uwamp wa kushakam, urumburil ruchingej rimwing kusu rikwetau antu, ni kutukwash kumwijik Nzamb, tunan ni tunan twa antu amen anch kwilej Bibil ni kutesh yilondilay chidi cha musangar nakash. Kutesh Bibil kukukuletin musangar.
[Chipich chidia pa paj wa 7]
Chamukasikena Naman kwitiyij yamulejau kud kashalapol wa chamwamu
[Chipich chidia pa paj wa 7]
Kutesh Bibil kusangareshin muchim wetu