Ikasikeshany!

“Ikasikeshany! En uteshilany katat mazu ma mutapu umwing mudi malondau aruwam.”—ZAKARIY 8:9.

1, 2. Ov, mulong wak tuwapidila kushinshikin mukand wa Hagay ni wa Zakariy?

UPROFET wa Hagay ni wa Zakariy aufunda pasutil kal mivu 2500, pakwez uprofet winou ukwet usey nakash kud etu. Jinsangu ja Bibil jidia mu mikand yiney yaad jidiap kusu yishimu ya pasak. Jidi chikunku cha “yom yawonsu yafundau pakuru . . . mulong wa kutulej nich etu.” (Rom 15:4) Jinsangu jivud tutangina mu mikand yiney jitongishin piur pa mikadil ya kashinsh yadingaku kudiosh kwatekinau Want mwiur mu muvu wa 1914.

² Pisambinay milong ni mikadil yamanau antu a Nzamb pasak, kambuy Paul walonda anch: “Katat yom yiney yamekana kudi awiy mudi chijingidij; ayifundila mulong wa kutubabesh nich etu, katat kwinsudiel kwa yirungu yawonsu kwez kal.” (1 Korint 10:11) Chawiy lel ukutwish kwiyipul anch, ‘Ov, mukand wa Hagay ni wa Zakariy yikwet usey ik pa chirung chetu?’

3. Yom ik yisambidinau mu uprofet wa Hagay ni Zakariy?

³ Mud mwalejena dilejan diasambedila, uprofet wa Hagay ni Zakariy wisambidin chisu chachirikau in Yuda mwi ngand yayinkishau kud Nzamb kupwa kwa kukwolik kwau mu uswik mu Babilon. Aprofet aad inay isambina nakash mulong wa kutungiril kwa tempel. In Yuda ateka mufulandal wa tempel mu muvu wa 536 kurutu kwa chirung chetu. Ap anch in Yuda a pasak ateka yitongijok yau pa yom yikur, kwadinga chakin kamu “dipumb dia musangar ujim.” Chakin kudi chom chimwing cha usey nakash chamekena pa chirung chetu. Ov, mu mutapu ik?—Ezra 3:3-13.

4. Yom ik yashikena kupwa kwa Njit ja Mangand ja Kusambish?

⁴ Kupwa kwa Njit ja Mangand ja Kusambish, antu a Yehova azizidilau many akwolika mu uswik wa Babilon Mujim. Kukwolik kwinoku kwamekesha mu mutapu ujim anch Yehova wadinga ni kuyikwash. Pasak chamekana mud amakurump a relijon nau arund nau in kusal milong ya politik imika mudimu wa kulejan ni kufundish wa in Kwilej a Bibil. (Ezra 4:8, 13, 21-24) Pakwez, Yehova Nzamb wadiosha yom yadinga ni kukangesh mudimu wa kulejan ni kwikadish in kwilej. Mu makum ma mivu kudiosh mu muvu wa 1919, mudimu wa Want wayil kal kamu kurutu ni kwikil chom ap chimwing chatwishina kuwimik.

5, 6. Kuwanyin ik kujim kwisambinau ku Zakariy 4:7?

⁵ Tukutwish kuchingej anch mudimu wa kulejan ni wa kufundish usadilau atushalapol in kuziyil a Yehova pa chirung chetu ukez kudandamen nich ukwash wa Nzamb. Ku Zakariy 4:7, tutangin anch: “Yom ya kukukangesh yikalap nchik yijim mudi mikandu, yikez kudiokal kurutu kwey. Antu akez kabarok anch: ‘Wajikit! Wajikit!’” Ov, chinech chadinga ni kwisambin kuwanyin ik kujim kwa pa chirung chetu?

