Yob—Muntu Ujijamena ni Uyingila
‘Ov, wamushinshikinaku kashalapol wam Yob? Mulong kwikil muntu udia mudi ndiy pa mangand. Udi muntu uyingila, chad kand utentamina, udi kand mwin kumwov Nzamb wom, ni kwiyep ku kuyip!’—YOB 1:8.
1, 2. (a) Mar ik makad kuchingejin mamanay Yob? (b) Rumburil mwom wa Yob kurutu mar mamushikena.
KWADING muntu wadinga ni yom yivud—mapit, katumb, ukash uwamp wa mujimbu ni mwom uwamp wa dijuku. Kupwa mar makash mamushikena swa tupamp tusatu twa kulondulijan. Ndiy washadisha mapit mend kapamp kamwing. Kupwa chinzwizu chikash nakash chamujipina anend awonsu. Kupwa amwinend wayela mayej mamwing maziyishina nakash mamuletina makwalong ma yitat yiyimp ya tushiny mujimbu wawonsu. Muntu winou wadinga Yob, muntu wisambidinau mu mukand wa Bibil ukweta dijin diend.—Yob, mwimbu wa 1 ni wa 2.
2 Yob winana anch: “Ang nidi mudi munading mu chirung cha kwinyim.” (Yob 3:3; 29:2) Pakata kushiken mar, ov, nany ulikininga kuvurik machuku ma kwinyim? Yob wadinga ni mwom umwing uwamp, chimeken mud wadinga wikingin ku mar. Antu a katumb ading ni kumulimish ni adinga ni kumwit yiyul. (Yob 29:5-11) Wadinga mpich, pakwez wadinga ni yitongijok yisikena piur pa nfalang. (Yob 31:24, 25, 28) Chisu chatanangay adia-afu ap an a nshon adia mu maswir, ndiy wadinga ni kuyikwash. (Yob 29:12-16) Ndiy washala ushinshamena ku uruw wend ni mukajend.—Yob 31:1, 9, 11.
3. Mutapu ik wamumanau Yob kud Yehova?
3 Yob wadinga ni mwom ushinshamena mulong ndiy wading ni kumwifukwil Nzamb. Chawiy lel, Yehova walonda anch: “Kwikil muntu udia mudi ndiy pa mangand. Udi muntu uyingila, chad kand utentamina, udi kand mwin kumwov Nzamb wom, ni kwiyep ku kuyip!” (Yob 1:1, 8) Ap anch Yob wading ni mwikadil uyingila, mar minam mayipisha mwom wend uwamp. Mapit mend mawonsu mapitay mashadika, ni kujikish kwend kwakin akupaka nich mar ni minan.
4. Mulong wak kushinshikin kupakiu kwa Yob kukez kutukwash?
4 Mwawiy, Yob kadiap kusu amwinend wamana mar ma muntu ipend pakach pa atushalapol a Nzamb. In Kristu avud nlel, akutwish ni yawiy kuman mar mud mamanay Yob. Chawiy lel, tufanyidin kushinshikin nawamp yipul yaad: Kushinshikin kupakiu kwa Yob kukez kutukwash nchik chisu tumena mar? Ni kupakiu kwinoku kwa Yob kukutwish nchik kutufundish mutapu wa kuyovil antu amena mar riy?
Kushinshaman ni Kupakiu kwa Kuying
5. Kulondwish yitongijok ya Satan, mulong wak Yob wadinga ni kumusadin Nzamb?
5 Mwikadil wa Yob wadingap mudi wa antu akwau. Yob kijikap yadinga ni kusut, Djabul watadika diyingish diakin diamubachika Yob kumusadin Nzamb. Pakumanganau angel mwiur, Yehova washinshikina ngikadil yiwamp ya Yob, chawiy lel, Satan wamwakula anch: “Ey umuchidijin, ni dijuku diend, ni yom yend yawonsu.” Chawiy lel Satan walonda anch choy chawiy chamubachika Yob kumusadin Nzamb—ni atushalapol a Nzamb awonsu amusadidin mulong wa choy. Satan wamuleja kand Yehova anch: “Tandjek bil chikas chey, umusheshil mapit mend, chakin kamu, ching wez wakushing patok!”—Yob 1:8-11.
