Tumusadilany Mwant Kristu Nich Kushinshaman

“Amwinkisha usu wa kuyikel ni uyaj, ni want, chakwel antu a michid yawosu, ni a mitapu yawonsu, ni a jindim jawonsu amusadil ndiy.”—DANIEL 7:14.

1, 2. Mutapu ik twija anch Kristu katambulap dikand diawonsu dia Want mu muvu wa 33?

OV, NYIKEL ik ukutwisha kuyifil antwend ni kupwa ikala kand mwom chakwel ayikela mud mwant? Mwant ik ukutwisha kushakam pansh, ayinkisha antwend ruchingej ni kushishaman, ni kupwa aya akayikela mwiur? Muntu umwing ukutwisha kusal mwamu—ni kusal yom yikwau yivud—udi ching kusu Yesu Kristu. (Luka 1:32, 33) Pa Pentekot wa mu muvu wa 33 pa chirung chetu, kwinyim kwa Yesu kufa, kuvumbuk, ni kukandam mwiur, Nzamb “wamuteka kand piur pa yom yawonsu, ni kwikal mwin kutakel wa Chikumbu cha Nzamb.” (Efes 1:20-22; Midimu 2:32-36) Chawiy Kristu wasambisha kuyikel mu chilik chikemp. Ndiy wasambisha kuyikel padi in Kristu azizidilau many, Isarel wa muspiritu, “Isarel wa Nzamb.”—Galatia 6:16; Kolosay 1:13.

² Pasuta piswimp mivu 30 kwinyim kwa Pentekot winou wa mu muvu wa 33, kambuy Paul wafunda anch Kristu wadinga kand kal atambula dikand diawonsu dia Want, pakwez ndiy wadinga “ku chikas cha katatuku cha Nzamb; kwawiy kukat kuchingilay ni pakuyitekau akankuny nend kwikal chipwan cha kwanzuk mend yend.” (Hebereu 10:12, 13) Kupwa, piswimp ni nsudiel ya mivu chitot ya kusambish, kambuy Yohan mu upal wend wamumana mu chishimushimu Mukaleng mwin Mangand, Yehova, umutekin Kristu Yesu mud Mwant wa Want usu wa mwiur. (Kujingunik 11:15; 12:1-5) Kulondulijan nich ruchingej retu pa chisu chinech, tukutwish kuman uman ujim ulejena anch Kristu wasambisha kuyikel mud Mwant Mesia mwiur mu muvu wa 1914.a

3. (a) Uruu ik usu wiwejina ku rusangu ruwamp ra Want mu muvu wa 1914? (b) Yipul ik yitufanyidina kwiyipul?

³ Chakin kamu, kudiosh mu muvu wa 1914, ku rusangu ruwamp ra Want kwiwejina chom chisu chisangareshina. Kristu uyikedil katat mud Mwant wa Want wa mwiur wa Nzamb, ap anch uyikedil “mukach mwa akankuny [nend].” (Kuseng 110:1, 2; Mateu 24:14; Kujingunik 12:7-12) Chikwau, mu mangand mawonsu, antwend ashishamena aziyidil kamu ku winyikel wend kusutil ku kusal mudimu wa kulejan Bibil mu mangand mawonsu kupandakanamu pa yirung yawonsu mu rusangu ra muntu. (Daniel 7:13, 14; Mateu 28:18) In Kristu azizidilau many, “an a mu want,” adi mud “aruu a Kristu.” Ayikwashin nich kushishaman kud chisak chipandikena kujimb cha “amikoku akwau” a Kristu, adia mud antimesh a Want wa Nzamb. (Mateu 13:38; 2 Korint 5:20; Yohan 10:16) Chikalap nchik mwamu, tufanyidin kushinshikin anch twitiyijin chakin kamu winyikel wa Kristu. Ov, tudi in kujijaman mu kushishaman kwetu kud ndiy? Mutapu ik tukutwisha kushishaman kud Mwant uyikedila mwiur? El twisambinany bil mayingish matusadila anch tushishaman kud Kristu.