⁶ Zakariy 4:7 wisambidin chirung chikeza difukwil diakin dia Mwant kushiken ku kuwanyin mu dibur dia tempel wend wa muspiritu. Tempel winou udi ditenchik dia Yehova dia kushejin kud ndiy mulong wa kumwifukwil pa dishin dia yakupesh ya Kristu Yesu ya kulikishin yitil. Chidi chakin anch tempel mujim wa muspiritu udingaku kudiosh kamu mu mivu chitot ya kusambish pa chirung chetu. Pakwez, difukwil diakin panap pansh dikez kwikal diwanyidina kamu chikupu. Mamiliyon ma in kwifukwil katat asadidil mu dibur dia panap pansh dia tempel winou wa muspiritu. Antu inay pamwing ni tutikit twa antu akuvumbulau akez kuyishikij ku kuwanyin mu Winyikel wa Mivu Kanan wa Yesu Kristu. Kwinsudiel kwa mivu kanan, ching kusu in kwifukwil akin a Nzamb awiy akeza kushal pa divu ditokishinau.

7. Yesu ukwet mudimu ik mu kuchirish kwa difukwil diakin dikal diwanyidin pa chirung chetu, ni mulong wak tufanyidina kuman anch chikasikeshin?

⁷ Nyikel Zorobabel ni Mwin Kupesh Mujim Joshua adingaku mulong wa kupan uman wa kupwish kutung kwa tempel mu muvu wa 515 kurutu kwa chirung chetu. Zakariy 6:12, 13 watakela kwisambin mudimu ufanikena ni wa Yesu wa kushikij difukwil diakin ku kuwanyidin palonday anch: “Muleja anch: ‘Muntu upidilau anch, Musil, ndiy kamu Uzizidilau Many, ukez kakul pa ndond yishichay. Ndiy ukez katunguril chikumbu cha [Yehova]. Ndiy kamu ukeza kachitung, ukez kikal nich katumb ka mwant. Ndiy ukez kiman ku mutambu wa ditand diend.’” Mulong Yesu udi mwiur ni ukudishin musil wa dijuku dia ant dia David, ni ukwashin mudimu wa Want mu tempel wa muspiritu, ov, utongin anch kudi muntu ukutwisha kukangesh mudimu winou kuya kurutu? Kwikil ap umwing! Tudandamenany kuya kurutu mu mudimu wetu, kangal twikal ni kampuw mulong wa minan ya dichuku ni dichuku.

Yitekinau pa Ndond ya Kusambish

8. Mulong wak tufanyidina kutek pa ndond ya kusambish mu mwom wetu mudimu wa tempel wa muspiritu?

⁸ Chakwel kutambul ukwash ni chiyukish cha Yehova, tufanyidin kutek pa ndond ya kusambish mu mwom wetu mudimu wa tempel wa muspiritu. Chidiap mud in Yuda alonda anch: “Chisu kand kal chiwanyin,” pakwez tufanyidin kwijik anch tushich “mu machuku ma kwisudiel.” (Hagay 1:2; 2 Timote 3:1) Yesu wasambela kulond anch in kwilej end ashinshamena akez kulejan rusangu ruwamp ra Want ni kwikadish in kwilej. Tufanyidin kubabal chakwel kangal twadiwul chisend chetu cha usey cha kulejan rusangu ruwamp. Mudimu wa kulejan ni kufundish wimikau mu chisu chikemp kud mangand minam matakedilay Satan, wasambisha kand nich usu mu muvu wa 1919, pakwez kand kal upwa wawonsu. Ukutwish kwikal nich kashinsh anch mudimu wa kulejan ni kufundish ukez kusadik kamu wawonsu djat ni kwisudiel.

9, 10. Yom ik tufanyidina kusal chakwel kutambul chiyukish cha Yehova, chinech chirumburikin ik kud etu?

⁹ Mu chilik tudandamedina kusal mudimu nich mushiku, akez kutuyukish—mud chisak cha antu ni mud muntu ni muntu ipend kukwatijan ni mudimu tusadila. Tal kushilamu kwa Yehova kutukutwisha kutan ruchingej. In Yuda pipanau ni muchim wau wawonsu mu difukwil diakin ni kusambishiril kand nich mushiku mudimu wau wa kutek mufulandal wa tempel, Yehova walonda anch: “Kudiokal katat am nikukuyukishany.” (Hagay 2:19) Awiy ela kutambul yiyukish yidiokila ku kwitiyik kwa Nzamb. Katat shinshikin yiyukish yidia mu kushilamu kwa Nzamb: “Awiy akez kadim yir yau mu chisambu. Mitond yau ya nviny yikez kasong mabuj, ni divu dikez kasongish yakudia, chad kukez kanak ruvul uwanyidina. Nikez kapan yiyukish yiney yawonsu kudi antu a muchid wam ashalap aom.”—Zakariy 8:9-13.