6. Mulong ik wa usey wasarumunay Satan?
6 Mulong winou wading wa usey nakash. Satan watadika mutapu uyikedinay Yehova mangand mawonsu. Ov, Nzamb ukutwish chakin kamu kuyikel mangand mawonsu nich rukat? Ap mudi mwatongay Satan, ov, choy chawiy chela kupandakan mu milong yawonsu? Yehova wamwinkisha Djabul chisu cha kumupak Yob chakwel kutal mutapu ukwikala milong, pakwez Nzamb wading ni ruchingej anch atushalapol end akez kushal ayingila ni ashinshamena. Chawiy lel, Satan ndiy wamuletina Yob mar malondulijadina swa mu chisu chikemp. Chakanganyay mu choziu chend cha kusambish, Satan wamudjibwila Yob mayej mamwing masansena kamu nakash. Djabul walonda anch: “Yom yawonsu yikwetay muntu ukuyipan mulong wa kuchidij mwom wend!”—Yob 2:4.
7. Nlel unou, mutapu ik umeningau atushalapol a Nzamb mar mud mamanay Yob?
7 Ap anch nlel unou in Kristu avud kamenap mar mud mamanay Yob, pakwez akat kuman ni yawiy mar ma mitapu ni mitapu. Amwing afa mulong wa ritiy rau. Avud arishin nich rupompat ap milong ya dijuku. Uzwendj ap mayej yikutwish kushesh mwom wa muntu. Chakin kamu, tufanyidinap kutong anch Satan ndiy uletining mar mawonsu tukata kuman. Pakwez, tukutwish kuman mar mulong wa kurumbuk kwetu ayinetu ap mulong wa mwikadil wa mujimbu twaswana. (Galatia 6:7) Etu awonsu tukutwish kuman mar ma upal ni ma chak chijim. Bibil urumburil patok anch mu chisu chinech, Yehova kakatap kusal yilay mulong wa kuyichidij atushalapol end ku mar minam.—Mulej 9:11.
8. Mutapu ik ukutwishay Satan kwandamin mu mar metu?
8 Pakwez, Satan ukutwish kusadil mar tumena mulong wa kuziyish ritiy retu. Kambuy Paul wisambina mar madingay ni kuman mud “muy mu mujimbu wa mbij, muruu wa Satan,” wadandamena ‘kumwakamish’. (2 Korint 12:7) Ap anch mar minam madinga ma ku mujimbu, mudi mayej ma mes, ap yom yikwau, Paul wading wij anch Satan ukutwish kumuletin milong ni yakamish chakwel ashadisha musangar ni kuying kwend. (Jinswir 24:10) Nlel unou, Satan ukutwish kuyibachik yid ya dijuku, ambay a ku shikol, ap winyikel wa kushindil mulong wa kuyizengol atushalapol a Nzamb mwi njil kanang.
9. Mulong wak mar ap kuzengol kufanyidinap kutushimokish nakash?
9 Mutapu ik tukutwisha kurish nich milong yiney? Tukutwish kuman mar minam mud mutapu wa kumekesh rukat retu kud Yehova ni kumekesh kand anch kuziyil kwetu ku winyikel wend kudi kwakin. (Yakob 1:2-4) Yikalap nchik yom yituletidina mar, kwijik usey wa kushinshaman kwetu kud Nzamb kukutukwash kulam mwikadil wetu uwamp wa muspiritu. Kambuy Pita wafunda anch: “Akadivar, kangal wachitongany ni kukwamuk mulong wa mar makash madia mukach mwen, makat kwez ni kunipak mudi chom chisu chamekana kudi en.” (1 Pita 4:12) Paul ni ndiy warumburila anch: ‘Chakin, awonsu asotila kwikal antu a Nzamb mu Kristu Yesu akez kuyizengol.’ (2 Timoteu 3:12) Satan uchitadikin ni katat kuying kwa Atuman a Yehova, mud mwasalay kud Yob. Chawiy lel, Bibil ulejen anch Satan wapandikeshin kal kuyirishish antu a Nzamb mu machuku minam ma nsudiel.—Kuburik 12:9, 17.