Mwant Ukweta Ngikadil Yiyibachikina Antwend ku Kushishaman

4. Chom ik chasalay Yesu mud Mwant Watondau kal mu mujikit wend padingay pansh?

⁴ Kushishaman kwetu kudiay Kristu kwimedin pa kujikitish mulong wa yom yasalay ni pa ngikadil yend yijim. (1 Pita 1:8) Padingay pansh, Yesu mud Mwant Watondau kal wamekesha mu chilik chikemp yikezay kusal pakezay kwikal Mwant uyikedila mangand mawonsu anch muten wa Nzamb wawanyin. Wayidisha antu afa nzal. Wayoka ayej, amputames, ayibid, atujikamatu, ni atumam. Wamekesha kand usu wend wa kuyichirish afu ku mwom. (Mateu 15:30, 31; Luka 7:11-16; Yohan 6:5-13) Chikwau kand, kwijik mutapu wadinga mwom wa Yesu padingay pansh kututwishishin kwijik ngikadil yend mud Nyikel wa kurutu wa divu—pakampwil rukat rend ra kwipan. (Marko 1:40-45; Yohan 2:11) Pa chinech, Napoléon Bonaparte walonda anch: “Alekizandre, Kaisar, Charlemagne, ni amwinam twasala mant, pakwez, pisu padinga pimedina yisal yetu yijim? Yading yimedin pa usu. Ching kusu Yesu Kristu, ndiy wengamishina want wend pa rukat, djat ni ilel unou mamiliyon ma antu adi tayad kufa mulong wendendiy.”

5. Ov, mulong wak untu wa Yesu wayipwita antu akwau?

⁵ Yesu wadinga mwin kwitudish ni kwikepish mu muchim, chawiy awonsu adinga nich yisend yilimina iswedisha kusutil ku malejan mend ni untu wend wa rukat. (Mateu 11:28-30) Anikanch asangaranga nakash kwikal nend. Amakundj itudishina ni akweta impu ya kwijik ikala in kwilejend. (Mateu 4:18-22; Marko 10:13-16) Kalimish kend kamukwasha kuyambat amband in kumwov Nzamb wom, amwing au asadila chisu chau, usu wau, ni mapit mau mulong wa kumusadil padingay ni kusal mujikit wend.—Luka 8:1-3.

6. Yovil ik ya riy yamekeshay Yesu pafay Lazar?

⁶ Kristu wamekesha yovil yend ya riy pafay murund nend Lazar. Runeng ra Mariy ni Mart ramukwata nakash mu chilik chakwel anch Yesu wova ushon, wanenganana nakash, ni “wadila.” Yesu “wanenganan nakash”—wiyakamisha nich kuswan ni ushon ku muchim, ap anch wadinga wij anch mu kachisu kakemp kamu ukumuchirish kand Lazar ku mwom. Chad lel, rukat ni riy yamubachika Yesu, asadila usu wamwinkishau kud Nzamb mulong wa kumuvumbul Lazar.—Yohan 11:11-15, 33-35, 38-44.

7. Ov, mulong wak tufanyidin kushishaman kudiay Yesu? (Tal kand mushet udia pa paj wa 31.)

⁷ Tukwet wom pamwing ni kalimish mulong wa rukat rikash ra Yesu piur pa yom yitentamina ni mulong wa kukis kwend rubabek ni uyimp. Wasala tupamp twaad chisal chimwing cha kuhamuk (kutakaman) cha kushitwish tempel nich kuyidioshamu in kwisak akweta ris. (Mateu 21:12, 13; Yohan 2:14-17) Chikwau kand, chadingay muntu pa divu, Yesu warisha nich milad yawonsu ya rupompat, yawiy yamwinkisha cha kusambish ronganyin ra maku mayimp ni yikokujol yitukata kurish nich. (Hebereu 5:7-9) Yesu wijika kand chidinga yovil ya muntu ukisinau ni ya kuburen kutentam. (Yohan 5:15-18; 11:53, 54; 18:38–19:16) Chakin kamu, waziyila nich kuhamuk (kutakaman) djat ni ku rufu ra chisum mulong wa kuwanyish rusot ra tatukwend ni mulong wa kuyinkish antwend mwom wa chikupu. (Yohan 3:16) Ov, ngikadil yiney ya Kristu yikubachikinap kudandamen kumusadil nich kushishaman? (Hebereu 13:8; Kujingunik 5:6-10) Ov, chom ik lel chifanyidina kusal chakwel kwikal umwing wa pakach pa antu a Want wa Kristu?