¹⁰ Mud kamu mutapu wayiyukishau in Yuda muspiritu ni ku mujimbu kud Yehova, mwamu mukezay kutuyukish anch twadandamen kusal mudimu utwinkishinay nich mushiku ni musangar. Mu yiyukish yiney mudi chisambu pakach petu, diking, kuzangijal, ni kukul muspiritu. Chikwau kand, ukutwish kwikal nich kashinsh anch chakwel Nzamb adandamena kutuyukish, tufanyidin kusal mudimu wa tempel wa muspiritu mu mutapu usotilay Yehova.

11. Mutapu ik tukutwisha kushinshikin ayinetu yom ya usey?

¹¹ Katat chawiy chisu cha ‘kushinshikin jinjil jetu.’ (Hagay 1:5, 7) Tufanyidin kwitekinap chisu cha kushinshikin yom tutekina pa ndond ya kusambish mu mwom wetu. Chiyukish cha Yehova padi etu ilel chengamidin pa chilik tutumbishina dijin diend ni kuya kurutu mu mudimu wetu wa tempel wa muspiritu. Ukutwish wiyipul anch: “Ov, yinikata kutek pa ndond ya kusambish yaswimpin kal? Ov, mushiku wam mulong wa Yehova, mulong wa uyakin wend, ni mu mudimu wend, udi chilik chimwing ni unadinga nich pasak pinatambula dibabatish? Ov, musangar wa kwikal ni mwom uwamp wazuwodil kal kuta muchim nifanyidina kuta kud Yehova ni Want wend? Ov, wom wa muntu—kutongin yikutwishau kutong antu akwau—yinkangeshin kuya kurutu mu mulad kanang?”—Kujingunik 2:2-4.

12. Mwikadil ik wa in Yuda wisambidinau ku Hagay 1:6, 9?

¹² Tusotinap kuburen yiyukish ya Nzamb mulong wa kudiwul mudimu wa kutumbish dijin diend. Tuvurikany anch kupwa kwa kusal usu nakash kwisambishil, in Yuda achirika mwi ngand yau adinga “muntu ni muntu ukat kurijek chikumbu chend,” mud mulondilay Hagay 1:9. Akwatikana nakash mu kukimb maswir ma mwom wau ayinau. Chawiy lel, kwadinga ‘kwangul yom yikemp,’ kuburen kwa yakudia yiwamp, ya kuna, ni maswin ma kulet chirungul. (Hagay 1:6) Yehova kayiyukishap bwat. Yiney yitulejin yom ik?

13, 14. Mutapu ik tukutwisha kusadil dilejan didia ku Hagay 1:6, 9, ni mulong wak chidi cha usey?

¹³ Ov, witiyijin anch chakwel kudandamena kutambul yiyukish ya Nzamb, tufanyidin kulik kukimbijol mapit metu mu chilik cha kuvuramen difukwil dia Yehova? Tufanyidin kamu kulik anch mujikit ap chom kanang chizuwola manangu metu chakwel kuya mu kukimb mapit, kupit swa, yitongijok ya kudandamen kamu kwilej mashikol majim majim mulong wa kwikal ni mudimu umwing uwamp mu mangand minam, ap jinjil jitukwashina kushiken yitutongidina ayinetu.

¹⁴ Yom yiney yiyipinap kwau. Pakwez, ov, ujinguninap kwey anch mu kuyisikesh nich mwom wa chikupu, yom yiney yidi chakin “midimu yifila”? (Heb 9:14) Mu mutapu ik? Yidi yom yifila muspiritu, yom yamwamu ni yakad mabuj. Anch muntu wadandamen kuyilondul, midimu ya mutapu winou yikutwish kumushikij ku rufu ra muspiritu. Chinech chayishikena kal in Kristu amwing azizidilau many a pa chirung cha atwimbuy. (Filip 3:17-19) Chayishikena kal amwing pa chirung chetu. Pamwing wijaku amwing asambisha kwizuwol pakemp pakemp mu mujikit ya Ukristu ni mu chikumangen; katat kasotinap kand kuchirikin mudimu wa Yehova. Tuchingejin chakin anch antu inay akez kuchirik kud Yehova, pakwez mulong udi anch kulondul “midimu yifila” kukutwish kutushadishin kwitiyik ni chiyukish cha Yehova. Ukutwish kuman mutapu chikutwisha kwikal chiyimp nakash. Chikutwish kurumburik kushadish musangar ni chisambu chikata kudiokal ku spiritu wa Nzamb. Ni tong bil chikwikal kuburen mud ik urund uwamp nau akadivar in Kristu!—Galatia 1:6; 5:7, 13, 22-24.

