Kalimish ka Muntu Mbil Yikatau Kujiril Chisu ni Chisu

“Kachom ni kachom ka mwom wa mu chibeng kadinga rizau rikwau riyila ku kukwatish usany ni kupwish kalimish.”—MAGDALENA KUSSEROW REUTER, MWIN KUPAND MU CHIBENG CHA KUMESHAN MAR CHA IN NAZI.

MADINGA mayimp nakash, mar ma mu yibeng ya in Nazi pa chirung cha Njit ja Mangand ja Kaad pakwez kimadingap ma kusambish ap ma nsudiel ma kushesh kalimish ka muntu. Tushinshikinap nchik yom ya pakur ap ya katat, dirumburish dioviken patok anch: pasutil kal mivu “antu achikat ni katat kuyovish usany ni kulik kuyilimish.”

Pakwez, kujiril kwa kalimish ka muntu, kudingap ching kwa yisal ya wibwambol usheshina rusangu ra muntu. Akat kujiril chisu ni chisu kalimish ka muntu mu jinjil jivud jijingamina. Tongin bil piur pa mwan ukatau kusaal mulong wa ngikadil kanang ya mujimbu wend. Ap ngez umwing uswingishiningau mulong wa yaku yimwing ya “kwolikwau.” Ap antu amena mar ma kasolikany mulong wa ulombu wau ap mulong wa muchid wau. In kusal mwamu akutwish kuman mulong winou mud wa maswimbu kwau, pakwez kusansan ni usany yovilau antu inay apipeshinau kudingap kuswimbul.—Jinswir 26:18, 19.

Kalimish ka Muntu Chom Ik?

Ndinguril umwing urumburil kalimish mud ‘ngikadil ap mwikadil wa kufanyin, ulimishinau ap ukwatinau nich usey.’ Chawiy lel, kalimish ka muntu, mudi milad yaad ya yom, mutapu twimena ayinetu ni mutapu utumenau akwetu. Ap anch kudi yom yivud kushalijan yikutwisha kukwat yovil yetu piur petu ayinetu, mutapu utumenau kud antu akwau ap mutapu utusadidilau ukwet usey ujim nakash piur petu ni piur pa kalimish ketu mu mwom wa pichuku-pichuku.

Chisak ni chisak cha antu chikwet atuzwendj au, antu akad diking, ni akad usu. Pakwez, kwikal mu mikadil yiney kupwishinap kalimish ka muntu. Udi mwikadil ni yisal ya antu akwau yikutwisha kwikal musul wa kuburen kumulimish muntu. Mwikadil wa ushon udi anch, chisu chawonsu akat kujiril ap kuman mbil ja atuzwendj mud jidi jakad usey. Tupamp twinch tukata kutesh mazu mud “wa chamwamu,” “wakad kufanyin,” ni “wakad usey” pakampwil mu kuyisadil nayimp amapal, atuzwendj, ap ayibid mu manangu ap ku mujimbu!

Ov, mulong wak ukatau antu kwipipesh umwing ni mukwau? Ov, antu akez kushiken ku kusadil mbil ya pa dishin ya kalimish ka muntu? Mutu wa mulong ulondwila ou ukutwinkish chakul chiwamp chidiokila mu Bibil, Dizu dia Nzamb.