Kuwanyish Yitinau Chakwel Kwikal Muntu wa Want wa Kristu

8. Yom ik yiyitinau antu a Kristu?

⁸ Tongin bil pa chilakej chinech: Chakwel anch wikal mwan a ngand wa ngand yikwau chitining kuwanyish yom kanang ya kusambish yitinau. Pamwing ap akutwish kuyit antu asotila kwikal an a ngand kwikal ni yaku yiwamp ni awanyisha yijil kanang ya ukash wa mujimbu. Chawiy chimwing, antu a Kristu aswiridin kwikal nich yijil ya piur nakash ya ngikadil ni ukash uwamp wa muspiritu.—1 Korint 6:9-11; Galatia 5:19-23.

9. Mutapu ik tukumekesha anch tushishamen kud Kristu?

⁹ Chakin, Yesu Kristu usotil anch antwend ikal ashishamena kud ndiy ni ku Want wend. Awiy akat kumekesh kushishaman kwinoku kusutil ku kushakam kwambatan nich yom yalejanay Yesu padingay pansh mud Mwant Watondau kal. Chilakej, pa ndond pa kusot mapit awiy atekin pa ndond ya kusambish yisakin ni rusot ra Nzamb. (Mateu 6:31-34) Asadil kand usu wau wawonsu wa kumekesh untu wa Kristu, ap mu mikadil yimwing yikash. (1 Pita 2:21-23) Antu a Kristu alondwil chilakej chend mu kwikal a kusambish kuyisadil antu akwau yom yiwamp.—Mateu 7:12; Yohan 13:3-17.

10. Mutapu ik ukutwisha kumekesh kushishaman kud Kristu mu (a) dijuku ni (b) mu chikumangen?

¹⁰ In Kwilej a Yesu amekeshin kand kushishaman kwau kud Yesu kusutil ku kumekesh ngikadil yend mu dijuku. Chilakej, angatan amekeshin kushishaman kud Mwant wau wa mwiur kusutil ku kwilakej ngikadil ya Kristu mu mutapu wa kuyisadil akajau ni anau. (Efes 5:25, 28-30; 6:4; 1 Pita 3:7) Angachik amekeshin kushishaman kud Kristu kusutil ku yaku yidia ya zwang ni ku kumekesh “muchim udimukina wa kwitudish.” (1 Pita 3:1-4; Efes 5:22-24) An adi ashishamena kud Kristu anch alondul chilakej chend cha kuziyil. Padingay nsand, Yesu wayiziyila anvajend, ap anch awiy adinga antu akad kuwanyin. (Luka 2:51, 52; Efes 6:1) Antu a Kristu ikasikeshining nich kushishaman kumwilakej ndiy kusutil ku ‘kwongojijan, kukatijan mud akadivar’ ni ku kwikal nich “michim ya riy ni yitudila.” Akat kwikasikesh kwikal mud Kristu, kakatap ‘kufundikesh kuyip ni kuyip, ap kuchirilan.’—1 Pita 3:8, 9; 1 Korint 11:1.

Antu a Kristu Aziyidil ku Chijil Chend

11. Yijil ik yikatau kuziyil antu a Kristu?

¹¹ Mud mukatau kuziyil an a ngand ku chijil cha ngand yau yisu, antu a Kristu aziyidil ku “chijil cha Kristu” kusutil ku kushakam kwambatan nich yawonsu yalejanay Yesu ni mbil yend. (Galatia 6:2, MM) Chakin, muntu ushishamena ushiching kwambatan nich “chijil cha mu Want wa Nzamb” cha rukat. (Yakob 2:8) Yom ik yidia mu yijil yiney?

12, 13. Mutapu ik tukata kuziyil nich kushishaman ku “chijil cha Kristu”?