Kwov Kuyimp ni Yiyul Yimwing Yiyimp
10. Ov, mar ik makash mamanay Yob?
10 Yob wamana mar nakash, tuswiridinap kuman mar ma mutapu winiwa. Ndiy kijikap mulong wak mar minam mamushikena. Yob widimba mu kulond mwi njil yimwing anch ‘Yehova ndiy mwin kupan, Yehova ndiy kand watambula.’ (Yob 1:21) Pamwing ap Satan wapakisha kumekesh kud Yob anch Nzamb ndiy wading umumeshina mar.
11. Rumburil chasalay Yob pamanay mar.
11 Yob wova ushon nakash, ap anch ndiy walika kumushing Nzamb mud mwamulejau kusal kud mukajend. (Yob 2:9, 10) Ndiy watonga anch: ‘Antu ayimp akwet mwom, ni kukasikan.’ (Yob 21:7-9) Ndiy wiyipula anch: ‘Ov, mulong wak mukombu wa Nzamb wimbudin am?’ Yisu yikwau Yob wadinga kwend ni kusot kufa. Ndiy wadila anch: “A! Ing njindjika kwam mwi ndond ya afu. Njindjika kwam ching anch ujim wey wasut.”—Yob 14:13.
12, 13. Yob wayimana arund nend asatu mutapu ik, ni yiyul ik yamwinkishau?
12 Yob wadinga nau arund asatu eza ni kumutal mulong wa “kumudidishaku Yob ni kumwongoj kand.” (Yob 2:11) Pakwez, arund inay adinga “in kwongoj a kwakamishan!” (Yob 16:2) Yob wela kutan ukwash kud arund nend, awiy ela kumukwash kusend chisend chend ap milong yamushikena, pakwez arund nend inay asatu amuwejinaku kand kanvundangesh ni runeng.—Yob 19:2; 26:2.
13 Komb choviken anch Yob wiyipula anch: ‘Mulong wak ching am? Ov, uyimp ik nasadila chakwel nimana mar minam mawonsu?’ Arund nend amurumburila yom ya makasu. Awiy atonga anch Yob wisarumwina amwinend mar kusutil ku kusal yitil yijim. Elifaz wipula anch: ‘Ov, kudi muntu wakad kurumbuk washeshikap kal? Ey wamanap kal atentamina ayijip? Am namen kal akata kusal kuyip ni kumeshan mar, akat kwangul yisalijok yau.’—Yob 4:7, 8.
14. Mulong wak tufanyidinap kulond mau-mau anch, muntu anch umen mar chidi mulong wasadil chitil?
14 Chakin kamu, milong yikutwish kutushiken anch twakun ku mujimbu pa ndond pa kukun ku spiritu. (Galatia 6:7, 8) Pakwez, mu mangand minam ma katat, milong yikutwish kutushiken yikalap nchik ngikadil yetu. Chikwau kand, tukutwishap kulond anch antu akad chitil kakutwishap kuman mar min mawonsu. Yesu Kristu, muntu wading “utumbila, mwi ndiy mwadingap kuyip ap chitil, amwaurila kumudiosh kudi akayitil,” wafa rufu rimwing risansena pa mutond wa mar, ni kambuy Yakobu amujipa kwi mpak ya musamun. (Hebreu 7:26, MM; Midimu 12:1, 2) Yitongijok ya makasu ya Elifaz ni ya arund nend aad, yamushikija Yob ku kusambish kuchidij katumb kend ni kwisambin nakash kuburen kwend kwa mulong. Chikwau kand, chimeken anch mazu ma chibud ma arund a Yob, mamwelau anch ndiy wafanyina kamu kuman mar mikala ni usu pa mutapu wend wa kuman kutentam kwa Nzamb.—Yob 34:5; 35:2.