15. Hagay 2:14 umekeshin nchik usey wa difukwil dietu?

¹⁵ Winou udi mulong ujim nakash. Tal mutapu wadingay Yehova ni kuyiman in Yuda adinga ni kudiwul chikumbu chend cha difukwil mulong wa kurijek yikumbu yau, ap yadingau yitonginau kusal, Hagay 2:14 ulondil anch: “Mwamu mudiau antu a muchid winou. Midimu yau yawonsu, ni yakupesh yau yikata kulambulau pa chintamb, yawonsu yijondila.” Yikalap nchik yakupesh yapanau ni michim yaad in Yuda pa chintamb mu Yerusalem kayitiyijap mulong awiy adiwula difukwil diakin.—Ezra 3:3.

Nzamb Washilamu Kuyikwash in Kumwifukwil Aziyidila

16. Kulondwish yishimushimu yamanay Zakariy, yom ik yafanyinau kwijik Ayuda?

¹⁶ In Yuda in kuziyil asala mudimu wa kutunguril tempel wa Nzamb ayileja anch Nzamb ukuyikwash, mud mwachilejanay Nzamb mu yishimushimu chinan yamanay Zakariy. Chishimushimu cha kusambish chalejana kupwish kutung kwa tempel ni kuzangijal kwa Yerusalem ni Yuda pamwing nau in Yuda aziyila mu kusal mudimu wafanyinau kusal. (Zakariy 1:8-17) Chishimushimu cha kaad chakana nsudiel ya mant mawonsu madinga ni kukangesh difukwil diakin. (Zakariy 1:18-21) Yishimushimu yikwau yalejana anch Nzamb ukudimukin ni kulam mudimu wa kutung, antu a michid yivud kwez ku chikumbu cha Yehova cha difukwil chikupwishau kutung, kukez kwikal chisambu chakin ni diking, akez kudiosh yom ya kukangesh yadinga yijim mud mikandu, yadinga ni kukangesh mudimu wapanay Nzamb, kudiosh kwa uyimp, kutakel ni diking dia angel. (Zakariy 2:5, 11; 3:10; 4:7; 5:6-11; 6:1-8) Ukutwish kutesh mulong wak nich kushilamu kwawonsu kwinoku kwa ukwash wa Nzamb, antu in kuziyil arijeka mutapu wau wa kushakam ni kutek yitongijok yau yawonsu pa mudimu wayikwodilau kud Nzamb.

17. Pa kuman yiyukish yitukaninau, yipul ik tufanyidina kwiyipul?

¹⁷ Chawiy chimwing, kushilamu tukweta kwa kupandakan kwa difukwil diakin kufanyidin kutubachik kutong nakash piur pa chikumbu cha Yehova cha difukwil, ni kusal kwambatan nich chikumbu cha Yehova cha difukwil. Iyipulap bil anch: ‘Anch nitiyijin anch katat chawiy chisu cha kusal mudimu wa kulejan rusangu ruwamp ra Want ni kwikadish in kwilej, ov, ntong jam ni mutapu wam wa kushakam yikwatijadin ni yitiyij yam? Ov, nikat kusadil chisu chifanyidina mulong wa kwilej Dizu dia uprofet dia Nzamb, ni kuman mutapu wa kudisadil, ni kuyishimuninamu akwetu in Kristu ni antu nikata kusankan?’