¹² Antu a Kristu adi antu akad kuwanyin ni akat kurumbukang. (Rom 3:23) Chawiy chiswiridinau kudandamen ‘kuyikat anamakwau in Kristu nich rukat rakin nich michim yau yawonsu.’ (1 Pita 1:22) “Anch muntu ukwet mulong ni mukwau,” in Kristu akat kusadil chijil cha Kristu nich kushishaman cha “kulikishijadin umwing ni mukwau.” Kuziyil ku chijil chinech kukat kuyikwash kulikishin kurumbuk ni kusot mayingish ma kukatijan umwing ni mukwau. Ov, kiukatap kusanger kushakam pamwing ni antu akata kumuziyil Mwant wetu mwin rukat mu kushishaman ni akweta rukat, “mwoj wa kukukasany mu umwing uwanyidina”?—Kolosay 3:13, 14, MM.

¹³ Yesu warumburila anch chilakej cha rukat chaletay chadinga chipandikena kujimb kusutamu rukat rikatau kwimekeshin muntu ni mukwau. (Yohan 13:34, 35) Anch twayikat ching kusu antu atukatilinga, tusadilap “chom chijim” ap chimwing. Anch mwamu chidia, rukat retu rikwikal rakad kuwanyin. Yesu watukasikesha kwilakej rukat ra Tatukwend kusutil ku kuyikat ap akankuny atukisina ni kutuzengol. (Mateu 5:46-48) Rukat riner ni rawiy riyibachikin antu a Want kudandamen kushishaman mu mudimu wau wa kusambish. Mudimu winou wa kusambish, udi mudimu ik?

Kushinshaman Akutekin mu Choziu

14. Ov, mulong wak mudimu wa kulejan udi wa usey ujim?

¹⁴ Antu a Want wa Nzamb akwet katat mudimu ujim wa ‘kurumburil rusangu ra want wa Nzamb.’ (Midimu 28:23) Chidi cha usey kusal mwamu mulong Want wa Mesia ukez kuchidij ukaleng wa mangand mawonsu wa Yehova. (1 Korint 15:24-28) Pitukata kulejan rusangu ruwamp, in kutesh akwet mutapu wa kwikal antu a Want wa Nzamb. Chikwau kand, mutapu ukatau kwitiyij antu ku uruu winou udi uman, wawiy ukezay kusadil Mwant Kristu mulong wa kuyirumburish antu. (Mateu 24:14; 2 Tesalanik 1:6-10) Chawiy lel, njil ya kusambish mutukata kumekeshin kushishaman kwetu kudiay Kristu yidi kusutil ku kuziyil kwi mbil yend ya kuyilej antu piur pa Want.—Mateu 28:18-20.

15. Ov, mulong wak kushishaman kwa in Kristu kudi mu chizou?

¹⁵ Mwawiy, Satan ukat kurirish mudimu wa kulejan mu mutapu win wawonsu ukutwishay, ni anyikel a antu kitiyijinap winyikel wa Kristu wamwinkishau kud Nzamb. (Kuseng 2:1-3, 6-8) Chawiy, Yesu wayibabesha in kwilejend anch: “Kashalapol kamupandakenip nsalajend kujimb. Anch anzengol am akez kakuzengolany kand ni yen.” (Yohan 15:20) Chawiy, in kwilej a Kristu, adi mwi njit ja muspiritu jitekina kushishaman kwau mu choziu.—2 Korint 10:3-5; Efes 6:10-12.

16. Ov, mulong wak antu a Want apanining “kudi Nzamb yom yidia ya Nzamb”?

¹⁶ Chikalap nchik mwamu, antu a Want wa Nzamb ashishamen kud Mwant wau wakad kumekan pakad kuyipipesh anyikel a chiuntu. (Titus 3:1, 2) Yesu walonda anch: “Panany kudi Kaisar yom ya Kaisar, ni kudi Nzamb yom yidia ya Nzamb.” (Marko 12:13-17) Chawiy, antu a Kristu, aziyidil yijil ya guvernema yakad kupwitijan nich yijil ya Nzamb. Pakwez, dirumburish dijim dia in Yuda pidiamatika yijil ya Nzamb ni kuyilikish in kwilej a Yesu mudimu wa kulejan, in kwilej ayakula nich kuhamuk ni kalimish anch chiyifanyidin “kumuziyil Nzamb chipandakena antu.”—Midimu 1:8; 5:27-32; Rom 13:1-7.