Mutapu wa Kutan Ukwash Pitumena Mar
15. Ov, yitongijok ya mutapu ik yikutwisha kutukwash pitumena mar?
15 Ov, yom ik tukutwisha kwilejin kudiay Yob? Mar, mayej, ap kuzengol yikutwish kumekan mud kuburen kutentam. Antu akwau akutwish kumekan mud kakwetap milong yiney yivud. (Kuseng 73:3-12) Chisu chikwau, tukutwish kwiyipul yipul yiney ya usey anch: ‘Ov, rukat ram kud Nzamb rinbachikin kumusadin yikalap nchik yikutwisha kushiken? Ov, nisotin kumwinkish Yehova chisu cha “kutwish kumwakul muntu ukumusala masal?” ’ (Jinswir 27:11; Mateu 22:37) Tufanyidinap kushil yitongijok yakad usey ya antu akwau chakwel yitwinkisha chinshilend ku muchim cha kutong anch Tatukwetu wa mwiur kakutwishap kutukwash. Mwin Kristu umwing ushinshamena wayela mu mivu yivud walonda dichuku dimwing anch: “Nij anch chom chawonsu chilikidinay Yehova, nikutwish kuchitiy. Am nij anch ndiy ukez kankasikesh nich usu niswiridina. Mulong ndiy ukat kwinkasikeshang nich usu niswiridina.”
16. Dizu dia Nzamb diyikwashin nchik antu amena mar makash?
16 Etu twij nawamp kubabal kwa Satan kupandakanamu chadingay Yob. “Kitukangenyip kwijik kubabal kwend,” ap kutenchik kwend kuyimp. (2 Korint 2:11) Chikwau kand, tukwet manangu nakash mafanyidina kutukwash. Mu Bibil, tutanin jinsangu ja amakundj ni amband ashinshamena ajijamana mu mar ma mitapu ni mitapu. Kambuy Paul, wamana mar nakash kupandakanamu in Kristu avud, wafunda anch: “Yom yawonsu yafundau pakuru ayifundila mulong wa kutulej etu, chakwel tukutambul ruchingej mu kudandamen ni mu kwongoj kwa mukand wa Nzamb.” (Rome 15:4) Kaman umwing wa mwi ngand ya Hongrie wakasau mulong wa ritiy rend chisu cha njit ja kaad ja mangand mawonsu wapana yakudia yend ya machuku masatu mulong wa kutambul Bibil. Ndiy walonda anch: “Kuswimp kwinoku kwading kwa usey nakash ap anch nova nzal, pakwez, natambula yakudia ya muspiritu yankwasha am ni antu akwau mu kupakiu kwetu chisu cha mar minima. Nalama Bibil winiwa djat ni nlel muten.”
17. Ov, Nzamb utwinkishin yom ik chakwel yitukwasha kujijaman?
17 Kuwejin ku rongoj ridiokila mu Bibil, tukwet mikand yitukwashina kwilej Bibil ni kututakel chakwel turisha nich milong yivud. Anch watang mu Index des publications Watch Tower, ukutanamu jinsangu ja mbay mwin Kristu warisha nich yoziu mud yiurishina nich. (1 Pita 5:9) Chikutwish kwikal kand cha ukwash kwisambin milong yey nau amakurump itekina pa ndond yey ap in Kristu akwau akudila muspiritu. Cha usey nakash, kusutil mu malembil ukutwish kuchingejin ukwash wa Yehova ni wa spiritu wend utumbila. Mutapu ik warishay Paul nich ‘kupak’ kwa Satan? Ndiy wileja kuchingejin usu wa Nzamb. (2 Korint 12:9, 10) Ndiy wafunda anch: “Nikutwish kusal yom yawonsu mwi ndiy ukata kwinkasikesh am.”—Filipoi 4:13.