18. Yom ik yikushikena mu machuku ma kurutu, kulondwish ni Zakariy mwimbu wa 14?

¹⁸ Zakariy wisambina kusheshik kwa Babilon Mujim ni njit ja Armagedon jikulondulap. Tutangin anch: “Kukez kikal muten chisu chawonsu, kushik ni chisu cha uchuku. Ching kusu Nzamb ndiy wija chisu chikeza kashik yom yiney.” Chakin, dichuku dia Yehova dikez kwikal kamu dichuku dia mididim ni dia mashik kud akankuny nend pa divu! Pakwez dikez kurumburik muten chisu chawonsu ni dilau kud in kumwifukwil Yehova ashinshamena. Zakariy warumburila kand mutapu ukeza kulejan yom yawonsu mu mangand masu kutumb kwa Yehova. Difukwil diakin mu tempel mujim wa muspiritu wa Nzamb dikez kwikal kusu mulad umwing wa difukwil pa divu. (Zakariy 14:7, 16-19) Kudi kushilamu kuwamp mud ik! Tukez kuman kuwanyin kwa yom yatakelau kulond ni tukez kuman kuchidij kwa win mangand wa Yehova. Dichuku dined dikez kwikal dichuku dia pa kampwil!

Yiyukish ya Chikupu

19, 20. Mulong wak Zakariy 14:8, 9 ukasikeshin nakash?

¹⁹ Kupwa kwa kuchidij mu mutapu ushimokishina win mangand wa Yehova, Satan nau ayilembil end akez kuyidjibwil mu dibuku diakad musul ni kakwikalap nich usu wa kusal chom ap chimwing. (Kujingunik 20:1-3, 7) Chawiy lel, yiyukish yikez kwikal ndond yawonsu mu Want wa Mivu Kanan wa Kristu. Zakariy 14:8, 9 ulondil anch: “Pidikeza kashik dichuku dinidia, mem ma mwom makez kabudik mu Yerusalem, chikunku chimwing chikez kaya mu Karung wa Mediterane. Mem minam makez kasutang muvu wawonsu, mu ruvul ni mu chishipu. Chawiy [ Yehova] ukez kikal Mwant wa mangand mawonsu. Antu awonsu akez kamwifukwil mulong ndiy udi Nzamb wau, ukez kikal ni dijin ching kusu dimwing.”

²⁰ “Mem ma mwom,” ap “wit wa mem ma kupand,” mafanikeshina yitenchik yisadilay Yehova mulong wa kupan mwom, makez kudandamen kubudik ku ditand dia Want wa Mesia. (Kujingunik 22:1, 2) Chisak chipandakena kujimb cha in kumwifukwil Yehova, chikupanda ku Armagedon, chikez kukwolik ku difish nich dia rufu ra Adam. Ap antu afila kal akez kutaninamu ku divumbuk. Chawiy kukez kusambish chirung chisu cha winyikel wa Yehova pa divu. Pa divu pawonsu antu akez kumwijik Yehova mud Mwant Mwin Mangand, ndiy kusu ufanyidina kwifukwil.

21. Ov, mupak ik tufanyidina kukwat?

²¹ Pa kuman yom yawonsu yalonday Hagay ni Zakariy ni yawonsu yawanyina kal, tukwet diyingish dijim dia kuya kurutu mu mudimu utwinkishinay Nzamb kusal mu dibur dia panap pansh dia tempel wend wa muspiritu. Kushik ni pakeza kushiken difukwil diakin ku mwikadil wa kuwanyin, twikasikeshany kutek yisakin ya Want pa ndond ya kusambish. Zakariy 8:9 utukasikeshin anch: “Ikasikeshany! En uteshilany katat mazu ma mutapu umwing mudi malondau aruwam.”

Ov, Uvurikin?

• Kufanakan ik kwa pasak kwasadila mukand wa Hagay ni wa Zakariy yikala ya usey ilel unou?

• Hagay ni Zakariy atufundishin yom ik piur pa yom ya kutek pa ndond ya kusambish?

• Mulong wak kushinshikin uprofet wa Hagay ni wa Zakariy kutwinkishin diyingish dia kuchingej machuku ma kurutu?

[Chipich chidia pa paj wa 15]

Hagay ni Zakariy ayikasikesha in Yuda kusal mudimu nich mupim wau wawonsu ni kutambul chiyukish

[Chipich chidia pa paj wa 16]

Ov, ‘ukat kurijek chikumbu chey’?

[Chipich chidia pa paj wa 17]

Yehova wakana chiyukish ni wachileta chiyukish