17. Ov, mulong wak tufanyidina kujijaman ku yoziu ya kushishaman nich kuhamuk?

¹⁷ Chakin, chiyitin antu a Kristu kuhamuk kukash chakwel kushishaman kud Mwant wau chikalap nchik kuzengol. Ap mwamu, Yesu walonda anch: “Wayukany kwen pakunisalau kudi antu, ni pakunizengolau, ni pakunitwambilanyau kuyip kwawonsu mulong wa kwingambat am. Zangamany kwen ni musangar ujim, mulong difut dien didi mwiur.” (Mateu 5:11, 12) In Kwilej a kusambish a Kristu imena kapu uyakin wa mazu minam. Ap anch ayibula misel mulong wa kudandamen kwau kulejan piur pa Want, awiy asangara ni kulond anch: “Atulimish kamu, ni kutukwatish usany mulong wa dijin dia Yesu. Machuku mawonsu mu tempel ni pol awiy kalikap kulej ni kulejan rusangu ra Yesu mudi Kristu.” (Midimu 5:41, 42) Chifanyidin kukujikitishany, chiumekeshinany spiritu wa kushishaman wa chilik chimwing piukata kujijamenany yisu ya mar makash, mayej, chidil, ap rupompat.—Rom 5:3-5; Hebereu 13:6.

18. Mazu mamwakulau Pons Pilat kudiay Yesu malejen yom ik?

¹⁸ Padingay uchidi Mwant Watondau, Yesu wamurumburila Nyikel mwin Rom Pons Pilat anch: “Want wamam kiudiap wa mangand minam. Anch Want wam wading wa mangand minam, ing, in kwilejam elang kurish chakwel kangal ampana mu makas mau amakurump a in Yuda. Bwat, Want wam kiudiap wa mangand minam!” (Yohan 18:36) Chawiy, antu a Want wa mwiur, kakatap kukwat ku mat kumwas muntu ap wisu ap kwikal ku mutambu kanang wa matend ma antu. Nich kushishaman kud ‘Mwanat wa Chisambu,’ adi kamu pol pa milong yaurila mangand.—Isay 2:2-4; 9:6, 7.

Difut dia Chikupu dia Antu Ashishamena

19. Ov, mulong wak antu a Kristu achingejin machuku ma musangar nich ruchingej rikash?

¹⁹ Antu ashishamena a Kristu, “Mwant wa ant,” amen machuku ma kurutu nich ruchingej ruwamp. Nich kuhamuk amen usu wa Want wa mwiur pa divu. (Kujingunik 19:11–20:3; Mateu 24:30) Kashal ushishamena, “an a mu want” azizidilau many atadil kurutu kudia uswan wau wa usey ujim mud ant pamwing ni Kristu mwiur. (Mateu 13:38; Luka 12:32) “Amikoku akwau” ashishamena a Kristu, achingejin nich impu kwitiyik kwau kud Mwant pakezay kuyel anch: “Ezany, en kakuyukishanyau kudi Tatukwam, uswanany want wakurijekilanyau kal kudiok kwisambishil kwa mangand.” (Yohan 10:16; Mateu 25:34) Pa chinech, en antu awonsu a Want kwatany mupak wa kudandamen kwikal ashishamena mu kumusadil Mwant Kristu.

[Mazu madia kwishin kwa paj]

Ov, Ukutwish Kurumburil?

• Ov, mulong wak tufanyidina kushinshaman kud Kristu?

• Mutapu ik umekeshinau antu a Kristu anch ashinshamen kud ndiy?

• Ov, mulong wak tuswiridina kushinshaman kudiay Mwant Kristu?

[Kamushet kadia pa paj wa 31]

NGIKADIL YIKWAU YIJIM YA KRISTU

Kakwetap kasolikany—Yohan 4:7-30.

Riy—Mateu 9:35-38; 12:18-21; Marko 6:30-34.

Rukat ra kwipan—Yohan 13:1; 15:12-15.

Kushinshaman—Mateu 4:1-11; 28:20; Marko 11:15-18.

Ranaken—Marko 7:32-35; Luka 7:11-15; Hebereu 4:15, 16.

Wisikena—Mateu 15:21-28.

[Chipich chidia pa paj wa 29]

Anch twakatijan muntu ni mukwau, tusadidil “chijil cha Kristu”

[Chipich chidia pa paj wa 31]

Ov, ngikadil ya Kristu yikubachikin kumusadil nich kushinshaman?