18. Ambay in Kristu akutwish nchik kuyikasikesh antu akwau?
18 Komb ukwash udi kwaku, chawiy lel tufanyidinap kwidjidjek ap pakemp mulong wa kuukimb. Mukand wa Jinswir ulondil anch: “Anch walengumwok pa dichuku dia yakamish, usu wey ukepil.” (Jinswir 24:10) Mud kamu amakej chikutwishau kudia manguj ma chikumbu ni kumawish, kuziy kukutwish kushesh kushinshaman kwa mwin Kristu. Chakwel kwipuk ubaj winou, Yehova utukwashin kusutil kudiau ambay netu atushalapol a Nzamb. Mwangel umwing wamekana kud Yesu ni wamukasikesha uchuku wamukwatau. (Luka 22:43) Padingay mu weny wa kuya ku Rome mudi muntu wa rukan, Paul “wamujikitisha Nzamb, chad wikasikesh” payisankanay akadivar ku Chiku cha Apius ni pa Yikumbu Yisatu ya kulal aeny. (Midimu 28:15) Mband umwing Kaman wa mu Allemange uchivurikin mutapu wamukwashau pashikay uchidi changadim nich wom mu chibeng cha mar cha Ravensbruck. Uvurikin anch: “Mband umwing mbay mwin Kristu wankwata ku chikas ni kwingak nich musangar, nambaz mukwau ushinshamena wankwasha nakash, ni wikala mud makwam mu urund wam ni Yehova.”
“Ikal ni Kujijaman”
19. Ov, yom ik yamukwasha Yob kurish nich rupompat ra Satan?
19 Yehova walonda anch Yob wadinga muntu “uyingila, chad kand utentamina.” (Yob 2:3) Ap anch ndiy waziya ni kijikap mulong wamenay mar, Yob kashadishap usey wa kushinshaman. Yob kalikap yom yawonsu yadingay ni kusal mu mwom wend. Ndiy wadandamena kulond anch: “Djat ni ku rufu ram nikudandamen kamu kulond anch, kinifilap nich.”—Yob 27:5.
20. Mulong wak kujijaman kudi kwa usey?
20 Anch twajijaman mud Yob tukutwish kulam kuying kwetu mu mikadil ya mitapu yawonsu—mu yoziu, mu rupompat, ni mu mar makash. Ku chikumangen cha Simirin Yesu walonda anch: “Kangal wov kwey wom wa yom yiukata kwikonkil. Tal, Satan usotil kuyitek akwen a pakach pen mu rukan chakwel akutentany, ukwakamany machuku dikum. Ikal ni kujijaman ni kushik ku rufu, ni yam nikez kukwink chibangul cha kupand.”—Kuburik 2:10.
21, 22. Ov, malejan ik makutukasikesha, pitujijamena mu mar makash?
21 Mu mangand minam mayikedinay Satan, kujijaman ni kuying kwetu kukez kupakiu. Pakwez, Yesu utukasikeshin anch, pituchingejina yom yikushikena mu machuku ma kurutu, tufanyidinap kwov wom. Kujijaman chawiy chom cha usey. Paul walonda anch: “Mar metu madi ma kachisu kakemp kusu,” chad masamun matukaninay Yehova, ap kulond anch ‘uyaj udi wakad kwilikan nich yom yikwau, ushich chikupu.’ (2 Korint 4:17, 18) Mar ma Yob madinga ma chisu chikemp anch twachind mivu yivud yasangaray pa kupwa kwa kupakiu kwend.—Yob 42:16.
22 Pakwez, mu mwom wetu kupakiu kukutwish kumekan mudi kwakad kupwang ni mar metu makutwish kukasikan kurish nich. Mu mutu wa mulong ukulondulap ou, tukushinshikin malejan makwau ma kujijaman tukutwisha kwilejin ku mar mamanay Yob. Tukez kukimb kand mutapu tukutwisha kusal chakwel kuyikasikesh antu akwau payipompatinau.
Ov, Mutapu ik Ukwakula?
• Mulong ik ujim wasarumunay Satan piur pa kuying kwa Yob?
• Mulong wak tufanyidinap kushimok rupompat?
• Mutapu ik utukwashinay Yehova kujijaman?
[Chipich pa paj wa 15]
Kukimbijol, kwambamb ni in Kristu akudila kal mu ritiy, ni kwipan mu malembil kukutwish kutukwash kujijaman